Matyo 6 - Mɨkan wu Fi

Yeso a Diʼ Anu mbɨ́ʼ Ngǎ Akwatɨ a mbó Ɨbɛn ba bɨ Lɔnə Akwatɨ ə

¹ “A nɨ lə ɨtú ɨtsən nkeʼ ngɨ̌ ɨnu tsɨ shiʼnɨ tsa Ŋwi a lɔnə asaŋəsaŋ taŋ á ɨbɛn zɛn awɨŋ ə. Be nɨ ngɨə ma lan asaŋəsaŋ muŋ nɨ mɨ keʼ nɨ mɨkyaŋnɨ a mbó Ta ɨwən wa a tsinɨ a fɔməbvurə chyɛ.

² Ma lan, be nɨ tɨ ghǎ akwatɨ a mbó ŋwɔn wa a lɔnə akwatɨ, nɨ keʼ ntaŋ a ntɔ́ŋə́ a mbyi bən tso mbáʼ ngaŋ ngɨ̌ ɨtsi ghɨnə a mu ndáŋwi bə Yuda abɔʼnɨ bɨkɔŋ lá. Bo ghɨə ma lan lá taŋ á ɨbɛn mbóntə́ awa ghe. Tsɛʼ a nkənu, bo kwarɨnɨ nkáb afaʼ ɨza tsum ə.

³ Lá nɨ tɨ kwátɨ́ ɨbɛn ba bɨ lɔnə akwatɨ, nɨ ghɨnə a zɛrə a nye ndóm wa tsɛʼ mbɔŋ ɨson ɨgho wa a fatɨnɨ agho tsɛʼ nkan a chi keʼ a zɛrə zhyɛ.

⁴ A mɨ tiʼ be anu a nkubə ghe. Ta ɨwən, zɨ wa a zɛ́nɨ́ ɨnu tsa nɨ ghɨnə a nkubə, a mɨ tiʼ kyaŋ awɨŋ ə.”

Yeso a Diʼ Anu mbɨ́ʼ Atsaʼtɨ a Ŋwi ə

⁵ “Nɨ tɨ tsaʼtɨ a Ŋwi, nɨ keʼ be tso ngaŋ ngɨ̌ ɨtsi ə! Bo kɔŋ ntɛmə ɨ tsaʼtɨ a Ŋwi a mu ndáŋwi bə Yuda abɔʼnɨ ɨtú bɨkɔŋ, taŋ á ɨbɛn ndzě awa ghe. Tsɛʼ a nkənu, bo kwarɨnɨ nkáb afaʼ ɨza tsum ə.

⁶ Lá be nɨ tɨ tsaʼtɨ a Ŋwi, nɨ kon ngɛn a mu ndá ɨtsən nkubɨnɨ ntsu ndá ntsaʼtɨ a Ŋwi a mbó Ta ɨwən wa ka bɨ ndzě ayi ayi ɛ. Ta ɨwən wa a zɛ́nɨ́ ɨnu tsa nɨ ghɨnə a nkubə, a mɨ tiʼ kyaŋ awɨŋ ə.

⁷ Be nɨ tɨ tsaʼtɨ a Ŋwi nɨ keʼ númə́ sógɨ́rɨ́ ɨnu tɨ ɨnu tso mbáʼ Bɨtɨbeməŋwi ghɨnə, bo ba bɨ wiʼtɨnɨ ngə́ bɨŋwi ba zǔʼ ɨtsaʼtɨ ɨtsa mbɨ́ʼ ngə́ tsɨ sagɨ lá.

⁸ Njimbɨʼ nɨ be tso bo ghe. Ta ɨwən a zhi ɨnu tsa nɨ lɔnə mbɔŋə nɨ tiʼə mbítə́ ayi ɛ.

⁹ Nɨ ntíʼə ntsaʼtə a Ŋwi ngə́: ‹Ta ɨwɨgɨ a fɔməbvurə: A ɨbɛn nkɔ́ʼsɨ́ ɨkum ɨgho wu fɛmnɨ atɨ́;

¹⁰ á Nɨfɔ ɨno yiŋə; á tsi atuəshe tso mbáʼ a tsinɨ a fɔməbvurə lá.

¹¹ Gha mɨdzɨ ma bɨgɨ lɔnə a mbó bɨgɨ ɨ sɨŋə ghe.

