Ɨfaʼ 5 - Mɨkan wu Fi

Anania bo Safira Chwe Ɨnu ə

¹ Mbáʼ bə mɔʼɔ kɨ́nə́ fǐŋ ɨdzum ɨtsa ngyíŋə́ nɨ nkáb zɨ wu tsum a ɨshi ntóm Yeso, ŋwɔn tse a tsí ɨwu wa ɨkum ɨyi bénɨ́ Anania, wa bo ngwe ɨyi Safira kɨ́nɨ́ nkɨ́ fén abɨŋ a ɨshe aza zɨə.

² Lá bo ngwe ɨyi bémnɨ́, wɛrə a lɛn abvuʼ a nkáb za a mbó atuəmbəm azhi ntiʼ ngyen nyɔŋ a mɨku abvuʼ ntóm Yeso ghe.

³ Bita a tíʼ mbítɨ́ wəmbo ngə́, “Anania, o lo nyɛʼtɨ Satan a kon a mu ntəm ɨgho ntiʼə ntsɨŋnə agho, ngɨ agho o chwe ɨnu a mbó Azhwi zə Fɛmnɨ a nye adzaŋ za o lɛnɨ abvuʼ a nkáb za o fenɨ abɨŋ a ɨshe azo ɨwu lá ngə́ ke le?

⁴ Bɔŋ o fǐŋ abɨŋ a ɨshe azo za, a bé azo; o ghɨnə fén a zɛrə, nkáb za be ɨzo ghe. O lo ndanɨ ntsɔʼ a mu ntəm ɨgho a ngɨ abə́ŋ anu tso məzen lá ngə́ ke le? Ka o chwe agho ɨnu lá a mbó ŋwɔn mɨsɔŋ a ntsu ə. O chwe ɨnu lá a mbó Ŋwi ə!”

⁵ Tsɛʼ mbáʼ Anania a byínɨ́ ndzúʼ a məzen lá, ngvo a ɨshe nkfo ə. Ŋwɔn tsum wa a zúʼnɨ́ anu məzen, a tsí nɨ nɨbɔgɨ nə wi ə.

⁶ Nkaŋ ŋwɔn ló atɨ́, nkarɨ akfú azhi, mbyɛʼ ntsa ngɛn ntwəŋə.

⁷ Bɨnyom tsanə tso bi bɨtárə́, ngwe ɨyi a yen nkon mbáʼ a sé anu za a fúnɨ́ zhyɛ.

⁸ Bita a bitɨ ayi ngə́, “Soŋ aghə, nə nɨ nkáb tsum zɛnə mbáʼ bɨŋ ndóm ɨgho lonɨ fiŋ abɨŋ a ɨshe za ɨwu le?” Wɛrə a chwɨ́gɨ́ ngə́, “Eŋə, a nɨ tsɛʼ zɛrə tsum ə.”

⁹ Ma lan, Bita a bítɨ́ wəmbo ngə́, “Bɨŋ ndóm ɨgho lo ndanɨ ntsɔʼ a mu mɨntəm ɨmən a njwə́ŋtɨ́ Azhwi a Maʼmbyí lá ngə́ ke le? Mbáŋnɨ́ tsa tsɨ lonɨ a ntwəŋ ndóm ɨgho, tsɨ chirɨ a ntsundá, bo mɨ kɨ byɛʼ agho ɨ fu nɨ gho wəbɔʼ ə!”

¹⁰ Tsɛʼ a nyom məwa a vwó a mɨku Bita nkfoə. Nkaŋ ŋwɔn kón ngyen ndzɛn ngə́ wɛrə a kfó, ntiʼ mbyɛʼ ayi ɨ fu nɨ wɛrə ngɛn ntwəŋ ayi a mbyɛn ndóm ɨyi ɛ.

¹¹ Ngǒtə ɨbɛn bɨ Ŋwi tsum abɔʼnɨ ŋwɔn tsum wa a zúʼnɨ́ a məzen bɨ tsí nɨ nɨbɔgɨ nə wi ə.

