Matyo 8 - Mɨkan wu Fi

Yeso a Tsuʼ a Ŋwɔn Mbáŋnɨ́ wu Tse ghe

¹ Mbáʼ Yeso a shíʼnɨ́ atú ntáʼ wa lá, ɨnɔ ɨnɔ ɨbɛn ɨ zɔ́ŋ ayi ɛ.

² Ŋwɔn atəchwen wu tse a yén nkwem mɨkwiʼtɨ ɨmyi a ɨshi zɨ ɨ soŋ ngə́, “Tə̧, be a bɔŋ a mbó gho, o chi ghɨ á ma shwetə.”

³ Yeso a tságɨ́ abó azhi ɨ mɔmtɨ ayi ɨwu, ɨ soŋ ngə́, “A bɔŋ a mbó me ghe; fɛmə!” Ŋwɔn wa a byí shwétɨ́ a mbó nɨghɔ nɨ atəchwen ɨni ɛ.

⁴ Yeso a tíʼ sóŋ wəmbo ngə́, “Njimbɨʼ o soŋ anu zə tsɛrə a mbó ŋwɔn tsɛrə ghe; lá ghɛn ndiʼ atuəmbəm azo a mbó ntumshe; nkɨ nga ɨdzúm tsə ghanɨ tsə mɨtsuʼnɨ mɨ atú ma Mǒse a sóŋnɨ́ ngə́ á bɨ ngǎ lá, tso alisɨ a mbó ɨbɛn bɨtsum ngə́ o shwetə.”

Yeso a Tsuʼ Ngaŋ Afaʼ Tantso Bɨgwe Nkɨ wu Fɨgɨnɨ ə

⁵ Adzaŋ za wɛrə a kónɨ́ a Kabɛrɨnaum lá, tantso bɨgwe nkɨ wu fɨgɨnɨ a yén nkwátɨ́ ayi, mbuʼ mbó wəmbo

⁶ ɨ soŋ ngə́, “Tə̧, ŋwɔn afaʼ ɨghan a byinkɨ ɨ nɔŋ a ndá, ndzǔʼ ndzaŋə be tɨsɨŋə.”

⁷ Yeso a sóŋ wəmbo ngə́, “Ma mɨ ghɛn tsuʼ ayi ɛ.”

⁸ Lá tantso bɨgwe nkɨ wu fɨgɨnɨ wa a chwɨ́gɨ́ ngə́, “Tə̧, ma sa kuʼnɨ a nkwárɨ́ gho a ndá me ghe; nyám soŋ tsɛʼ ngə́ á shwetə, a mɨ kɨ shwetə.

⁹ Me mboŋ, ma kɨ mbe ŋwɔn wa ma tsinɨ nɨ ɨtú tsa tsɨ sáʼnə́ aghan nkɨ ntsi nɨ bɨgwe ba ma sáʼnə́ awa ghe. Ma soŋ a mbó gwe wa wu tse ngə́, ‹Ghen!› a ghen; ma soŋ a mbó wu mɔʼɔ ngə́, ‹Yiŋə!› a yiŋə; ma soŋ a mbó abuʼ azan ngə́, ‹Ghɨ lə!› a kɨ ngɨ tsɛʼ mə lá.”

¹⁰ Mbáʼ Yeso a zúʼnɨ́ a məzen lá, a kɨ́ʼnɨ́ ayi tsɛʼ nkə; a bə́nkɨ́ ayi ɨ soŋ a mbó ɨnɔ ɨbɛn wa ɨ kɨ́nə́ ndzɔŋə ayi lá ngə́, “Ma sóŋə́ awɨŋ ə, ka ma zɛ́nə aghan abeməntəm tso zɛnə ghe, kə́ be a mu Izrai tsum ə!

¹¹ Ma sóŋə́ awɨŋ ə, bə ghaʼnɨ ghɨ lo a sáʼnyom bo ntsonyom ɨ yen shiʼtɨ tsi atú atɛkɨ bo bɨ Abraʼm, Isak bo Yakɔb a mu nɨdorɨ a mu Nɨfɔ nɨ fɔməbvurə ghe.

