Nkyɛʼə 14 - Mɨkan wu Fi

Mɔn Mbyindzɨ wa abɔʼnɨ Ɨbɛn ɨbyi ɛ

¹ Ma tíʼ nden ndzɛn adzaŋ za Mɔn Mbyindzɨ wa a tɛ́mnɨ́ atú Mbám Zayɔn ə; ɨbɛn táʼ aban nɨ nchwuʼ mɨghúm mi nɨkwa nɨ ntsɔb nɨkwa (144,000) ba bɨ tsínɨ́ nɨ ɨkum ɨyi abɔʼnɨ ɨkum ta ɨyi a mɨdzenɨ bo tsi bo zɨə.

² Ma zúʼ nji zɨ tse za ɨ lónɨ́ a fɔməbvurə ɨ kom tso ndzuʼə adiʼ a nkyi zə vwonɨ, tso mbəŋ za ɨ ŋwankɨnɨ be tɨsɨŋə. Ɨ kóm tso ɨkom wa bɨndzɔb azɔb ba bɨ búʼnɨ́ mɨloŋ mɨ aŋantɨ a bɨ búʼnə́ ghe.

³ Ɨbɛn ba táʼ aban nɨ nchwuʼ mɨghúm mi nɨkwa nɨ ntsɔb nɨkwa (144,000) tɛ́m a ɨshi abərɨ za, ɨdzúm tsɨ kaʼnɨ tsa tsi nɨkwa, abɔʼnɨ bɨkum ba; bo kə́ ndzɔ̌b azɔb zə fi za a kɨ chinɨ yɛʼ tsɛʼ bo ghe. A nɨ tsɛʼ bo ba Ŋwi a zonɨ ɨtú ɨtsa ghe.

⁴ Bo lá ɨbɛn ba bɨ bvurɨ tɨ shwiʼ ɨtumbəm ɨtsa bo bɨ bəngye, bo nɨ ngo ghe. Bo zɔŋə a Mɔn Mbyindzɨ wa adiʼ atsum za wɛrə ghɛnə ghe. Bɨ zonɨ ɨtú ɨtsa a mbó ngwəgɨ ŋwɔn mɨsɔŋ a ntsu tsum, ntiʼ mbe bɨtsabɨmbyi ba bɨ ghanɨ awa a mbó Ŋwi nkɨ nga a mbó Mɔn Mbyindzɨ wa.

⁵ Bo láʼnə mbvurɨ ɨnu tɨ chwe; ka bo zhi awa ɨbvu wu tsɛrə ghe.

Ɨtsendá Ŋwi tsa tsi Tárə́ Yen nɨ Nɨsáʼ nɨ Ŋwi ə

⁶ Ma tíʼ ndzɛ́n ntsendá Ŋwi zɨ mɔʼɔ ɨ linə atɨ́ atɨ́ a mu ɨfɛgɨ, nɨ nkən wu shiʼnɨ wa ɨ ghɨnɨ ghɔ́ŋ nɨnkoŋ ə. Ɨ kə́ ngěn a nchwítɨ́ wɛrə a mbó ɨbɛn bɨ atuəshe, ngwəgɨ ŋwɔn mɨsɔŋ a ntsu tsum, atsé zə wi atsum, nɨgham nɨtsum bo ɨlaʼ ɨtsum ə.

⁷ Ntsendá Ŋwi za sóŋ nɨ nji zɨ ntən ngə́, “Kɔʼsɨ a Ŋwi atɨ́ nkɨ nga nɨfáŋ wəmbo ə! Mbɨ́ʼ ngə́ nkfu nɨsáʼ wɛrə ɨ kuʼnə ghe. Ghuʼsɨ a wɛrə wa a káʼnɨ́ fɔməbvurə, atuəshe, sagɨrə wu ngwi abɔʼnɨ bɨnáŋə́bə́rə ghe!”

⁸ Ntsendá Ŋwi za ɨ zɔ́ŋtɨ́nɨ́ a nye ɨdiʼ tsi bá zɔ́ŋtɨ́ a zɨ ntsambyi, ɨ sóŋə́ ngə́, “A vwonə ghe! Təkɔʼ Babilɔn a vwonə ghe! A ghɨ́ ŋwɔn tsum a no mɨluʼ ɨmyi — mɨluʼ mə tən mə ɨnu ntɔrɨ ɨlɛbɨ ɨchi ɛ!”

⁹ Ntsendá Ŋwi za a zɔ́ŋtɨ́nɨ́ a nye ɨdiʼ tsi tárə́ zɔ́ŋtɨ́ a tsə ntsambyi tsa tsi bá, ɨ sóŋə́ nɨ nji zɨ ntən ngə́, “Ŋwɔn tsum wa a ghuʼsɨnɨ ɨnyam mɨbaʼ za abɔʼnɨ mɔn abe ɨyi, nkwarɨ alyigɨ za a nɨdzenɨ zɨ kə abó zɨ

¹⁰ a mɨ tiʼ no mɨluʼ mɨ mɨlwi Ŋwi ə. Ŋwi a mɨ lwi ntɔŋ ɨ tiʼ nɨŋ ngɨ́ʼ zɨ ntən a ɨnye zɨ tso ngə́ wɛrə a no mɨluʼ mə tɨŋə! Ŋwɔn tsum wa a konɨ a mu ngɨ ɨbvu məzen, bɨ ghɨ nɨŋ ngɨ́ʼ wə ɨnye a mu ɨmugɨ wa ɨ tənɨ be tɨsɨŋə. Məzen a ghɨ lɔgɨ adiʼ lá a ɨshi ɨtsendá Ŋwi tsə fɛmnɨ abɔʼnɨ Mɔn Mbyindzɨ wa.

