Nkyɛʼə 12 - Mɨkan wu Fi

Mangye wa bo Dragɔn wa

¹ Alɨgɨ zə wi za a kɨʼnɨnɨ ɨbɛn a tíʼ fú a ɨshe a nɨkaŋ ə. Alɨgɨ zen a bé mangye wa atsɛʼ azhi a bénɨ́ nɨnyom ə. Wɛrə a tsí nɨ saŋ a shwúrɨ́ mɨku zɨ, ɨsáʼfɔ za ɨ tsínɨ́ nɨ mɨndzɔŋ nɨghúm ntsɔb bá tsí atú wɛrə ghe.

² Wɛrə a tɛ́m nɨ mɔn, a bvurɨ tsɛʼ mɨnya mɨ nkfu á wɛrə a jwiə. Ndzaŋə abɔʼnɨ ngɨ́ʼ nɨjwi za ghɨ́ wɛrə a bugə.

³ Alɨgɨ zə kɨʼnɨnɨ zə mɔʼɔ a kwíʼ fú a ɨshe a nɨkaŋ ə. A bé tə́fəm dragɔn wa a kɨ́nə́ mbaŋə wa a tsínɨ́ nɨ ɨtú tsi samba abɔʼnɨ mɨndɔ́ŋ mi nɨghúm, ɨsáʼfɔ tsi atú ɨtú tsa ɨtsum ə.

⁴ Wɛrə a shwúʼ a táʼ adiʼ mbáʼ bɨ yɛbtɨnɨ mɨndzɔŋ a nɨkaŋ ɨdiʼ tsi tárə́ nɨ nkon ɨyi ɨ nyɛʼ a mɛrə atuəshe. Wɛrə a tɛ́m a ɨshi mangye wa taŋ ɨ kfurɨ a mɔn ɨyi wa tsɛʼ mbáʼ mangye wa mɨ byi jwi a wɛrə ghe.

⁵ Mangye wa tíʼ njwí a mɔn mbáŋnɨ́, wɛrə wa a mɨ sáʼ ɨlaʼ ɨtsum nɨ mɨtən tso a sáʼə nɨ mbaŋ atɨŋə ghe. Lá bɨ fé a mɔn wa ngɛn nɨ wɛrə a mbó Ŋwi abɔʼnɨ abərɨ azhi ɛ.

⁶ Mangye wa a kɨ́ə ngɛn a mu mɨkɨghonɨ, adiʼ wa Ŋwi a kwɛ́nə nkyaŋtɨ wəmbo, adiʼ wa bɨ mɨ lə̌tú nɨ zɨ atú njwi 1,260 ghe.

⁷ Ntso tíʼ mbiʼnɨ a fɔməbvurə ghe. Makɛn bo bɨ ɨtsendá Ŋwi ɨchi tó a dragɔn wa wa a kɨ́nɨ́ nkɨ́ ntó awa nɨ ɨchi ɨtsendá Ŋwi ə.

⁸ Lá bɨ gháʼ a dragɔn ə. Bɨ sé nyɛʼtɨ a wɛrə bo bɨ ɨtsendá Ŋwi ɨchi ngə́ á bo kwiʼə mbɨŋə nchyɛ̌ a fɔməbvurə ghe.

⁹ Bɨ tyíŋ a tə́fəm dragɔn wa ɨ maʼ a ntáʼə — ɨnyo bənguʼ za bɨ tɔ́ŋnə́ ngə́ Dəbɨrɨ, kə Satan, mbáʼ ɨ támtɨ́nɨ́ atuəshe atsum lá. Bɨ máʼ ayi a shiʼ ngyen atuəshe, ndzɔŋ nkwiʼtɨ ɨtsendá Ŋwi ɨchi ɨtsum ə.

