Matyo 12 - Mɨkan wu Fi

Abítɨ Mbɨ́ʼ Njwi Alaʼ Ŋwi ə

¹ Abaŋ a bənə mbe ɨwu, Yeso ghantɨnə ntsǎ ayi a mu mɨshwom mɨ mɨsaŋ mə tse a Njwi Alaʼ Ŋwi ə. Nji kə́ ndzǎŋ bɨyɛʼ ɨbyi, bo tiʼ mbiʼnɨ ɨ fágɨ́ nchwi, nkwítə́, nkfúrə́ ghe.

² Mbáʼ bə Farisao zɛ́nɨ́ a məzen lá, ɨ soŋ a mbó Yeso ngə́, “Ze azo, a nɨ ɨ fasɨ Nyɔngɔŋ ɨwɨgɨnə a mbó bɨyɛʼ ɨbo a ngɨ məzen a Njwi Alaʼ Ŋwi ə!”

³ Yeso a chwɨ́gɨ́ ngə́, “Njingə nɨ bvurɨ tɨ tɔŋ anu za Ɨfɔ Devidɨ a ghɨ́nɨ́ a nkfu za nji gháʼnɨ́ ayi bo bɨ ɨbɛn ɨbyi lá le?

⁴ A báʼtɨ́ mbé afənu a mu Nyɔngɔŋ ɨwɨgɨnə ngə́ á ŋwɔn adaŋədaŋə, tɨ be ntumshe a nkfurɨ abán məza lá, Devidɨ a kón ngɛn a mu ndá za a nɨ zɨ Ŋwi, ndɔgɨ abán za bɨ ghánɨ́ a mbó Ŋwi, nkfurɨ, nkɨ nga nɨ ɨbɛn ɨbyi ɛ. A tsí tsɛʼ bɨntumshe a nkfúrɨ́ abán məza ə.

⁵ Kə nɨ bvurɨ awən tɨ tɔŋ a mu Nyɔngɔŋ Mǒse ngə́ a Njwi Alaʼ Ŋwi tsum, bɨntumshe a Ndáŋwi zɨ Ngwi lánə́ fásə́ a Nyɔngɔŋ Njwi Alaʼ Ŋwi, lá mbvurɨ anu zə tse tɨ fan le?

⁶ Ma sóŋə́ awən ngə́ anu zə tse a tsi ɨghan ntsa Ndáŋwi zɨ Ngwi ə.

⁷ Aŋwaʼnɨ a Ŋwi a soŋ ngə́, ‹Ma lǒ lá a mɨlɨŋnɨ keʼ be mɨtsuʼnɨ mɨ atú be.› Nɨ be lanɨ zhi anu za nɨgham niŋ diʼnɨ, muŋ ka nɨ soŋə awən ngə́ ɨbɛn ba bɨ se ɨsáʼ vwo bɨ vwo ɨsáʼ;

⁸ mbɨ́ʼ ngə́ Mɔn Ŋwɔn a nɨ Maʼmbyí, nkwiʼtɨ atú Njwi Alaʼ Ŋwi ə.”

Mbáŋnɨ́ zɨ tse za ɨ Tsínɨ́ nɨ Akfo Abó ə

⁹ Yeso a nyɛ́ʼtɨ́ adiʼ za nkón ngɛ́n a mu ndáŋwi bə Yuda ghe.

¹⁰ Ɨwu, Ŋwɔn tse a tsí ɨwu nɨ akfo abó ə. Ɨbɛn bə tse tsí ɨwu ba bɨ kɨ́nə́ ndǒ nkaŋ Yeso ngə́ a fə anu, ma lan, ntiʼ mbitɨ ayi ngə́, “Nyɔngɔŋ ɨwɨgɨnə a diʼ ngə́ á bɨgɨnə tsuʼ a ŋwɔn a Njwi Alaʼ Ŋwi le?”

