Ɨfaʼ 3 - Mɨkan wu Fi

Bita bo Yoane Tsuʼ a Mbyinkɨnɨ wu tse ghe

¹ A ɨtfúʼ njwi tse, Bita bo Yoane kə́ ngěn a Ndáŋwi zɨ Ngwi a nye bɨnyom bi bɨtárə́ a ndzəŋ nyom, nkfu za bɨ kɨ́nə́ ntsaʼtə a Ŋwi ə.

² Ŋwɔn tse wa a byínkɨ́nɨ́ nchwuʼnɨ mbáʼ bɨ jwínɨ́ ayi a tsí a ntsunká wa bɨ kɨ́nə́ ntɔ́ŋə́ ngə́ Ntsunká Nɨbɔŋ ə. Bɨ kə́ ntsɔ́ʼə ayi njwi tsum ngyíŋə́ nɨ zɨ a ntsunká wa ngə́ á ndɔ́ntɨ́ nkáb a mbó ɨbɛn ba bɨ kɨ́nə́ nkúŋə́ ngěn a mu Ndáŋwi zɨ Ngwi ə.

³ Mbáʼ wɛrə a zɛ́nɨ́ a Bita bo Yoane bɨ kuŋə ngěn lá, a lɔ́ntɨ́ nkáb a mbó bo ghe.

⁴ Bo kyérɨ́ ayi, Bita a tiʼ soŋ ngə́, “Len awɨgɨ ə!”

⁵ A tíʼ nden awa, ntsǐŋ nkwarɨ nkáb a mbó bo ghe.

⁶ Lá Bita a sóŋ wəmbo ngə́, “Ka ma tsi aghan nɨ nkáb tse ghe, lá ma mɨ gha agho nɨ azúm za ma tsinɨ nɨ zɛrə ghe; nɨ ɨkum Yeso Kristo ŋwɔn Nazarɛ, lo atɨ́ a ntɛ́mə́ ghe!”

⁷ A tíʼ ntsagɨ abó azhi zə maʼə nkwatɨ ayi ɨwu ngə́ á lo tɛm atɨ́ ə. Mɨku ɨmyi bo ɨmɨgɨ mɨ mɨku ɨmyi byí ntən;

⁸ a kanɨ ndo atɨ́, ntɛm, mbiʼnɨ ɨ tɛm karɨkə. A tíʼ ndzɔŋ awa nkon ngɛn a mu Ndáŋwi zɨ Ngwi, ngyíŋə́, ɨ náŋtə́, mbóntə́ a Ŋwi ə.

⁹ Ɨbɛn ba bɨtsum ɨwu zɛ́n ayi a tɛmə nkə́ mbóntə́ a Ŋwi,

¹⁰ bo ghɨnə ntíʼ njí ayi tso ndɔŋ wa a kɨ́nə́ shíʼtə́ nchyɛ̌ a Ntsunká Nɨbɔŋ wa lá, a kɨ́ʼnɨ́ nkɨ́ ntsánɨ́ awa bɨtsum a nye anu za a fúnɨ́ wə ɨnye.

Nkən Bita a mu Ndáŋwi zɨ Ngwi ə

¹¹ Mbáʼ ŋwɔn wa a chwánɨ́ a Bita bo Yoane ntiʼtɨ a ntaŋ wu tɛʼnɨ wu Sanɨmɔ lá, a tíʼ nkɨʼnɨ ɨbɛn ba, bo kɨənɨ ngyen a mbó bo ghe.

¹² Mbáʼ Bita a zɛ́nɨ́ ɨbɛn ba lá, a bítɨ́ a mbó bo ngə́, “Ɨbɔmbɨma ɨban bə Izrai, məzen a kɨʼnɨ awən lá ngə́ ke le? Nɨ kə́ nkyérə́ awɨgɨ lá ngə́ ke le? Nɨ kwaʼtɨ ngə́ bɨgɨ tsa lá a ndzum mɨtən ɨmɨgɨ kə a ndzum adzaŋ za bɨgɨ bɔŋnɨ a ɨshi ɨmɨgɨ Ŋwi be tɨ́sə́n mbáʼ bɨgɨ ghɨnɨ ŋwɔn wen a tɛmnə lá le?

¹³ Ŋwi, zɨ wa a nɨ wu Abraʼm, Isak nɨ Yakɔb, Ŋwi wu bɨta ɨbɨgɨnə bə kɔ́ʼɔ́nguʼ, wɛrə a ghanə nkɔʼsə atɨ́ zɨ ngwi a mbó ngaŋ afaʼ ɨzhi Yeso ghe. Lá nɨ tíntɨ́ ayi ngá a mbó bɨsáʼ bɨ alaʼ nkɨ nton awən ayi a ɨshi Branto le buŋ Branto a kwɛ́nə ntsɔʼ a mu ntəm zɨ ngə́ zɨə mɨ nyɛʼtɨ ayi ɛ.