¹² Lá ɨbɛn ba bɨ benɨ tsi a mu Nɨfɔ məna, bɨ mɨ tyiŋ awa ɨ tsagɨ a mu ndzumnɨ, á bɨ tsi ɨwu mbúgə́ nkə́ nkfúrɨ́ mɨsɔŋ ɨma ghe.”

¹³ Yeso a tíʼ sóŋ a mbó tantso bɨgwe nkɨ wu fɨgɨnɨ wa ngə́, “Ghen; a mɨ be tsɛʼ adzaŋ za o nɨŋnɨ ntəm ɨgho ɨwu lá.” Ŋwɔn afaʼ ɨyi wa byí nkɨ́ shwétɨ́ tsɛʼ a nyom məwa.

Yeso a Tsuʼ Ɨbɛn bə Ghaʼnɨ ə

¹⁴ Yeso a yén nkón a mu ndá Bita, ndzɛn a nyɔŋ Bita a nɔŋ a ɨkon ngǒ nɨ ɨfɛgɨ wu tɨŋə.

¹⁵ Yeso a mɔ́mtɨ́ abó azhi, ɨfɛgɨ wu tən wa byi nyɛʼtɨ ayi, a lo atɨ́ ntiʼ ntaŋtɨ nɨghan ɨni ɛ.

¹⁶ A nkwɛfɔ məwa, bɨ yén nɨ ɨbɛn a ɨnɔ wəmbo ba bɨ tsínɨ́ nɨ bɨdzɨŋ a mu ɨnye ɨtsa ghe. Yeso a lɔ́gɨ́ lá tsɛʼ nɨgham nɨ ntsu ɨni ɨ fɨgɨ ɨzhwi tɨbɔŋ tsa ɨwu, nkɨ ntsuʼ a ŋwɔn tsum wa a kɨ́nə́ ngǒ ghe.

¹⁷ Wɛrə a ghɨ́ a məzen lá taŋ á kɔ́ʼ mbomnkɨ bo bɨ anu za ntom Ŋwi Asaya ɨ sóŋnɨ́ ngə́, “Wɛrə zɨmboŋ a kwárɨ́ ndzaŋə ɨzɨgɨnə nkɨ mbyɛʼ mɨghɔ ɨmɨgɨnə ghe.”

Ba bɨ Tsinɨ ɨ Ghɨ Zɔŋ a Yeso ghe

¹⁸ Mbáʼ Yeso a zɛ́nɨ́ ɨnɔ ɨbɛn wa ɨ kárɨ́nɨ́ ayi lá, wɛrə a sóŋ a mbó bɨyɛʼ ɨbyi ngə́ á bɨ daŋ ngɛn a ndzɨŋ sagɨrə wa zɨ mɔʼɔ ghe.

¹⁹ Ndiʼ Nyɔngɔŋ wu tse a kɔ́ʼ ngyen ɨ soŋ wəmbo ngə́, “Ndiʼ aŋwaʼnɨ, ma mɨ zɔŋ agho adiʼ atsum za o mɨ ghen.”

²⁰ Yeso a sóŋ wəmbo ngə́, “Bɨnɨmaŋ tsi nɨ mɨngvo, bɨsɨ́ŋ tsi nɨ mɨnkə, lá Mɔn Ŋwɔn a se tsi nɨ adiʼ za a chinɨ nɔŋ ɨwu ɨ zhwitə.”

²¹ Wu mɔʼɔ ngyɛʼ a sóŋ wəmbo ngə́, “Tə̧, nyɛʼtɨ á ma fom ngɛn ntwəŋ a ta ɨghə.”

²² Lá Yeso a chwɨ́gɨ́ wəmbo ngə́, “Zɔŋ aghə, ɨ nyɛʼtɨ á bɨkfú twəŋ ɨkfú ɨbɛn ɨtsa ghe.”

Yeso a Bɔrɨsɨ a Kɨfɛrɨ Wu Ntɨŋ ə

²³ A ghɨnə nkón ntsí a mu abáŋ a nkyi za bɨyɛʼ ɨbyi zɔŋ nkuŋə.