Ntóm Yeso Ghɨ Ɨnu tsɨ Yerɨnɨ-yerɨnɨ Abɔʼnɨ tsə Tsanɨnɨ ə

¹² Ntóm Yeso kə́ ngɨ̌ ɨnu tsɨ yerɨnɨ-yerɨnɨ abɔʼnɨ tsə tsanɨnɨ a tɨtərɨ ɨbɛn ə. Ɨbɛn bɨtsum ba bɨ nɨ́ŋnɨ́ mɨntəm ɨma a nye Ŋwi bómnkɨ́ a mu ntaŋ wu tɛʼnɨ wu Sanɨmɔ ghe.

¹³ Ɨbɛn kə́ mbáʼtə́ ngǎm ɨnu tsɨ shiʼnɨ ɨ ghamnɨ mbɨ́ʼ awa lá, ŋwɔn tse wa a sé ŋwɔn wa a nɨ́ŋnɨ́ ntəm ɨyi a nye Ŋwi a sé zhwəŋtɨ a nkúŋə́ a tɨtərɨ bo ghe.

¹⁴ Lá ndvuŋ ɨbɛn ba bɨ kɨ́nə́ nkúŋə́ a mu ngǒtə za kə́ ngáʼə ngɛn ɨ ghɛnɨ nɨ mbyi ɛ. A bé ɨnɔ mbáŋnɨ́ bo bɨ bəngye ba bɨ nɨ́ŋnɨ́ mɨntəm ɨma a nye Maʼmbyí ɛ.

¹⁵ Mbɨ́ʼ ɨnu tsa ntóm Yeso kɨ́nə́ ngɨə, ɨbɛn kə́ mbyɛ̌ʼ ngaŋ mɨghɔ nkúŋə́ nɨ tsɛrə a mu bɨkɔŋ bɨ ndóm, ɨ nyɔ́ŋə́ awa atú mɨkon abɔʼnɨ ɨbaʼ taŋ á tsɛʼ nɨnɨŋənɨŋə Bita a tsa ngyɛʼ awa a nkfu za Bita a tsanə taŋ á bo shwetə.

¹⁶ Ɨnɔ ɨbɛn kə́ fúə a mu ntáʼmbagə tsa tsɨ tsínɨ́ a kárɨ́kɨ́ Yerosalɛm, ngyíŋə́ nɨ ngaŋ mɨghɔ kə ba bɨ tsínɨ́ nɨ ɨzhwi tsə tɔmnɨnɨ a mu ɨnye bo; ntóm Yeso tiʼə ntsuʼə awa bɨtsum ə.

Bɨntsagɨnɨ bɨ bə Yuda Dɨgɨ Ntóm Yeso ghe

¹⁷ Ntumshe wu Ngwi abɔʼnɨ ngaŋ aku ɨchi ɨtsum, ɨbɛn bɨ mandzɔŋ bə Sadukai wa a tsínɨ́ a kárɨ́kɨ́ wa, tíʼ ntsí nɨ aghɨʼnɨ be tɨ́sə́n a nye ntóm Yeso; ma lan, bo tíʼ ntsɔ́ʼ a mu mɨntəm ɨma ngə́ bo mɨ ghɨ anu zə tse ghe.

¹⁸ Bo kótɨ́ ntóm Yeso ɨ nɨŋ awa atsáŋ ajwáŋ ə.

¹⁹ Lá tsɛʼ nɨ ɨtfúʼ məwa, ntsendá Maʼmbyí ŋáʼ ntsunká atsáŋ wa, ntintɨ ntóm Yeso tsa ntsa nɨ bo abyɛn, ntiʼ soŋ a mbó bo ngə́,

²⁰ “A nɨ ghɛn a mu Ndáŋwi zɨ Ngwi, ntɛm ɨwu ɨ fɨʼtɨ atsum a mbó ɨbɛn mbɨ́ʼ ntsi mbyi zɨ fi ziŋ ə.”

²¹ Ntóm Yeso zúʼnə́. A tənjwi nɨ mbvugɨrɨ bo kón a mu Ndáŋwi zɨ Ngwi mbiʼnɨ ndiʼə anu a Ŋwi ə. Mbáʼ bo kɨ́nə́ ngɨə ma lan lá, Ntumshe wu Ngwi abɔʼnɨ ngaŋ aku ɨchi ɨtsum tɔ́ŋ ngǒtə bɨkum bɨ bə Yuda tsɛʼ bo bɨtsum ngə́ á bo wɛm ngǒtə Ngaŋ Sáʼ Abyɛn ə. Bo tíʼ sóŋ ngə́ á bɨgwe ghɛn ŋaʼ ntsunká atsáŋ wa ngyen nɨ ntóm Yeso a ɨshi bo ghe.

