Marɨkusɨ 15 - Mɨkan wu Fi

Bɨ Lɔgɨ a Yeso Ngɛn nɨ zɨ a Ɨshi Branto ghe

¹ Tsɛʼ mbáʼ njwi byínɨ́ ndán, bɨntumshe bə wi, bɨkum abɔʼnɨ bɨdiʼ bɨ Nyɔngɔŋ nɨ Ngaŋ Saʼ abyɛn bɨtsum kɨ́ənɨ́ ngwɛm ngǒtə́, ngɨ akyaŋtɨ aza ghe. Bo kórɨ́ a Yeso, ntiʼə ntíntə́, ngɛn nga a mbó Branto ghe.

² Branto a tíʼ mbítɨ́ ayi ngə́, “O nɨ Ɨfɔ bə Yuda le?” Yeso a chwɨ́gɨ́ ayi ngə́, “Adzaŋ za o soŋnɨ lá.”

³ Bɨntumshe bə wi kə́ nkaŋə ayi mbɨ́ʼ ɨnu tsɨ ghaʼnɨ ə.

⁴ Ma lan, Branto a kwíʼ mbítɨ́ ayi ngə́, “O so nɨ achwɨgə a ngá tsi le? Zuʼ ndvuŋ ɨnu tsa bɨ kaŋnə agho mbɨ́ʼ a tsɛrə ghe!”

⁵ Lá Yeso a sé anu zə tse kwiʼ mbə́ sóŋə́. A tíʼ nkɨʼnɨ a Branto ghe.

Bɨ Soŋ ngə́ Yeso a Vwo Ɨsáʼ, Ntsi nɨ Nkfo ghe

⁶ A yén mbé mbɔm ngə́ a nkfu Nɨdorɨ nɨ Tsa-yɛʼnɨ, Branto a kə́ fɨ́gə́ a táʼ ŋwɔn atsáŋ wa bə Yuda bítɨ́nɨ́ wəmbo ə.

⁷ A nkfu məwa, ŋwɔn tse wa ɨkum ɨyi bénɨ́ Barabasɨ a tsí atsáŋ bo bɨ bɨngvugɨ ndum ba bɨ zhwítɨ́nɨ́ ɨbɛn ə.

⁸ Ɨnɔ ɨbɛn wa ghɨnə ngótɨ́ a ɨshi Branto, ɨ bíʼnɨ́ sóŋə́ ngə́ ghɨ tsɛʼ adzaŋ za o kwɛnə njwɨ́gə́ ngɨə lá.

⁹ A bítɨ́ awa ngə́, “Nɨ lǒ ngə́ á ma fɨgɨ a Ɨfɔ bə Yuda nga nɨ bən le?”

¹⁰ Wɛrə a zhí ɨ shiʼnɨ ngə́ bɨntumshe bə wi tíntɨ́ a Yeso nga nɨ zɨ lá mbɨ́ʼ aghɨʼnɨ ə.

¹¹ Lá bɨntumshe bə wi tótɨ́ ɨnɔ ɨbɛn wa ngə́ á bo soŋ á Branto a baŋnɨ fɨgɨ be a Barabasɨ a mbó bo ghe.

¹² Branto a bə́ nkwiʼ mbitɨ awa ngə́, “Nɨ tiʼə ndǒ ngə́ á ma ghɨ lə nɨ ŋwɔn wa nɨ tɔ́ŋnə́ ngə́ Ɨfɔ bə Yuda lá le?”

¹³ Bo tɔ́nkɨ́ mbyigɨ wə ntsu ngə́, “Kwemtɨ ayi atɨ abaŋnɨ-baŋnɨ ə.”

¹⁴ Branto a tíʼ mbítɨ́ ngə́, “Lá ɨbvu wa a ghɨnɨ a nɨ wɨŋə le?” Lá bo kwíʼ ntɔ́nkɨ́ ngɛn nɨ mbyi ngə́, “Kwemtɨ ayi atɨ abaŋnɨ-baŋnɨ ə!”

¹⁵ Ma lan, mbɨ́ʼ ngə́ Branto a kə́ ndǒ ngɨə á ɨnye ɨnɔ ɨbɛn wa ɨ bɔŋ, a tíʼ fɨ́gɨ́ a Barabasɨ nga nɨ bo; ntiʼ ndəŋ a Yeso nɨ ngwan ntiʼ mbəŋ ayi nga ngə́ á bo ghɛn nkwemtə.

Bɨgwe Werɨ a Yeso ghe

¹⁶ Bɨgwe tíʼ ndɔgɨ ayi ngɛ́n nɨ zɨ a mu saŋntɔ́ʼ gobɨna; ntiʼ ngon akarɨ a bɨgwe aza bɨtsum ə.

¹⁷ Bo tíʼ ngwə́gɨ́ atsɛʼ za a bvúrɨ́nɨ́ a mbaŋə zə atɨŋndvuŋ wə ɨnye za a fínɨ́ a zə ɨfɔ, mbáʼ ɨsáʼfɔ nɨ ndzɔŋ ndzɔŋ ngwəgɨ wu atú ə.

