Kolose 2 - Mɨkan wu Fi

¹ A ma soŋ awən nɨ adzaŋ za ma faʼnə nɨ adaʼ azə atsum a mbó bən, nkwiʼtɨ ɨbɛn ba bɨ tsinɨ a Laodisia nɨ ɨbɛn bə mɔʼɔ bɨtsum ba bɨ láʼnə mbvurɨ aghan me mboŋ tɨ ze.

² Ma ghɨə a məzen lá taŋ á bo kotɨ mbáŋnɨ́ ɨtsa, ntiʼ nchi kɨ ghótɨ́nə a mbúm a mu akɔŋnɨ ə. Ma lan, bo mɨ tiʼ tsi nɨ ngótɨ́ ndzuʼ kɨ zhi, adzaŋ məwen á nɨbɔgɨ nə tse keʼ ɨwu bə mbe. A nye ndóm məwen, bo mɨ zhi a za Ŋwi a lɛnɨ a nkubə, mbáʼ a lá Kristo zɨmboŋ ə.

³ Wɛrə lá akugɨ za a ŋáʼnɨ́ mɨntsu mɨndá mɨtsum mɨ afuʼ zə lwɛʼnɨ zə Ŋwi za a nɨ zóŋ abɔʼnɨ azhyɛ lá.

⁴ Ma tiʼə sóŋə́ a mbó bɨŋ ə, á ŋwɔn tse a keʼ awən tamtɨ nɨ mɨgham mɨ ndɛgɨ ma ka anu zə tsɛrə a tsi ayi ɨwu, kɔ́ŋ mɨ fi tso mɨ bɔŋ be lə́ ghe.

⁵ Mbɨ́ʼ ngə́ ma baʼtɨ nkaʼ tsi ɨ tsinɨ bɨgɨnə a nye mbəmnye lá, ma tsi bɨgɨnə a mu azhwi, nkə́ ndórə́ adzaŋ za nɨ kyáŋtɨ́nɨ́ ɨtumbəm ɨtsɨŋ ɨ shiʼnɨ nkɨ ntɛm ntɨŋə ngə́ twə́ŋ a mu abeməntəm azən a nye Kristo lá.

Nchyɛ̌ a mu Kristo Ghǎ Ntsi Ntən a Nɨ́lónɨ́ ə

⁶ Tso mbáʼ nɨ bemnə a Kristo Yeso tso Maʼmbyí lá, á nɨ nchyɛ̌ a mbúm bɨŋ bo ghe.

⁷ A nɨ twəŋ mɨngaŋ ɨmən a nye Kristo á bɨŋ bo tsi a mbúm, á ntsi mbyi ɨzɨŋ tsum ɨ zɛʼtɨ ayi wə ɨnye, ɨ nyɛʼtɨ abeməntəm azən á ntɨŋə tsɛʼ tənɨ adzaŋ za bɨ díʼnɨ́ awən lá. A nɨ ngǎ a mɨya a mbó Ŋwi tsɛʼ nkfu tsum ə.

⁸ A nɨ tiʼ ndzɛn ngə́ á ŋwɔn tse a keʼ ghɨ awən a nye ɨbuʼ ntsa a ndzum ntam tənu zóŋ ŋwɔn mɨsɔŋ a ntsu za ɨ lonə a nye ɨnu tsa ŋwɔn mɨsɔŋ a ntsu a diʼnə ndo a mbó bɨtarɨ nkon a mbó ɨbɔ nkɨ ndo a mbó ɨzhwi tsa tsɨ sáʼnɨ́ mbyi-mbyi tsum, nkeʼ be a mbó Kristo lo lá.

⁹ Mbɨ́ʼ ngə́ mbě Kristo tso ŋwɔn mɨsɔŋ a ntsu a nye mɨndóm mɨtsum sé kwebtɨ a nye mbě Ŋwi ə.

¹⁰ Bɨ kɨnə nkɨ nga ntsi ntən a nɨ́lónɨ́ a mbó bən a mbúm bɨŋ bo ghe. Wɛrə a tsi atú ɨzhwi ɨtsum abɔʼnɨ mɨtən mɨtsum ə.

¹¹ A mbúm bɨŋ bɨ Kristo, bɨ tsə́ŋ ɨlagɨ ɨtsən, nkeʼ ntsəŋ alagɨ za a tsəŋnə ŋwɔn mɨsɔŋ a ntsu be, lá mbe be ntsəŋ alagɨ za a tsəŋnə Kristo mbáʼ lá nkyɛtɨ mɨnkɨ mɨ abuʼ ma mbəmnye zɨ ɨbvu zen ɨ korɨnɨ awən ɨwu ə.

¹² Mbɨ́ʼ ngə́ a nkfu za nɨ kwárɨ́nɨ́ nkyi lá, bɨ twə́ŋ awən bɨŋ bɨ Kristo ghe. A nkwárɨ́ nkyi məwen, Ŋwi a kɨ́ nzhwémnɨ́ awən bɨŋ bɨ Kristo ntsa a ndzum abeməntəm azən a nye mɨtən mɨ Ŋwi ma mɨ faʼnə ghe. Ŋwi a zhwémnɨ́ ayi a mbó nɨvwo ə.