²² Lá bɨgwe ba ghɛnə nkon, nkeʼ ntóm Yeso a mu atsáŋ za ze. Ma lan, bo tíʼ mbə mbə́n ɨ fɨʼtɨ a mbó Ngaŋ Sáʼ Abyɛn ngə́,

²³ “A nkfu za bɨgɨ ghɛ́nɨ́ fu a nye atsáŋ za, bɨgɨ zɛ́n ngə́ bɨ fən a zɛrə ɨ shiʼnɨ, bɨtsen bɨ atsáŋ kɨ ntɛmnkɨ nɨ mɨntsu mɨ abuʼ ndyɛmə a mɛrə mɨtsum ə. Lá a nkfu za bɨgɨ ŋáʼnɨ́ ntsuəbuʼ, ŋwɔn tse a keʼ wə mu chyɛ!”

²⁴ A bé anu zə tsanɨnɨ a mbó bɨntumshe bə wi abɔʼnɨ atú a ngaŋ ntsiŋ ɨdi a Ndáŋwi zɨ Ngwi a nkfu za bo zúʼnɨ́ anu za a fúnɨ́ a nye ntóm Yeso ghe.

²⁵ Ŋwɔn tse a tíʼ ngyen soŋ a mbó bo ngə́, “Zuʼnə! Ɨbɛn ba nɨ kɨ nɨŋnɨ atsáŋ lá bɨ tsi a Ndáŋwi zɨ Ngwi ndǐʼ ɨbɛn ɨwu ə!”

²⁶ Ma lan, atú a ngaŋ ntsiŋ ɨdiʼ za bo bɨ bɨgwe ɨbyi tíʼ mbə ngɛ́n ngyen nɨ ntóm Yeso wədiʼ ə. Lá bo sé awa nɨ adaʼ ko mbɨ́ʼ ngə́ bo kə́ mbɔ́gə́ ngə́ ɨbɛn kɨ chi tumtɨ awa nɨ mɨngɔʼ ə.

²⁷ Bɨgwe ba yén nɨ ntóm Yeso, ngɨ bo kon ntɛm a ɨshi Ngaŋ Sáʼ Abyɛn, Ntumshe wu Ngwi a tiʼə mbítə́ awa nɨ ɨbítɨ ə.

²⁸ A sóŋ ngə́, “Bɨgɨ kwántɨ́ awən tsɛʼ nkan ngə́ á nɨ keʼ kwiʼ ndiʼ anu zə tse nɨ ɨkum ŋwɔn wiŋ ə, lá zɛnə anu za nɨ ghɨnə! Anu za nɨ diʼnə lá a lamnɨnə a mu Yerosalɛm tsɛʼ tsum, nɨ kə ndǒ ngɨə á ghɨ ndiʼ ngə́ nɨvwo ɨni ló a mbó bɨgɨ ə!”

²⁹ Bita bo ntóm Yeso tsə mɔʼɔ tsa chwɨ́gɨ́ ngə́, “Bɨgɨ tsi nɨ ndzuʼnɨ Ŋwi nkeʼ be ɨbɛn be ə.

³⁰ Ŋwi bɨta ɨbɨgɨnə bə kɔ́ʼɔ́nguʼ a zhwémnɨ́ a Yeso a mbó nɨvwo, mbáʼ nɨ zhwítɨ́nɨ́ a mbə́ zɨ atɨ abaŋnɨ-baŋnɨ ə.

³¹ Ŋwi a tsɔ́ʼ ayi nkɔʼ ntɛgɨ a bagɨ abó zɨ zə maʼə tso Ntsagɨnɨ abɔʼnɨ Ndoŋ, ngə́ á gha abárɨ́ a mbó bə Izrai a mbəŋ mɨntəm ɨma a nye mɨbvu ɨma, á Ŋwi a lɨgɨnɨ mɨbvu ɨma ghe.

³² Bɨgɨ abɔʼnɨ Azhwi zə Fɛmnɨ, wa a nɨ azúm zə ghanɨ zə Ŋwi a mbó ɨbɛn ba bɨ zúʼnɨ́nə́ ayi, nɨ bətɛmə-ndzě a nye ɨnu tsiŋ ɨtsum ə.”

