Ɨfaʼ 20 - Mɨkan wu Fi

Baolo a Ghɛn a Masedonia bo Akaiya ghe

¹ Ndum za ghɨnə nkyɛ́ntɨ́, Baolo a tɔŋ ɨbɛn ba bɨ nɨ́ŋnɨ́ mɨntəm ɨma a nye Kristo táʼ adiʼ, ngwɔŋtɨ awa nɨ mɨgham, ntiʼ nga fɨlye ɨfa ghe. Wɛrə a tíʼ ndo ngɛn a Masedonia ghe.

² Wɛrə a tsá a mu mbuʼ tsa nkə́ ngwɔ́ŋtɨ́ ɨbɛn ɨ shiʼnɨ ɨ shiʼnɨ ə. Wɛrə a tíʼ ngyen fu Akaiya,

³ adiʼ wa wɛrə a tsínɨ́ ɨwu atú bɨsaŋ bi bɨtárə́ ghe. Wɛrə a kə́ nkyáŋtɨ́ ɨnye ɨzhi a ngén a Sirɨya mbáʼ wɛrə a tíʼnɨ́ nji ngə́ bə Yuda kə́ nkórə́ a mɨnaŋ mbɨ́ʼ ayi ɛ; ma lan, wɛrə a tíʼ ntsɔ́ʼ a mu ntəm zɨ ɨ bə bən nɨ ndóm Masedonia ghe.

⁴ Wɛrə a ghɛ́n bo Sobeta wa a lónɨ́ a Bəria mbe mɔn Bairusɨ wu mbáŋnɨ́; nkwiʼtɨ Aristakusɨ bo Sekundusɨ ba bɨ lónɨ́ a Tesalonaika; abɔʼnɨ Gayosɨ wa a lónɨ́ a Dərɨbe; nɨ Taichikusɨ bo Trɔfimɔsɨ ba bɨ lónɨ́ a mbuʼ Esha; nkɨ ndzɔŋ nkwiʼtɨ a Timotyo ghe.

⁵ Bo fóm ntsa mbyi ngɛ́n njwíʼtɨ́ awɨgɨ a Truasɨ ə.

⁶ Nɨdorɨ nɨ Abán tɨ Mbɛgə ghɨnə ntsá, bɨgɨ lo a Filibi ngyiŋ nɨyen a mu nkyi ɛ. Njwi tsi tə̧̂ tsanə, bɨgɨ yen nkwati awa a Truasɨ, adiʼ wa bɨgɨ bo tsínɨ́ ɨwu atú njwi tsi samba ghe.

Baolo a Ghantɨ a Truasɨ a nye Ntsɨrɨndzum Nkfu ə

⁷ A nye ntsambyi njwi a mu ngabɨ, bɨgɨ ghótɨ́ a ndzɨ́ ntárɨ́ ə. Baolo a ghám tsɛʼ ghamnɨ a mbó ɨbɛn nkɔʼ nkuʼ a ntɨŋ ɨtfúʼ, mbáʼ wɛrə a tsínɨ́ nɨ ɨ nyɛʼtɨ bo mbáʼ njwi lanə lá.

⁸ Mɨnkaʼ mə ghaʼnɨ kə́ mbaŋə a mu kwasɨ ndá wa a tsínɨ́ atɨ́, wa bɨgɨ ghótɨ́nɨ́ wə mu a mu kɔ́ʼtɨ́ wa lá.

⁹ Mɔn mbáŋnɨ́ wu tse wa ɨkum ɨyi bénɨ́ Yutikɔsɨ a shíʼtɨ́ ntsí a nye abuʼ a ɨfɛ́gɨ́ ə. Adzaŋ za Baolo a kɨ́nə́ ngamə ngěn nɨ mbyi tsɛʼ ghɛnɨ lá, Yutikɔsɨ a bíʼnɨ́ ntsɨ́ŋə́ ndyě, ndyé ndyé ndɨŋnɨ ɨ kɔʼ kuʼ a nye ɨfɨʼ za wɛrə a tsɔ́ʼnɨ́nɨ́ ngvó ndo a nye mɨkyebɨnɨ mɨ ndá ma mi mɨntárə́ ɨ shiʼ fu a tɨshe. Bɨ tɨnə tɨ yen byɛn ayi le a kfonə ghe.

