Nkyɛʼə 16 - Mɨkan wu Fi

Ɨkəbɨ tsa tsi Samba tsə Mɨlwi Ŋwi ə

¹ Ma tíʼ ndzúʼ nji zɨ ntən zɨ tsɛrə ɨ ghamnə a mu nɨshwim na a mbó ɨtsendá Ŋwi tsa tsi samba ngə́: “Ghɛn nchwirɨ ɨkəbɨ Mɨlwi Ŋwi tsa tsi samba atú atuəshe!”

² Ntsambyi ntsendá Ŋwi ghɛ́n nchwirɨ azhi akəbɨ atú atuəshe ə. Ntsɔʼ madɨ́ŋ tsə tɨbɔŋ tsa tsɨ kɨ́nə́ ndzáŋə́ tsɛʼ nkan fú a nye ɨbɛn ba bɨ tsínɨ́ nɨ alyigɨ a ɨnyam mɨbaʼ za abɔʼnɨ ɨbɛn ba bɨ ghúʼsɨ́nɨ́ a mɔn abe ɨyi ɛ.

³ Ntsendá Ŋwi za ɨ zɔ́ŋtɨ́nɨ́ a nye ɨdiʼ tsi bá chwírɨ́ azhi akəbɨ a mɨlwi wu ntən a mu sagɨrə wu ngwi ə. Nkyi ɨyi tíʼ mbənkɨ mbe tso alɛm a ŋwɔn wa a kfonə, ɨdzúm tsə kaʼnɨ ɨtsum tsa tsɨ tsínɨ́ ntən, ntsi a mu sagɨrə wu ngwi wa tsɨ kfókə́.

⁴ Ntsendá Ŋwi za ɨ zɔ́ŋtɨ́nɨ́ a nye ɨdiʼ tsi tárə́ chwírɨ́ azhi akəbɨ a mɨlwi wu ntən a mu bɨmɨzam abɔʼnɨ bɨnáŋə́bə́rə ghe. Mɨnkyi ɨma bə́ŋ ntiʼ alɛm ə.

⁵ Ma zúʼ ntsendá Ŋwi za ɨ kɨ́nə́ ndə̌tú nɨ mɨnkyi ɨ soŋ ngə́, “O Wu Fɛmnɨ, gho wa o nɨ nkɨ mbe wa o bénɨ́, nchɛrɨ mɨsáʼ za o chɛrɨnɨ lá tsɨ tsi tɨ nkobɨ ə!

⁶ Bo chwírɨ́ alɛm a ɨbɛn bɨ Ŋwi abɔʼnɨ zə ntóm Ŋwi, ma lan, o gha alɛm a mbó bo ngə́ á bo noə. Bo kwárə́ lá a za a kuʼnɨnɨ ngə́ á bo kwarə!”

⁷ Ma tíʼ ndzúʼ nji ɨ lo atú a mɨkuʼ ɨ sóŋə́ ngə́, “Maʼmbyí Ŋwi Tamɨtən Mɨtsum! Nchɛrɨ mɨsáʼ ɨzo ɨ dǐʼ nkənu, nkeʼ nɨ nkobɨ chyɛ!”

⁸ Ntsendá Ŋwi za ɨ zɔ́ŋtɨ́nɨ́ a nye ɨdiʼ tsi nɨkwa chwírɨ́ azhi akəbɨ a mɨlwi wu ntən atú nɨnyom ə. Bɨ tíʼ nyɛʼtɨ ngə́ á nɨnyom a tɔn ɨbɛn nɨ ndomə ɨzhi za ɨ lomnə tso ɨmugɨ ə.

⁹ Bɨ tɔ́n awa nɨ ndomə zɨ tən, bo tiʼ ndɔʼ ɨkum Ŋwi, zɨ wa a tsinɨ nɨ mɨtən atú ngɨ́ʼ tsiŋ ə. Lá bo sé bəŋ mɨntəm ɨma a nye mɨbvu ɨma ɨ tiʼ kɨ gha nɨfáŋ a mbó Ŋwi ə.

¹⁰ Ntsendá Ŋwi za ɨ zɔ́ŋtɨ́nɨ́ a nye ɨdiʼ tsi tə̧̂ chwírɨ́ azhi akəbɨ a mɨlwi wu ntən atú abərɨ a ɨnyam mɨbaʼ za. Ndzumnɨ kúbɨ́nɨ́ nɨfɔ nɨ ɨnyam mɨbaʼ za. Ɨbɛn lómtɨ́ ɨlɛm ɨtsa mbɨ́ʼ ndzáŋə́ za bo kɨ́nə́ ndzúʼə ghe.

¹¹ Bo tíʼ ndɔʼ a Ŋwi, zɨ wa a tsinɨ a fɔməbvurə mbɨ́ʼ ndzáŋə́ za abɔʼnɨ ntsɔʼ madɨ́ŋ tsa, lá bo sé bəŋ mɨntəm ɨma a nye mɨndóm mə tɔmnɨnɨ ɨma ghe.

