Matyo 2 - Mɨkan wu Fi

Bɨghən ba bɨ Lónɨ́ a Sáʼnyom ə

¹ Bɨ jwí a Yeso lá a ntáʼmbagə Bɛtrəʼɛm a mu Mbuʼ Yudiya, a nkfu wa Ɛrɔd a bénɨ́ ɨfɔ ghe. Abaŋ a benə ɨwu tsɛʼ nanə, mbáŋnɨ́ tsɨ tse tsa tsɨ kɨ́nə́ ngyɛ́ʼ ɨnu mbɨ́ʼ mɨndzɔŋ ló a sáʼnyom ngɛ́n a Yerosalɛm,

² mbitɨ ngə́, “Mɔn wa bɨ jwinɨ mbáʼ a nɨ Ɨfɔ bə Yuda lá a mé le? Bɨgɨ zé fɨndzɔŋ fa fɨ fúnɨ́ a ndiʼə ngə́ bɨ jwi ayi, a nkfu za fɨ fúnɨ́ a sáʼnyom ə. Bɨgɨ tiʼ ngyen lá a ngúʼsɨ́ wɛrə ghe.”

³ Mbáʼ Ɨfɔ Ɛrɔd a zúʼnɨ́ a məzen lá, anu zə wu a ghágɨ́ ayi tsɛʼ nkan nkwiʼtɨ a ŋwɔn tsum a Yerosalɛm ə.

⁴ Wɛrə a tɔ́ŋ bɨntumshe bə wi abɔʼnɨ bɨdiʼ bɨ Nyɔngɔŋ ngotɨ awa táʼ adiʼ, mbitɨ awa ngə́, “Bɨ tsí nɨ njwi Wa bɨ Zɔ́ʼnɨ́ lá ɨ ghé le?”

⁵ Bo chwɨ́gɨ́ ngə́, “A Bɛtrəʼɛm a mu Mbuʼ Yudiya ghe. Mbɨ́ʼ ngə́ anu za ntom Ŋwi za ɨ ŋwáʼnɨ́nɨ́ a zɛnə, ngə́:

⁶ ‹Bɛtrəʼɛm, a mu ɨshe Yudaʼ, ka o be agho ntáʼmbagə zɨ ngwi za ɨ kɨgɨnɨ ntsa ntáʼmbagə tsɨ wi ɨtsum a mu Yudaʼ ghe; mbɨ́ʼ ngə́ ɨsáʼlaʼ a ghɨ lo a mbó gho wa a ghɨnɨ tsɨŋnɨ ɨbɛn ɨban, bə Izrai ghe.›”

⁷ Ma lan, Ɛrɔd a tíʼ ntɔ́ŋ bɨghən ba bɨ lónɨ́ a sáʼnyom lá a ngǒtə a ndzum nkubə, ntiʼ ntsɔʼnɨ aku a mbó bo a nyom wa fɨndzɔŋ fa fúnə́.

⁸ Wɛrə a tíʼ ntsagɨ awa a Bɛtrəʼɛm nɨ ntɨgə tsen ngə́, “Nɨ ghɛn ɨ númə́ ndǒ a mɔn wa tsɛʼ a nɨyerɨnɨ nɨyerɨnɨ, nɨ zɛn ayi, nɨ yen soŋ a mbó me taŋ á ma chi kɨ ghɛn ghúʼsɨ́ ayi ɛ.”

⁹ Bo zuʼnə anu za ɨfɔ wa a sóŋnɨ́ lá, ntiʼ ngɛn awa ghe. A ndómnji bo zé fɨndzɔŋ fa bo zɛ́nɨ́ a sáʼnyom lá, fɨ kə́ ngěn a mbyi bo, ndáʼ ngɛ́n ntɛ́m atú adiʼ za mɔn wa a tsínɨ́ ɨwu ə.

¹⁰ Mbáʼ bo zɛ́nɨ́ fɨndzɔŋ fa lá, ntiʼ ntsi nɨ nɨdorɨ nə wi be tɨsɨŋə;

¹¹ bo kón a ndá ndzɛ́n a mɔn wa a mbó Mɛrɨ nɨmi ɨyi, nkwem mɨkwiʼtɨ ɨma a tɨshe nguʼsɨ ayi ɛ. Bo ŋáʼtɨ́ ɨban ɨtsa ɨ fɨgɨ ɨzarɨ ɨdzúm tsɨ ghanɨ ɨwu mbáʼ tsɨ bénɨ́; ŋwaʼŋwaʼ, nyuʼtə atɨŋndvuŋ, abɔʼnɨ alyɛn nkyaŋ ayi ɨwu ə.

¹² Mbáʼ Ŋwi a sóŋnɨ́ a mbó bo a ndzɛm ngə́ á bo keʼ a mbó Ɛrɔd bə ngɛn lá, bo lɔ́gɨ́ ndómnji wə daŋ nkwɛn ngɛn alaʼ bo ghe.

