Jemsɨ 4 - Mɨkan wu Fi

Shiʼtɨ nɨ Ɨnye ɨzo a Ɨshe taŋ á Maʼmbyí a Kɔʼsɨ agho atɨ́ ə

¹ Fɨto fɨtsum abɔʼnɨ azɔŋ atsum a tɨtərɨ bən tsɨ lǒ lá ɨ ghé le? Tsɨ lǒ lá a nye ɨnu tsa nɨ lɔnə a ngɨə á mbəmnye ɨtsɨŋ mbɔ́ŋə́, tsa tsɨ tǒkɨ́nə́ a mu ɨnye ɨtsən lá.

² Nɨ lǒ ɨdzúm ə, lá nchi keʼ nɨ tsɛrə chyɛ, ma lan, njwítə́ a bə mɔʼɔ ghe. Nɨ lǒ ɨdzúm tsa tsɨ se ɨtsən be nɨ aghɨʼnɨ lá nchi keʼ nɨ tsɛrə chyɛ, ma lan, nɨ zɔŋnə nkə́ ntǒ ghe. Nɨ se nɨ azúm za nɨ lɔnə a nchyɛ̌ lá mbɨ́ʼ ngə́ nɨ sě mbítə́ a zɛrə lá a mbó Ŋwi ə.

³ Nɨ bítə́ nkeʼ nɨ zɛrə a nchyɛ̌ lá mbɨ́ʼ ngə́ nɨ bítə́ nɨ awiʼtɨ a tɨbɔŋ; nɨ bítɨ́ ɨdzúm a ngɨə á mbəmnye ɨtsɨŋ mbɔ́ŋə́ ghe.

⁴ Nɨ be lá tso ngaŋ achwurɨ ə! Nɨ se zhi ngə́ a ntɛ́gɨ́ mɨntɔŋ ɨmən a nye ɨdzúm atuəshe ghɨ awən a nye ngaŋ kɨban Ŋwi le? Ma lan, ŋwɔn tsum wa a tɛgɨnɨ ntɔŋ ɨyɨ a nye ɨdzúm atuəshe, a ghɨ atuəmbəm azhi a nye ngaŋ kɨban Ŋwi ə.

⁵ A nɨ keʼ wiʼtɨ ngə́ nkənu se tsi a nye aŋwaʼnɨ a Ŋwi adiʼ wa a soŋnɨ ngə́, “Ŋwi a tɛgɨ atú azhi tsɛʼ nkan a nye azhwi za wɛrə a ghɨnɨ ngə́ á tsi a mu ɨnye ɨtsɨgɨnə lá.”

⁶ Lá abɔŋəntəm za Ŋwi a ghánə́ a tən ngɛn nɨ mbyi ɛ. Tso mbáʼ aŋwaʼnɨ a Ŋwi a soŋnɨ ngə́, “Ŋwi a kɨ̌ŋ ndómnji ngaŋ ŋuʼ ɨnye, lá ngǎ abɔŋəntəm a mbó ba bɨ shíʼtɨ́nə́ nɨ ɨnye ɨtsa a ɨshe.”

⁷ Ma lan, á nɨ ndzúʼnə́ a Ŋwi ə. A nɨ ton awən a Dəbɨrɨ, wɛrə a mɨ kɨ kɨə ayi awɨŋ ə.

⁸ A nɨ nkɔ́ʼtə́ a mbyɛn Ŋwi ə, wɛrə a mɨ kɨ kɔʼtɨ a mbyɛn bɨŋ ə. Bɨŋ ngaŋ ngɨ mɨbvu, á nɨ kyɛntɨ a ngɨ mɨbvu ə! Bɨŋ ngaŋ ngɨ ɨtsi, á nɨ kyɛntɨ a ngɨ ɨtsi ə!

⁹ A nɨ tsi nɨ adzə́ŋnɨ, mbugɨ nkɨ ndzɛʼ; á nɨ bəŋ nɨwe ɨnən a nye nɨzɛʼ, nkɨ mbənkɨ nɨdorɨ ɨnən a nye ɨshi wu fɨŋnɨ ə!

¹⁰ A nɨ shíʼtə́ nɨ ɨnye ɨtsən a ɨshe a ɨshi Maʼmbyí, wɛrə a mɨ kɔʼsɨ awən atɨ́ ə.

Akwantɨ mbɨ́ʼ ɨ Sáʼ Ŋwɔn wa bɨŋ zɨ Zɔŋnə a Kristo ghe

¹¹ Ɨbɔmbɨma ɨban á nɨ keʼ ngǎm ɨnu tsɨ tɔmnɨnɨ mbɨ́ʼ a ŋwɔn nɨ ŋwɔn ə. Be nɨ ngǎm ɨnu tsɨ tɔmnɨnɨ mbɨ́ʼ ɨbɛn ba bɨŋ bo zɔŋnə a Kristo kə ɨ sáʼə awa, nɨ ghǎm ɨnu tsɨ tɔmnɨnɨ lá mbɨ́ʼ a Nyɔngɔŋ nkə́ sáʼə a wɛrə ghe. Be o sáʼə a Nyɔngɔŋ, lá be ngə́ ka o bvurɨ mbe agho ŋwɔn wa a zúʼnɨ́nə́ a Nyɔngɔŋ, lá mbe be ŋwɔn wa a sáʼnə́ a wɛrə ghe.

¹² A nɨ tsɛʼ Ŋwi zɨzɨ wa a ghánə́ a nyɔngɔŋ nkɨ mbe ɨsáʼ abyɛn ə. A nɨ tsɛʼ wɛrə zɨzɨ wa a chinɨ loŋ ɨ kɨ tsənkɨ awɨgɨnə ghe. O kwaʼtɨ ngə́ o lá ɨwa, a sáʼ ŋwɔn adaŋ le?

Akwantɨ Mbɨ́ʼ a Kɨtɛrɨ ə

¹³ A nɨ zuʼ le, bɨŋ ɨbɛn ba nɨ sóŋnə́ ngə́, “Sɨŋə kə ɨzo bɨgɨ mɨ ghɛn a mu ntáʼmbagə wu wi wu tse, adiʼ wa bɨgɨ mɨ tsi ɨwu atú táʼ alom, ɨ táŋ a mɨtan ɨ ghɨ nkáb zɨ ngaʼnə.”

¹⁴ Nɨ se zhi adzaŋ za ntsi mbyi ɨzɨŋ ghɨnɨ be ɨzo ghe! Nɨ tsi lá tso azhwirɨ za a fúnə́ a ɨshe a nye məkum a nkfu, ntiʼ ngvukɨ mbyékə́.

¹⁵ Anu za nɨ baŋnɨ ntsi nɨ ɨ soŋə a nɨ ngə́, “Be Maʼmbyí a bemtɨ, bɨgɨ mɨ tsi ntən, ɨ ghɨ a ziŋ anu kə a zhirɨ ə.”

¹⁶ Lá tɨtsɔŋnɨ nɨ ŋǔʼ ɨnye, nkə́ ntɛ́rə́ ghe; abə́ŋ a kɨtɛrɨ məza atsum nɨ anu zə tɔmnɨnɨ ə.

¹⁷ Ma lan, ɨbɛn ba bɨ sě ngɨ̌ ɨnu tsɨ shiʼnɨ tsa bo zhinɨ ngə́ bo tsi nɨ ngɨ tsɛrə, bo ghɨ ɨbvu ə.