²⁴ Mɨmboŋnɨ kɨfɛrɨ wu ntən a zhwúʼ ntsa a mu sagɨrə wa, adzaŋ za mbáʼ nkyiɛ yiŋənɛmə kɨ́nə́ ntsɔ́ʼ abáŋ a nkyi za nkɔʼə mbɨ́ŋə́ shiʼə nɨ zɛrə; lá Yeso a lyenə ayi ɛ.

²⁵ Bɨyɛʼ bɨ Yeso tíʼ ngɛn ndzɛm ayi, ɨ soŋ ngə́, “Maʼmbyí, loŋ awɨgɨ ə, bɨgɨ tsi a ntsu nɨvwo ə!”

²⁶ Yeso a bítɨ́ awa ngə́, “Nɨ bɔ́gə́ lá mbɨ́ʼ ake le? Abeməntəm azən a kɨ́gɨ́ be tɨsɨŋə!” A tíʼ ndo ngamtɨ a kɨfɛrɨ wa bo nkyiɛ yiŋənɛmə wa; ɨdiʼ tiʼ mbɔnɨ ngə́ tum.

²⁷ A kɨ́ʼnɨ́ ɨbɛn, bo bitɨ ngə́, “A nɨ abə́ŋ a ŋwɔn ake a zen mbáʼ atsum a zúʼnɨ́nə́ ayi ɨ ghɛn kuʼ a nye kɨfɛrɨ bo nkyiɛ yiŋənɛmə lá le?”

Yeso a Tsuʼ Mbáŋnɨ́ tsi Bá tsa tsɨ Tsínɨ́ nɨ Bɨdzɨŋ ə

²⁸ Mbáʼ Yeso a yénɨ́ nkón alaʼ bə Gadara a ndaŋ ndzɨŋə sagɨrə wa lá, ɨbɛn bə tse bi bɨbá ba bɨ fúnɨ́ a mu mɨfúʼ ma bɨ kɨ́nə́ ntwə̌ŋ ɨkfú ɨbɛn ɨwu lá, bɨ bom ayi ɛ. Ɨbɛn ben bɨ tsí nɨ bɨdzɨŋ a mu ɨnye ɨtsa ghe. Ma lan, bo kə́ ntsɛ́gə́ a nye ndóm wa ŋwɔn tse a chínɨ́ keʼ zhwəŋtɨ a ntsǎ a ndóm məwa ə.

²⁹ Mbáʼ bo bómnɨ́ a Yeso lá, bo byí ntɔ́nkɨ́ mbitɨ ngə́, “Mɔn Ŋwi, bɨgɨnə tsi lá nɨ anu ake le? O yen ɨghan lá a nɨ́ŋ ngɨ́ʼ a nye bɨgɨ bɔŋ á nkfu za ɨ kuʼnɨnɨ ɨ yen le?”

³⁰ A kárɨ́kɨ́ adiʼ məwa, akarɨ a bɨkəkfunyam a tsí ɨwu ndzɨə ghe.

³¹ Ma lan, bɨdzɨŋ ba búʼtɨ́ mbó a mbó Yeso ɨ soŋ ngə́, “Be o fɨgɨ awɨgɨ, tsagɨ awɨgɨ a mu akarɨ a bɨkəkfunyam zhirɨ ə.”

³² A tíʼ sóŋ a mbó bo ngə́, “Ghɛnə.” Ma lan, bo fú ntiʼ nkón a nye bɨkəkfunyam ba. Akarɨ za atsum a zhwúʼ ɨ shiʼ abaŋ za ɨ sɔ́ʼ awa a mu sagɨrə wa ɨ shwimnkɨ ɨwu ə.

³³ Ɨbɛn ba bɨ kɨ́nə́ ntsǐŋ bɨkəkfunyam ba bɨ kɨ́ə ngɛn a mu ntáʼmbagə wu wi nkərɨ anu atsum nkwiʼtɨ a za a fúnɨ́ a nye ɨbɛn ba bɨ tsínɨ́ nɨ bɨdzɨŋ ba a mu ɨnye ɨtsa lá.

³⁴ Ma lan, ŋwɔn tsum a mu ntáʼmbagə wu wi wa tíʼ fú ngyén mbom a Yeso; bɨ zɛnə ayi, ntiʼ mbuʼtɨ mbó wəmbo ngə́ á fu ayi a mu alaʼ bo ghe.