Yosɛb a Lɔgɨ a Mɛrɨ bo Yeso bo bo Kɨə Ngɛn Alaʼ Gyibto ghe

¹³ Mbáʼ bɨghən ba ghɛ́nə awa lá, ntsendá Ŋwi zɨ Maʼmbyí fú a ɨshe a ndzɛm mbáʼ Yosɛb a kɨ́nə́ ndyě ɨ soŋ ngə́, “Ɛrɔd a mɨ lonə a mɔn wa taŋ ɨ zhwitɨ ayi ɛ. Ma lan, lo atɨ́ ndɔgɨ a mɔn wa bo nɨmi ɨyi á bɨŋ bo kɨə ngɛn Alaʼ Gyibto, ntsi ɨwu ɨ kɔʼ kuʼ nkfu za ma mɨ soŋ ngə́ á nɨ lo adiʼ məwa.”

¹⁴ Yosɛb a ló atɨ́, ndɔgɨ a mɔn wa bo nɨmi ɨyi nɨ ɨtfúʼ, bo bo ghɛn a Alaʼ Gyibto,

¹⁵ ntiʼ ntsi ɨwu nkuʼnɨ nkfu wa Ɛrɔd a kfónə́. Məzen a fú lá taŋ á kɔʼ mbomnkɨ bo za Maʼmbyí a kwɛ́nə sóŋ ntsa a ndzum ntom Ŋwi ngə́, “Ma tɔ́ŋ a mɔn ɨghan ɨ fɨgɨ ayi Alaʼ Gyibto ghe.”

Bɨ Zhwitɨ Ɨbɔ ə

¹⁶ Ɛrɔd a ghɨnə njí ngə́ bɨghən ba bɨ lónɨ́ a sáʼnyom lá bɨ támtɨ́ ayi, ntɔŋ ɨyi lánɨ́ ndwi tsɛʼ a nkə. Wɛrə a ghá ntɨgə ngə́ á bɨ zhwitɨ ɨbɔ mbáŋnɨ́ bɨtsum a mu Bɛtrəʼɛm abɔʼnɨ mbuʼ za tsum ba bɨ lvúŋnɨ́ mbiʼnɨ a nye táʼ njwi ɨ kɔʼ kuʼ a nye ɨlom tsi bá ghe — bɨ ghɨ́ a məzen lá mbɨ́ʼ anu za wɛrə a zúʼnɨ́ a mbó bɨghən ba mbɨ́ʼ nkfu za fɨndzɔŋ fa fúnɨ́ a ɨshe.

¹⁷ Adzaŋ məwen, anu za ntom Ŋwi Wemɨyɛrə a kwɛ́nɨ́ sóŋ a tíʼ mbé nkənu ngə́:

¹⁸ “Bɨ zúʼ nji zɨ tse a Rama, nji za ɨ búgɨ́nə́ tsɛʼ nɨvwo nɨvwo ə. Reshɛl a búgə́ mbɨ́ʼ ɨbɔ ɨbyi; ka wɛrə a mbémə́ ayi ngə́ á bɨ lɛtɨ ayi mbɨ́ʼ ngə́ bo kfokə.”

Yosɛb, Mɛrɨ bo mɔn wa Lo Alaʼ Gyibto mbə Mbən awa ghe

¹⁹ Mbáʼ Ɛrɔd a kfónɨ́ lá, ntsendá Ŋwi zɨ Maʼmbyí ɨ fú a ɨshe a ndzɛm mbáʼ Yosɛb a kɨ́nə́ ndyě Alaʼ Gyibto,

²⁰ ɨ soŋ ngə́, “Lo atɨ́, ndɔgɨ a mɔn wen bo nɨmi ɨyi, mbə mbən ngɛn a ɨshe Izrai, mbɨ́ʼ ngə́ ɨbɛn ba bɨ kɨ́nə́ ndǒ njwitɨ wɛrə lá bɨ kfokɨnə ghe.”

²¹ Ma lan, Yosɛb a ló atɨ́, ndɔgɨ a mɔn wa bo nɨmi ɨyi ngɛn a Izrai ghe.

²² Lá Yosɛb a ghɨnə ndzúʼ ngə́ Akelɔsɨ a dzɨ́ ndá ta ɨyi Ɛrɔd ntiʼə sáʼə a Yudiya, wɛrə a bɔ́gɨ́ ngěn ɨwu ə. Bɨ bə́ nkwiʼ nkwiʼtɨ ntɨgə a mbó wɛrə a ndzɛm, ma lan, wɛrə a tíʼ ngɛn a mu Mbuʼ Galili

²³ ntiʼ ngvu njwuʼ ɨzhi a mu ntáʼmbagə tse wa ɨkum ɨyi bénɨ́ Nazarɛ ghe. Ma lan, ɨnu tsa ntóm Ŋwi kwɛ́nɨ́ sóŋ tíʼ mbe nkənu ngə́: “Bɨ ghɨ tɔŋnə ayi ngə́ ŋwɔn bə Nazarɛ ghe.”