Ɨfaʼ 4 - Mɨkan wu Fi

Bɨ Ko a Bita bo Yoane Ngɛn nɨ bo a Ɨshi Ngaŋ sáʼ Abyɛn ə

¹ Bita bo Yoane kə́ mbvúrə́ ngámə́ a mbó ɨbɛn ba mbáʼ bɨntumshe bə tse, atú a bɨntsiŋ ɨdiʼ a Ndáŋwi zɨ Ngwi abɔʼnɨ ɨbɛn bə tse ba bɨ kɨ́nə́ ntɔ́ŋə́ awa ngə́ bə Sadukai a bɨ shwə́gɨ́nɨ́nə́.

² Mɨntɔŋ ɨma lwínɨ́ mbɨ́ʼ ngə́ ntóm Yeso tsa tsi bá kə́ ndǐʼ ɨbɛn ba ngə́ Yeso a zhwémnɨ́ a mbó nɨvwo, mbáʼ a tíʼnɨ́ ndíʼ ngə́ ba bɨ kfokɨnɨ ghɨ zhwémnɨ́ a mbó nɨvwo ɨ tsi ntɨŋ ə.

³ Ma lan, bo kótɨ́ a Bita nɨ Yoane ɨ nɨŋ atsáŋ, bo tsi ɨwu nkɔʼ nkuʼ ɨzo wu mɔʼɔ mbáʼ nkfu tsánə́ lá.

⁴ Lá ɨbɛn bə ghaʼnɨ ba bɨ zúʼnɨ́ nkən ɨwa nɨ́ŋ mɨntəm ɨma ɨwu ə. Ndvuŋ mbáŋnɨ́ tsa tsɨ nɨ́ŋnɨ́ mɨntəm ɨma a nye nkən wa kɔ́ʼ mbe tso 5,000 ghe.

⁵ Njwi ghɨnə ndán, bɨntsagɨnɨ bɨ bə Yuda, bɨkum bɨ alaʼ abɔʼnɨ bɨdiʼ bɨ Nyɔngɔŋ bɨ bom a Yerosalɛm ə.

⁶ Bo tsí bo bɨ Ntumshe wu Ngwi Anasɨ abɔʼnɨ Kayafasɨ, Yoane, Alɛgɨsanda bo bɨ bə mɔʼɔ ba bɨ tsínɨ́ a mu ngwəgɨ Ntumshe wu Ngwi ə.

⁷ Bo ghɨ́ Bita bo Yoane tɛm atɨ́ a ɨshi bo, bo tiʼ mbitɨ awa ngə́, “Nɨ kɨ tsa lá ɨ nə́ ngɨ a məzen le? Nɨ tsi lá nɨ mɨŋə mɨtən ə, kə nɨ faʼ lá nɨ ɨkum ɨwa le?”

⁸ Bita, zɨ wa a lónɨ́ nɨ Azhwi zə Fɛmnɨ, a chwɨ́gɨ́ awa ngə́, “Bɨntsagɨnɨ bɨ ɨbɛn abɔʼnɨ bɨkum bɨ alaʼ:

⁹ be a be ngə́ nɨ bítə́ awɨgɨ nɨ ɨbítɨ ɨ sɨŋə mbɨ́ʼ ɨbɔŋ wa Ŋwi a ghɨnɨ a nye mbyinkɨnɨ wen abɔʼnɨ adzaŋ za bɨ tsánɨ́ ntsúʼ ayi,

¹⁰ bən bɨtsum tiʼ ntsi nɨ njiɛ, á ŋwɔn tsum a mu Izrai a kɨ nji ngə́ ŋwɔn wen wa a tɛmnɨ ɨghan a ɨshi bən a shwetɨ ɨ shiʼnɨ ntsa lá a ndzum mɨtən ma mɨ tsinɨ a nye ɨkum Yeso Kristo ŋwɔn Nazarɛ ghe. Yeso wa nɨ kwémtɨ́nɨ́ atɨ abaŋnɨ-baŋnɨ, lá Ŋwi a zhwemnɨ ayi a mbó nɨvwo lá.