¹¹ Yeso a chwɨ́gɨ́ ngə́, “A mɨ be ɨ nə́ mbáʼ be mbyindzɨ ŋwɔn nɨ bən ɨ vwo a mu abɨ́ a nkyi zə shwinɨ a Njwi Alaʼ Ŋwi le? O mɨ koʼ chwa ɨ fɨgɨ a zɛrə a ntáʼ le?

¹² A nkwiʼtə, ndvuŋ ŋwɔn mɨsɔŋ a ntsu tsa wu mbyindzɨ be tɨsɨŋə! Ma lan, Nyɔngɔŋ ɨwɨgɨnə a nyɛʼtɨ ngə́ á bɨ nkwátɨ́ ɨbɛn a Njwi Alaʼ Ŋwi ə.”

¹³ Yeso a tíʼ sóŋ a mbó ŋwɔn wa nɨ akfo abó za ngə́, “Shiŋ abó azo ə.” A shíŋ a zɛrə, abó za a tiʼ shwetɨ wədiʼ, mbə ntiʼ nyaʼ ntsi tso zə mɔʼɔ ghe.

¹⁴ Bə Farisao tíʼ ndo ntiʼə nkə́mnə́ akyaŋtɨ a njwítɨ́ Yeso ghe.

Ŋwɔn Afaʼ wa Ŋwi a Tsɔʼnə

¹⁵ Mbáʼ Yeso a zúʼnɨ́ a mɨnaŋ wa bɨ kɨ́nə́ nkyáŋtə́ mbɨ́ʼ ayi lá, a ló ayi adiʼ wa; ɨnɔ ɨbɛn tiʼ ndzɔŋ ayi ɛ. Wɛrə a tsúʼ ngaŋ mɨghɔ mɨtsum

¹⁶ nkwantɨ awa ngə́ njimbɨʼ bo soŋ anu zə tsɛrə a mbó ɨbɛn mbɨ́ʼ ayi ɛ.

¹⁷ A ghɨ́ a məzen lá taŋ á kɔʼ mbom bo anu za Ŋwi a kwɛ́nə soŋ ntsa a ndzum ntom Ŋwi Asaya ngə́:

¹⁸ “Ŋwɔn afaʼ ɨghan a wɛnə, wa ma tsɔʼnə, wa ma kɔŋnɨ, wa ɨnye ɨzə bɔŋnə wə ɨnye tsɛʼ nkə. Ma mɨ tsagɨ Azhwi azan wə ɨnye, a mɨ tiʼ chwitɨ Nɨsáʼ ɨnan a mbó ba a se bə Yuda be ə.

¹⁹ A mɨ keʼ kwənkɨ kə ɨ tɔnkɨ, kə ɨ gham mɨgham nɨ nji zɨ ntən a mu bɨkɔŋ ə.

²⁰ Wɛrə a mɨ mɛtɨ ntsənkɨ ɨbɛn ba bɨ kwɛnə mbɨ́gɨ́ awa, ɨ kɨ tsi nɨ akômɨlɨŋnɨ a nye ɨbɛn ba bɨ tsinɨ a ntsu nɨvwo ə. A ghɨ keʼ kán ɨ kɔʼ kuʼ nkfu za wɛrə a ghɨnɨ ghɨ á nɨsáʼ nə chinɨnɨ tsi ɨdiʼ ɨtsum,

²¹ ɨbɛn bɨtsum ghɨ nɨ́ŋ ntsiŋə nɨ ntəm tsum ɨza wə ɨnye ə.”

Bɨ Tɔŋ a Yeso ngə́ Bɛlzɛbu ə

²² Ɨbɛn bə tse tíʼ ngyen a mbó Yeso nɨ ɨfɨgɨ za ɨ kɨ́nɨ́ nkɨ́ mbé akəkúgɨ́ mbɨ́ʼ ngə́ a tsí nɨ dzɨŋ ə. Yeso a tsúʼ a ŋwɔn wa, a tiʼ nchi gham ɨ kɨ ze ɨdiʼ ə.