¹⁴ Wɛrə a Fɛ́m nkɨ́ Nchinɨ, lá nɨ ton awən ayi ɛ. Nɨ báŋnɨ́ sóŋ ngə́ ɨbɔŋ wa Branto a mɨ ghɨ a mbó bən a nɨ ɨ fɨgɨ ngwarɨ ŋwɔn atsáŋ ɨ gha a mbó bɨŋ ə.

¹⁵ Nɨ zhwítɨ́ a ŋwɔn wa a ghánɨ́ ntsi ntɨŋ ə. Lá Ŋwi a zhwémnɨ́ ayi a mbó nɨvwo ə. Bɨgɨ nɨ bətɛmə-ndzě a nye anu məziŋ ə.

¹⁶ A nɨ abeməntəm a nye ɨkum ɨyi mbáʼ a lónɨ́ ngɨ mbyinkɨnɨ wen a shwetə. Za nɨ zɛ́nə́ nkɨ nji lá, bɨ faʼ ntsa lá a ndzum abeməntəm a nye ɨkum ɨyi ɛ; a lo mbé lá abeməntəm a nye ɨkum Yeso mbáʼ a lónɨ́ ngɨ a shwetɨ, tso mbáʼ bən bɨtsum zɛ́nə́ lá.

¹⁷ Tɨtsɔŋnɨ nə ɨbɔmbɨma ɨban bə Izrai, ma zhi ngə́ anu za bɨŋ bɨntsagɨnɨ ɨbɨŋ ghɨ́nɨ́ a nye Yeso, nɨ ghɨ́ a zɛrə lá mbɨ́ʼ a tɨzhi ɨwɨŋ ə.

¹⁸ Ŋwi a chwítɨ́ a ngúʼə ngúʼə ntsa a ndzum ntóm Ŋwi ɨtsum ngə́ Wa bɨ Zɔ́ʼnɨ́ ɨyi wa mɨ ze ngɨ́ʼ; a kɨ́ ngɨ a fu a nye nkənu ə.

¹⁹ Tiʼ lá nyɛʼnə mɨbvu ɨmən, mbəŋ mɨntəm ɨmən nga a mbó Ŋwi, taŋ á Ŋwi a chi lɨgɨnɨ mɨbvu ɨmɨŋ ə. Be nɨ ghɨ mə lan,

²⁰ nkfu ghɨ yen za Maʼmbyí a mɨ tsagɨ a Wa bɨ Zɔ́ʼnɨ́ wa a mbó bən, zɨ wa a nɨ Yeso, mbe zɨ wa Ŋwi a kwɛnə ntsɔʼ a mbó bən lá.

²¹ A tsi nɨ ɨ zagɨ ghɔŋ a fɔməbvurə ɨ kuʼnɨ nkfu za bɨ ghɨnɨ ghɨ á ɨnu ɨtsum tiʼ tsɨ fi, adzaŋ za Ŋwi a chwítɨ́nɨ́ ntsa a ndzum ntóm Ŋwi tsɨ fɛmnɨ ɨchi, tsa tsɨ tsínɨ́ atuəshe nchwuʼnɨ a lɔ́ʼkwam lá.

²² Mǒse a sóŋ ngə́, ‹Maʼmbyí Ŋwi ɨwən a ghɨ tsagɨ ntom Ŋwi a mbó bən, ndəŋndəŋ adzaŋ za a tságɨ́nɨ́ aghan, a mɨ be táʼ ŋwɔn abɔʼnɨ bɨŋ ə. Nɨ tsi nɨ ndzuʼnɨ anu atsum za a soŋnɨ ngə́ á nɨ ghɨə.

²³ Ŋwɔn tsum wa a se ntom Ŋwi məzen zuʼnɨ, bɨ ghɨ fɨ́gɨ́ ayi a tɨtərɨ ɨbɛn bɨ Ŋwi ɨ zhwitə.›

²⁴ Ntóm Ŋwi ɨtsum tsa tsɨ tsínɨ́ nɨ nkən, mbiʼnɨ a nye Samwɛrɨ, nkwiʼtɨ a ba bɨ zɔ́ŋnɨ́ wə ndzum, kwɛ́nə ngam mbɨ́ʼ ɨnu tsen tsa tsɨ fúnə́ a mu njwi tsen lá.

²⁵ Ɨkaʼ tsa Ŋwi a káʼnɨ́ ntsa a ndzum ntóm Ŋwi tsi lá a mbó bɨŋ ə, nɨ kɨ ntsi a mu akan za bɨta ɨbən bə kɔ́ʼɔ́nguʼ kónɨ́ bo bɨ Ŋwi ə. Wɛrə a sóŋ a mbó Abraʼm ngə́, ‹Ntsa a ndzum ɨlə̌ ɨgho, ma mɨ fɔgɨ ɨbɛn bɨtsum atuəshe.›

²⁶ Ma lan, Ŋwi a tsɔ́ʼ Ngaŋ Afaʼ ɨzhi, ntyigɨ ayi a ntsambyi a mbó bən ngə́ á fɔgɨ awən, a ngɨə á ŋwɔn tsum a tɨtərɨ bən a furɨ ndzum ɨzhi a nye abɨgəntəm azhi ɛ.”