³³ Mbáʼ Ngaŋ Sáʼ Abyɛn zúʼnɨ́ a məzen lá, mɨntɔŋ ɨma lwínɨ́ be tɨ́sə́n, bo kə́ ndǒ ngə́ á bɨ zhwitɨ ntóm Yeso tsa.

³⁴ Lá táʼ ŋwɔn nɨ bo mbe ŋwɔn bə Farisao ɨkum ɨyi be Gamaliɛ, nkɨ ndzɔŋ mbe ndiʼ Nyɔngɔŋ, ɨbɛn bɨtsum kə ndǐʼ mbɔm zɨ shiʼnɨ wəmbo tsɛʼ nkan, a ló ntɛ́m atɨ́ a tɨtərɨ Ngaŋ Sáʼ Abyɛn ə. A sóŋ ngə́ á ntóm Yeso tsa tɛm abyɛn a nye məkum a nkfu,

³⁵ ntiʼ soŋ a mbó Ngaŋ Sáʼ Abyɛn ngə́, “Ɨbɔmbɨma ɨban bə Izrai, á nɨ lə ɨtú ɨtsən nɨ ɨnu ɨtsum tsa nɨ ghɨnə a nye ɨbɛn biŋ ə.

³⁶ A nɨ waʼtɨ ngə́ Tiodasɨ a fú a ɨshe nkfu tsɛrə, ɨ sóŋə́ ngə́ zɨə nɨ ŋwɔn wu ngwi tse, mbáŋnɨ́ tso nkɨ tsi nɨkwa zɔ́ŋ nkón a ngô zɨə. Lá bɨ zhwítɨ́ ayi, ɨbɛn ba bɨ kɨ́nə́ ndzɔŋə ayi bɨ dzagɨnɨ, ngǒtə ɨzhi abɔʼnɨ akwaʼtɨ aza lwɨgɨnə.

³⁷ Məza a ghɨnə ntsá, Yudasɨ, ŋwɔn bə Galili a fu a ɨshe a nkfu wa bɨ kɨ́nə́ nkwǎʼ ɨbɛn ə. A kɨ́ ngɨ ɨnɔ ɨbɛn kwəŋnɨnə ndzɔ́ŋə́ wə ndzum ə. Lá bɨ kɨ́ njwítɨ́ ayi, ɨbɛn bɨtsum ba bɨ kɨ́nə́ ndzɔŋə ayi bɨ dzagɨnə.

³⁸ A nye zen za bɨgɨnə zɛ́nə́ lá, ma sóŋə́ awɨŋ ə, á nɨ keʼ anu zə tse ghɨ a nye ɨbɛn biŋ ə. Nyam nyɛʼtɨnə awa ghe! Be za bo kyaŋtɨnɨ nkɨ ngɨ a lo lá a mbó ŋwɔn mɨsɔŋ a ntsu, a mɨ byekə,

³⁹ lá be a lo a mbó Ŋwi, nɨ chi keʼ awa gháʼə. Nɨ chi ghɨ zɛ́n ngə́ nɨ nɨ ɨbɛn ba bɨ tǒkɨ́nə́ a Ŋwi ə!” Ngaŋ Sáʼ Abyɛn zɔ́ŋ atɨgɨtɨ a Gamaliɛ ghe.

⁴⁰ Bo tɔ́ŋ ntóm Yeso bɨ kon a ndá, bɨ shwom awa nɨ ngwan, ɨ soŋ a mbó bo ngə́ á bo keʼ kwiʼ soŋ anu zə tse nɨ ɨkum Yeso; ntiʼ nyɛʼtɨ awa bo ghɛn awa ghe.

⁴¹ Adzaŋ za ntóm Yeso lónɨ́ a ɨshi Ngaŋ Sáʼ Abyɛn lá, bo dórɨ́ mbɨ́ʼ ngə́ Ŋwi a zɛ́n ngə́ bo kúʼnɨ́ a nkwárɨ́ adɨrətú mbɨ́ʼ atú a Yeso ghe.

⁴² Bo ghɛ́n nɨ mbyi ndiʼə nkə́ sǒŋ Nkən wu Shiʼnɨ mbɨ́ʼ a Yeso, Wa bɨ Zɔ́ʼnɨ́ wa njwi tsum a mu Ndáŋwi zɨ Ngwi abɔʼnɨ njwuʼ ɨbɛn ə.