Ɨfaʼ 26 - Mɨkan wu Fi

Baolo a Gham Nɨgham nɨ Ntsuʼ Atú azhi a Ɨshi Agɨrɨba ghe

¹ Agɨrɨba a sóŋ a mbó Baolo ngə́, “O chi gham nɨgham nɨ ntsuʼ atú azo ə.” Baolo a tságɨ́ abó azhi atɨ́ ntiʼ ngam nɨgham nɨ ntsuʼ atú azhi ngə́:

² “Ɨfɔ Agɨrɨba! Ma kwaʼtɨ ngə́ a nɨ abɔŋətú azan ɨ sɨŋə ngə́ ma chi gham nɨgham nɨ ntsuʼ atú azan a ɨshi gho mbɨ́ʼ ɨnu ɨtsum tsa bə Yuda benə kaŋnə aghan mbɨ́ʼ a tsɛrə,

³ tɨ́sə́n tɨ́sə́n, tso mbáʼ o zhinɨ ɨ shiʼnɨ mbɔm bə Yuda abɔʼnɨ ɨnu tsa bo kwənkɨnə ɨwu lá. Ma lan, ma tiʼə mbúʼtɨ́ mbó a mbó gho ngə́ o tsi nɨ nchigə a njwíʼtɨ́ anu za ma mɨ soŋə.

⁴ Bə Yuda bɨtsum zhi ntsi mbyi ɨzan nchwuʼnɨ mbáʼ ma bénɨ́ mánkɨ́ə. Bo zhi atsum adzaŋ za ma kɨ chinə nchyɛ̌, a mbiʼnə, a mu alaʼ azan, a ndzɔŋtə, a Yerosalɛm ə.

⁵ Bo zhi, ɨ lɔgɨnɨ a nye abaŋ zə sa, mbáʼ be bo kɔŋ ɨ soŋ za bo zhinɨ, ngə́ ɨ lɔgɨnɨ a mbiʼnə, ma bé ŋwɔn mandzɔŋ ɨbɛn ba bɨ zɔŋnə, tə fə́nkə́, bɨnyɔngɔŋ mbɨ́ʼ ndóm wa bɨgɨnə zhinɨ a Ŋwi ə. Ntsi mbyi ɨzə bé zɨ bə Farisao ghe.

⁶ Tɨtsɔŋnɨ, ma tɛm ɨghan á bɨ sáʼ aghan mbɨ́ʼ ntsiŋə nɨ ntəm tsum za ma tsinɨ nɨ zɛrə a nye akaʼ za Ŋwi a ghɨ́nɨ́ a mbó bɨta ɨbɨgɨnə bə kɔ́ʼɔ́nguʼ —

⁷ ndəŋndəŋ azúm za ɨtsé tsɨ wi tsɨ ɨbɛn ɨbɨgɨnə tsa nɨghúm ntsɔb bá tsenə nɨ ntəm tsum ɨ ghɨ kwárɨ́, adzaŋ za bo ghúʼsɨ́nə́ a Ŋwi nɨ ɨtfúʼ nɨ njwi lá. A nɨ mbɨ́ʼ ntsiŋə nɨ ntəm tsum məzen, nə Tsazɨ, mbáʼ bə Yuda biŋ kaŋnɨ aghan mbɨ́ʼ a zɛrə ghe!

⁸ Bən ba nɨ tsinɨ ɨghan, a ghɨ ake nɨ ghuʼnə kɨ́káŋ a nɨŋ ntəm ɨwən ɨwu ngə́ Ŋwi a zhwémnɨ́ bɨkfú a mbó nɨvwo le?

⁹ Me mboŋ, ma kwɛ́ nkɨ́ nkwáʼtɨ́ ngə́ muŋ ma ghɨ anu atsum za ma chínɨ́ ghɨ a ntsúʼnɨ́ anu mbɨ́ʼ ɨkum Yeso Ŋwɔn Nazarɛ ghe.

¹⁰ Nə nɨ anu za ma ghɨ́nɨ́ a Yerosalɛm ə. Ma kwárɨ́ mɨtən a mbó bɨntumshe bə wi, ɨ nɨŋ ɨbɛn bɨ Ŋwi bə ghaʼnɨ atsáŋ; a nkfu za bɨ sáʼnɨ́ nchɛ́rɨ́ ngə́ á bɨ zhwitɨ awa lá, ma kɨ́ ntwɛ́mtə́.

