Kolose 1 - Mɨkan wu Fi

¹ Aŋwaʼnɨ zen a lo a mbó me Baolo, me wa a ntsǎ a ndzum adzaŋ za Ŋwi a lɔnə, ma nɨ ntom Yeso zɨ Kristo Yeso, nkɨ ndo a mbó Timotyo mɨma ɨwɨgɨnə ghe.

² A ghěn a mbó ɨbɛn bɨ Ŋwi ba bɨ tsinɨ a Kolose, bo ba bo nɨ ɨbɔmbɨma ɨbɨgɨnə ba bɨ faʼnə tsɛʼ nɨ táʼ ntəm, ba bɨ tsinɨ a mbúm bo bɨ Kristo lá. A Ŋwi, zɨ wa nɨ Ta ɨwɨgɨnə a gha abɔŋəntəm abɔʼnɨ mbɔnɨ a mbó bɨŋ ə.

Atsaʼtɨ a Ŋwi zə Nga Mɨya ghe

³ Bɨgɨ ghǎ a mɨya nkfu tsum a mbó Ŋwi, zɨ wa nɨ Ta bɨ Maʼmbyí Yeso Kristo ɨwɨgɨnə a nkfu za bɨgɨ tsaʼtɨnə a Ŋwi mbɨ́ʼ awɨŋ ə.

⁴ Mbɨ́ʼ ngə́ bɨgɨ zuʼnə mbɨ́ʼ abeməntəm azən a nye Kristo Yeso abɔʼnɨ akɔŋnɨ azən a nye ɨbɛn bɨ Ŋwi bɨtsum ə.

⁵ A nkfu za nkən wu nkənu wa, Nkən wu Shiʼnɨ wa bɨ fómnɨ́ sóŋ a mbó bən, nɨ zúʼ mbɨ́ʼ ntsiŋə nɨ ntəm tsum za ɨ ghánə́ ghe. Ma lan, abeməntəm azən abɔʼnɨ akɔŋnɨ azən a tɛm lá atú anu za nɨ tsenə nɨ mɨntəm ɨmən mɨtsum, mbáʼ Ŋwi a lɛnɨ ɨ shiʼnɨ a mbó bən a fɔməbvurə lá.

⁶ Nkən wu shiʼnɨ yiŋə nɨ ɨfɔgə nkə́ ndzágɨ́nə́ a mu mbyi tsum, tsɛʼ adzaŋ za ɨ dzagɨnɨnə a tɨtərɨ bən nchwuʼnɨ njwi za nɨ fómnɨ́ ndzúʼ mbɨ́ʼ abɔŋəntəm a Ŋwi, ngɨ́ nkɨ́ njí a zɛrə tsɛʼ adzaŋ za a lanɨnɨ mbe lá.

⁷ Nɨ zúʼ mbɨ́ʼ abɔŋəntəm a Ŋwi lá a mbó Ebafrasɨ, ngaŋ afaʼ za bɨgɨ bo faʼnə za bɨgɨ kɔŋnɨ lá. Wɛrə nɨ ngaŋ afaʼ Kristo za ɨ faʼnə tsɛʼ nɨ táʼ ntəm za ɨ faʼnə a nkfu bɨgɨ ə.

⁸ Wɛrə a soŋnə a mbó bɨgɨ adzaŋ za Azhwi zə Fɛmnɨ a ghɨnə ngə́ á nɨ nkɔŋnə awən bən nɨ bɨŋ ə.

⁹ Mbɨ́ʼ a məzen, bɨgɨ tsaʼtə a Ŋwi nkfu tsum mbɨ́ʼ awən nchwuʼnɨ mbáʼ bɨgɨ zúʼnɨ́ a məzen mbɨ́ʼ awɨŋ ə. Bɨgɨ lɔ́ntə́ a mbó Ŋwi ngə́ á wɛrə a lwɨgɨ awən nɨ azhyɛ ɨnu tsa zɨə lɔnə, ndwɨgɨ awən nɨ zóŋ nkɨ ndwɨgɨ awən nɨ ndzuʼ kɨ zhi za Azhwi zə Fɛmnɨ a ghánə́ ghe.

¹⁰ Nɨ mɨ chi tiʼə tsinə adzaŋ za Maʼmbyí a lɔnə ɨ kə́ gháʼə ghɨnɨ ɨnu tsa tsɨ ghɨnə ɨnye wɛrə bɔŋənə ghe. Ntsi mbyi ɨtsɨŋ mɨ fɨgɨ ɨbə́ŋ ngɨnɨ mɨnu mə shiʼnɨ mɨtsum ə. Nɨ mɨ kɨ kwi a mu azhyɛ a Ŋwi azɨŋ ə.

¹¹ A Ŋwi a ghɨ á nɨ ntɨ́ŋə́ nɨ adaʼ za a lonɨ a mbó mɨtən ma a nɨ mə nɨfáŋ ɨni, taŋ á nɨ chi chigɨ ntəm a nye ɨnu ɨtsum nɨ nchigə abɔʼnɨ nɨdorɨ ə.

¹² Ɨ kə́ ghanə a mɨya a mbó Tarɨ, zɨ wa a ghɨnə nɨ chi tiʼ tsi nɨ azɨŋ azúm a mu ɨdzúm tsa Ŋwi a lɛnɨ a mbó ɨbɛn ɨbyi a mu nɨfɔ nɨ nkaʼ ə.

¹³ Wɛrə a fɨ́gɨ́ awɨgɨnə a mu mbó zɨ wa a sáʼnɨ́ ɨdiʼ ndzumnɨ, nkɨ ngyen nɨ bɨgɨnə tsɛʼ ɨ shiʼnɨ ɨ shiʼnɨ a mu nɨfɔ nɨ mɔn ɨyi wa wɛrə a kɔŋnɨ,

¹⁴ a ntsǎ a ndzum wɛrə, bɨ zonə ɨtú ɨtsɨgɨnə, lá be ngə́, bɨ lɨgɨnɨnə mɨbvu ɨmɨgɨnə ghe.

Kristo a Tsi Atú Azúm Atsum za Ŋwi a Káʼnə́

¹⁵ Kristo nɨ afi a Ŋwi za bɨ zɛ́nə́, Ŋwi, zɨ wa ka bɨ ndzě ayi ayi lá. Kristo nɨ ntsambyi Mɔn Mbáŋnɨ́, wa a tsinɨ atú ɨdzúm ɨtsum tsa Ŋwi a káʼnə́.

¹⁶ Mbɨ́ʼ ngə́ a ntsǎ a ndzum wɛrə Ŋwi a káʼ ɨdzúm ɨtsum a fɔməbvurə abɔʼnɨ atuəshe, ɨdzúm tsa bɨ zɛ́nə́ nkeʼ kə́ ndzě, nkwiʼtɨ bɨtsen bɨ ndá bɨ Ŋwi bɨtsum abɔʼnɨ ɨzhwi tsɨ tən ɨtsum tsa tsɨ sáʼnə́ a nɨkaŋ ə. Ŋwi a káʼ mbyi-mbyi tsum ntsa lá a ndzum wɛrə nkɨ mbe a mbó wɛrə ghe.

¹⁷ Kristo a tsí ɨwu bɔŋ á Ŋwi a kaʼ ɨdzúm ɨtsum, a mbúm bo bɨ wɛrə, ɨdzúm ɨtsum tsi a nye ɨdiʼ ɨtsa, tsa tsɨ kuʼnɨnɨ a mbó bo ghe.

¹⁸ Wɛrə nɨ atú a mbəmnye ɨzhi, mbe lá ndáŋwi; ntsi ntɨŋ mbəmnye za lǒ lá a mbó wɛrə ghe. Wɛrə nɨ ntsambyi Mɔn, wa Ŋwi a zhwémnɨ́nɨ́ a mbó nɨvwo, taŋ á be tsɛʼ zɨzɨ wa a chinɨ tsi nɨ ntsambyi adiʼ a nye ɨnu ɨtsum ə.

¹⁹ Mbɨ́ʼ ngə́ a bé lá a ntsǎ a ndzum ntsɔʼ a mu ntəm Ŋwi zɨmboŋ mbáʼ Mɔn ɨyi a benɨ tso Ŋwi a nye mɨndóm mɨtsum ə

²⁰ A ntsǎ a ndzum Mɔn məwen, Ŋwi a tíʼ ntsɔ́ʼ a mu ntəm zɨ a ndɔgɨ mbyi-mbyi tsum ɨ bə yen nɨ zɛrə a mbó atuəmbəm azhi ɛ. Ŋwi a ghɨ́ ngə́ á mbɔnɨ tsi ntsa lá a ndzum alɛm a Mɔn ɨyi za a chwínɨ́nɨ́ atɨ abaŋnɨ-baŋnɨ, ma lan, wɛrə a lɔ́gɨ́ ɨdzúm ɨtsum atuəshe abɔʼnɨ fɔməbvurə ngyen nɨ tsɛrə a mbó atuəmbəm azhi ɛ.

²¹ A bé a nkfu tse, mbáʼ nɨ bvúrɨ́nɨ́ tɨ nɨŋ mɨntəm ɨmən a nye Kristo lá, aghagɨ azən a ságɨ́ tɨ́sə́n a nye Ŋwi, nɨ kɨ mbe ngaŋ kɨban ɨchi, mbɨ́ʼ mɨbvu ma nɨ kɨ́nə́ nkwaʼtə nkə́ ngɨə ghe.

²² Lá tɨtsɔŋnɨ, a ntsǎ a ndzum nɨvwo nɨ Mɔn ɨyi, Ŋwi a ghɨnə awən a nye bɨson ɨbyi, taŋ ɨ tiʼ yen nɨ bən a ɨshi zɨ á nɨ fɛm, nkeʼ nɨ alɔʼ zə tsɛrə tsi nkɨ ntsi tɨ ɨfərɨ wu tsɛrə,

²³ mbáʼ be nɨ mɨ zagɨ ɨ ghěnə nɨ mbyi a mu abeməntəm za, ɨ tɛm ɨ tɨŋə ngə́ twə́ŋ nkeʼ nchíʼnə́, ɨ keʼ kɨ nyɛʼtɨ ɨtumbəm ɨtsən á azúm zə tsɛrə a chiʼtɨ ntsiŋə nɨ ntəm tsum za nɨ kwárɨ́nɨ́ a nkfu za bɨ sóŋnɨ́ nkən wu shiʼnɨ a mbó bən lá. Me Baolo, ma bə́ŋ ngaŋ afaʼ lá a ndaʼ nkən wu shiʼnɨ məwiŋ ə. Nkən wu shiʼnɨ məwen bɨ soŋnə a wɛrə a mbó ŋwɔn tsum a mu mbyi ɛ.

Afaʼ a Baolo Tso Ngaŋ Afaʼ Ndáŋwi ə

²⁴ Tɨtsɔŋnɨ ma dórə́ mbɨ́ʼ ngɨ́ʼ za ma zɛ́nə́ mbɨ́ʼ awən, mbɨ́ʼ ngə́ a ntsǎ a ndzum ngɨ́ʼ məzen za ma zɛ́nə́ a mbəmnye me, ma zě ngɨ́ʼ tsum adzaŋ za Kristo a lɔnə ngə́ á ma zɛn mbɨ́ʼ atú azhi, mbe lá ndáŋwi ə.

²⁵ Ŋwi a ghɨ aghan a nye ngaŋ afaʼ ndáŋwi ə. Wɛrə a ghá afaʼ məzen a mbó me a faʼə mbɨ́ʼ ɨbɔŋ ɨwɨŋ ə. A nɨ afaʼ a nchwítɨ́ nkən ɨyi ɨ ghɛn mɛtə.

²⁶ Nkən məwiŋ lá anu a nkubə za wɛrə a lwɛ́ʼnɨ́ nchwuʼnɨ a lɔʼkwam, a ndɔgɨnə a nye nɨwə ɨ kon a nye nə mɔʼɔ, lá tɨtsɔŋnɨ wɛrə a kyɛʼnə a zɛrə a mbó ɨbɛn ɨbyi lá.

²⁷ Akyaŋtɨ a Ŋwi a nɨ ngə́ á wɛrə a kyɛʼ anu a nkubə azhi a mbó ɨbɛn ɨbyi, anu a nkubə za a dɨrɨnɨ nkɨ ndon nɨ nɨfáŋ na wɛrə a lɛnɨ a mbó ɨbɛn bɨtsum lá. Anu a nkubə məzen a nɨ ngə́ Kristo a tsi a mu ɨnye bən, mbáʼ a diʼnɨ lá ngə́ nɨ ghɨ kɨ tsi nɨ nɨfáŋ nɨ Ŋwi ə.

²⁸ Ma lan, bɨgɨ sóŋə́ anu a Kristo a mbó ŋwɔn tsum ə. Nɨ zóŋ tsum wa a chinɨ tsi, bɨgɨ kwantə nkə́ ndiʼə awa taŋ ɨ lɔgɨ a ŋwɔn tsum ɨ yen nɨ wɛrə a ɨshi ɨmɨgɨ Ŋwi tso ŋwɔn wa a kwinɨ nkɨ ntsi a mbúm bo Kristo ghe.

²⁹ A ngɨə á məzen a fu, ma faʼə nɨ adaʼ azə atsum, ɨ faʼə nɨ adaʼ zə wi za Kristo a ghánə́, a tsi a mu ɨnye me ɨ faʼə ɨwu lá.