Ɨfaʼ 23 - Mɨkan wu Fi

¹ Baolo a kyérɨ́ mɨshi mɨ Ngaŋ Sáʼ Abyɛn tsa ntiʼ soŋ ngə́, “Ɨbɔmbɨma ɨban, bə Izrai! Ntəm ɨghə fɛm mbɨ́ʼ ntsi mbyi ɨzan a ɨshi Ŋwi ɨ kɔʼ kuʼ ɨ sɨŋə ghe.”

² Ntumshe wu Ngwi wa ɨkum ɨyi bénɨ́ Anania lá a sóŋ a mbó ɨbɛn ba bɨ tɛ́mkɨ́nɨ́ a mbyɛn Baolo ngə́ á bo sarɨ andubɨnɨ a ntsu Baolo ghe.

³ Baolo a sóŋ wəmbo ngə́, “Ŋwi a ghɨ zagɨ sarɨ andubɨnɨ a nye gho ghe — gho afə́ŋ a ndá za bɨ zɔ́ʼnɨ́ nɨ mbɛm zɨ fú ə! O shiʼtɨ ntsi adiʼ wa a ndzɔŋ Nyɔngɔŋ ɨ sáʼ aghan, lá ɨ fásə́ a Nyɔngɔŋ mbáʼ o soŋnɨ ngə́ á bɨ sarɨ andubɨnɨ a ɨnye me ghe!”

⁴ Ɨbɛn ba bɨ tɛ́mkɨ́nɨ́ a mbyɛn Baolo sóŋ wəmbo ngə́, “O zɔmə a Ntumshe wu Ngwi wu Ŋwi ə!”

⁵ Baolo a chwɨ́gɨ́ ngə́, “Ɨbɔmbɨma ɨban, bə Izrai, ma lo nkaʼ zhi ngə́ a lo mbe Ntumshe wu Ngwi ə. Aŋwaʼnɨ a Ŋwi a soŋ ngə́, ‹O chi koʼ gham anu zə tɔmnɨnɨ mbɨ́ʼ a ŋwɔn wa a sáʼnɨ́ ɨbɛn ɨbo.› ”

⁶ Mbáʼ Baolo a zɛ́nɨ́ ngə́ abagɨ zə tse a bé bə Sadukai, zə mɔʼɔ a be bə Farisao lá, wɛrə a tɔ́nkɨ́ a ɨshi Ngaŋ Sáʼ Abyɛn tsa ngə́, “Ɨbɔmbɨma ɨban, bə Izrai! Ma nɨ ŋwɔn bə Farisao, mɔn Farisao wu mbáŋnɨ́ ə. Bɨ sáʼə aghan ɨghan lá mbɨ́ʼ ntsiŋə nɨ ntəm tsum ngə́ bɨkfú ghɨ zhwémnɨ́ a mbó nɨvwo ə!”

⁷ Tsɛʼ mbáʼ wɛrə a sóŋnɨ́ a məzen lá, bə Farisao bo bə Sadukai chwúʼ azɔŋ, ayɛbtɨ a tiʼ ntsi a tɨtərɨ ngǒtə za.

⁸ (Mbɨ́ʼ ngə́ bə Sadukai sóŋə́ ngə́ ɨbɛn ghɨ keʼ zhwemnɨ a mbó nɨvwo, ngə́ ka bɨtsen bɨ ndá bɨ Ŋwi be awa ɨwu kə ɨzhwi ə; lá bə Farisao nɨŋ mɨntəm ɨma a nye tsɛrə ɨtsum tsi tárə́ ghe.)

⁹ Ntɔnkə za kwíʼ ntəntɨ, bɨdiʼ bɨ Nyɔngɔŋ ba bə tse ba bɨ tsínɨ́ a mu mandzɔŋ bə Farisao ló ntɛ́m atɨ́ ntón anu məzen nɨ nji tsɨ tən ngə́, “Ka bɨgɨ ze awɨgɨ anu zə tse za ŋwɔn wen a fanə! Aghagɨ a tsɛrə azhwi zə tsɛrə kə ntsendá Ŋwi zɨ tse lo ndánɨ́ ngám wəmbo ə!”

¹⁰ Akwənkɨ za a tə́n tɨ́sə́n a nye mbon wa tantso wa a kɨ́nə́ mbɔ́gə́ ngə́ bɨ chi satɨ a Baolo ɨlam ɨlam ə. Ma lan, wɛrə a sóŋ a mbó bɨgwe ɨbyi ngə́ á bo shiʼ ngɛn a mu ngǒtə za, ndɔgɨ a Baolo ngɛn nɨ zɨ a mu bálɨ́gɨ́ ə.

¹¹ Nɨ ɨtfúʼ məwa, Maʼmbyí a tɛ́m a mbyɛn Baolo ɨ soŋ ngə́, “Koʼ bɔgə! O soŋnɨ nkənu za ɨ tsinɨ ɨwu mbɨ́ʼ aghan ɨghan a Yerosalɛm ə, o mɨ zagɨ kɨ ɨ ghɨ ndəŋndəŋ a Roma ghe.”

