Nkyɛʼə 17 - Mɨkan wu Fi

Ntɨŋ Akwarə za

¹ Táʼ ntsendá Ŋwi a tɨtərɨ tsa tsi samba tsa tsɨ tíʼtɨ́nɨ́ ɨkəbɨ tsa tsi samba tíʼ ngyen a mbó me, ɨ soŋ ngə́, “Yiŋə, ma mɨ diʼ a mbó gho adzaŋ za bɨ mɨ nɨŋ ngɨ́ʼ a ɨnye ntɨŋ akwarə za, mbáʼ lá ntáʼmbagə wu wiəwi wa bɨ vwunɨ ɨ fatɨ bɨmɨzam bə ghaʼnɨ lá.

² Bɨfɔ bɨ atuəshe kə́ ngɨ̌ ɨnu ntɔrɨ ɨlɛbɨ bo bo, ɨbɛn bɨ atuəshe tíʼ mbánɨ́ mɨluʼ ma ntɨŋ akwarə za a ghánɨ́ a mbó bo, bo bo tiʼ nkɨ ngɨ ɨnu ntɔrɨ ɨlɛbɨ ə.”

³ Azhwi a tíʼə ntsɨŋnə aghan, ntsendá Ŋwi za tiʼ mbyɛʼ aghan ngɛn nɨ me a mu mɨkɨghonɨ ə. Ɨwu, ma zɛ́n a mangye wu tse a shiʼtɨ ntsi atú ɨnyam mɨbaʼ zɨ mbaŋnɨ za bɨ ŋwáʼnɨ́nɨ́ mɨkum mɨ ndzɔm Ŋwi wə ɨnye tsum; ɨnyam mɨbaʼ za tsí nɨ ɨtú tsi samba abɔʼnɨ mɨndɔ́ŋ nɨghúm ə.

⁴ Mangye wa a wə́gɨ́ atsɛʼ atɨŋndvuŋ zə baŋnɨ, ɨdzúm mɨsom ŋwaʼŋwaʼ kubɨnɨ ayi, nkwiʼtɨ ngɔʼ tsə ŋwenɨnɨ abɔʼnɨ mbaŋətuʼ ə. A mu abó azhi wɛrə a tsí nɨ ndɔ́ŋ ŋwaʼŋwaʼ za ɨ lónɨ́ nɨ ɨtɨshwe ɨnu tsa ŋwɔn a se tsi nɨ ɨ byi zuʼ tsɛʼ ɨ zuʼnɨ, ɨdzúm tsa tsɨ funɨ a mu afaʼ a ntɔrɨ ɨlɛbɨ azhi ɛ.

⁵ A nɨdzenɨ mangye wa bɨ ŋwáʼnɨ́ ɨkum wa anu za ɨkum məwiŋ díʼnɨ́ ɨ bénɨ́ anu a nkubə; ngə́, “Babilɔn wu ngwi, nɨmi bɨ ɨkwarɨ ɨtsum nɨ ɨtɨshwe ɨnu ɨtsum tsa ŋwɔn a se tsi nɨ ɨ byi zuʼ tsɛʼ ɨ zuʼnɨ a mu mbyi ɛ.”

⁶ Ma kɨ́ ndzɛ́n ngə́ mangye wa a bánɨ́ a mu ɨno alɛm a ɨbɛn bɨ Ŋwi, abɔʼnɨ ɨno alɛm a ɨbɛn ba bɨ zhwítɨ́nɨ́ mbɨ́ʼ ngə́ bo zɔ́ŋ a Yeso nɨ táʼ ntəm ə. Mbáʼ ma zɛ́nɨ́ ayi lá, a kɨ́ʼnɨ́ aghan be tɨsɨŋə.

⁷ Ntsendá Ŋwi za bítɨ́ aghan ngə́, “Agho lá a kɨʼnɨ ake le? Ma mɨ soŋ agho nɨ anu za anu a nkubə za a diʼnɨ mbɨ́ʼ a mangye məwen abɔʼnɨ ɨnyam mɨbaʼ za ɨ byɛʼnɨ ayi abɔʼnɨ ɨnyam mɨbaʼ za nɨ ɨtú tsi samba nɨ mɨndɔ́ŋ nɨghúm lá.