²³ Anu za Yeso a ghɨ́nɨ́ lá a kɨ́ʼnɨ́ ɨnɔ ɨbɛn wa, bo tiʼ mbitɨ ngə́, “Lə chi be Mɔn ɨlə̌ Devidɨ le?”

²⁴ Mbáʼ bə Farisao zúʼnɨ́ a məzen lá, nchwɨgɨ ngə́, “A fɨ́gɨ́ bɨdzɨŋ lá tsɛʼ mbɨ́ʼ ngə́ ɨfɔ bɨdzɨŋ Bɛlzɛbu a ghǎ mɨtən wəmbo ngə́ á ngɨə mə lá.”

²⁵ Yeso a zhí anu za bo kɨ́nə́ ngwíʼtə́ ntiʼ soŋ a mbó bo ngə́, “Alaʼ atsum za a yɛbtɨnɨ atuəmbəm azhi achwirɨ achwirɨ, ntǒkə́ bo nɨbo, a chi keʼ tsi a nye abaŋ zə sa ghe. Ntáʼmbagə tsum kə ngwəgɨ tsum za mbáʼ ɨ yɛbtɨnɨ atuəmbəm azhi achwirɨ achwirɨ, ntǒkə́ bo nɨbo, ɨ mɨ dzagɨnə.

²⁶ Ma lan, be táʼ achwirɨ a ntǒkə́ a zə mɔʼɔ a mu nɨfɔ nɨ Satan, məzen a diʼ lá ngə́ nɨ yɛbtɨnə a achwirɨ achwirɨ, a bvurɨ tsɛʼ mɨnyiə á nɨ dzagɨnə.

²⁷ Nɨ soŋ ngə́ ma fɨ́gɨ́ bɨdzɨŋ mbɨ́ʼ ngə́ Bɛlzɛbu a ghǎ mɨtən ngə́ á ma ghɨ mə lá. A bɔŋ tsɛʼ nkə, a tiʼə nkə́ ngǎ ɨwa ngǎ mɨtən a mbó ɨbɛn ba bɨ zɔŋnə awən a fɨ́gɨ́ bɨdzɨŋ le? Anu za ɨbɛn ba bɨ zɔŋnə awɨŋ ghɨnə diʼ ngə́ nɨ fə!

²⁸ Ngáŋ, ka a be ayi Bɛlzɛbu, a lá be Azhwi a Ŋwi mbáʼ a ghánɨ́ mɨtən a mbó me a fɨ́gɨ́ bɨdzɨŋ, ndiʼ lá ngə́, Nɨfɔ nɨ Ŋwi binə ngyen a mbó bɨŋ ə.

²⁹ Ŋwɔn tse a chi keʼ bɛʼ ndá ntən ɨ fúʼ ɨdzúm ɨchi, tɨgha a byigɨ mbyi nkorɨ a ntən wa; a nyom məwa, a chi tiʼ fúʼ ndá wɛrə ghe.

³⁰ Ŋwɔn tsum wa mbáʼ a se bɨgɨ zɨ tsi, a lánə́ ntǒkə́ aghə; ŋwɔn tsum wa a se tsi bɨgɨ zɨ nkwátə́ aghan a ngótə́, a lánə́ ndzágə́ ghe.

³¹ Ma lan, ma tiʼə soŋə a mbó bən ngə́ bɨ chi lɨgɨnɨ mɨbvu mɨtsum ma ɨbɛn ghɨnɨ abɔʼnɨ ɨnu tsɨ tɔmnɨnɨ ɨtsum tsa bo sóŋnə́; lá ŋwɔn tsum wa a soŋnɨ ɨnu tsɨ tɔmnɨnɨ nkwənkɨ Azhwi zə Fɛmnɨ, Ŋwi a láʼ keʼ mɨbvu ɨmyi lɨgɨnə.

³² Ŋwɔn tsum wa a soŋnɨ anu zə tse nkwənkɨ a Mɔn Ŋwɔn nɨ zɛrə, Ŋwi a chi lɨgɨnɨ ɨbvu ɨyi ɛ; lá ŋwɔn tsum wa a soŋnɨ anu zə tse nkwənkɨ Azhwi zə Fɛmnɨ, wɛrə a láʼ keʼ ɨbvu ɨyi lɨgɨnɨ tɨtsɔŋnɨ, ɨ láʼ keʼ kɨ mbe.”