¹¹ Nkfu tsə ghaʼnɨ ma nɨ́ŋ ngɨ́ʼ a nye bo a mu ndáŋwi bə Yuda, nkɨ njwəŋtɨ a ngɨə á bo nyɛʼ abeməntəm aza ghe. Ma lwí ntɔŋ a nye bo tɨ́sə́n ɨ kɔʼ kuʼ ɨfɨʼ za ma kɨ́nə́ fúrə́ awa ngěn nɨ ntáʼmbagə tsɨ wi tsɨ ɨtóm ɨtóm a ndɨ́gɨ́ bo ghe.”

Baolo a Fɨʼtɨ Adzaŋ za Zɨə Kwébtɨ́nɨ́ Ntəm ɨyi ɛ

¹² “A bé lá mbɨ́ʼ anu məzen mbáʼ ma ghɛ́nɨ́ a Damaskusɨ nɨ mɨtən abɔʼnɨ ɨtɨgɨtɨ tsa tsɨ lónɨ́ a mbó bɨntumshe bə wi ə.

¹³ A ghɨ́ mbé lá a ndómnji a ntənɨ nyom, nə Tsazɨ, mbáʼ ma zɛ́nɨ́ nkaʼ wu tse wa ɨ kɨ́nə́ ntǎ ntsa a nɨnyom, wa ɨ lónɨ́ a nɨkaŋ nta nkárɨ́sɨ́ aghan abɔʼnɨ ɨbɛn ba bɨgɨ bo tsínɨ́ aku ə.

¹⁴ Bɨgɨ bɨtsum vwókɨ́ a tɨshe, ma zuʼ nji ɨ gham nɨ nɨgham nɨ bə Ɛbal a mbó me ngə́, ‹Sɔlɨ, Sɔlɨ! O dɨ́gə́ aghan lá ngə́ ke le? O lɛ́mtə́ atuəmbəm azo adzaŋ za o tókɨ́nə́ aghan lá.›

¹⁵ Ma bítɨ́ ngə́, ‹Maʼmbyí, o lá ɨwa le?› Maʼmbyí a tíʼ nchwɨ́gɨ́ ngə́, ‹Ma nɨ Yeso, zɨ wa o dɨ́gɨ́nə́ lá.

¹⁶ Lá lo ntɛm atɨ́ ə. Ma fu a ɨshe a ɨshi gho a ntsɔ́ʼ gho a nye ngaŋ afaʼ ɨzə. O mɨ soŋ a mbó ɨbɛn bə mɔʼɔ ɨnu tsa o zɛnɨ mbɨ́ʼ aghan ɨ sɨŋə abɔʼnɨ tsa ma ghɨ fɨʼtɨ a mbó gho a nkfu ndzum ə.

¹⁷ Ma mɨ kɨnkɨ agho a mbó ɨbɛn bɨ Izrai abɔʼnɨ ba a se bə Yuda be ba ma mɨ tsagɨ agho a mbó bo lá.

¹⁸ O mɨ ŋaʼ ɨmɨgɨ ɨma, ɨ kɨ fɨgɨ awa a mu ndzumnɨ ɨ tsagɨ a mu nkaʼ, ɨ fɨgɨ awa a mu mɨtən mɨ Satan ɨ tsagɨ a mu nɨfɔ nɨ Ŋwi, taŋ a ntsǎ a ndzum abeməntəm aza za bo tsinɨ nɨ zɛrə a nye me, bɨ mɨ lɨgɨnɨ mɨbvu ɨma, ɨ tiʼ tsi nɨ adiʼ za bo tsinɨ nɨ nchyɛ nɨ zɛrə a tɨtərɨ ɨbɛn ba Ŋwi a tsɔʼnə ghe.›

Baolo a Gham mbɨ́ʼ Ɨfaʼ ɨyi ɛ

¹⁹ Ma lan nə Ɨfɔ Agɨrɨba, ma sá atú tən a mbó ndzɛm nəzhwɨgɨnɨ za ma lyénɨ́ za ɨ lónɨ́ a fɔməbvurə lá.

²⁰ Ma tsá mbyi ɨ soŋ anu a Ŋwi lá a Damaskusɨ ntiʼ ndzɔŋtɨ nɨ Yerosalɛm, ntiʼ ndzɔŋtɨ nɨ Yudiya tsum, ntiʼ ndo ɨwu nkon a mbó ba a se bə Yuda be ə. Ma sóŋ anu a Ŋwi ngə́ bo mɨ zagɨ bəŋ mɨntəm ɨma a nye mɨbvu ɨma, ɨ tiʼ tsi a bagɨ Ŋwi, ɨ kɨ ghɨnɨ mɨnu ma mɨ diʼnɨ ngə́ bo bəŋnə mɨntəm ɨma a nye mɨbvu ɨma ghe.