¹² Ntsendá Ŋwi za ɨ zɔ́ŋtɨ́nɨ́ a nye ɨdiʼ tsi ntugə chwírɨ́ azhi akəbɨ a mɨlwi wu ntən a mu mɨzam Yufritisɨ wu ngwi wa. Mɨzam wa a zóm, taŋ ɨ kyaŋtɨ ndómnji a mbó bɨfɔ ba bɨ lonɨ a bagɨ sáʼnyom ə.

¹³ Ma tíʼ ndzɛ́n ɨzhwi tsɨ tɔmnɨnɨ tsi tárə́ tsa tsɨ fínɨ́ ɨsamnkye ə. Táʼ a kə́ fúə a ntsu dragɔn wa, táʼ a funə a ntsu ɨnyam mɨbaʼ za, wu mɔʼɔ a funə a ntsu ntom Ŋwi ɨchwenu za.

¹⁴ Bo lá ɨzhwi bɨdzɨŋ tsa tsɨ ghɨnɨ ɨnu tsɨ yerɨnɨ-yerɨnɨ lá. Ɨzhwi mətsen tsi tárə́ ghěn a mbó bɨfɔ bɨ atuəshe bɨtsum, ɨ ghotɨ awa adiʼ zɨə mɔ́ʼɔ́ a mbó ntso wa ɨ ghɨnɨ lɔgɨ adiʼ a Njwi wa Ŋwi Tamɨtən Mɨtsum a ghɨnɨ sáʼ ɨbɛn ə.

¹⁵ Ma zúʼ Yeso a soŋ ngə́, “Zhwiʼtɨnə! Ma mɨ yen tso ndzɛrə ghe! Nɨdorɨ tsi a mbó zɨ wa a mɨ tsi a nɨkyerə, á ɨtsɛʼ ɨchi kɨ ntsi a ɨbəm ɨnye zɨ, taŋ ɨ ghɨ keʼ ntiʼə númə́ ngyǐŋ ntyigɨnɨ, ɨ kɨ tsi nɨ adɨrətú a tɨtərɨ ɨbɛn ə!”

¹⁶ Ɨzhwi tsa tíʼ ngǒtɨ́ bɨfɔ ba táʼ adiʼ, adiʼ wa bə Ɛbal tɔ́ŋnə́ ngə́ Amagɛdɔn lá.

¹⁷ Ntsendá Ŋwi za ɨ zɔ́ŋtɨ́nɨ́ a nye ɨdiʼ tsi samba chwírɨ́ azhi akəbɨ a mɨlwi wu ntən a mu ɨfɛgə. Nji zɨ nkɔʼnɨ atɨ́ zɨ tsɛrə kə́ fúə, ndo a nye abərɨ za a mu nɨshwim na ɨ sóŋə́ ngə́, “A miə!”

¹⁸ Mbəŋ zhwíbtɨ́, nkum nkɨ ŋwánkɨ́, ɨshe nɛm be a nji adaŋə. Ɨshe láʼnə mbvurɨ tɨ nɛm a nji məwen nchwuʼnɨ mbáʼ bɨ káʼnɨ́ ngwəgɨ ŋwɔn mɨsɔŋ a ntsu ə; məziŋ ɨnɛm ɨshe a nɨ za ɨ bɨ́gɨ́nɨ́ ntsa ɨtsum ə!

¹⁹ Ɨnɛm ɨdiʼ za tíʼ ngyɛbtɨ ntáʼmbagə wu wiəwi wa a nye bɨbagɨ bɨtárə́, ntiʼ nkɨ ntsənkɨ ntáʼmbagə tsə wi a mu ɨlaʼ ɨtsum ə. Ŋwi a wáʼtɨ́ a Babilɔn wu ngwi, ntiʼ ngɨ ngə́ á ɨbɛn ba bɨ tsínɨ́ ɨwu no mɨluʼ ma mɨ tsinɨ a mu ndɔ́ŋ ɨzhi — mɨluʼ ma mɨ lá chwusətú mɨlwi ɨyi wu ntən lá.

²⁰ Ɨdiʼ ɨtsum tsa nkyi kárɨ́sɨ́nɨ́ byékɨ́, mbám ɨtsum kɨ mbyekə.

²¹ Bɨtəkɔʼ bɨ fɨwɛ, ba táʼ a dɨ́rɨ́nɨ́ tso bɨkilogram mɨghúm mi mɨntə̧̂ ló a nɨkaŋ ngvo atú ɨbɛn ə. Ɨbɛn məbiŋ tíʼ ndɔʼ a Ŋwi mbɨ́ʼ ngɨ́ʼ zɨ fɨwɛ za, mbɨ́ʼ ngə́ a bé ngɨ́ʼ zɨ tɨbɔŋ be tɨsɨŋə.