⁸ Ɨnyam mɨbaʼ za kwɛ́ ntsi ntɨŋə, lá ka ɨ bvurɨ ntsi ayi atú ntɨŋə; ɨ tsi a ndóm a fuə a mu abɨ́ a kfúrɨ́mándzó, ɨ kɔʼ ghɛn á bɨ tsənkɨ ayi ɛ. Ɨbɛn ba bɨ tsínə́ atuəshe mbáʼ bɨ bvúrɨ́nɨ́ tɨ ŋwaʼnɨ mɨkum ɨma bɔŋ á bɨ káʼ mbyi, a mu aŋwaʼnɨ a ɨbɛn ba bɨ ghɨnɨ tsi ntən, a mɨ kɨʼnɨ awa bɨtsum adzaŋ za bo lenə ɨnyam mɨbaʼ za. Ɨ kwɛ́ ntsi ntən nkfu tsɛrə; tɨtsɔŋnɨ ka ɨ bə mbvurɨ ayi, lá ɨ ghɨ bə fu a ɨshe ə.

⁹ A tiʼə ndǒ a zóŋ abɔʼnɨ ndzuʼ kɨ zhiɛ. Ɨtú tsa tsi samba lá mɨntáʼ mi samba ma mangye wa a shíʼtɨ́nə́ chyɛ̌ ɨwu ə. Tsɨ kɨ mbe lá bɨfɔ bi samba ghe.

¹⁰ A tɨtərɨ bɨfɔ məben bi samba, bə bi bɨtə̧̂ kfokɨnə, táʼ a bvurə sáʼə, wu mɔʼɔ wa a bvurɨ tɨ yiŋə; a ghɨ ngyén, a tsi nɨ zagɨ ɨ sáʼ tsɛʼ a nye məkum a nkfu ə.

¹¹ Ɨnyam mɨbaʼ za ɨ tsínɨ́ ntən nkfu tse, lá nkeʼ bə mbvurɨ ntsi atú ntən tɨtsɔŋnɨ lá, atuəmbəm zɨ a nɨ ɨfɔ wa a kuʼnɨ a nye ɨdiʼ tsi nɨfə̧, mbe táʼ a tɨtərɨ ba bi samba, wa a tsinɨ a ndóm a ngěn á bɨ tsənkɨ ə.

¹² Mɨndɔ́ŋ ma nɨghúm ma o zɛ́nɨ́ lá, lá bɨfɔ bi nɨghúm ba bɨ bvurɨnɨ tɨ biʼnɨ ɨ sáʼə; lá bɨ mɨ gha mɨtən a mbó bo á bo sáʼ tso bɨfɔ atú məkum a nkfu bo bɨ ɨnyam mɨbaʼ za.

¹³ Məben bi nɨghúm lǒ tsɛʼ táʼ anu, bo ghǎ adaʼ aza abɔʼnɨ mɨtən ɨma a mbó ɨnyam mɨbaʼ za.

¹⁴ Bo mɨ tǒkɨ a Mɔn Mbyindzɨ wa; lá Mɔn Mbyindzɨ wa abɔʼnɨ ɨbyi ba bɨ tsɔ́ʼnɨ́, ndzarɨ awa, bɨ kə́ ndzɔŋə ayi tsɛʼ nɨ táʼ ntəm lá, bo mɨ ghaʼ awa mbɨ́ʼ ngə́ wɛrə a nɨ Maʼmbyí bɨmaʼmbyí nkɨ mbe Ɨfɔ bɨfɔ ghe.”

¹⁵ Ntsendá Ŋwi za kɨ́ sóŋ a mbó me ngə́, “Ngə́rɨ́ mɨnkyi tsa o zɛ́nɨ́ akwarə za a shiʼtɨ ntsi ɨwu lá, lá ɨlaʼ, ɨbɛn, ngwəgɨ ŋwɔn mɨsɔŋ a ntsu abɔʼnɨ mɨgham ə.

¹⁶ Mɨndɔ́ŋ ma nɨghúm ma o zɛ́nɨ́, nkwiʼtɨ ɨnyam mɨbaʼ za mɨ ban akwarə za; bɨ mɨ kwarɨ azúm atsum za a tsinɨ nɨ zɛrə ɨ tiʼ nyɛʼtɨ ayi ntyigɨnɨ; bɨ mɨ kfurɨ ɨnyam ɨnye ɨzhi, ɨ tiʼ kɨ tsənkɨ ayi nɨ ɨmugɨ ə.

¹⁷ Mbɨ́ʼ ngə́ Ŋwi a ghɨnə ngə́ á bo tsɔʼ a mu mɨntəm ɨma a ngɨ anu za wɛrə lɔnə, a nye adzaŋ za bo faʼnə a mbúm abɔʼnɨ nga mɨtən a sáʼə a mbó ɨnyam mɨbaʼ za ɨ kɔʼ kuʼ nkfu za nɨgham nɨ Ŋwi ghɨ be nkənu ə.

¹⁸ Mangye wa o zɛ́nɨ́ lá, a lá ntáʼmbagə wu wiəwi wa ɨ sáʼnə́ bɨfɔ bɨ atuəshe lá.”