¹⁸ Bo chwúʼ ntíʼə ngwérə́ ayi adzaŋ za bɨ kɨ́nə́ ntsaʼtə ayi tso ɨfɔ, ɨ súgɨ́ ntɔ́ʼ ɨ sóŋə́ ngə́, “Kɔʼsɨnə a Ɨfɔ bə Yuda atɨ ə!”

¹⁹ Bo búʼ atú azhi nɨ mbaŋ, ntsərɨ mɨtwe wə ɨnye nkɨ ntiʼ nkwem mɨkwiʼtɨ ɨma wə ɨshi nguʼsɨ ayi a ngwerɨ zɨə.

²⁰ Bo ghɨnə mɛ́tɨ́ a ngwerɨ zɨ, ntiʼ ntsɔʼ atsɛʼ za a bvúrɨ́nɨ́ a mbaŋə lá, ntiʼ ngwəgɨ ɨchi wə ɨnye. Bo tíʼ ntíntɨ́ ayi ngɛn, ɨ ghɛn kwemtɨ ayi ɛ.

Bɨ Kwemtɨ a Yeso ghe

²¹ A ndómnji bo bóm a ŋwɔn wu tse wa ɨkum ɨyi bénɨ́ Samɔn ə. Samɔn məwen a ló ayi a mu alaʼ nkúŋə́ ngyíŋə́ a mu ntáʼmbagə wu wi, bɨgwe ba chwa ayi ɨ nyəm a wɛrə a byɛʼ abaŋnɨ-baŋnɨ a Yeso za. (Samɔn a bé ŋwɔn bə Sirin, mbe ta bɨ Alɛgɨsanda bo Rufusɨ ə.)

²² Bɨ lɔ́gɨ́ a Yeso ngɛn nɨ zɨ a nye adiʼ za bɨ kɨ́nə́ ntɔ́ŋə́ ngə́ Gɔlgɔta (ndiʼ lá ngə́ adiʼ aghɔʼrɨ atú ə).

²³ Bo nyám mɨluʼ nɨ afu za a ghɨnə atú a ŋwɔn a bvurɨnə bɨ tɔŋə ngə́ maya nga ngə́ á wɛrə a no; lá a ton ayi ɛ.

²⁴ Bo tíʼ nkwemtɨ ayi atɨ abaŋnɨ-baŋnɨ, ngyɛbtɨ ɨtsɛʼ ɨchi a tɨtərɨ bo ghe. Bo máʼ ndzɔʼ taŋ ɨ zhi abagɨ atsɛʼ za táʼ ŋwɔn a mɨ ghɛn nɨ zɛrə ghe.

²⁵ A ghɨ́ mbé lá bɨnyom bi nɨbvuʼə a tənjwi mbáʼ bɨ kwémtɨ́nɨ́ ayi ɛ.

²⁶ Abagɨ azúm za bɨ ŋwáʼnɨ́nɨ́ ɨwu nkaŋ ayi, bɨ ŋwáʼnɨ́ ngə́, “Ɨfɔ bə Yuda.”

²⁷ Bɨ kɨ́ nkwemtɨ nkákɨ́ mɨzɛrə bi bɨbá bo bɨ Yeso atɨ abaŋnɨ-baŋnɨ; táʼ a bagɨ abó zɨ zə dzɨnɨ, wu mɔʼɔ a bagɨ abó zɨ zə ntə́ŋ ə.

²⁸

²⁹ Bɨntsatsanɨ kə́ ngwerə ayi, nchǐʼ ɨtú tsa ɨ sóŋə́ ngə́, “Təbɛ́ʼ! Gho wa o chínɨ́ kum Ndáŋwi zɨ Ngwi ɨ bə vwu atú njwi tsi tárə́,

³⁰ loŋ lá atuəmbəm azo ɨ shiʼ ɨ gha atɨ abaŋnɨ-baŋnɨ ə!”

³¹ Ndəŋndəŋ bɨntumshe bə wi abɔʼnɨ bɨdiʼ bɨ Nyɔngɔŋ kɨ́ ngwerɨ ayi ɨ sóŋə́ ngə́, “A lóŋ ɨbɛn bə daŋ ə; a chi keʼ atuəmbəm azhi loŋə!

³² A bɨgɨnə ze a Wa bɨ Zɔ́ʼnɨ́, Ɨfɔ bə Izrai, á shiʼ atɨ abaŋnɨ-baŋnɨ tɨtsɔŋnɨ, bɨgɨnə mɨ tiʼ nɨŋ mɨntəm ɨmɨgɨnə wə ɨnye!” Ɨbɛn ba bi bɨbá ba bɨ kwémtɨ́nɨ́ awa bo bɨ Yeso lá kɨ́ ndzɔm ayi ɛ.

Adzaŋ za Yeso a Kfónə́

³³ Nyom a ghɨnə ntə́nɨ́, ndzumnɨ ɨ bɔm ɨdiʼ, nkubɨnɨ alaʼ za atsum nkɔʼ nkuʼ bɨnyom bɨtárə́ a ndzəŋ nyom ə.