Bɨ Zhyɛ Atɨ lá a nye Mɨntam ɨmyi ɛ

³³ “Be o tsi nɨ mɨntam mɨ atɨ mə shiʼnɨ, lá be ngə́ mɨ zagɨ ndo lá a nye atɨ zə shiʼnɨ ə; be o tsi nɨ atɨ a tɨbɔŋ, lá be ngə́ o mɨ tsi nɨ mɨntam mɨ atɨ mə tɨbɔŋ ə. Bɨ zhyɛ̌ atɨ lá a nye abə́ŋ a mɨntam za a kónɨ́nə́ ɨwu ə.

³⁴ Bɨŋ mɨnyo — nɨ chi soŋ ɨnu tsɨ shiʼnɨ lá ɨ nə́ mbáʼ nɨ nɨ bɨntɔmnɨnɨ lá le? Mbɨ́ʼ ngə́ ntsu ɨ sóŋə́ lá a za a lonɨ a mu ntəm ə.

³⁵ Ŋwɔn wu shiʼnɨ a fɨ́gɨ́ ɨdzúm tsɨ shiʼnɨ lá a mu nɨlɛnɨ nɨ ɨdzúm tsɨ shiʼnɨ tsa tsɨ tsinɨ a mu ntəm zɨə; ŋwɔn tɨbɔŋ a fɨgɨnɨ ɨdzúm tɨbɔŋ lá a mu nɨlɛnɨ nɨ ɨdzúm tɨbɔŋ tsa tsɨ tsinɨ a mu ntəm zɨə.

³⁶ Nɨ chi zhi ɨ shiʼnɨ ngə́ a Njwi Nɨsáʼ ŋwɔn tsum a lo bə́rɨ́ mɨto ɨmyi, ɨ fɨʼtɨ anu za a ghɨ́nɨ́ a gham anyaʼnɨ a nɨgham atsum za a láʼnə ngamə.

³⁷ Bɨ ghɨ lɔgɨ mɨgham ɨmo ɨ sáʼ agho nɨ mɛrə ghe — a ntɛ́gɨ́nə́ ngə́ o dzɨ kə ngvo ɨsáʼ ə.”

Bɨ Bitɨ Anu zə Yerɨnɨ-yerɨnɨ ə

³⁸ Bɨdiʼ bɨ Nyɔngɔŋ abɔʼnɨ bə Farisao bə tse tíʼ sóŋ a mbó Yeso ngə́, “Ndiʼ aŋwaʼnɨ, bɨgɨ lǒ ndzě gho o ghɨ anu zə yerɨnɨ-yerɨnɨ ə.”

³⁹ Yeso a chwɨ́gɨ́ awa ngə́, “Bɨŋ ɨbɛn bɨ nɨwə nə sɨŋə, nɨ ghɨ̌ ɨnu tsɨ tɔmnɨnɨ nkeʼ mɨntəm ɨmən a nye Ŋwi kɨ nɨŋə! Nɨ bitɨ aghan nɨ anu zə yerɨnɨ-yerɨnɨ le? Ngáŋ! Anu zə yerɨnɨ-yerɨnɨ za be ma gha a mbó bən a nɨ zə ntom Ŋwi Yǒna ghe.

⁴⁰ Ndəŋndəŋ mbáʼ Yǒna a tsínɨ́ njwi bo mɨtfúʼ mɨntárə́ a mɨto ɨshwú zɨ ngwi za lá, Mɔn Ŋwɔn a ghɨ kɨ́ tsí njwi bo mɨtfúʼ mɨntárə́ a mbyishe ə.