¹¹ Yeso a nɨ ŋwɔn wa aŋwaʼnɨ a Ŋwi a sóŋnɨ́ mbɨ́ʼ ayi ngə́: ‹Ngɔʼ za bɨvwu bɨ ndá tónɨ́ lá, ɨ bə́ŋ ntíʼ ngɔʼ nɨbú nɨ ndá ə.›

¹² Bɨ chi loŋ a ŋwɔn ɨ tsa lá tsɛʼ a ndzum zɨ, nkeʼ ŋwɔn adaŋ be; a mu mbyi ziŋ tsum, ka ŋwɔn adaŋ a tsi ayi ɨwu wa Ŋwi a ghanə mbáʼ a chinɨ loŋ awɨgɨnə ghe.”

¹³ A kɨ́ʼnɨ́ Ngaŋ Sáʼ Abyɛn tsa adzaŋ za Bita bo Yoane tsínɨ́ nɨ mɨntəm mə fankɨnɨ, nkwiʼtɨ ngə́ bo bé tsɛʼ ɨbɛn a njwankɨ nkeʼ aŋwaʼnɨ zə dɨtɨnɨ zə tse yɛʼə. Bo tíʼ njí a nyom məwa ngə́ bo kwɛ́ mbé ngaŋ aku Yeso ghe.

¹⁴ Lá, anu zə daŋ za bo chínɨ́ sóŋ a sé bé mbɨ́ʼ ngə́ bo zɛ́n a ŋwɔn wa bɨ tsúʼnɨ́ lá a tɛm ɨwu bo bɨ Bita nɨ Yoane ghe.

¹⁵ Ma lan, bo tíʼ sóŋ a mbó Bita nɨ Yoane ngə́ á bo fu awa a mu Ndá Ngaŋ Sáʼ Abyɛn za. Mbáʼ bo fúnɨ́ abyɛn lá, bo tíʼ mbə ntsi ngámnə́ bo nɨbo ghe.

¹⁶ Bo bítɨ́ ngə́, “Bɨgɨnə mɨ ghɨ lá ɨ nə́ nɨ ɨbɛn ben le? Ŋwɔn tsum a Yerosalɛm a zhi ngə́ líʼ anu zə yerɨnɨ-yerɨnɨ zen a ghɨ bo, bɨgɨnə chi keʼ a zɛrə kɨ ntuŋə.

¹⁷ Lá, a nchwǎ anu zen ngə́ á keʼ kwiʼ ndzagɨnɨ ngɛn nɨ mbyi a tɨtərɨ ɨbɛn, á bɨgɨnə kwantɨ ɨbɛn ben ngə́ á bo keʼ kwiʼ ngam a mbó ŋwɔn adaŋ nɨ ɨkum Yeso ghe.”

¹⁸ Ma lan, bɨ bə́ ntɔ́ŋ awa bɨ kón a ndá, bɨ kwantɨ awa ngə́ á bo láʼ keʼ kwiʼ ngam kə ndiʼ anu zə tse nɨ ɨkum Yeso ghe.

¹⁹ Lá Bita bo Yoane chwɨ́gɨ́ a mbó bo ngə́, “Tsɛʼ bɨŋ mboŋ, nɨ tsi nɨ ɨ zagɨ bitɨ ɨtumbəm tsɨŋ ə, ngə́ a kuʼnɨ zɨŋə a ɨshi ɨmɨgɨ Ŋwi, a ndzúʼnɨ́ Ŋwi kə awɨŋ ə.

²⁰ Lá a mbó bɨgɨ, bɨgɨ mboŋ chi keʼ kyɛntɨ a ngamə mbɨ́ʼ anu za bɨgɨ zɛnə nkɨ ndzuʼə.”