¹⁰ Lá Baolo a shíʼ ngɛn nkfuʼnɨ wu atú, nchwa ayi, ɨ soŋ ngə́, “A nɨ keʼ bɔgə, awa a bvurɨnɨ ntsi atú ntɨŋə!”

¹¹ Baolo a bə́ nkɔ́ʼ ngɛ́n a mu kɔ́ʼtɨ́ wa mbɛʼnɨ abán nkfúrə́. Wɛrə a tíʼə ntǎŋ ngam bo bɨ ɨbɛn ba bɨ nɨ́ŋnɨ́ mɨntəm ɨma a nye Kristo a nye abaŋ zə sa ɨ kɔʼ kuʼ nkfu za nɨnyom a sáʼnɨ́, ntiʼ nyɛʼtɨ awa ghe.

¹² Bo tíʼ ndɔgɨ a mɔn mbáŋnɨ́ wa atú ntən nkwɛn nɨ zɨ, məzen a be alɛtɨ a ntəm zə wi a mbó bo ghe.

Baolo a lo a Truasɨ Ngɛn a Milɛtusɨ ə

¹³ Bɨgɨ tsá mbyi ngɛn a mu abáŋ a nkyi za, ntiʼ ngyiŋ nɨyen a mu nkyi ngɛ́n Asɔsɨ adiʼ wa bɨgɨ tsínɨ́ nɨ ndɔgɨ Baolo á wɛrə a kon a mu abáŋ a nkyi za. Wɛrə a sóŋ a mbó bɨgɨ ngə́ á bɨgɨ ghɨ ma lan, mbɨ́ʼ ngə́ wɛrə a yíŋ nɨyen be a tɨshe ngɛn ɨwu ə.

¹⁴ Mbáʼ wɛrə a kwátɨ́nɨ́ awɨgɨ Asɔsɨ lá, wɛrə a kɔ́ʼ nkón a mu abáŋ a nkyi za bɨgɨ bo ghɛn a Mitailin ə.

¹⁵ Bɨgɨ ló ɨwu ngyiŋ nɨyen a mu nkyi ngyen fu a ndaŋ ndzɨŋə Kayosɨ njwi zɨ mɔʼɔ ghe. Njwi zɨ mɔʼɔ bənə ndán, bɨgɨ tsi a Samosɨ, zɨ mɔʼɔ bənə tɨ lǎn, bɨgɨ kuʼ a Milɛtusɨ ə.

¹⁶ Baolo a tsɔ́ʼ a mu ntəm zɨ a ngyiŋ nɨyen a mu nkyi, ɨ tosɨ tsa a Ɛfɛso tsɛʼ tosɨnɨ taŋ ɨ keʼ nkfu tse tsəŋ a mu mbuʼ Esha ghe. Wɛrə a kə́ nkɨənə ɨ ghɛn fu a Yerosalɛm a nkfu Bɛntɛkɔsɨ, mbáʼ be a chi fu adzaŋ məwa.

Nɨgham nɨ Ngǎ Fɨlye nɨ Baolo a mbó Ɨtú Ndáŋwi a Ɛfɛso ghe

¹⁷ Mbáʼ Baolo a tsínɨ́ a Milɛtusɨ lá, wɛrə a tságɨ́ nkən a Ɛfɛso, ntɔŋ ɨtú ndáŋwi ngə́ á tsɨ yen mbom ayi ɛ.

¹⁸ Bo ghɨnə ngyén, wɛrə a soŋ a mbó bo ngə́, “Nɨ zhi adzaŋ za ntsi mbyi ɨzan ɨ bénɨ́ a nye nkfu tsum za ma tsínɨ́ bɨgɨnə, nchwuʼnɨ a nye ntsambyi njwi za ma yénɨ́ nkón a mbuʼ Esha ghe.

¹⁹ Ma kə́ faʼə ɨfaʼ ɨghan tso ngaŋ afaʼ Maʼmbyí, ɨ shíʼtə́ nɨ ɨnye ɨzan a ɨshe abɔʼnɨ nkyi a ɨmɨgɨ a nkfu za ɨdiʼ tə́nɨ́ a ɨnye me mbɨ́ʼ a mɨnaŋ wa bə Yuda bə tse kɨ́nə́ nkórə́ ghe.