¹² Lɨgɨnɨ mɨbvu ma bɨgɨ ghɨnə, tso mbáʼ bɨgɨ kɨ́nə́ ndɨ́gɨ́nɨ́ mɨbvu mɨ ɨbɛn bə mɔʼɔ ma bo fanə a nye bɨgɨ ə.

¹³ Koʼ nyɛʼtɨ á bɨgɨ ghɨ ɨbvu mbáʼ be bɨ kwaʼnɨ awɨgɨ, lá kwarɨ awɨgɨ a mbó Wu Ntɔmnɨnɨ wa.›

¹⁴ Be nɨ lɨgɨnɨ mɨbvu ma ɨbɛn ghɨnə a nye bən, muŋ Ta ɨwən a fɔməbvurə a mɨ kɨ lɨgɨnɨ ɨmɨŋ mɨbvu ə.

¹⁵ Lá be nɨ tú lɨgɨnɨ mɨbvu mɨ ɨbɛn bə mɔʼɔ, muŋ Ta ɨwən a fɔməbvurə a mɨ keʼ ɨmɨŋ mɨbvu kɨ ndɨgɨnə.”

Yeso a Diʼ Anu mbɨ́ʼ Nchigɨ Nji Tsə Ntsaʼtɨ Ŋwi ə

¹⁶ “Be o nchígɨ́ nji tsə ntsaʼtɨ Ŋwi, koʼ adzəŋnɨ a ndiʼə a ɨshi gho tso mbáʼ ngaŋ ngɨ̌ ɨtsi ghɨnə lá. Bo diʼə adzəŋnɨ a mɨshi bo lá taŋ á ɨbɛn zɛn ngə́ bo chigɨ nji tsə ntsaʼtɨ Ŋwi ə. Tsɛʼ a nkənu, ma sóŋə́ awɨŋ ə, bo kwarɨnə mɨtsɔʼnɨ mɨ afaʼ ɨma ghe.

¹⁷ Lá be o tɨ chigɨ nji tsə ntsaʼtɨ Ŋwi, sugɨ ɨshi ɨgho ndzɔʼ nɨ mɨvwurɨ nkɨ sha ɨnyɔŋ atú ɨtso,

¹⁸ taŋ á ɨbɛn bə mɔʼɔ chi keʼ zhi ngə́ o chigɨ nji tsə ntsaʼtɨ Ŋwi ə. A baŋnɨ nji tsɛʼ Ta ɨgho wa mbáʼ ka ŋwɔn tsɛrə a ndzě ayi ayi ɛ. Ta ɨgho wa a zɛ́nə́ anu za o ghɨnə a nkubə, a mɨ tiʼ kyaŋ agho ə.”

Yeso a Diʼ ngə́ á bɨ Ndě Afuʼ a Fɔməbvurə ghe

¹⁹ “A nɨ keʼ afuʼ a mbó ɨtumbəm ɨtsən lɛn atuəshe, adiʼ wa ɨsɛʼ bo ntsɛb mɨ tsənkɨ, á mɨzɛrə kɨ ngyen ndze.

²⁰ A nɨ baŋnɨ ndɛn afuʼ azən a fɔməbvurə, adiʼ wa ɨsɛʼ abɔʼnɨ ntsɛb chinɨ keʼ tsənkɨ, á mɨzɛrə keʼ kɨ mbɛʼ ndá nkon ndze.

²¹ Mbɨ́ʼ ngə́ o lě ntəm ɨgho lá tsɛʼ adiʼ wa afuʼ azo a tsinə.”

Yeso a Diʼ Anu mbɨ́ʼ Azúm za a Ghánɨ́ Nkaʼ a mbó Mbəmnye

²² “Ɨmɨgɨ lá nkaʼ mbəmnye ɨzo ghe. Ma lan, be ɨmɨgɨ ɨmo tsi ɨ shiʼnɨ, mbəmnye ɨzo tsum mɨ tsi nɨ nkaʼ ə;

²³ lá be ɨmɨgɨ ɨmo tú tsi ɨ shiʼnɨ muŋ mbəmnye ɨzo tsum mɨ tsi a mu ndzumnɨ ə. Be nkaʼ ɨnye ɨgho bəŋ ndzumnɨ, məza ndzumnɨ ɨ ghaʼ mbó ə!”