²¹ Ma lan, Ngaŋ Sáʼ Abyɛn kwíʼ nkwantɨ awa nɨ nji zɨ ntən ntiʼ nyɛʼtɨ awa ngə́ á bo ghɛn awa ghe. Bo zɛ́n ngə́ bo kɨ chi keʼ nɨŋ ngɨ́ʼ tse a nye bo mbɨ́ʼ ngə́ ɨbɛn bɨtsum kə́ mbontə a Ŋwi mbɨ́ʼ anu za a fúnɨ́ lá.

²² Ŋwɔn wa bɨ fáʼnɨ́ anu zə yerɨnɨ-yerɨnɨ zə ntsuʼ ŋwɔn zen wə ɨnye lá, a lvúŋnə́ ntsa ɨlom mɨghúm mi nɨkwa ghe.

Ɨbɛn ba bɨ Nɨŋnɨ Mɨntəm ɨma a nye Ŋwi Tsaʼtɨ a Ŋwi a Nchyɛ́ nɨ Mɨntəm mə Fankɨnɨ ə

²³ Tsɛʼ mbáʼ bɨ nyɛ́ʼtɨ́nɨ́ a Bita bo Yoane lá, bo bə́ mbən ngɛn nkwatɨ ngǒtə ɨbɛn ba bɨ nɨ́ŋnɨ́ mɨntəm ɨma a nye Ŋwi, ɨ fɨʼtɨ anu za bɨntumshe bə wi abɔʼnɨ bɨkum bɨ alaʼ a bɨ sóŋnɨ́ a mbó bo ghe.

²⁴ Mbáʼ ɨbɛn ba bɨ nɨ́ŋnɨ́ mɨntəm ɨma a nye Ŋwi zúʼnɨ́ a məzen lá, bo bɨtsum tfúŋ ɨtú ɨtsa ntsaʼtɨ a Ŋwi ngə́: “Maʼmbyí, gho wa o káʼnɨ́ fɔməbvurə, atuəshe, sagɨrə wu ngwi nɨ ɨdzúm ɨtsum tsa tsɨ tsinɨ a mu ɨdiʼ tsiŋ ɨtsum!

²⁵ A ntsǎ a ndzum Azhwi zə Fɛmnɨ, o ghɨ́ ta ɨwɨgɨ wu kɔ́ʼɔ́nguʼ Ɨfɔ Devidɨ ngaŋ afaʼ ɨzo gham ɨ soŋ ngə́: ‹ba a se bə Yuda be lwí ntɔŋ lá ngə́ ke le; ɨbɛn táŋ a mɨnaŋ tənu lá mbɨ́ʼ ake le?

²⁶ Bɨfɔ bɨ atuəshe wiŋ kyáŋtɨ́ ɨnye ɨtsa, bɨsáʼ bɨ alaʼ ghótɨ́ a ntó Maʼmbyí bo ɨyi Wa bɨ Zɔ́ʼnɨ́ wa.›

²⁷ Mbɨ́ʼ ngə́ tsɛʼ a nkənu, Ɛrɔd bo Bonto Branto bómnkɨ́ a mu ntáʼmbagə wu wi wen bo bɨ ba a se bə Yuda be nkwiʼtɨ bə Izrai, ntáŋ a mɨnaŋ atú Yeso, ngaŋ afaʼ ɨzo zɨ fɛmnɨ za o ghɨ́nɨ́ a nye Wa bɨ Zɔ́ʼnɨ́ wa.

²⁸ Bo bómnkɨ́ lá a ngɨ ɨnu ɨtsum tsa o kwɛ́nə nkyaŋtɨ ngə́ á tsɨ fu ntsa a ndzum mɨtən ɨmo abɔʼnɨ adzaŋ za o kɨ́nə́ ndǒ ghe.