³⁴ A nye bɨnyom bɨtárə́ a ndzəŋ nyom, Yeso a búgɨ́ nɨ nji zɨ ntən ngə́, “Elɔi, Elɔi, lama sabaktani?” ndiʼ ngə́, “Ŋwi ɨghan, Ŋwi ɨghan, o nyɛʼ aghan lá mbɨ́ʼ ake le?”

³⁵ Ɨbɛn bə tse ba bɨ tsínɨ́ ɨwu ndzuʼ bɨ sóŋ ngə́, “Zuʼnə, a tɔŋə Alaja ghe.”

³⁶ Táʼ ŋwɔn nɨbo a kórɨ́ a kuncha atú atɨ, ndɛrɨkɨ ntsub a mu tɨntsɛgɨ mɨluʼ, nkɔʼsɨ wə ntsu ngə́ á no, ɨ soŋ ngə́, “Tɛmnə! A bɨgɨnə zɛn ngə́ Alaja a mɨ yen shiʼsɨ ayi atɨ abaŋnɨ-baŋnɨ zen kə ngáŋ ə!”

³⁷ Yeso a búgɨ́ nɨ nji zɨ ntən, ntiʼ ntsəmə.

³⁸ Abagɨ atsɛʼ zə nkwasə za a tsínɨ́ a mu Ndáŋwi zɨ Ngwi a wánɨ́ ɨbagɨ tsi bá ndɔgɨnɨ atú ɨ shiʼ nkuʼ a shwúrɨ́ ə.

³⁹ Tantso bɨgwe nkɨ wu fɨgɨnɨ mbáʼ a tɛ́mnɨ́ wə ɨshi ndyiŋə adzaŋ za a kfónɨ́ a sóŋ ngə́, “Tsɛʼ a nkənu, ŋwɔn wɛnə a bé Mɔn Ŋwi ə!”

⁴⁰ Bəngye bə tse kɨ́ ntsí ɨwu, ntɛm nəghagɨ ndyíŋə́ ghe. A tɨtərɨ bo a tsí Mɛrɨ Matarɨna, Salome abɔʼnɨ Mɛrɨ nɨmi bɨ Jemsɨ mánkɨ́ə bo Yosɛb ə.

⁴¹ Bo kə́ ndzɔŋə a Yeso, nkwátə́ ayi nchwuʼnɨ a Galili ə. Bəngye bə mɔʼɔ bə ghaʼnɨ ba bɨ zɔ́ŋnɨ́ a wɛrə ɨ shiʼ ngyen nkon a Yerosalɛm kɨ́ ntsí ɨwu ə.

Adzaŋ za Bɨ Twə́ŋnɨ́ a Yeso ghe

⁴² A ghɨnə mbé a nkwɛfɔ, mbáʼ a bénɨ́ njwi akyaŋtɨ, bɔŋ á njwi ɨ lán a nye Njwi Alaʼ Ŋwi lá,

⁴³ Yosɛb ŋwɔn Arimatia wa a bénɨ́ táʼ ŋwɔn Ngaŋ Sáʼ Abyɛn nkɨ mbə mbe ŋwɔn wa bɨ kɨ́nə́ ndǐʼ mbɔm zɨ shiʼnɨ wəmbo, wa a kɨ́nə́ ntsǐŋ Nɨfɔ nɨ Ŋwi, a kórɨ́ ntəm ngɛn a mbó Branto, mbitɨ akfú a Yeso wəmbo ə.

⁴⁴ A kɨ́ʼnɨ́ a Branto mbáʼ wɛrə a zúʼnɨ́ ngə́ Yeso a kfónə ghe. Wɛrə a tíʼ ntɔ́ŋ a tantso bɨgwe nkɨ wu fɨgɨnɨ wa, mbitɨ ayi ngə́ abaŋ a ságɨ́nə́ mbáʼ Yeso a kfónə́ le.

⁴⁵ A ghɨnə ndzúʼ a ntsu tantso bɨgwe nkɨ wu fɨgɨnɨ wa ngə́ a kfónə́, ntiʼ nga akfú za a mbó Yosɛb ə.

⁴⁶ Yosɛb a zón abó atsɛʼ zə fú, ɨ shiʼsɨ akfú za, ndwɛrɨ ɨwu, ntiʼ ntwəŋ a mu nɨshe na nɨ bénɨ́ ɨfúʼ wa bɨ tóŋnɨ́ a mu aláŋsə́ ngɔʼ ə. Wɛrə a tíʼ mbɨ́ŋsɨ́ ngɔʼ nkubɨnɨ ntsu nɨshe wa ɨwu ə.

⁴⁷ Mɛrɨ Matarɨna bo Mɛrɨ nɨmi bɨ Yosɛb, bo zɛ́n adiʼ za bɨ nyɔ́ŋnɨ́ akfú a Yeso ɨwu ə.