Nkyɛʼə 19 - Mɨkan wu Fi

¹ Mbáʼ məzen a tsánɨ́, ma zúʼ azúm zə tse za a bénɨ́ tso nji ɨnɔ ɨbɛn a fɔməbvurə, ɨ sóŋə́ ngə́, “Bontɨ a Ŋwi ə! Ɨloŋ, nɨfáŋ abɔʼnɨ mɨtən tsi a mbó Ŋwi ɨwɨgɨnə ghe!

² Nchɛrɨ ɨsáʼ ɨzhi nɨ zɨ nkənu nkɨ ntɛmnɨ ə! Wɛrə a tsɔʼnə a mu ntəm zɨ adzaŋ za wɛrə mɨ nɨŋ ngɨ́ʼ a nye ntɨŋ akwarə za a kɨ chinə mbáʼə nkobɨ atuəshe nɨ ɨnu ntɔrɨ ɨlɛbɨ ɨchi lá. Ŋwi a nɨŋnɨ ngɨ́ʼ wə ɨnye lá mbɨ́ʼ ngə́ wɛrə a zhwítɨ́ ngaŋ afaʼ ɨchi ɛ.”

³ Bo kwíʼ ntɔ́nkɨ́ ngə́, “Bontɨ a Ŋwi ə! Fɨndyiʼ fa fɨ funɨ a nye ndwa ɨmugɨ wa ɨ tɔnɨ ntáʼmbagə wu wi wa kɔʼə ngěn atɨ́ nɨnkoŋ nɨnkoŋ ə!”

⁴ Bɨkum ba mɨghúm mi mɨmbá nɨ ntsɔb nɨkwa abɔʼnɨ ɨdzúm tsə kaʼnɨ tsa tsi nɨkwa tsa tsɨ tsínɨ́ ntən tíʼ ngvo a tɨshe nguʼsɨ a Ŋwi, zɨ wa a shíʼtɨ́nɨ́ ntsí atú abərɨ za, ɨ sóŋə́ ngə́, “A be lá! Bontɨ a Ŋwi ə!”

Nɨdorɨ nɨ Nɨzɔ́ʼ nɨ Mɔn Mbyindzɨ wa

⁵ Nji zɨ tse tíʼ fú atú abərɨ za, ɨ sóŋə́ ngə́, “A nɨ bontɨ a Ŋwi ɨwɨgɨnə ghe, bɨŋ ngaŋ afaʼ ɨchi ɨtsum, ɨbɛn bɨtsum, bə wi bo bə kɨʼnɨ, bən ba nɨ bɔ́gɨ́tɨ́nə́ ayi lá!”

⁶ Ma tíʼ ndzúʼ azúm zə tse za a zɔ́rɨ́nɨ́ tso ɨnɔ ɨbɛn, tso ndzuʼ nkyi wu vwonɨ, tso mbəŋ za ɨ ŋwankɨnə ghe. Ma zúʼ bo soŋ ngə́, “Bontɨ a Ŋwi ə! Mbɨ́ʼ ngə́ Maʼmbyí, Ŋwi Tamɨtən Mɨtsum ɨwɨgɨnə nɨ Ɨfɔ ghe!

⁷ A bɨgɨnə dorɨkɨ nkɨ saŋnɨ; á bɨgɨnə gha nɨfáŋ a mbó wɛrə ghe! Mbɨ́ʼ ngə́ nkfu nɨzɔ́ʼ nɨ Mɔn Mbyindzɨ wa ɨ kuʼnə, mɨngən ɨyi a kɨ nkyaŋtɨ ɨnye ɨzhi mbɨ́ʼ a nɛrə ghe.

⁸ Bɨ ghanə ɨtsɛʼ ɨtɨŋndvuŋ tsɨ ŋwenɨnɨ wəmbo ngə́ á wəgə.” (Ɨtsɛʼ ɨtɨŋndvuŋ tsiŋ tsi lá tso ngɨnɨ mɨnu tsɨ shiʼnɨ tsɨ ɨbɛn bɨ Ŋwi ə.)

⁹ Ntsendá Ŋwi za tíʼ sóŋ a mbó me ngə́, “Ŋwaʼnɨ a ziŋ ə: nɨdorɨ tsi a mbó ɨbɛn ba bɨ ghonɨ awa a nye nɨdorɨ nɨ nɨzɔ́ʼ nɨ Mɔn Mbyindzɨ wa.” Ntsendá Ŋwi za kwíʼtɨ́ ngə́, “Lə nɨ nkasɨ mɨgham mɨ Ŋwi mɛnə ghe.”

¹⁰ Ma vwó a mɨku zɨ a ngúʼsɨ́ zɨ, lá a sóŋ a mbó me ngə́, “Koʼ məla ghɨə! Ma kɨ mbe ngaŋ afaʼ tso gho nkwiʼtɨ ɨbɛn ba bɨ nɨŋnɨ mɨntəm ɨma a nye Ŋwi, ɨbɛn bɨtsum ba bɨ chwanɨ nkənu za Yeso a kyɛ́ʼnə́. Ghuʼsɨ be a Ŋwi ə!” Mbɨ́ʼ ngə́ nkənu za Yeso a kyɛ́ʼnɨ́ bǐtɨ̌ ɨbɛn a nchwítɨ́ nkən Ŋwi ə.

