Nkyɛʼə 21 - Mɨkan wu Fi

Fɔməbvurə wu Fi wa abɔʼnɨ Atuəshe zə Fi za

¹ Ma tíʼ ndzɛ́n fɔməbvurə wu fi abɔʼnɨ atuəshe zə fi ə. Ntsambyi fɔməbvurə wa abɔʼnɨ ntsambyi atuəshe za byékɨ́, sagɨrə wu ngwi a kɨ mbyekə.

² Ma kwíʼ ndzɛ́n Ntáʼmbagə wu Wi wu Fɛmnɨ wa, Yerosalɛm wu fi wa, ɨ lo a mbó Ŋwi a fɔməbvurə ɨ shiʼə ngyiŋə ghe. Ŋwi a kyáŋtɨ́ ayi tso mɨngən wa a wəgɨnɨ ɨtsɛʼ ɨchi a nkwátɨ́ ndóm ɨyi ɛ.

³ Ma zúʼ nji zɨ ntən ɨ ghamnə ndo atú abərɨ za ɨ sóŋə́ ngə́: “Tɨtsɔŋnɨ njwuʼ Ŋwi tsi a tɨtərɨ ŋwɔn mɨsɔŋ a ntsu ə! Wɛrə a mɨ tsi bo bo, á bo tiʼ nkɨ mbe ɨbɛn ɨbyi ɛ. Ŋwi zɨmboŋ a mɨ tsi bo bo, ɨ kɨ be Ŋwi ɨwa ghe.

⁴ Wɛrə a mɨ chiʼ nkyi nɨzɛʼ ɨtsum wa ɨ tsinɨ a ɨmɨgɨ bo ghe. Nɨvwo mɨ keʼ bə mbe, kə asɔbɨnɨ kə nɨzɛʼ kə ndzaŋə, mbɨ́ʼ ngə́ ɨnu tsen tsa tsɨ tsínɨ́ a mbyi lá tsɨ byekɨnə ghe”

⁵ Zɨ wa a shíʼtɨ́nə́ nchyɛ̌ atú abərɨ za a tíʼ sóŋ ngə́, “Tɨtsɔŋnɨ, ma mɨ ghɨ ɨdzúm ɨtsum tiʼ tsə fi ə!” Wɛrə a kɨ́ sóŋ a mbó me ngə́, “Ŋwaʼnɨ a zen, mbɨ́ʼ ngə́ mɨgham miŋ nɨ nkənu, bɨ chi kɨ nɨŋ ntəm a nye mɛrə ghe.”

⁶ Wɛrə a kwíʼ sóŋ ngə́, “Ma ghɨnə ɨnu tsiŋ ɨtsum ə! Ma nɨ ntsambyi nkɨ mbe ntsɨrɨndzum, mbiʼnə nkɨ mbe ndwitə ghe. Ma mɨ gha a mbó ŋwɔn tsum wa nji nkyi záŋnə́ ayi mɨtən ngə́ á no nkyi wa ɨ lonɨ a mu náŋə́bə́rə wa nkyi ɨyi ghánɨ́ ntsi ntən tɨgha a tfu a wɛrə ghe.

⁷ Ɨbɛn ba bɨ tsinɨ nɨ ayanguʼ məziŋ mɨ kwarɨ a məzen a mbó me: ma mɨ be Ŋwi ɨwa, á bo tiʼ kɨ mbe ɨbɔ ɨbə.

⁸ Lá bə kɨəngvwurɨ, bɨ tɨ tsi nɨ abeməntəm a nye Yeso, ɨbɛn ba bɨ ghɨnɨ ɨtumbəm tsa tsɨ nyaʼnɨ, ngaŋ njwítɨ́ ɨbɛn, ngaŋ ngɨ ɨnu ntɔrɨ ɨlɛbɨ, ngaŋ fu abú, ngaŋ nguʼsɨ ɨbɔ bɨ abe abɔʼnɨ ngaŋ ɨchwenu ɨtsum — adiʼ aza a nɨ sagɨrə ɨmugɨ wa ɨ tənɨ be tɨ́sə́n, mbáʼ lá nɨvwo na nɨ zɔŋtɨnɨ a nye ɨdiʼ tsi bá lá.”

Yerosalɛm wu Fi wa

⁹ Táʼ ntsendá Ŋwi a tɨtərɨ ɨtsendá Ŋwi tsa tsi samba tsa tsɨ tsínɨ́ nɨ ɨkəbɨ tsa tsi samba tsa tsɨ lónɨ́ nɨ ngɨ́ʼ ntsɨrɨndzum tsa tsi samba, yén a mbó me ɨ soŋ ngə́, “Yiŋə, ma mɨ diʼ a mɨngən wa, ngwe Mɔn Mbyindzɨ wa a mbó gho ghe.”

