Matyo 10 - Mɨkan wu Fi

Ntóm Yeso tsa Nɨghúm ntsɔb bá ghe

¹ Yeso a tɔ́ŋ bɨyɛʼ ɨbyi nɨghúm ntsɔb bá ntiʼ nga mɨtən a nkɨŋ ɨzhwi tɨbɔŋ, ɨ tsuʼ mɨghɔ abɔʼnɨ ɨzaŋnɨ ɨtsum ə.

² Mɨkum mɨ ntóm Yeso tsa nɨghúm ntsɔb bá mɛnə: a ntsambyi, Samɔn mbáʼ bɨ tɔ́ŋnə́ ngə́ Bita, Andɨrɨya mɨma ɨyi; Jemsɨ bo Yoane ɨbɔ bɨ Zebɨdi;

³ Firɨbɔ bo Batəloma; Tɔməshi bo Matyo ngaŋ nkwarɨ ashɛbɨ; Jemsɨ mɔn Afasɨ, abɔʼnɨ Tadyo,

⁴ Samɔn Nkɔŋəlaʼ nɨ Yudasɨ Iskario wa a ghɨ́nɨ́ fen a Yeso ghe.

Za ba Nɨghúm ntsɔb bá Fúnɨ́ Abyɛn a Ndǒ ghe

⁵ Yeso a tyígɨ́ mbáŋnɨ́ tsa nɨghúm ntsɔb bá ghe. Wɛrə a kə́ ntyigə awa lá nga ɨtɨgɨtɨ tsenə a mbó bo ngə́, “A nɨ keʼ ghɛn a mu adiʼ a ba a se bə Yuda be zə tsɛrə, kə a mu ntáʼmbagə bə Samaria wu tsɛrə ghe.

⁶ Lá nɨ ghɛn be a mbó bə Izrai ba bɨ benɨ tso mbyindzɨ tsa tsɨ byenɨ lá.

⁷ Nɨ ghɛn ɨ númə́ sóŋə́ anu a Ŋwi ngə́, ‹Nɨfɔ nɨ fɔməbvurə tiʼ tsɛʼ abó ə.›

⁸ Nɨ tsuʼ mɨghɔ, nzhwemnɨ bɨkfú, ntsuʼ ɨtɨchwen nkɨ fɨgɨ bɨdzɨŋ ə. Ka nɨ zon awən mɨtən məmen ma nɨ mɨ faʼnə nɨ mɛrə lá nɨ nkáb ə, ma lan, á nɨ kə́ ngǎ a mɛrə tə́ nkwárɨ́ nkáb ə.

⁹ A nɨ keʼ nkáb tse tiʼtɨ,

¹⁰ kə aban a ngěn a nɨghan mənen, kə atsɛʼ zə daŋ, kə ngobɨ, kə mbaŋ; mbɨ́ʼ ngə́ ŋwɔn afaʼ tsum a tsi nɨ nchyɛ nɨ azúm atsum za a lɔnə ghe.

¹¹ Be nɨ ghɛn nkon a mu ntáʼmbagə tse kə atom zə tse, á nɨ tsɔʼnɨ aku a ŋwɔn ntəm wu shiʼnɨ wa a lɔnɨ nkwarɨ bən, ntsi bɨŋ bo ɨ kɔʼ kuʼ nkfu za nɨ mɨ nyɛʼtɨ adiʼ məza.

¹² Ndá tsum za nɨ konɨ ɨwu, á nɨ soŋ ngə́, ‹A mbɔnɨ tsi a mbó bɨŋ ə.›

¹³ Be ngaŋ ndá tsa kwarɨ awən ɨ shiʼnɨ, nɨ tsaʼtɨ a Ŋwi ngə́ á mbɔnɨ tsi a mbó ngaŋ ndá mətsa; lá be bo tú awɨŋ ɨ shiʼnɨ kwarɨ, atsaʼtɨ a mbɔnɨ azən ghɔŋ ayi a mbó bɨŋ ə.

¹⁴ Be ndá tse kə ntáʼmbagə zɨ tse ton a nkwárɨ́ bən, kə ɨ zuʼ a mbó bən, nɨ lo adiʼ məwa, nkfutɨ abvuŋnɨ a mɨku azən ɨwu ə.

¹⁵ Ma soŋə a mbó bən tsɛʼ a nkənu ngə́ a Njwi Nɨsáʼ, Ŋwi a lo diʼ akômɨlɨŋnɨ a mbó ɨbɛn bɨ Sodom bo Gomora ɨ keʼ be be a mbó ɨbɛn bɨ ntáʼmbagə məwa!”

Ndɨgə za ɨ Ghɨnɨ Yiŋə

¹⁶ “Zuʼnə! Ma tyigə awən lá tso ma tyigɨ mbyindzɨ ngə́ á tsɨ ghɛn nkwatɨ bəngwabaʼ ə. Nɨ tsi nɨ nchyɛ nɨ zóŋ tso mɨnyo ɨ kɨ bɔnɨ tso bɨbvugɨrə-fɨkon ə.