²⁹ Tɨtsɔŋnɨ nə Maʼmbyí, ze adzaŋ za bo kyésɨ́nə́ awɨgɨ, Maʼmbyí tiʼ ngɨ awɨgɨ ngaŋ afaʼ ɨtso ngə́ á bɨgɨ soŋ nkən ɨgho nɨ mɨntəm mə fankɨnɨ ə.

³⁰ Adzaŋ za bɨgɨ sóŋnɨ́ nkən ɨgho nɨ mɨntəm mə fankɨnɨ lá, shiŋ abó azo a ntsúʼ mɨghɔ, nkɨ ngɨ ngə́ á bɨgɨ chi ghɨ ɨnu tsɨ tsanɨnɨ abɔʼnɨ ɨnu tsɨ yerɨnɨ-yerɨnɨ ntsa a ndzum ɨkum ngaŋ afaʼ ɨzo zɨ fɛmnɨ, Yeso ghe.”

³¹ Bo ghɨnə mɛ́tɨ́ a ntsaʼtɨ Ŋwi, adiʼ za bo tsínɨ́ ɨwu lá a nɛmə. Azhwi zə Fɛmnɨ a lwɨ́gɨ́ awa bɨtsum, bo tiʼ mbiʼnɨ nchwítɨ́ nkən Ŋwi nɨ mɨntəm mə fankɨnɨ ə.

Ɨbɛn ba bɨ Nɨ́ŋnɨ́ Mɨntəm ɨma a nye Ŋwi kə́ Ngyɛbtɨ Ɨdzúm ɨtsa a Tɨtərɨ bo ghe

³² Ngǒtə ɨbɛn ba bɨ nɨ́ŋnɨ́ mɨntəm ɨma a nye Ŋwi bé lá tsɛʼ táʼ azúm a ntəm bo abɔʼnɨ akwaʼtɨ aza ghe. Ŋwɔn tse a tɨtərɨ bo a sé sóŋ ngə́ azúm zə tsɛrə za zɨə tsínɨ́ nɨ zɛrə a nɨ tsɛʼ azhi ɛ. Bo kə́ ngyɛbtɨ ɨdzúm ɨtsa tsɛʼ ɨtsum a tɨtərɨ bo ghe.

³³ Ntóm Yeso kə́ sóŋə́ nɨ adaʼ zə wi adzaŋ za bo tɛ́mnɨ́ ɨwu nkɨ ndzɛn adzaŋ za Maʼmbyí Yeso a zhwémnɨ́nɨ́ a mbó nɨvwo, Ŋwi a tiʼ nkɨ nga abɔŋəntəm zə wi a mbó bo ghe.

³⁴ Ŋwɔn tse a tɨtərɨ bo a sé azúm zə tsɛrə a mbóŋə́ ghe. Bo ba bɨ tsínɨ́ nɨ ɨbɨŋ ɨshe abɔʼnɨ ndá kə́ fiŋə a tsɛrə ngyíŋə́ nɨ nkáb za bɨ fénɨ́ ɨwu,

³⁵ ngǎ a zɛrə a mbó ntóm Yeso ghe. Bo kə́ ntíʼə ngyɛ́btɨ́ nkáb məzen a mbó ŋwɔn tsum ndzɔ̌ŋ anu za ŋwɔn tsum a kɨ́nə́ ndǒ ngɨə nɨ nkáb ə.

³⁶ Ma lan, Yosɛb, ŋwɔn ɨlə̌ ndá Levi wa bɨ jwínɨ́ ayi a Saibrusɨ, zɨ wa ntóm Yeso kɨ́nə́ ntɔ́ŋə́ ngə́ Banabasɨ (mbáʼ ɨ diʼnɨ lá ngə́, ‘‘Zɨ wa a Wɔŋtɨnə’’),

³⁷ a fíŋ abɨŋ a ɨshe azhi, ngyen nyɔŋ nkáb za a fénɨ́ ɨwu a mɨku ntóm Yeso ghe.