¹⁰ Azhwi a Ŋwi a tíʼə ntsɨŋnə aghan, ntsendá Ŋwi za lɔgɨ aghan nkɔʼ ngɛn nɨ me atú mbám za ɨ ságɨ́nɨ́ tsɛʼ nkə. Wɛrə a díʼ a Yerosalɛm a mbó me, Ntáʼmbagə wu Wi wu Fɛmnɨ wa, ɨ lo a mbó Ŋwi a fɔməbvurə ɨ shiʼə ngyiŋə ghe.

¹¹ Ntáʼmbagə wu Wi wu Fɛmnɨ wa kə́ ntǎ nɨ nɨfáŋ nɨ Ŋwi ə. Ɨ kə́ ntǎ tso ngɔʼ zɨ ŋwenɨnɨ, tso jasɨba, ɨ ŋwenə tso ntsəŋ ɨləŋ za o lenə ndzě ndzum zɨ mɔʼɔ ghe.

¹² Ɨ kɨ́ ntsí nɨ nká wu tən wu tse wa ɨfə́ŋ ɨchi ságɨ́nɨ́ atɨ́ tsɛʼ nkə. Mɨntsu mɨ abuʼ tsi ɨwu nɨghúm ntsɔb bá, ɨtsendá Ŋwi nɨghúm ntsɔb bá tsiŋənə a mɛrə, táʼ ntsendá Ŋwi a nye táʼ ntsu ə. Bɨ ŋwáʼnɨ́ mɨkum mɨ ɨtsé tsə wi tsə bə Izrai tsa nɨghúm ntsɔb bá a nye mɨntsu mɨ abuʼ ma mɨtsum, táʼ ɨkum a nye táʼ ntsu ə.

¹³ Mɨntsu mɨ abuʼ mi mɨntárə́ tsí a nye táʼ ndam nká wa: mi mɨntárə́ a bagɨ sáʼnyom, mi mɨntárə́ a bagɨ ntɨ́ŋ, mi mɨntárə́ a bagɨ atú, nɨ mi mɨntárə́ a bagɨ ntsonyom ə.

¹⁴ Bɨ vwú atsé nká ntáʼmbagə wu wi wa lá atú ngɔʼ tsɨ wiəwi nɨghúm ntsɔb bá ghe. Bɨ ŋwáʼnɨ́ mɨkum mɨ ntóm Yeso tsə Mɔn Mbyindzɨ wa a nye ngɔʼ tsa nɨghúm ntsɔb bá, táʼ ɨkum atú táʼ ngɔʼ ə.

¹⁵ Ntsendá Ŋwi za ɨ ghámnɨ́ a mbó me lá, ɨ tsí nɨ atɨ a ɨfɨʼ zə ŋwaʼŋwaʼ, a fɨʼ ntáʼmbagə wu wi wa, mɨntsu mɨ abuʼ ɨmyi abɔʼnɨ ndam ɨchi ɛ.

¹⁶ Ntáʼmbagə wu wi wa bé ndəŋndəŋ bɨbagɨ bɨtsum ə, ɨsagɨ ɨzhi abɔʼnɨ nghaʼtɨ ɨzhi kuʼnə. Ntsendá Ŋwi za fɨ́ʼ ntáʼmbagə wu wi wa nɨ atɨ a ɨfɨʼ azhi ɛ: ɨ bé bɨkilomita nchwuʼ tsi bá nɨ nkɨ tsi nɨkwa (2,400) a sagə ghe. Nghaʼ ɨzhi nɨ ɨŋaŋtə atɨ ɨzhi abɔʼnɨ ɨsagɨ ɨzhi bé ndəŋndəŋ ə.

¹⁷ Ntsendá Ŋwi za kɨ́ fɨʼ nká wa. Ɨ bé bɨmita mɨghúm mi ntugə a ŋaŋtə atɨ́ ndzɔŋə adzaŋ za ŋwɔn mɨsɔŋ a ntsu a kɨ́nə́ fɨʼ ɨdzum ə.

¹⁸ Bɨ bɔ́m nká wa nɨ ngɔʼ tsa bɨ tɔ́ŋnə́ ngə́ jasɨba, nkɨ mbɔm ntáʼmbagə wu wi wa wɛrə mboŋ nɨ ŋwaʼŋwaʼ tɨ nyam, a ŋwenɨnə tso ntsəŋ ɨləŋ ə.

