Nkyɛʼə 2 - Mɨkan wu Fi

Nkən wa Yoane a Tságɨ́nɨ́ a Ɛfɛso ghe

¹ “Ŋwaʼnɨ a mbó ntsendá Ŋwi zɨ ndáŋwi za ɨ tsinɨ a Ɛfɛso ngə́: Nə nɨ nkən wa ɨ lonɨ a mbó zɨ wa a tiʼtɨnɨ mɨndzɔŋ ma mi samba a mu abó azhi zə maʼə, zɨ wa a númnə́ ngyíŋə́ a tɨtərɨ ɨtɛkɨ nkaʼ ŋwaʼŋwaʼ tsa tsi samba lá.

² Ma zhi anu za nɨ ghɨnə ghe; ma zhi adzaŋ za nɨ faʼnə nɨ adaʼ azən atsum abɔʼnɨ nchigə za nɨ tsinə nɨ zɛrə ghe. Ma zhi ngə́ nɨ chi keʼ bemtɨ bɨntɔmnɨnɨ ə. Ma kɨ nji ngə́ nɨ zhwəŋtɨnə ɨbɛn ba bɨ soŋnɨ ngə́ bo nɨ ntóm Yeso tɨ be tsɛrə lá, ntiʼ nji ngə́ bo nɨ ngaŋ ɨchwenu ə.

³ Nɨ tsi nɨ nchigə, nɨ kɨnə nkɨ ndze ngɨ́ʼ mbɨ́ʼ atú azan, nkeʼ kɨ ntsɔʼ mbó ɨmən ɨwu ə.

⁴ Lá anu za nɨ ghɨnɨ a nye me a keʼ bɔŋ a zɛnə ghe: ka nɨ bvurɨ nkɔŋ awən aghan adzaŋ za nɨ fómnɨ́ nkɔŋə.

⁵ A nɨ waʼtɨ adiʼ za nɨ tɛ́mnɨ́ ɨwu bɔŋ ɨ tiʼ bə bəntə! A nɨ bəŋ mɨntəm ɨmən a nye mɨbvu ɨmən mbɨŋə ngɨ̌ mɨnu ma nɨ kɨ́nə́ ngɨə a ntsambyi ɛ. Be nɨ tú bəŋ mɨntəm ɨmən a nye mɨbvu ɨmən muŋ ma mɨ yen a mbó bən ɨ tsɔʼ atɛkɨ a nkaʼ azən adiʼ wa a tɛmnɨ ɨwu ə.

⁶ Lá za nɨ ghɨnə za a bɔŋnɨ a zɛnə: nɨ bə̌ ɨnu tsa bə Naikolaitan ghɨnə tsɛʼ adzaŋ za ma kɨnɨ nkɨ mban lá.

⁷ Zɨ wa a tsinɨ nɨ ɨtoŋnɨ á zhwiʼtɨ anu za Azhwi a sóŋnə́ a mbó ndáŋwi ə! A mbó ba bɨ tsinɨ nɨ ayanguʼ məzen, ma mɨ ghɨ á be adiʼ aza a ndzɨ́ fɨtam fɨ atɨ za a ghánɨ́ ntsi ntən za a kwínə́ a mu Baradiso Ŋwi lá.”

Nkən wa Yoane a Tságɨ́nɨ́ a Smaina ghe

⁸ “Ŋwaʼnɨ a mbó ntsendá Ŋwi zɨ ndáŋwi za ɨ tsinɨ a Smaina ngə́: Nə nɨ nkən wa ɨ lonɨ a mbó zɨ wa a nɨ ntsambyi ŋwɔn nkɨ mbe ntsɨrɨndzum ŋwɔn, zɨ wa a kfónɨ́ mbə́ mbən ntsi ntən wədiʼ lá.

⁹ Ma zhi ngɨ́ʼ ɨzɨŋ ə; ma zhi ngə́ nɨ nɨ ɨfúm ə — lá nɨ lanɨ mbe lá ngaŋ nkáb ə! Ma zhi ɨnu tsɨ tɔmnɨnɨ tsa ba bɨ soŋnɨ ngə́ bo nɨ bə Yuda tɨ be bə Yuda, a bɨ sóŋnə́ mbɨ́ʼ awɨŋ ə; bo nɨ ngǒtə Satan ə!