²⁰ Nɨ zhi ngə́ ma sá lwɛʼ anu zə tse za a bénɨ́ kwátɨ́ awən a nkfu za ma kɨ́nə́ sóŋə́ anu a Ŋwi nkə́ ndíʼə asaŋəsaŋ abɔʼnɨ njwuʼ ɨtsən lá.

²¹ A mbó bə Yuda abɔʼnɨ ba a se bə Yuda be, bo bɨtsum ma kwántɨ́ awa be tɨ́sə́n ngə́ á bo bəŋ mɨntəm ɨma a nye mɨbvu ɨma ntsi a bagɨ Ŋwi nkɨ nɨŋ mɨntəm ɨma a nye Maʼmbyí Yeso ɨwɨgɨnə ghe.

²² Tɨtsɔŋnɨ, a ndzúʼnɨ́ Azhwi zə Fɛmnɨ, ma ghěn a Yerosalɛm, nkaʼ zhi a za a mɨ bom aghan ɨwu ə.

²³ Ma zhi tsɛʼ ngə́ a mu ntáʼmbagə wu wi ɨtsum, Azhwi zə Fɛmnɨ a kwantɨnə aghan ngə́ atsáŋ abɔʼnɨ ngɨ́ʼ zhwíʼtə́ aghan ɨwu ə.

²⁴ Lá, a mbó me, ma lɔgɨ ntsi mbyi ɨzan a nye azúm adaŋədaŋə; ma lǒ tsɛʼ ɨ mɛtɨ za ma funɨ abyɛn a faʼə ɨ kɨ mɛtɨ afaʼ za Maʼmbyí Yeso a ghánɨ́ a mbó me a faʼə ghe. Afaʼ məzen a tsi lá a sóŋ ntəm mbɨ́ʼ Nkən wu Shiʼnɨ mbɨ́ʼ abɔŋəntəm a Ŋwi ə.

²⁵ Ma numnə nkarɨ a tɨtərɨ bən, ɨ sóŋə́ anu a Nɨfɔ nɨ Ŋwi ə. Tɨtsɔŋnɨ ma zhi ngə́ ŋwɔn nɨ bən wu tse a láʼ keʼ aghan bə nkwiʼ ndze.

²⁶ Ma lan, ma soŋ ntəm ɨghan tɨ mɨghan ɨtfúʼ mbyi sɨŋə ngə́: be ŋwɔn nɨ bən wu tse a byé muŋ ka ma wɛm aghan anu ɨwu ə.

²⁷ Mbɨ́ʼ ngə́ ka ma chwa aghan anu zə tse a ndzum a nkfu za ma chwítɨ́nə́ a mbó bən, ɨnu ɨtsum tsa Ŋwi a kyáŋtɨ́nɨ́ mbɨ́ʼ awɨŋ ə.

²⁸ Ma lan, á nɨ lə atú nɨ ɨtumbəm ɨtsən nkɨ ndə atú a nye ɨbɛn ba bɨ nɨŋnɨ mɨntəm ɨma a nye Kristo ba Azhwi zə Fɛmnɨ a ghanɨ ngə́ á nɨ ndə̌tú nɨ bɛrə lá. A nɨ be bɨntsiŋ mɨnyam a nye ndáŋwi za a nɨ zɨ Ŋwi, za wɛrə a ghɨ́nɨ́ a nye ɨzhi ntsa a ndzum alɛm a Mɔn ɨyi lá.

²⁹ Ma zhi ngə́ a nkfu za ma mɨ nyɛʼtɨ awən lá, ɨbɛn mɨ kon a tɨtərɨ bən tso bəngwabaʼ bə mɨtsɛ́gɨ́ ɨ keʼ nyɛʼtɨ ɨbɛn ba bɨ nɨŋnɨ mɨntəm ɨma a nye Kristo tɨ satɨ awa ghe.

³⁰ Nkfu ghɨ yen za ɨbɛn ghɨ fú a tɨtərɨ ngǒtə ɨzən ