Jemsɨ 5 - Mɨkan wu Fi

Akwantɨ a mbó Ɨbɛn ba bɨ Tsinɨ nɨ Afuʼ ə

¹ A nɨ zuʼ le, bɨŋ ɨbɛn ba nɨ tsinɨ nɨ afuʼ ə! A nɨ bugɨ nkɨ ntɔnkɨ mbɨ́ʼ abvu za bɨ mɨ tum atú bɨŋ ə!

² Afuʼ azən a byenə, ndzɛm kɨ nkfurɨ ɨtsɛʼ ɨtsɨŋ ə.

³ Ntsɛbɨ ɨ ko a ŋwaʼŋwaʼ ɨwən abɔʼnɨ tsə́ŋtsə́ŋ ɨwɨŋ ə. Ntsɛbɨ məziŋ ghɨ be atɛmə-ndzě a nye bən, ɨ kfurɨ ndza ɨnye ɨzən tso ɨmugɨ ə. Nɨ kwɛʼnə afuʼ a nye njwi ntsɨrɨndzum tsiŋ ə.

⁴ Nɨ se tfu nkáb ngaŋ afaʼ tsa tsɨ faʼnə a mu mɨshwom ɨmɨŋ ə. A nɨ zuʼ adzaŋ za bo zhwuʼnɨnə ghe! Nɨzɛʼ nɨ ɨbɛn ba bɨ fuʼnə mɨdzɨ ɨmən konə a ɨtoŋnɨ Ŋwi, Maʼmbyí Tamɨtən Mɨtsum ə.

⁵ Ntsi mbyi ɨzɨŋ atuəshe ɨ lon nɨ ɨdzúm mɨsom abɔʼnɨ ngɨə á mbəmnye mbɔ́ŋə́ ghe. Nɨ dzɨnə ɨ fankɨ tso bɨnkɔʼndzum ba bɨ ghɛnə nɨ bɛrə ɨ ghɛn warə.

⁶ Nɨ soŋnə ngə́ ɨbɛn ba bɨ chinɨnɨ a ɨshi ɨmɨgɨ Ŋwi vwo ɨsáʼ ntiʼ nkɨ njwitɨ awa ghe. Bo nɨ ɨbɛn ba bo chinɨ keʼ ndómnji ɨwən kɨ́ŋə.

Nchigə Abɔʼnɨ Atsaʼtɨ a Ŋwi ə

⁷ Ma lan nə ɨbɔmbɨma ɨban, á nɨ tsi nɨ nchigə ɨ kɔʼ kuʼ njwi za Maʼmbyí a ghɨnɨ yiŋə. A nɨ ze adzaŋ za ndyiʼ mɨshwom a tsinɨ nɨ nchigə, adzaŋ za wɛrə a zhwíʼtɨ́nə́ ngə́ á mɨdzɨ mə shiʼnɨ kwi a mu mɨshwom ɨmyi ɛ. Wɛrə a tsiŋə nɨ nchigə ngə́ á mbəŋ ntsubɨmbəŋ abɔʼnɨ mbəŋ za ɨ lónə́ mbáʼ mbəŋ tiʼnə ntsǎ ɨ loə.

⁸ Nɨ tsi nɨ ɨ kɨ zagɨ tsi nɨ nchigə ghe. A nɨ len ntsiŋə nɨ ntəm ɨzɨŋ tsum atɨ́, mbɨ́ʼ ngə́ njwi za Maʼmbyí a lo bə yen ɨ tiʼ tsɛʼ abó ə.

⁹ Ɨbɔmbɨma ɨban, á nɨ keʼ nzhwúʼnə́ mbɨ́ʼ a ŋwɔn nɨ ŋwɔn, taŋ á Ŋwi a keʼ awən sáʼə. Zɛnə azɨŋ ə, Tabyɛn a tɛm a nkom ntsu ndá ə.

¹⁰ Ɨbɔmbɨma ɨban, á nɨ waʼtɨ ntóm Ŋwi tsa tsɨ kɨ́nə́ ngamə nɨ ɨkum Maʼmbyí lá. A nɨ lɔgɨ awa tso ɨlisɨ tsɨ nchigə a mu ndzě ngɨ́ʼ ə.

¹¹ Bɨgɨnə lɔgɨ awa tso ɨbɛn ba bɨ fɔ́gɨ́nɨ́ lá mbɨ́ʼ ngə́ bo chígɨ́ ntəm ə. Nɨ zuʼnə mbɨ́ʼ nchigə zɨ Jobɨ, nkɨ nji adzaŋ za Maʼmbyí a ghánɨ́ wəmbo a ndwitə ghe. Maʼmbyí a lon nɨ akômɨlɨŋnɨ abɔʼnɨ ngɨ ɨbɔŋ ə.

¹² Za a tsanɨ atsum nə ɨbɔmbɨma ɨban, a nɨ ngə́ á nɨ keʼ kan mbáʼ nɨ ghɨnə akaʼ ə. A nɨ keʼ kan nɨ ɨkum fɔməbvurə kə nɨ ɨkum atuəshe kə nɨ ɨkum azúm zə tsɛrə zədaŋ ə. A e ɨgho a be e, á ngáŋ ɨgho a be ngáŋ, taŋ á bɨ keʼ soŋ ngə́ o vwo ɨsáʼ ə.

¹³ Ŋwɔn nɨ bən wu tse a tsi a mu ngɨ́ʼ le? A ŋwɔn məwa a tsaʼtɨ a Ŋwi ə. Ŋwɔn nɨ bən wu tse a tsi a mu nɨdorɨ le? A ŋwɔn məwen a zɔbɨ ɨkom mbontɨ a Ŋwi ə.

¹⁴ Ŋwɔn nɨ bən wu tse a tsi a mu nɨghɔ le? A ŋwɔn məwen a tɔŋ ɨtú ndáŋwi, á bɨ yen ntsaʼtɨ a Ŋwi atú zɨ nkɨ ndzɔʼ ayi nɨ mɨvwurɨ nɨ ɨkum Maʼmbyí ɛ.

¹⁵ Atsaʼtɨ a Ŋwi zen za bɨ ghɨnɨ a mu abeməntəm lá, a mɨ tsuʼ a ŋwɔn nɨghɔ wa; Maʼmbyí a mɨ ghɨ á wɛrə a shwetɨ, á bɨ kɨ ndɨgɨnɨ mɨbvu ma wɛrə a ghɨnə ghe.

¹⁶ Ma lan, á nɨ ntiʼə sóŋə́ mɨbvu ma nɨ ghɨnɨ a mbó ŋwɔn nɨ ŋwɔn, nkə́ ntsáʼtə́ a Ŋwi atú ŋwɔn nɨ ŋwɔn, taŋ á bɨ tsuʼ awɨŋ ə. Atsaʼtɨ a Ŋwi a ŋwɔn wa a chinɨnɨ a tsi nɨ adaʼ nkə́ faʼə ghe.

¹⁷ Alaja a bé ndəŋndəŋ ŋwɔn mɨsɔŋ a ntsu tso adzaŋ za bɨgɨnə benə. A ɨtfúʼ njwi wu tsɛrə, wɛrə a tsáʼtɨ́ a Ŋwi nɨ ntəm ɨyi ɨtsum ngə́ á mbəŋ keʼ lô, mbəŋ sé kɨ ndo atú ɨlom tsi tárə́ nɨ akum ə.

¹⁸ Mbáʼ nkfu məza ɨ tsánə, wɛrə a kwíʼ ntsaʼtɨ a Ŋwi, fɔməbvurə ŋaʼnɨ mbəŋ lo, ɨshe gha mɨdzɨ ə.

¹⁹ Ɨbɔmbɨma ɨban, be ŋwɔn tse a nyɛʼ nkənu nkarɨ ngɛn ayi nɨ mɨndóm mədaŋ, ŋwɔn wu mɔʼɔ a lɔgɨ ayi mbə mbən nɨ zɨ,

²⁰ á nɨ waʼtɨ a zen ngə́: ŋwɔn tsum wa a lɔgɨnɨ a ngaŋ ngɨ mɨbvu a nye ndóm ngɨ mɨbvu ɨyi wa mbə mbən nɨ zɨ, a mɨ loŋ a gharɨ ngaŋ ngɨ mɨbvu wa a mbó nɨvwo, ɨ kɨ ghɨ á ndɨgɨnɨ mɨbvu mə ghaʼnɨ be ɨwu ə.