Jemsɨ 3 - Mɨkan wu Fi

Lə̌tú nɨ Alɛm za a Tsinɨ a Mu Ntsu ɨgho

¹ Ɨbɔmbɨma ɨban, á bən bə ghaʼnɨ keʼ be bɨdiʼ bɨ aŋwaʼnɨ ə. Adzaŋ za nɨ zhinɨ lá, bɨ ghɨ sáʼ awɨgɨ bɨdiʼ bɨ aŋwaʼnɨ nɨ ntɛgɨ nɨdɨgɨ za ɨ ghɛnɨ nɨ mbyi ɛ.

² Bɨgɨnə bɨtsum ghɨ̌ ɨfənu ə. Lá, be a be ngə́ ka ŋwɔn tse a ndáʼə fə̌ ayi ntsu nɨgham ɨyi, muŋ a kɔʼ ntɛm ngə́ tsáŋ nkɨ chi tsɨŋnɨ atuəmbəm azhi atsum ə.

³ Bɨgɨnə nɨ́ŋə́ abagɨ atɨŋə a ntsu ɨnyamənkárə́ lá taŋ á ɨ ndzúʼnə́ awɨgɨnə, bɨgɨnə chi tiʼ ghɨ á ɨ ghɛn adiʼ za bɨgɨnə lɔnə ghe.

⁴ Kə wiʼtɨ mbɨ́ʼ abáŋ a nkyi ɛ; a baʼtɨ faŋ ɨ faŋnɨ, a kə ntyíŋə́ kɨfɛrɨ wu ntən lá, bɨ chi twɛn a zɛrə tsɛʼ nɨ mɨnya mɨ kárə́ghɨ́rə́, á ghɛn adiʼ atsum za ntyǐŋ abáŋ a nkyi a lɔnə ngə́ á ghɛn ɨwu ə.

⁵ A kɨ mbe ndəŋndəŋ nɨ alɛm za a tsinɨ a ntsu ŋwɔn: a baʼtɨ mbe mɨnya mɨ alam a ɨnye mbəmnye ɨ benɨ lá, a chi tɛrɨ mbɨ́ʼ ɨnu tsɨ wi ə. Wiʼtɨ adzaŋ za mbáʼ ako atɨ zə wi a chinɨ ko ɨmugɨ tsɛʼ nɨ mɨnya mɨ ndwa ɨmugɨ ə!

⁶ Alɛm a ntsu ŋwɔn a be lá tso ɨmugɨ ə. A tɨtərɨ ɨlam ɨnye, alɛm a tsi lá tso atuəshe zə tse za a lonɨ nɨ ɨbvu, ntiʼə ndǎm ɨlam ɨnye ɨtsum nɨ ɨbvu məwa. A ghɨə ntsi mbyi ɨzɨgɨnə tsum tsi tso ɨ tsi a mu ɨmugɨ nɨ ɨmugɨ wa ɨ lǒnə adiʼ a ɨmugɨ nɨnkoŋ ə.

⁷ Ŋwɔn mɨsɔŋ a ntsu a chi mərɨsɨ, a kɨnə nkɨ mərɨsɨ ɨbə́ŋ ɨdzúm tsə kaʼnɨ tsə mɔʼɔ ɨtsum — ɨnyam mɨbaʼ bo bɨ bɨsɨ́ŋ, bɨkóŋə́she abɔʼnɨ ɨdzúm tsɨ kaʼnɨ tsa tsɨ tsinɨ a mu nkyi ɛ.

⁸ Lá ka ŋwɔn tse a láʼnə chi mərɨsɨ ayi alɛm a mu ntsu ə. A lon nɨ ndyíʼ tɨbɔŋ nkɨ mbe azúm zə tɔmnɨnɨ ə.

⁹ Bɨgɨnə ghǎ a mɨya a mbó Maʼmbyí ɨwɨgɨnə abɔʼnɨ Ta ɨwɨgɨnə nɨ zɛrə, nkə́ ndɔʼə ɨbɛn bə mɔʼɔ ba Ŋwi a káʼnɨ́ a nye afi azhi tsɛʼ nɨ alɛm məza.

¹⁰ Mɨgham mɨ nga mɨya abɔʼnɨ mə ndɔʼə fúə tsɛʼ a mu táʼ ntsu ə. Ɨbɔmbɨma ɨban, á ziŋ anu a keʼ fuə!

¹¹ A mu táʼ náŋə́bə́rə, nkyi wu shiʼnɨ abɔʼnɨ nkyi wu lwinɨ chi fuənə ɨwu táʼ nkfu le?

¹² Ɨbɔmbɨma ɨban, atɨ ankwɛbɨnɨ a chi kǒnɨ mɨntam mɨ atɨ mɨ angwafa kə á atɨ a bya kǒnɨ angwafa le? Kə náŋə́bə́rə wa nkyi fɨngwáŋ fúnə́ ɨwu chi fɨgɨ nkyi wu shiʼnɨ le?

Zóŋ wa a Lonɨ a Fɔməbvurə ghe

¹³ Ɨbɛn tsi a tɨtərɨ bən ba bɨ tsinɨ nɨ zóŋ, ndzúʼə nkə́ njíɛ le? Bo mɨ diʼ a tsɛrə ɨ tsa lá a ndzum ntsi mbyi ɨza zɨ shiʼnɨ ɨ kɨ tsa a ndzum ngɨnɨ mɨnu ɨma nɨ ɨshiʼtə nɨ ɨnye a ɨshe abɔʼnɨ zóŋ ə.

¹⁴ Lá be a be ngə́ a mu ntəm ɨgho a tsi aghɨʼnɨ abɔʼnɨ ɨkarɨ, koʼ ntɛ́rə́ mbɨ́ʼ a zóŋ ɨgho mbɨ́ʼ ngə́ o diʼə ngə́ nkən Ŋwi se nkənu be ə.

¹⁵ Abə́ŋ a zóŋ məzen a sě ndǒ lá a fɔməbvurə ɨ shiʼə ngyíŋə́ ghe; a tsi lá a mbó atuəshe zen, nkeʼ lo a mbó azhwi a Ŋwi, lá ndo be a mbó bɨdzɨŋ ə.

¹⁶ Adiʼ wa aghɨʼnɨ abɔʼnɨ ɨkarɨ tsinɨ ɨwu, dzagɨnɨ dzagɨnɨ a kɨ ntsi ɨwu, ndzɔŋ nkwiʼtɨ ɨbə́ŋ ɨnu tsɨ tɔmnɨnɨ ɨtsum ə.

¹⁷ Lá zóŋ wa a lonɨ a fɔməbvurə a fom ntsambyi ndán, ntiʼ ndzɔŋtɨ, ngyíŋə́ nɨ mbɔnɨ, nkwáʼtə́ mbɨ́ʼ a bə mɔʼɔ, nkɨ mbe ɨson ə; a lon nɨ akômɨlɨŋnɨ nkə́ nkónə́ a za bɨ fuʼnə a be ngɨnɨ mɨnu mə shiʼnɨ ə; a se nɨ nkyerɨ abɔʼnɨ ntamtɨ ɨdiʼ chyɛ.

¹⁸ Nchinə a ɨshi ɨmɨgɨ Ŋwi nɨ za bɨ fuʼnə a nye ɨdzúm ngwəgɨ tsa ngaŋ ngɨ mbɔnɨ binə nɨ mbɔnɨ ə.