¹⁹ Bɨ ŋwáʼsɨ́ ngɔʼ atsé a nká ntáʼmbagə wu wi wa nɨ ɨbə́ŋ ngɔʼ tsɨ ŋwenɨnɨ ɨtsum ə. Ntsambyi ngɔʼ atsé a nká za bɨ ŋwáʼsɨ́ nɨ jasɨba, za ɨ zɔ́ŋtɨ́nɨ́ a nye ɨdiʼ tsi bá bɨ ŋwáʼsɨ́ nɨ safaya, zɨ ɨdiʼ tsi tárə́ nɨ agetɨ, zɨ ɨdiʼ tsi nɨkwa nɨ ɛmɛradɨ,

²⁰ zɨ ɨdiʼ tsi tə̧̂ nɨ onigɨsɨ, zɨ ɨdiʼ tsi ntugə nɨ kanɛlyan, zɨ ɨdiʼ tsi samba nɨ krisolaitɨ, zɨ ɨdiʼ tsi nɨfə̧ nɨ bɛrilɨ, zɨ ɨdiʼ tsi nɨbvuʼə nɨ tobasɨ, zɨ ɨdiʼ tsi nɨghúm nɨ krisobrasɨ, zɨ ɨdiʼ tsi nɨghúm ntsɔb mɔ́ʼɔ́ nɨ jasintɨ, zɨ ɨdiʼ tsi nɨghúm ntsɔb bá nɨ amɛtistɨ ə.

²¹ Mɨntsu mɨ abuʼ ma nɨghúm ntsɔb bá bé lá tso mbaŋətuʼ tsɨ wiəwi nɨghúm ntsɔb bá, táʼ ntsuəbuʼ bɨ nyɛtɨ nɨ táʼ mbaŋətuʼ ə. Kɔŋ ndóm ntáʼmbagə wu wi wa a bé ŋwaʼŋwaʼ tɨ nyam, ɨ ŋwenə bɨ chi ze ndzum zɨ mɔʼɔ tso ntsəŋ ɨləŋ ə.

²² Ma sá zɛ́n nɨshwim a mu ntáʼmbagə wu wi wa, mbɨ́ʼ ngə́ nɨshwim ɨni nɨ Maʼmbyí Ŋwi Tamɨtən Mɨtsum bo Mɔn Mbyindzɨ wa.

²³ Ka ntáʼmbagə wu wi wa ndǒ ayi a nɨnyom kə a saŋ a ntá ɨwu ə, mbɨ́ʼ ngə́ nɨfáŋ nɨ Ŋwi tǎ ɨwu, Mɔn Mbyindzɨ wa be nkaʼ ɨyi ɛ.

²⁴ Nkaʼ ntáʼmbagə wu wi mɨ kyɛʼtɨnɨ ɨlaʼ ɨtsum atuəshe á bo númə́ ngɨ̌ mɨnu ɨma ghe. Bɨfɔ bɨ atuəshe mɨ tiʼ kɨ yen nɨ afuʼ aza ɨwu ə.

²⁵ Mɨntsu mɨ abuʼ mɨ ntáʼmbagə wu wi wa mɨ tɛmnə ɨ dzɨ́gɨ́ atú njwi tsum; bɨ láʼ keʼ a mɛrə vwuʼnɨ, mbɨ́ʼ ngə́ ɨtfúʼ láʼ keʼ ɨwu be.

²⁶ Ɨbɛn mɨ yen nɨ ɨdzúm ɨtɨŋndvuŋ tsɨ ŋwenɨnɨ abɔʼnɨ afuʼ ɨlaʼ ɨtsum a mu ntáʼmbagə wu wi wa.

²⁷ Lá ka azúm zə tse za a se fɛm a ghɨ kón a mu ntáʼmbagə wu wi wa, kə ŋwɔn tse wa a ghɨnɨ ɨnu adɨrətú, kə ŋwɔn tse wa a chwɛ́nɨ́ ɨnu ə. Ɨbɛn ba bɨ ghɨnɨ kón a mu ntáʼmbagə wu wi wa nɨ tsɛʼ ba bɨ ŋwaʼnɨnɨ mɨkum ɨma a mu aŋwaʼnɨ a Mɔn Mbyindzɨ za a tsinɨ nɨ mɨkum mɨ ɨbɛn ba bɨ ghɨnɨ tsí nɨnkoŋ lá.