Bɨ Korɨ a Mɨnaŋ a Njwítɨ́ Baolo ghe

¹² Njwi zɨ mɔʼɔ bənə ndán, bə Yuda bə tse bomnkɨ ngɨ akyaŋtɨ ə. Bo bɨtsum kán ngə́ ŋwɔn nɨ bo wu tse mɨ keʼ dzɨ kə ɨ no azúm zə tse tɨgha bo zhwitɨ a Baolo ghe.

¹³ Bo ba bɨ ghɨ́nɨ́ akyaŋtɨ məzen bɨ tsá 40 ghe.

¹⁴ Bo tíʼ ngɛn a mbó bɨntumshe bə wi abɔʼnɨ bɨkum bɨ alaʼ ɨ soŋ a mbó bo ngə́, “Bɨgɨ lɔgɨ akan zə tən ngə́ bɨgɨ mɨ keʼ dzɨ azúm zə tse tɨgha bɨgɨ zhwitɨ a Baolo ghe.

¹⁵ Ma lan, bən, nkwiʼtɨ Ngaŋ Sáʼ Abyɛn ɨtsum mɨ tsagɨ nkən a mbó tantso bə Roma ngə́ á wɛrə a yen nga a Baolo a mbó bən, ɨ ghɨnə lá ɨtsi ngə́ nɨ lǒ ntsɔʼ aku wəmbo ɨ shiʼnɨ ɨ shiʼnɨ mbɨ́ʼ atuəmbəm azhi ɛ. Lá bɨgɨ mɨ kyaŋtɨ ɨnye ɨtsɨgɨ a njwítɨ́ zɨ bɔŋ a yen nkuʼ ɨghə.”

¹⁶ Lá mɔn mɨma Baolo wu mangye, wu mbáŋnɨ́ a zúʼ a mɨnaŋ məwen; ma lan wɛrə a ghɛ́n a mu bálɨ́gɨ́ wa, nkyɛʼ a mɨnaŋ məwen a mbó Baolo ghe.

¹⁷ Baolo a tíʼ ntɔ́ŋ a táʼ tantso bɨgwe nkɨ wu fɨgɨnɨ wa wu mɔʼɔ ɨ soŋ wəmbo ngə́, “Lɔgɨ nkaŋ ŋwɔn zen ngɛn nɨ zɨ a ɨshi tantso ghe; wɛrə a tsi nɨ anu zə tsɛrə a sóŋə́ a mbó zɨə.”

¹⁸ Tantso bɨgwe nkɨ wu fɨgɨnɨ wa a lɔ́gɨ́ ayi ngɛn nɨ zɨ a ɨshi tantso, ntiʼ soŋ ngə́, “Baolo ngaŋ atsáŋ wa a tɔŋ aghan ɨ soŋ ngə́ á ma lɔgɨ mbáŋnɨ́ zen ngyen nɨ zɛrə a ɨshi gho, mbɨ́ʼ ngə́ ɨ tsi nɨ anu zə tsɛrə a sóŋə́ a mbó gho ghe.”

¹⁹ Tantso wa a chwá abó a mɔn mbáŋnɨ́ wa, ɨ shwuŋtɨ ayi bo zɨ ghɛntɨ ntɛm tsɛʼ bo zɨ bi bɨbá, ntiʼ mbitɨ ayi ngə́, “O tsi lá nɨ zɨŋ anu a sóŋə́ a mbó me le?”

²⁰ Wɛrə a sóŋ ngə́, “Bɨsáʼ bɨ ɨlaʼ bɨ bə Yuda bemnɨnə ngə́ a lo bé ɨzo, á bɛrə soŋ a mbó gho ngə́ o lɔgɨ a Baolo ɨ shiʼ ngyen nɨ zɨ a ɨshi Ngaŋ Sáʼ Abyɛn, ɨ ghɨnə lá ɨtsi ngə́ bo lǒ ntsɔʼ aku ngótɨ́ nkən mbɨ́ʼ atuəmbəm azhi wəmbo ə.

²¹ Lá koʼ ghɨ anu za bo soŋnɨ mbɨ́ʼ ngə́ ɨbɛn ntsatɨ mɨghúm mi nɨkwa lo nɔŋ a mu mɨbaʼ ɨ zhwíʼtɨ́nə́ ayi ɛ. Bo lɔgɨnə akan ngə́ bo mɨ keʼ dzɨ kə ɨ no azúm zə tse tɨgha bo zhwitɨ ayi ɛ. Bo kyaŋtɨnɨ ɨnye ɨtsa a ngɨ zɛrə ntiʼə njwíʼtə́ lá a za o mɨ tsɔʼ a mu ntəm gho ghe.”

²² Tantso wa a sóŋ ngə́, “Koʼ a mbó ŋwɔn tse soŋ ngə́ o fɨʼtɨnə anu məzen a mbó me ghe.” Wɛrə a tíʼ sóŋ ngə́ á mbáŋnɨ́ za ghɛn ayi ɛ.