¹⁰ A nɨ keʼ mbɔ́gɨ́ ngɨ́ʼ tse za nɨ mɨ ze. Zhwiʼtɨnə! Dəbɨrɨ a mɨ zhwəŋtɨ abeməntəm azən a ntsǎ ndzum ntsagɨ bən bə tse atsáŋ, ngɨ́ʼ ɨzɨŋ mɨ tiʼ tsi atú njwi tsi nɨghúm ə. A nkə faʼə tsɛʼ faʼnɨ a mbó me nɨ táʼ ntəm mbáʼ be a kwɛ ndiʼ be nɨvwo, ma mɨ gha ntsi ntən nɨnkoŋ a mbó bən tso ɨsáʼfɔ ayanguʼ azɨŋ ə.

¹¹ Zɨ wa a tsinɨ nɨ ɨtoŋnɨ á zhwiʼtɨ anu za Azhwi a sóŋnə́ a mbó ndáŋwi ə! Ŋwɔn tsum wa a tokɨnɨ ntsi nɨ ayanguʼ məzen, nɨvwo na nɨ zɔŋtɨnɨ a nye ɨdiʼ tsi bá mɨ keʼ ghɨ á ze ngɨ́ʼ ə.”

Nkən wa Yoane a Tságɨ́nɨ́ a Bɛgamum ə

¹² “Ŋwaʼnɨ a mbó ntsendá Ŋwi zɨ ndáŋwi za ɨ tsinɨ a Bɛgamum ngə́: Nə nɨ nkən wa ɨ lonɨ a mbó zɨ wa a tsinɨ nɨ lumban ndzum ɨtsum wu ntsɛgɨnɨ ə.

¹³ Ma zhi adiʼ za nɨ tsínə́ ɨwu ə, ɨwu, mbáʼ Satan a tsinɨ nɨ abərɨ azhi lá. O sǒŋ nkənu a mbó me, o sé kɨ nyɛʼ abeməntəm azo a nye me a nkfu za tsɛʼ atɛmə-ndzě ɨghan Antibasɨ wa a faʼnə a mbó me nɨ táʼ ntəm, a bɨ zhwítɨ́nɨ́ ayi ɨwu, adiʼ wa Satan a tsínə́ lá.

¹⁴ Lá ɨnu tsə tse tsi ɨwu tsa nɨ ghɨnə tsa ka ɨnye ɨzə mbɔŋə ayi mbɨ́ʼ a tsɛrə a nye bɨŋ ə: ɨbɛn bə tse tsi ɨwu a tɨtərɨ bən ba bɨ zɔŋnɨ ɨnu tsa Balam a diʼnə ghe. Balam wa a díʼnɨ́ a Balakɨ nɨ adzaŋ za wɛrə a mɨ tsagɨnɨnɨ ɨbɛn bə Izrai a mu ɨbvu a ntsǎ a ndzum ndɛtɨ bo a ndzɨ́ mɨdzɨ ma bɨ ghánɨ́ a mbó ɨbɔ bɨ abe, ɨ kɨ ghɨ mɨnu mɨ ntɔrɨ ɨlɛbɨ lá.

¹⁵ Ndəŋndəŋ ɨbɛn tsi ɨwu a tɨtərɨ bən ba bɨ zɔŋnɨ ɨnu tsa bə Naikolaitan diʼnə ghe.

¹⁶ Tɨtsɔŋnɨ, nɨ bəŋ mɨntəm ɨmən a nye mɨbvu ɨmɨŋ ə! Be nɨ tú lá ɨ ghɨ, muŋ mɨmboŋnɨ ma mɨ yen a mbó bən ɨ tiʼ tǒkɨ ɨbɛn məba nɨ lumban wa a fúnə́ a ntsu me lá.

¹⁷ Zɨ wa a tsinɨ nɨ ɨtoŋnɨ á zhwiʼtɨ anu za Azhwi a sóŋnə́ a mbó ndáŋwi ə! A mbó ɨbɛn ba bɨ tokɨnɨ ntsi nɨ ayanguʼ məzen, ma mɨ gha a mbó bo a mana wa wu tse wa bɨ lwɛʼnɨ lá. Ma mɨ kɨ gha a mbó bo ɨ mɔ́ʼɔ́ mɔ́ʼɔ́ ngɔʼ zɨ fú za bɨ ŋwaʼnɨnɨ ɨkum wu fi ɨwu, ɨkum wa mbáʼ ka ŋwɔn tse a zhi ayi ntsatɨ a ŋwɔn wa a kwarɨnɨ a zɛrə ghe.”

Nkən wa Yoane a Tságɨ́nɨ́ a Tiatira ghe

¹⁸ “Ŋwaʼnɨ a mbó ntsendá Ŋwi zɨ ndáŋwi za ɨ tsinɨ a Tiatira ngə́: Nə nɨ nkən wa ɨ lonɨ a mbó Mɔn Ŋwi, zɨ wa ɨmɨgɨ ɨmyi kwárɨ́nə́ tso ɨmugɨ, wa mɨku ɨmyi dzinkɨnə tso broŋsɨ wa bɨ sugɨnɨ a mu alam lá.

