Kolose 4 - Mɨkan wu Fi

¹ Bɨtafaʼ, á nɨ ntíʼtɨ́ ɨbuʼ ɨtsən a nye ndóm wa ɨ kuʼnɨnɨ nkɨ ntsi tɨ nkobɨ ə. A nɨ zhi ngə́ nɨ kɨ ntsi nɨ Tafaʼ a fɔməbvurə ghe.

Ɨtɨgɨtɨ ə

² A nɨ ntsáʼtə́ a Ŋwi tə nkyɛ́ntə́, ndáʼ nkeʼ ɨnye ɨtsən a ndɨ́gɨ́nə́, nkə́ ngǎ a mɨya a mbó Ŋwi ə.

³ A nɨ kə́ ntsáʼtə́ a Ŋwi mbɨ́ʼ awɨgɨ, taŋ á Ŋwi a gha abárɨ́ a mbó bɨgɨ a sóŋ nkən ɨyi mbáʼ ɨ ghamnə lá mbɨ́ʼ anu a nkubə zə Kristo ghe. Mbɨ́ʼ ngə́ a nɨ mbɨ́ʼ a zɛrə mbáʼ ma tsinɨ atsáŋ tɨtsɔŋnɨ ə.

⁴ A nɨ tiʼə ntsáʼtə́ a Ŋwi taŋ á ma chi gham, tsɛʼ adzaŋ za ma tsinɨ nɨ ngamə, a nye ndóm wa ɨ mɨ lə̌.

⁵ A nɨ tsi nɨ zóŋ a nye ndóm wa nɨ ghɨnɨ mɨnu bɨŋ bɨ ɨbɛn ba bo se nɨŋ mɨntəm ɨma a nye Ŋwi, ɨ fáʼə nɨ abárɨ́ atsum za nɨ tsinɨ nɨ zɛrə a nye ndóm wu shiʼnɨ ə.

⁶ A nɨ ngǎm mɨgham ma mɨ bɔŋnə ɨbɛn nkə́ ngɨə ɨnye ɨtsa shánə, á nɨ kɨ nji adzaŋ a ngá achwɨgə za a kuʼnɨnɨ a mbó ŋwɔn tsum ə.

Atɔ́ŋtɨ a Ndwɨgɨnə ghe

⁷ Mɨma ɨwɨgɨ wa bɨgɨ kɔŋnɨ tsɛʼ nkan Taichikusɨ, wa a faʼnə tsɛʼ nɨ táʼ ntəm, nkɨ mbe ŋwɔn wa bɨgɨ bo faʼnə afaʼ a Maʼmbyí, a mɨ soŋ nkən ɨtsum mbɨ́ʼ aghan a mbó bɨŋ ə.

⁸ Nə nɨ anu za ma tsagɨnə ayi a mbó bən, taŋ á wɛrə a yen ngɨ á ɨnye ɨzɨŋ ɨ sáŋnə́ adzaŋ za wɛrə a mɨ soŋ adzaŋ za ɨnu ghɛnə a mbó bɨgɨ ə.

⁹ Wɛrə a yiŋə bo Onesimusɨ, mɨma ɨwɨgɨnə wa a faʼnə tsɛʼ nɨ táʼ ntəm, bɨgɨnə kɨ nkɔŋ ayi tsɛʼ nkan, wa a kɨnɨ mbe ŋwɔn ngǒtə ɨzən lá. Bo mɨ soŋ ɨnu ɨtsum tsa tsɨ fúnə́ ɨghə.

¹⁰ Aristakusɨ wa a tsinɨ atsáŋ bɨgɨ zɨ a tsagə atsaʼtɨ a mbó bən, ndzɔŋ nkwiʼtɨ a Marɨkusɨ mɔn mɨma ta bɨ Banabasɨ ə. Nɨ kwɛnə nkwarɨ atɨgɨtɨ ngə́ be Marɨkusɨ a yen nkwatɨ awən, nɨ kwarɨ ayi ɨ shiʼnɨ ə.

¹¹ Yoshua wa bɨ kɨ́nə́ nkə́ ntɔ́ŋə́ ayi ngə́ Jusɨtusɨ a kə́ ntságə́ atɔ́ŋtɨ ə. Benə bi bɨtárə́ lá tsɛʼ bə Yuda ba bɨ nɨŋnɨ mɨntəm ɨma a nye Kristo ba ma faʼnə bɨgɨ bo a mbó Nɨfɔ nɨ Ŋwi ə. Bo ghǎ akwatɨ zə wi a mbó me ghe.

¹² Ebafrasɨ a kə́ ntɔ́ŋtə́ awɨŋ ə. Wɛrə nɨ táʼ ŋwɔn a mu ngǒtə ɨzən nkɨ mbe ngaŋ afaʼ Kristo Yeso ghe. Wɛrə a tsaʼtə a Ŋwi tsɛʼ nɨ ntəm ɨyi ɨtsum nkfu tsum mbɨ́ʼ awən, ndɔ́ntə́ a mbó Ŋwi ngə́ á wɛrə a ghɨ á nɨ tɛm ntɨŋə ngə́ twə́ŋ, nkwi, nkeʼ nɨ aməŋnɨ zə tsɛrə nyam ntsi mbɨ́ʼ ɨnɨŋ mɨntəm ɨzɨgɨnə a nye Kristo, nkɨ ntsi a mu ndzuʼnə a nɨ́lónɨ́ anu za Ŋwi a lɔnə ghe.

¹³ Ma nɨ atɛmə-ndzě wɛrə ngə́ wɛrə a faʼə nɨ adaʼ azhi atsum a mbó bən, nkwiʼtɨ a ba bɨ tsinɨ a Laodisia nɨ Irabolisɨ ə.

¹⁴ Alukasɨ, ŋwɔn ngaŋ ɨwɨgɨ wa bɨgɨ kɔŋnɨ tsɛʼ nkan bo Demasɨ tsagə atsaʼtɨ a mbó bɨŋ ə.

¹⁵ A nɨ tɔŋtɨ ɨbɔmbɨma ba bɨ tsinɨ a Laodisia abɔʼnɨ Nimfa abɔʼnɨ ndáŋwi za ɨ kónə́ a ndá wɛrə lá.

¹⁶ Be nɨ mɛtɨ a ntɔ́ŋ aŋwaʼnɨ zen, á nɨ zagɨ ndzɛn ngə́ bɨ kɨ ntɔŋ a zɛrə a ndáŋwi za ɨ tsinɨ a Laodisia lá. Ndəŋndəŋ, nɨ mɨ kɨ tɔŋ aŋwaʼnɨ za ɨbɔmbɨma ba bɨ tsinɨ a Laodisia mɨ tsagɨ a mbó bɨŋ ə.

¹⁷ A nɨ soŋ a mbó Achibusɨ ngə́, “Zɛn ngə́ o mɛtɨ ɨfaʼ wa bɨ ghánɨ́ a mbó gho a mu afaʼ a Maʼmbyí lá.”

¹⁸ Me Baolo, ma ŋwaʼnɨ atsaʼtɨ zen tsɛʼ me mboŋ nɨ abó azə. A nɨ keʼ lɨgɨnɨ ngə́ ma tsi a ndá atsáŋ ə! A abɔŋəntəm a Ŋwi a tsi a mbó bɨŋ ə.