¹⁰ Ma tíʼ ndzúʼ nji za ɨ nkɔʼnɨ atɨ́ zɨ tsɛrə a fɔməbvurə a soŋənə ngə́, “Tɨtsɔŋnɨ ɨloŋ Ŋwi yenə ghe! Tɨtsɔŋnɨ Ŋwi a diʼnə mɨtən ɨmyi tso ɨfɔ ghe! Tɨtsɔŋnɨ, Wa bɨ Zɔ́ʼnɨ́ wa Ŋwi a tsɔʼnɨ a diʼnə mɨtən ɨmyi, mbɨ́ʼ ngə́ zɨ wa a tɛ́mnɨ́ a ɨshi Ŋwi ɨwɨgɨnə nkǎŋ ɨbɔmbɨma ɨbɨgɨnə nɨ njwi nɨ ɨtfúʼ bɨ maʼnə ayi a fu a fɔməbvurə ghe.

¹¹ Ɨbɔmbɨma ɨbɨgɨnə tsí nɨ ayanguʼ atú zɨ ntsa lá a ndzum alɛm a Mɔn Mbyindzɨ za nkɨ ntsa lá a ndzum nkənu za bo chwítɨ́nə́; bo kyáŋtɨ́ ɨnye ɨtsa a ngá ntsi mbyi ɨtsa mbáʼ be a kwɛ ndiʼ ngə́ á bo kfo ə.

¹² Ma lan, fɔməbvurə abɔʼnɨ bən bɨtsum ba nɨ tsínə́ ɨwu, á nɨ tiʼ ntsi nɨ nɨdorɨ ə! Lá a bɨ́gɨ́ be tɨ́sə́n a mbó atuəshe abɔʼnɨ sagɨrə wu ngwi ə! Mbɨ́ʼ ngə́ Dəbɨrɨ a shiʼnə ngyen a mbó bɨŋ ə. Wɛrə a lon nɨ mɨlwi mbɨ́ʼ ngə́ wɛrə a zhi ngə́ zɨə bvurɨ ntsi tsɛʼ nɨ mɨnyi mɨ nkfu ə.”

¹³ Mbáʼ dragɔn a zhínɨ́ ngə́ bɨ máʼnə ayi a shiʼ ngyen atuəshe lá, wɛrə a tíʼ mbiʼnɨ a fúrɨ́ mangye wa a jwínɨ́ a mɔn mbáŋnɨ́ wa lá.

¹⁴ Bɨ ghá mɨbabɨnɨ mi mɨmbá mə təkɔʼ bɨ azám a mbó mangye wa taŋ á wɛrə a li ngɛn adiʼ zɨ a mu mɨkɨghonɨ, adiʼ wa bɨ mɨ lə̌tú nɨ zɨ atú ɨlom tsi tárə́ nɨ akum ə. Adzaŋ məwen, dragɔn mɨ keʼ nɨ abárɨ́ bə ntsi a ngɨ anu a tɨbɔŋ zə tsɛrə wə ɨnye ə.

¹⁵ Dragɔn a tíʼ twɔ́kɨ́ nkyi a ntsu zɨ wa ɨ fínɨ́ a mɨzam a ndzum mangye wa, taŋ nkyi wa ɨ kwə́ŋnɨ́nə́ lá ɨ kwəŋ ayi ngɛn nɨ zɨə.

¹⁶ Lá atuəshe a kwátɨ́ a mangye wa ɨ ŋaʼ ntsu ɨyi ɨ myi nkyi wa ɨ fúnɨ́ a ntsu dragɔn wa lá.

¹⁷ Ntɔŋ dragɔn lánɨ́ ndwi a nye mangye wa, wɛrə a tiʼ ndo ngɛn a ntó abvuʼ a ɨbɛn bɨ ɨlə̌ mangye wa, bo ba bɨ zúʼnɨ́nɨ́ ntɨgə Ŋwi nkə́ ndzɔ̌ŋ nkənu za Yeso a kyɛ́ʼnɨ́ lá nɨ táʼ ntəm ə. Dragɔn a tíʼ ntɛ́m a ngə́rɨ́ sagɨrə wu ngwi ə.