¹³ A nkfu tse nɨ bé tso nɨ kfókɨ́ mbɨ́ʼ mɨbvu ɨmən nkɨ mbe mbɨ́ʼ ngə́ nɨ bé ba a se bə Yuda be nkeʼ nɨ Nyɔngɔŋ wa chyɛ. Lá Ŋwi a lɔgɨnə awən ngyen nɨ bən a mu ntsi mbyi bɨŋ bɨ Kristo ghe. Ŋwi a lɨ́gɨ́nɨ́ mɨbvu ɨmɨgɨnə mɨtsum;

¹⁴ wɛrə a chíʼtɨ́ ɨnu tɨbɔŋ tsa bɨ ŋwánɨ́nɨ́ mbɨ́ʼ awɨgɨnə nkɨ nchiʼtɨ bɨnyɔngɔŋ ba bɨ kɨ́nə́ ngwɛmə awɨgɨnə ghe. Wɛrə a ghɨ́ ɨnu tɨbɔŋ mətsiŋ tiʼ ɨnu adaŋədaŋə adzaŋ za wɛrə a kwémtɨ́nɨ́ a tsɛrə atɨ abaŋnɨ-baŋnɨ ə.

¹⁵ Atɨ abaŋnɨ-baŋnɨ wa, Kristo a kyɛ́tɨ́ mɨnkɨ mɨ abuʼ a nye zɨmboŋ nkɨ nkwarɨ adaʼ ɨzhwi tɨbɔŋ tsa tsɨ sáʼnə́ a nɨkaŋ; ngaʼ awa ghe.

¹⁶ Ma lan, á ŋwɔn tse a keʼ ghɨ ntɨgə tsɨ tse mbɨ́ʼ azúm za nɨ dzɨ́nə́ kə ɨ nǒ kə njwi tsɨ fɛmnɨ kə mbɨ́ʼ Nɨdorɨ nɨ Saŋ wu Fi kə Njwi Alaʼ Ŋwi ə.

¹⁷ Ɨdzúm tsiŋ ɨtsum lá tsɛʼ nɨnɨŋənɨŋə ɨdzúm tsa tsɨ ghɨnɨ fuə; ngótɨ́ anu a lá Kristo ghe.

¹⁸ A nɨ keʼ nyɛʼtɨ ɨtumbəm ɨtsən á ŋwɔn tse a tsənkɨ awɨŋ ə. Ɨbɛn ba bɨ soŋnɨ ngə́ bo tsi atú atəntsánɨ́ mbɨ́ʼ ndzɛm nəzhwɨgɨnɨ, ba bɨ nyəmnə ngə́ á bɨ shíʼtə́ nɨ ɨnye a ɨshe a ngɨ ɨtsi nkə́ nyəmə ngə́ á bɨ ngúʼsɨ́ bɨtsen bɨ ndá bɨ Ŋwi lá. Ɨdzaŋ ɨbɛn tso mətsiŋ ŋǔʼ ɨnye tsa ɨtsum lá tsɛʼ atú adaŋədaŋə mbɨ́ʼ ngə́ bo kwaʼtɨ ɨnu lá tsɛʼ a nye ndóm wa ŋwɔn mɨsɔŋ a ntsu tsum a kwaʼtɨnə ghe.

¹⁹ Bo kyɛntɨnə a ndzúʼnɨ́ Kristo, zɨ wa a nɨ atú a mbəmnye za. Atú a tsɨŋnɨ mbəmnye tsum, ndzɨgə a zɛrə nkə́ mbósə́ a zɛrə táʼ adiʼ a nye mɨkyebɨnɨ mɨ ɨnye, ɨ tiʼə nkə́ nkwiə adzaŋ za Ŋwi a lɔnə ngə́ á ɨ nkwiə ghe.

Nkfǒ abɔʼnɨ Nchyɛ̌ Atú Ntən Bɨŋ Kristo ghe

²⁰ Nɨ kfonə bɨŋ bɨ Kristo ghe. Wɛrə a kɨnə nkɨ nkyɛtɨ mɨnkɨ mɨ abuʼ ma ɨzhwi tsa tsɨ sáʼnɨ́ mbyi-mbyi tsum korɨnɨ awən ɨwu ə. Ntsi mbyi ɨzɨŋ tiʼ ntsi tso nɨ tsi a mbó mbyi zen lá ngə́ ke le? Nɨ zúʼnɨ́ ntɨgə tsenə ngə́:

²¹ “Koʼ a zen tiʼtə”, “Koʼ a zhirɨ zhwiʼtɨ a ntsu”, “Koʼ a zɛnə mɔmtɨ” lá ngə́ ke le?

²² Bɨnyɔngɔŋ ben bɨtsum ghamə lá mbɨ́ʼ ɨdzúm tsa tsɨ bəŋnə ɨdzúm adaŋədaŋə mbáʼ be bɨ faʼ nɨ tsɛrə tsɛʼ táʼ nkfu; tsɨ lá tsɛʼ ntɨgə ŋwɔn mɨsɔŋ a ntsu abɔʼnɨ ɨnu tsa wɛrə a diʼnə ghe.

²³ Tsɛʼ a nkənu, ntɨgə mətsiŋ fi tso tsɨ zɛʼtɨ awa a nye zóŋ a nye adzaŋ za tsɨ nyəmnə ngə́ á bɨ ngúʼsɨ́ ɨtsendá Ŋwi, ɨ shíʼtə́ nɨ atuəmbəm azo a ɨshe a mu ɨtsi, abɔʼnɨ ngɨə á mbəmnye ɨzo ze ngɨ́ʼ; lá ka tsɨ tsi awa nɨ ngótɨ́ akwatɨ a mbó ŋwɔn wa a lɔnɨ ngwɛmtɨ ɨnye ɨzhi a nye ɨnu tsa mbəmnye lɔnə ghe.