Bɨ Tsagɨ a Baolo a mbó Gobɨna Fɛligɨsɨ ə

²³ Tantso wa tíʼ ntɔ́ŋ bɨgwe ɨbyi bi bɨbá ɨ soŋ a mbó bo ngə́, “A nɨ kyaŋtɨ bɨgwe nkɨ tsi bá a ngen a Seseria, nkwiʼtɨ ngaŋ nkɔʼ ɨnyamankarə mɨghúm mi samba abɔʼnɨ bənyamɨkɔŋ nkɨ tsi bá ghe. A nɨ kyaŋtɨ ɨnye ɨtsən a ngen nɨ ɨtfúʼ sɨŋə a nye bɨnyom bi nɨbvuʼə ghe.

²⁴ A nɨ kɨ nkyaŋtɨ ɨnyamankarə tsɨ tsɛrə tsa Baolo mɨ kɔʼ á nɨ lɔgɨ ayi ngɛn nɨ zɨ tsɛʼ ɨ shiʼnɨ ɨ shiʼnɨ a mbó gobɨna Fɛligɨsɨ ə.”

²⁵ Tantso wa a tíʼ ŋwaʼnɨ aŋwaʼnɨ za, ɨ wə ɨmu wɛrə a kɨ́nə́ sóŋə́ ngə́:

²⁶ “Ndo a mbó Klodiosɨ Laisiasɨ ngěn a mbó Tsazɨ gobɨna Fɛligɨsɨ ə: ma tɔ́ŋtə́ ghe.

²⁷ Bə Yuda kɨ ko a ŋwɔn wen ndǒ njwitə ghe. Ma kɨ zuʼ ngə́ a nɨ ŋwɔn bə Roma ghe. Ma lan, ma kɨ ghɛn bɨgɨ bɨ bɨgwe ɨban, ngɛn nkwarɨ ayi a mu mbó bo ghe.

²⁸ Ma kə́ ndǒ nji anu za bɨ káŋnɨ́ ayi mbɨ́ʼ a zɛrə ghe. Ma lan, ma lɔ́gɨ́ ayi ɨ shiʼ ngɛn nɨ zɨ a ɨshi Ngaŋ Sáʼ Abyɛn ɨtsa ghe.

²⁹ Ma tsɔ́ʼnɨ́ aku ndzɛn ngə́ ka wɛrə a ghɨ ayi anu zə tsɛrə za be bɨ zhwitɨ ayi kə ɨ nɨŋ ayi atsáŋ; ɨnu tsa bɨ káŋnɨ́ ayi ɨwu bé ɨnu mbɨ́ʼ a nyɔngɔŋ ɨwa ghe.

³⁰ Mbáʼ ma zúʼnɨ́ ngə́ bɨ kórɨ́ a mɨnaŋ atú ɨyi lá, ma byí ntsɔ́ʼ a mu ntəm me a ntsagɨ zɨ a mbó gho ghe. Ma soŋnə a mbó ɨbɛn ba bɨ kaŋnə ayi lá ngə́ á bo yen ngɨ ɨsáʼ wə ɨnye a ɨshi gho ghe.”

³¹ Bɨgwe ba ghɨ́ ɨnu tsa bɨ sóŋnɨ́ a mbó bo ghe. Bo lɔ́gɨ́ a Baolo ngɛ́n nɨ zɨ aghagɨ a sagɨ sote ngɛn nkuʼ Antibatɨrɨsɨ ə.

³² Njwi zɨ mɔʼɔ bənə ndán, bɨgwe ba bɨ kɨ́nə́ ntɛ́mə́ nɨ mɨku lá chwɨgɨ a təbɨŋə nɨ ndzum, ɨ nyɛʼtɨ a ba bɨ tsínɨ́ atú ɨnyamankarə lá ngə́ á bo tiʼə ngěn nɨ mbyi nɨ Baolo ghe.

³³ Bo ghɛ́n nkón nɨ zɨ a Seseria, nga aŋwaʼnɨ za a mbó gobɨna wa, ntiʼ nkɨ nga a Baolo a mbó zɨə.

³⁴ Gobɨna wa a tɔ́ŋ aŋwaʼnɨ za, ntiʼ mbitɨ a Baolo ngə́ wɛrə a fú lá a mu zɨŋə mbuʼ ə. Mbáʼ wɛrə a zúʼnɨ́ ngə́ wɛrə a fú a Silisha lá,

³⁵ ntiʼ soŋ ngə́, “Ma mɨ zuʼ ɨsáʼ ɨgho a nkfu za ɨbɛn ba bɨ kaŋnɨ a gho yenə.” Wɛrə a tíʼ ngá ntɨgə ngə́ á bɨ lɔgɨ a Baolo ngɛn ndɛn ayi ndyɛ́mə́ a mu ntɔ́ʼ za Ɛrɔd a vwúnɨ́ lá.