¹¹ Fɨndyiʼ fɨ ɨmugɨ wu ɨnɨŋ ngɨ́ʼ məzen fɨ kɔ́ʼə ngěn atɨ́ nɨnkoŋ ə. Ka ashwetɨ a ntəm a be ayi ɨwu nəzhwɨgɨnɨ kə nɨ ɨtfúʼ a mbó ɨbɛn ba bɨ ghúʼsɨ́nə́ ɨnyam mɨbaʼ za abɔʼnɨ mɔn abe ɨyi, nkwiʼtɨ a ŋwɔn tsum wa a tsinɨ nɨ alyigɨ a ɨkum ɨyi ɛ.”

¹² Məzen a lǒ achigəntəm a mbó ɨbɛn bɨ Ŋwi ba bɨ zúʼnɨ́nɨ́ ntɨgə Ŋwi nkɨ nɨŋ mɨntəm ɨma a nye Yeso ghe.

¹³ Ma tíʼ ndzúʼ nji ɨ lo a fɔməbvurə, ɨ sóŋə́ ngə́, “Ŋwaʼnɨ a ziŋ ə: nɨdorɨ tsi a mbó ŋwɔn tsum wa ɨ lɔgɨnɨ tɨtsɔŋnɨ ɨ ghɛn nɨ mbyi a kfonɨ a mu ɨ faʼə a mbó Maʼmbyí ɛ!” Azhwi za a chwɨgɨ ngə́, “E, tsɛʼ a nkənu ə! Bo ghɨ tsi nɨ ashwetɨ a ntəm a mbó anyuʼnɨ aza, mbɨ́ʼ ngə́ ngɨnɨ mɨnu ɨma ghěn bo bo ghe.”

Ndzɛm Nəzhwɨgɨnɨ mbɨʼ Ntsɨrɨndzum Nɨsáʼ ə

¹⁴ Ma tíʼ nden ndzɛn mbaʼ zɨ fú ə. Atú mbaʼ za azúm zə tse a shíʼtɨ́ ntsi ɨwu ɨ fi a mɔn ŋwɔn ə. A tsí nɨ ɨsáʼfɔ ŋwaʼŋwaʼ atú zɨ abɔʼnɨ ɨŋwi nɨfuʼ zɨ ntsɛgɨnɨ abó zɨə.

¹⁵ Ntsendá Ŋwi zɨ mɔʼɔ ɨ tíʼ fú a mu nɨshwim mbugɨ nɨ nji zɨ ntən ɨ soŋ a mbó za ɨ shíʼtɨ́nɨ́ ntsi atú mbaʼ za lá ngə́, “Lɔgɨ ɨŋwi nɨfuʼ ɨzo za, ɨ fuʼ mɨdzɨ ɨwu, mbɨ́ʼ ngə́ nkfu ɨ kuʼnə ghe; nɨfuʼ nɨ atuəshe tənə ghe!”

¹⁶ Za ɨ shíʼtɨ́nɨ́ ntsi atú mbaʼ za tíʼ ghágɨ́ ɨŋwi nɨfuʼ ɨzhi atuəshe, ntiʼ fuʼ nɨfuʼ nɨ atuəshe.

¹⁷ Ma tíʼ ndzɛ́n ntsendá Ŋwi za ɨ zɔ́ŋtɨ́nɨ́ a zɨ ntsambyi za, ɨ fu a mu nɨshwim a fɔməbvurə, nkɨ ntsi nɨ ɨŋwi nɨfuʼ zɨ ntsɛgɨnɨ ə.

¹⁸ Ntsendá Ŋwi zɨ mɔʼɔ, za ɨ tsinɨ nɨ mɨtən a ntsɨŋnɨ ɨmugɨ wa tíʼ ndo atú a mɨkuʼ ɨ fu ngyiŋə. Wɛrə a tɔ́nkɨ́ a mbó ntsendá Ŋwi zɨ mɔʼɔ za ɨ tíʼtɨ́nɨ́ ɨŋwi nɨfuʼ zɨ ntsɛgɨnɨ za ngə́, “Lɔgɨ ɨŋwi nɨfuʼ ɨzo za, nchwə mɨjwaʼ mɨ mɨntam mɨ atɨ mɨ nyɛtɨ mɨluʼ mɨ atuəshe ɨwu, mbɨ́ʼ ngə́ mɨntam mɨ atɨ mɨ nyɛtɨ mɨluʼ ma baŋnə ghe!”

¹⁹ Ma lan, ntsendá Ŋwi za tíʼ ghágɨ́ ɨŋwi nɨfuʼ ɨzhi atuəshe nchwántɨ́ mɨntam mɨ atɨ mɨ nyɛtɨ mɨluʼ ma a nye ɨtɨ ɨtsa, ɨ maʼ a mu təkɔʼ bɨ adiʼ a nkám mɨluʼ mbáʼ lá chwusətú mɨlwi Ŋwi lá.

²⁰ Bɨ kám mɨntam mɨ atɨ mɨ nyɛtɨ mɨluʼ ma a mu adiʼ a nkám mɨluʼ za a tsínɨ́ abyɛn ntáʼmbagə wu wi, alɛm a tíʼ fú a mu adiʼ a nkám mɨluʼ za ɨ shisɨ a nye bɨkilomɛta nkɨ tsi tárə́ a sagə nkə́ ntiʼə fátə́ bɨmita bɨbá a shwiɛ a ɨshe.