²¹ A bé lá mbɨ́ʼ a məzen mbáʼ bə Yuda benə shíʼnɨ́ mbó a ɨnye me a mu Ndáŋwi zɨ Ngwi, ntiʼ njwəŋtɨ a njwítɨ́ me ghe.

²² Ɨ kɔʼ kuʼ ntsu sɨŋə, Ŋwi a kwátə́ aghə. Ma lan, ma tɛm ɨghan ɨ sóŋə́ lá a za a diʼnɨ nkənu a mbó bə kɨʼnɨ nkwiʼtɨ a bə wi ə. Anu za ma sóŋnə́ lá nɨ ndəŋndəŋ anu za ntóm Ŋwi abɔʼnɨ Mǒse sóŋnɨ́ ngə́ a ghɨ fu ngə́:

²³ Wa bɨ Zɔ́ʼnɨ́ wa a mɨ zagɨ ze ngɨ́ʼ, ɨ be ntsambyi ŋwɔn a nzhwémnə́ a mbó nɨvwo taŋ ɨ chwítɨ́ nkən wen a mbó bə Yuda abɔʼnɨ ba a se bə Yuda be ngə́ bɨ chi loŋ awa, á məzen a be lá tso nkaʼ a mbó bo ghe.”

²⁴ Adzaŋ za Baolo a ghámnɨ́ nɨgham nɨ ntsuʼ atú azhi adzaŋ wen lá, Fɛsɨto a tɔ́nkɨ́ ngə́, “Baolo o banɨ ə! Aŋwaʼnɨ zə wi za a tsinɨ a mu atú gho lá a nɨŋ abarə a mu atú azo ə!”

²⁵ Baolo a chwɨ́gɨ́ ngə́, “Tsazɨ, ka ma banɨ aghə! Ma sóŋə́ lá nkənu a mu mbɔnɨ ə.

²⁶ Ɨfɔ Agɨrɨba! Ma chi gham a mbó gho tɨ nɨbɔgɨ mbɨ́ʼ ngə́ o zhi anu mbɨ́ʼ ɨnu tsiŋ ɨtsum ə. Ma zhi ɨ shiʼnɨ ngə́ o lɛn a tsɛrə ɨtsum a mu atú gho mbɨ́ʼ ngə́ ka anu zen a fu ayi lá a nkubə ghe.

²⁷ Ɨfɔ Agɨrɨba, o nɨŋ ntəm ɨgho a nye ɨnu tsa ntóm Ŋwi ŋwáʼnɨ́nɨ́ le? Ma zhi ngə́ o nɨŋə!”

²⁸ Agɨrɨba a sóŋ a mbó Baolo ngə́, “Tsɛʼ a nye məkum a nkfu wen, o wiʼtɨ ngə́ be o bəŋ aghan a nye ŋwɔn wa a zɔŋnə a Kristo le?”

²⁹ Baolo a chwɨ́gɨ́ ngə́, “Kə nkfu vwugɨ kə ɨ sagɨ muŋ atsaʼtɨ a Ŋwi azan a nɨ ngə́ á gho nkwiʼtɨ abvuʼ azən bɨtsum za a tsinɨ ɨghan ɨ sɨŋə njwíʼtə́ anu za ma sóŋnə́ chi bəŋ ɨ be tso me — ɨ keʼ baŋnɨ mbe tso me wa ma nɨ ngaŋ atsáŋ bɨ korɨ aghan nɨ mɨnkɨ mɨ atɨŋə lá!”

³⁰ Ɨfɔ, gobɨna, Bɛrɨnisɨ nkwiʼtɨ a bə mɔʼɔ bɨtsum tíʼ ndo atɨ́,

³¹ bo ghɨnə nyɛ́ʼtɨ́ adiʼ za, ntiʼ ngamnɨ ŋwɔn nɨ ŋwɔn ngə́, “Ka ŋwɔn wen a ghɨ ayi anu zə tse za be bɨ zhwitɨ ayi kə ɨ nɨŋ ayi atsáŋ ə.”

³² Agɨrɨba a tíʼ sóŋ a mbó Fɛsɨto ngə́, “Ŋwɔn wen a lo be tú soŋ ngə́ á bɨ tsagɨ ɨsáʼ ɨyi a mbó Kaisa muŋ bɨ fɨgɨ ayi ɨ nyɛʼtə.”