¹⁷ A nɨ lə ɨtú ɨtsən mbɨ́ʼ ngə́ ɨbɛn ghɨ kótɨ́nə́ awən, ɨ lɔgɨnə awən ɨ ghěn nɨ bən a ngɔʼ abyɛn, ɨ kə́ ləŋnə awən nɨ ngwan a mu ndáŋwi bə Yuda ghe.

¹⁸ Mbɨ́ʼ atú azan, bɨ ghɨ tɔ́ŋtɨ́nə abyɛn a nye bən a ɨshi bɨta bɨ ɨlaʼ abɔʼnɨ bɨfɔ, á tiʼ mbe abárɨ́ a mbó bən a sóŋ Nkən wu Shiʼnɨ a mbó bo abɔʼnɨ ba a se bə Yuda be.

¹⁹ Be nɨ shiʼtɨ ntsi a ngɔʼ abyɛn, á nɨ keʼ mbǔʼ ɨnye ɨtsən mbɨ́ʼ anu za nɨ mɨ soŋ kə adzaŋ za nɨ mɨ soŋə; nkfu ghɨ́ ngyen muŋ nɨ mɨ tsi nɨ anu zə soŋə.

²⁰ Mbɨ́ʼ ngə́ ɨnu tsa nɨ mɨ soŋ, tsɨ mɨ keʼ ɨtsən be; Azhwi a Ŋwi Ta ɨwən a fɔməbvurə ghɨ ghamnə a ntsǎ a ndzum bɨŋ ə.

²¹ Ɨbɔmbɨma bə mbáŋnɨ́ ghɨ tíntɨ́ ɨbɔmbɨma bə mbáŋnɨ́ ɨ gha á bɨ zhwitɨ, á bɨtarɨ ghɨ ndəŋndəŋ a nye ɨbɔ ɨba; á ɨbɔ bənkɨ awa a nye bɨta ɨba nkɨ ngɨ á bɨ zhwitɨ a bɛrə ghe.

²² Ŋwɔn tsum a ghɨ ban awən mbɨ́ʼ atú azə. Lá ŋwɔn tsum wa a chigɨnɨ ntəm ɨ ghɛn kuʼ a ndwitə, bɨ ghɨ loŋ ayi ɛ.

²³ Be bɨ dɨgɨ awən a mu ntáʼmbagə zɨ tse, nɨ kɨə ngɛn a nye zɨ mɔʼɔ ghe. Ma sóŋə́ awən tsɛʼ a nkənu ngə́ Mɔn Ŋwɔn a mɨ yen bɔŋ á nɨ mɛtɨ ɨfaʼ ɨwən ɨtsum a mu ntáʼmbagə Izrai ɨtsum ə.

²⁴ Ka ngyɛʼ a tsa ayi a ndiʼ aŋwaʼnɨ ɨyi; abuʼ a keʼ a tabuʼ ɨyi kɨ ntsaə.

²⁵ A kuʼnɨ a mbó ngyɛʼ a mbé tso ndiʼ aŋwaʼnɨ ɨyi, nkɨ mbe ndəŋndəŋ mbáʼ be abuʼ a tsi nɨ mɨtən tso tabuʼ ɨyi ɛ. Be bɨ tɔŋ a tanjwuʼ nɨ Bɛlzɛbu, bɨ ghɨ tɔ́ŋ ɨbɛn bɨ ngwəgɨ za nɨ mɨkum ma mɨ bɨ́gɨ́nɨ́ ntsa lá!”

Ŋwɔn wa o Tsinɨ nɨ Mbɔgə ghe

²⁶ “Ma lan, á nɨ keʼ a ŋwɔn mɨsɔŋ a ntsu tse a mbɔ́gə́ ghe. Anu atsum za bɨ bɔmtɨnɨ tɨtsɔŋnɨ, bɨ ghɨ shwirə, anu a nkubə atsum á tiʼ ntsi asaŋəsaŋ ə.

²⁷ Anu za ma fɨʼtɨnə a mbó bən a ndzumnɨ nɨ tsi nɨ ɨ zagɨ soŋ a zɛrə a ntɨŋə azhwɨgɨnɨ, anu za nɨ zuʼnɨ a nkubə nɨ tsi nɨ ɨ tiʼə chwítɨ́nə a zɛrə be a mɨtan ə.

²⁸ A nɨ keʼ mbɔ́gɨ́ ɨbɛn ba bɨ zhwítɨ́nɨ́ mbəmnye lá nchi keʼ a gharɨ zhwitə; nɨ baŋnɨ mbɔgɨ be a Ŋwi, zɨ wa a chinɨ zhwitɨ mbəmnye bo gharɨ a mu ɨmugɨ nɨnkoŋ ə.