¹⁹ Ma zhi ɨnu tsa nɨ ghɨnə ghe. Ma zhi akɔŋnɨ za nɨ tsinɨ nɨ zɛrə a nye me, adzaŋ za nɨ faʼnə nɨ táʼ ntəm, afaʼ azən abɔʼnɨ nchigə ɨzɨŋ ə. Ma zhi ngə́ nɨ faʼə tɨtsɔŋnɨ ntsa adzaŋ za nɨ kɨ chinə faʼə a ntsambyi ɛ.

²⁰ Lá anu za nɨ ghɨnə za ka ɨnye ɨzə mbɔŋə ayi mbɨ́ʼ a zɛrə a nye bən a zɛnə: nɨ chigɨ ntəm nɨ mangye wa ɨkum ɨyi nɨ Jezebɛ, wa a soŋnɨ ngə́ zɨə nɨ ntom Ŋwi lá. A ntsǎ a ndzum ɨnu tsa wɛrə a diʼnə, a támtɨ́ ngaŋ afaʼ ɨtsan ntságə́ a ngɨ ɨnu ntɔrɨ ɨlɛbɨ abɔʼnɨ ndzɨ mɨdzɨ ma bɨ ghanɨ a mbó ɨbɔ bɨ abe.

²¹ Ma ghanɨ nkfu a mbó zɨ ngə́ á wɛrə a bəŋ ntəm ɨyi a nye mɨbvu ɨmyi ɛ, lá wɛrə a keʼ ndǒ mbəŋ ntəm ɨyi a nye ɨnu ntɔrɨ ɨlɛbɨ ɨchi ɛ.

²² Ma lan, ma mɨ tɔʼ ayi ɨ maʼ atú ɨkon nɨghɔ wa zɨ abɔʼnɨ ɨbɛn ba bo bo chwurɨnə ɨwu lá mɨ ze ngɨ́ʼ zɨ ntən ə. Ma mɨ ghɨ a məzen tɨtsɔŋnɨ mbáʼ be bo tú bəŋ mɨntəm ɨma a nye ɨnu abɨgəntəm tsa bo ghɨ́nɨ́ bo bɨ wɛrə lá.

²³ Ma mɨ kɨ zhwitɨ ɨbɛn ba bɨ zɔŋnɨ ɨnu tsa wɛrə a diʼnə lá. Ndáŋwi ɨtsum mɨ tiʼ zhi ngə́ ma lá zɨ wa a zhinɨ ɨkwaʼtɨ ŋwɔn tsum nɨ ɨnu tsa ŋwɔn tsum a lɔnə ghe. Ma mɨ tfú a ŋwɔn tsum ɨ zɔŋnə tsɛʼ ɨnu tsa ŋwɔn məwa a ghɨnə.

²⁴ Lá abvuʼ azən za nɨ tsinɨ a Tiatira, nɨ ton awən ɨnu abɨgəntəm tsen tsa bɨ diʼnə lá: nɨ se yɛʼ ɨnu tsa bə mɔʼɔ tɔ́ŋnə́ ngə́, ‹ɨnu nkubə tsə Satan tsə shwinə›. Ma soŋ a mbó bən ngə́ ma mɨ kaʼ bə ntɛgɨ abyɛʼ zə mɔʼɔ atú bɨŋ ə.

²⁵ Nɨ tsi nɨ ɨ zagɨ chwa ɨ faŋnɨ a za nɨ tsinɨ nɨ zɛrə ɨ kɔʼ kuʼ nkfu za ma ghɨ yiŋə.

²⁶ A mbó ɨbɛn ba bɨ tokɨnɨ ntsi nɨ ayanguʼ məzen, mbáʼ bɨ ghɨnɨ ɨnu tsa ma lɔnə ngɛn fu a ndwitə, ma mɨ gha ndəŋndəŋ mɨtən ma ma kwárɨ́nɨ́ a mbó Ta ɨghə. Ma mɨ ghɨ á bo tsi nɨ mɨtən atú ɨlaʼ,

²⁷ a sáʼ bo nɨ mbaŋ atɨŋə ɨ kɨ botɨ awa ɨlám ɨlám tso bɨ botɨ bənto bɨ ɨshe.

²⁸ Ma mɨ kɨ gha awa nɨ fɨndzɔŋ fə tənjwi ɛ.

²⁹ Zɨ wa a tsinɨ nɨ ɨtoŋnɨ á zhwiʼtɨ anu za Azhwi a sóŋnə́ a mbó ndáŋwi ə!”