Yeso a Diʼ Anu mbɨ́ʼ Ɨdzúm tsa Bɨgɨnə Tsínə́ nɨ Tsɛrə ghe

²⁴ “Ka ŋwɔn tse a chi faʼ ayi a mbó bɨta bɨ afaʼ bi bɨbá ghe; a mɨ ban a táʼ, ɨ baŋnɨ kɔŋ a wu mɔʼɔ kə a shíʼtɨ́nə a ɨshe a ɨshi táʼ, ɨ baŋnə tságɨ́nə a wu mɔʼɔ ghe. O chi koʼ faʼə a mbó Ŋwi nkɨ mbe abuʼ a mbó afuʼ ə.

²⁵ Ma lan, ma sóŋə́ awɨŋ ə, koʼ ɨnye ɨzo a mbúʼə mbɨ́ʼ ntsi mbyi ɨzo, mbɨ́ʼ mɨdzɨ ma o mɨ dzɨ kə za o mɨ no, kə ɨtsɛʼ tsa o mɨ wəgə. Ntsi mbyi ɨzo se tsa mɨdzɨ, á mbəmnye ɨzo tsa ɨtsɛʼ le?

²⁶ Nɨ zě bɨsɨ́ŋ ben ba bɨ línə́ a mu ɨfɛgɨ lá: bo se mbǐ mɨdzɨ kə nkə́ fúʼə ngótə́ a mu mɨntaŋ mɨ mɨdzɨ ɨma ghe, lá Ta ɨwən a fɔməbvurə a dzɨ́gə́ awa ghe. Ndvuŋ ɨwɨŋ se tən ntsa wu bɨsɨ́ŋ ben le?

²⁷ Ɨwa ŋwɔn nɨ bən a chi kwiʼtɨ tsɛʼ mə tsəb a nye ndvuŋ njwi tsa Ŋwi a lɛ́nɨ́ wəmbo a atuəshe wen mbɨ́ʼ ngə́ a bǔʼ ɨnye ɨzhi le?

²⁸ Nɨ kə́ mbǔʼ ɨnye ɨtsən mbɨ́ʼ ɨtsɛʼ lá mbɨ́ʼ ake le? Nɨ ze bɨbaŋbaŋ ba bɨ kwínə́ a mu mɨbaʼ: bɨ se fáʼə kə ngɨ̌ ɨtsɛʼ ngwə́gə́ a nye bo ghe.

²⁹ Lá ma sóŋə́ a mbó bən ngə́ tsɛʼ Ɨfɔ Sanɨmɔ nɨ ɨdzúm ɨchi ɨtsum; a sé nɨ ɨtsɛʼ tsi tsa tsɨ bɔŋnɨ nkuʼ a táʼ baŋbaŋ wɛnə ghe.

³⁰ A wə́gə́ Ŋwi ngwəgɨ ɨtsɛʼ a nye ngyɛn — ngyɛn za mbáʼ o zɛ́nə́ sɨŋə ndo ndo ɨzo kɨ́káŋ, mbɨ́ʼ ngə́ bɨ tɔn nɨ ɨmugɨ ə. Be Ŋwi a boŋ lá abə́ŋ atsɛʼ ake a ngwə́gə́ a ɨnye bən le? Abeməntəm azən a kɨ́gɨ́ be tɨsɨŋə!

³¹ Ma lan, á nɨ keʼ ɨnye ɨtsən a mbúʼə ɨ sóŋə́ ngə́, ‹Ma mɨ dzɨ lá ake le?› Kə ‹Ma mɨ no lá ake le?› Kə ‹Ma mɨ wəgɨ ake le?›

³² Bɨtɨbeməŋwi númə́ ndǒ lá ɨdzaŋ ɨdzúm mətsiŋ ə. Ta ɨgho a fɔməbvurə a zhi ngə́ o lǒ ɨdzaŋ ɨdzúm mətsiŋ ə.

³³ Baŋnɨ ntɛgɨ atú azo be a nye ɨnu ɨtsum tsa tsɨ tsinɨ mbɨ́ʼ Nɨfɔ nɨ Ŋwi abɔʼnɨ ɨnu ɨtsum tsa Ŋwi a lɔnə a mbó gho, wɛrə a mɨ tiʼ gha ɨdzúm mətsiŋ ɨtsum a mbó gho ghe.

³⁴ Ma lan, koʼ ɨnye ɨzo a mbúʼə mbɨ́ʼ ɨzo, mbɨ́ʼ ngə́ ɨzo mɨ tsi nɨ ɨchi ɨnu a mbúʼ ɨnye mbɨ́ʼ a tsɛrə ghe. Koʼ kwiʼtɨ ngɨ́ʼ za sɨŋə a tsinɨ nɨ zɛrə ghe.”