²⁹ Bɨ fǐŋ ŋchwaŋə tsi bá lá tsɛʼ nɨ táʼ kaba ghe, lá ka táʼ anchwaŋə a ngvǒ ayi a tɨshe tɨgha Ta ɨwən a fɔməbvurə a zhyɛ.

³⁰ A mbó bən, tsɛʼ ɨnyɔŋ atú tsa tsɨ tsinɨ atú bən bɨ kwaʼnə a tsɛrə ɨtsum ə.

³¹ Ma lan, á nɨ keʼ mbɔ́gə́ ghe; ndvuŋ ɨwɨŋ tsi atɨ́ ntsa wu ɨnɔ ŋchwaŋə ghe!”

Ɨsoŋə ngə́ o Nɨŋ Ntəm ɨgho a nye Kristo nɨ ɨ kɨ Ton ayi ɛ

³² “Mbɨ́ʼ ngə́ ŋwɔn tsum wa a bemnɨ anu azan asaŋəsaŋ, ma ghɨ kɨ́ bém anu azhi a ɨshi Ta ɨghan a fɔməbvurə ghe.

³³ Lá be ŋwɔn tse a tón aghan asaŋəsaŋ, ma ghɨ kɨ́ tón ayi a ɨshi Ta ɨghan a fɔməbvurə ghe.”

Yeso a Yiŋə lá be nɨ Azɔŋ nkeʼ Mbɔnɨ be

³⁴ “A nɨ keʼ wiʼtɨ ngə́ ma yen lá a ngɨə á mbɔnɨ tsi a mu mbyi ɛ. Ngáŋ, ma sá yen lá ngə́ á mbɔnɨ chyɛ, ma yén be nɨ ndum ə.

³⁵ Ma yén lá a ngɨə á ɨbɔ mbáŋnɨ́ kwənkɨ bo bɨ bɨta ɨba, á ɨbɔ bəngye kwənkɨ bo bɨ bɨmá ɨba, á bəngye bɨ ɨbɔ kwənkɨ bo bɨmabɨŋ ɨba ghe;

³⁶ á ngaŋ kɨban ŋwɔn tsɨ tən be ngaŋ ngwəgɨ ɨchi ɛ.

³⁷ Ɨbɛn ba bɨ kɔŋnɨ a ta ɨwa kə a nɨmi ɨwa ntsa aghan, bɨ se kuʼnɨ a mbe bɨyɛʼ ɨbə; ɨbɛn ba bɨ kɔŋnɨ a mɔn ɨwa wu mbáŋnɨ́ kə a wu mangye ntsa aghan, bɨ se kuʼnɨ a mbe bɨyɛʼ ɨbə.

³⁸ Ŋwɔn tsum wa a se byɛʼ abaŋnɨ-baŋnɨ azhi ndzɔŋ ɨbɨŋ mɨku ɨtsan, a se kuʼnɨ a mbé ngyɛʼ ɨghə.

³⁹ Ŋwɔn tsum wa a zhwəŋtɨnɨ a ndoŋ ntsi mbyi ɨzhi, a mɨ byɛgɨ a zɛrə ghe; lá ŋwɔn tsum wa a byɛgɨnɨ ntsi mbyi ɨzhi mbɨ́ʼ atú azan, a mɨ sə́ŋ a zɛrə ghe.”

Mɨkyaŋnɨ ə

⁴⁰ “Ŋwɔn tsum wa a kwarɨnɨ awɨŋ ɨ shiʼnɨ a kwarɨ lá aghə; ŋwɔn tsum wa a kwarɨnɨ aghan ɨ shiʼnɨ a kwarɨ lá a ŋwɔn wa a tyígɨ́nɨ́ aghə.

⁴¹ Ŋwɔn tsum wa a kwarɨnɨ ntom Ŋwi ɨ shiʼnɨ mbɨ́ʼ ngə́ a nɨ ntom Ŋwi, a ghɨ kɨ́ tsí nɨ bagɨ mɨkyaŋnɨ mɨ ntom Ŋwi za. Ŋwɔn tsum wa a kwarɨnɨ a ŋwɔn wu shiʼnɨ mbɨ́ʼ ngə́ a nɨ ŋwɔn wu shiʼnɨ a ghɨ kɨ́ tsí nɨ bagɨ mɨkyaŋnɨ mɨ ŋwɔn wu shiʼnɨ wa.

⁴² Nɨ tsi nɨ njiɛ tsɛʼ a nkənu ngə́ ŋwɔn tsum wa a ghanɨ tsɛʼ ndɔ́ŋ nkyi zɨ shwetɨnɨ a mbó táʼ ngyɛʼ ɨghan wen wu tse wa a kɨgɨnɨ ntsa bɨtsum, a ghɨ zagɨ tsi nɨ mɨkyaŋnɨ ɨmyi ɛ.”