Nkɔʼ Ɨnyam wa Atú Ɨnyamənkárə́ zɨ Fú ə

¹¹ Ma tíʼ ndzɛ́n adzaŋ za fɔməbvurə ŋáʼnɨ́nɨ́, ntiʼ nkɨ ndzɛn ɨnyamənkárə́ zɨ fú ə. Ŋwɔn wa a kɔ́ʼnɨ́ wətú bɨ tɔŋə ayi ngə́ Wa A Faʼnə A Mbó Ŋwi Nɨ Táʼ Ntəm abɔʼnɨ Nkənu ə; wɛrə a nɨ́ŋ ngɨ́ʼ a nye ɨbɛn a nye ndóm wa ɨ kuʼnɨnɨ nkə́ ntǒ ngaŋ kɨban ɨchi tɨ nkobɨ ə.

¹² Ɨmɨgɨ ɨmyi kə́ nkwárə́ tso ndwa ɨmugɨ, nkɨ ngwəgɨ ɨsáʼfɔ tsə ghaʼnɨ atú zɨə. Bɨ ŋwáʼnɨ́ ɨkum wu tsɛrə a nye zɨə, lá ŋwɔn tse a sé zhi anu za ɨkum məwiŋ diʼnɨ ntsatɨ a zɨmboŋ ə.

¹³ Bɨ tsúbɨ́ a tɔgɨ wa wɛrə a wə́gɨ́nɨ́ a mu alɛm ə. Ɨkum ɨyi a nɨ “Nɨgham nɨ Ŋwi ə”.

¹⁴ Bɨgwe bɨ fɔməbvurə a mu aka a mu aka ba bɨ wə́gɨ́nɨ́ ɨtsɛʼ ɨtɨŋndvuŋ tsɨ fú tsɨ fɛmnɨ kɔ́ʼ ɨnyamənkárə́ tsə fú, ndzɔŋə ayi ɛ.

¹⁵ Lumban wu ntsɛgɨnɨ a jígɨ́nɨ́ a ntsu zɨə. Wɛrə mɨ lɔgɨ lá a wɛrə ɨ gháʼ ɨlaʼ ɨwu ə. Wɛrə a mɨ sáʼ awa nɨ mɨtən tso a sáʼə nɨ mbaŋ atɨŋə, ɨ kɨ kám mɨntam mɨ atɨ mɨ nyɛtɨ mɨluʼ ma a mu adiʼ a nkám mɨluʼ za, mbáʼ lá chwusətú mɨlwi Ŋwi Tamɨtən Mɨtsum lá.

¹⁶ Bɨ ŋwáʼnɨ́ a nye tɔgɨ ɨyi abɔʼnɨ nɨtuʼ ɨni ngə́, “Ɨfɔ bɨfɔ abɔʼnɨ Maʼmbyí bɨmaʼmbyí ɛ”.

¹⁷ Ma tíʼ ndzɛ́n ntsendá Ŋwi zɨ tse ɨ tɛm atú nɨnyom ə. Ɨ tɔ́nkɨ́ nɨ nji zɨ ntən a mbó bɨsɨ́ŋ bɨtsum ba bɨ kɨ́nə́ ndyíə a ndə́ŋ nɨkaŋ ngə́: “Nɨ yen ngǒtɨ táʼ adiʼ a ndzɨ́ nɨdorɨ nə wi nə Ŋwi na!

¹⁸ Nɨ yen nkfurɨ ɨnyam ɨnye bɨfɔ, bəkaməntso abɔʼnɨ zɨ ɨbɛn bə dɨtɨnɨ, ɨnyam ɨnye ɨnyamənkárə́ abɔʼnɨ bɨnkɔʼ mɨnyam ɨba, ɨnyam ɨnye ɨbɛn bɨtsum, abuʼ abɔʼnɨ ŋwɔn nɨ atú azhi, wu ngwi abɔʼnɨ wu nkɨʼnɨ ə!”

¹⁹ Ma tíʼ ndzɛ́n adzaŋ za ɨnyam mɨbaʼ za abɔʼnɨ bɨfɔ bɨ atuəshe nkwiʼtɨ bɨgwe ɨba, a bɨ ghótɨ́nɨ́ a ntó wa a kɔ́ʼnɨ́ atú ɨnyamənkárə́ za abɔʼnɨ bɨgwe ɨbyi ba.

²⁰ Bɨ chwá ɨnyam mɨbaʼ za abɔʼnɨ ntom Ŋwi ɨchwenu za ɨ ghɨ́nɨ́ ɨnu tsɨ yerɨnɨ-yerɨnɨ a ɨshi ɨnyam mɨbaʼ za lá a nye ngaŋ atsáŋ ə. (Bɨ tsá lá a ndzum ɨnu tsɨ yerɨnɨ-yerɨnɨ tsa wɛrə a támtɨ́nɨ́ ɨbɛn ba bɨ tsínɨ́ nɨ alyigɨ a ɨnyam mɨbaʼ za abɔʼnɨ ba bɨ ghúʼsɨ́nə a mɔn abe ɨnyam mɨbaʼ wa lá.) Bɨ máʼ ɨnyam mɨbaʼ za abɔʼnɨ ntom Ŋwi ɨchwenu za atú ntən a mu sagɨrə ɨmugɨ wa ka ɨ ndáʼə mbyɛ́nə́ ayi lá.

²¹ Bɨ zhwítɨ́ abvuʼ a ɨbɛn nɨ lumban wa a jigɨnɨnɨ a ntsu zɨ wa a kɔ́ʼnɨ́ atú ɨnyamənkárə́ za; bɨsɨ́ŋ ba bɨtsum tíʼ nkfúrɨ́ ɨnyam ɨnye ɨtsa nkuʼ ndvuŋ wa bo chínɨ́ kfurɨ, nzhwurɨ ə.