⁴¹ A lo be a Njwi Nɨsáʼ, á ɨbɛn bɨ Ninive lo ntɛm nkaŋ awən, mbɨ́ʼ ngə́ bɛrə nyɛ́ʼ mɨbvu ɨma a nkfu za bɛrə zúʼnɨ́ anu a Ŋwi a mbó Yǒna lá; ma tiʼə soŋə a mbó bən tsɛʼ a nkənu ngə́ anu zə tse a tsi ɨghan ntsa a Yǒna ghe!

⁴² A lo be a Njwi Nɨsáʼ, á Ɨfɔ Mangye Alaʼ Shɛba a lo ntɛm nkaŋ awən, mbɨ́ʼ ngə́ zɨə yíŋ nɨyen nə sa ndo alaʼ zɨ ngyen a njwíʼtɨ́ adzaŋ za Ɨfɔ Sanɨmɔ a diʼnə a zóŋ ɨyi; ma tiʼə soŋə awɨŋ ə, anu zə tse a tsi ɨghan ntsa a Sanɨmɔ ghe!”

Nkfu za Azhwi zə Tɔmnɨnɨ a Bə́nɨ́ Mbɨŋə

⁴³ “Azhwi zə tɔmnɨnɨ a ghɨ fú a nye ŋwɔn lá, a númə́ nkárə́ a mu mɨkɨghonɨ ndǒ adiʼ zə zhwitɨnə. Be a tú adiʼ zɛn,

⁴⁴ a soŋ a mbó atuəmbəm azhi ngə́, ‹Ma mɨ bə ghɛn aghə a ndá me ghe.› Ma lan, be a bə́ ngɛn ndzɛn ndá za zɨ ndzobɨnɨ, ɨ fɛmə, bɨ kɨ nkyaŋtɨ ɨ shiʼnɨ,

⁴⁵ wɛrə a tiʼ fu ngɛn nghuŋ ɨzhwi tɨbɔŋ tsə daŋ tsi samba tsa tsɨ bɨ́gɨ́nɨ́ ntsa ayi, bo bo tiʼ ngyen ntsi ɨwu ə. A ndwitə, ŋwɔn məwa a bə mbɨ́gɨ́ ntsa adzaŋ za a kwɛ́nɨ́ mbé a mbiʼnə ghe. Nə nɨ adzaŋ za a ghɨnɨ fú a nye ɨbɛn bə tɔmnɨnɨ bə sɨŋə ghe.”

Nɨmi bɨ Yeso abɔʼnɨ Ɨbɔmbɨma bə Yeso bə Mbáŋnɨ́ ə

⁴⁶ Yeso a kə́ mbvúrə́ ngámə́ a mbó ɨbɛn ba mbáʼ ɨbɔmbɨma ɨbyi bə mbáŋnɨ́ abɔʼnɨ nɨmi ɨyi yénə́. Bo tɛ́m abyɛn, mbítə́ ngə́ be bo ghamnɨ bo bɨ Yeso ghe.

⁴⁷ Ma lan, táʼ ŋwɔn adiʼ məwa a tíʼ sóŋ a mbó Yeso ngə́, “Ze azo, nɨmi ɨgho bo bɨ ɨbɔmbɨma ɨbo bə mbáŋnɨ́ tɛm abyɛn, ndǒ ngamnə bɨŋ bo ghe.”

⁴⁸ Yeso a chwɨ́gɨ́ ngə́, “Nɨmi ɨghan a nɨ ɨwa le? Ɨbɔmbɨma ɨban bə mbáŋnɨ́ be bɨwa le?”

⁴⁹ A tíʼ sɨʼtɨ bɨyɛʼ ɨbyi ɨ soŋ ngə́, “Zɛnə! Nɨmi ɨghan bo bɨ ɨbɔmbɨma ɨban bə mbáŋnɨ́ bɨ benə!

⁵⁰ Ŋwɔn tsum wa a ghɨnə anu za Ta ɨghan a fɔməbvurə a lɔnə ngə́ á ghɨ, a nɨ mɨma ɨghan wu mbáŋnɨ́ kə mɨma ɨghan wu mangye kə nɨmi ɨghə.”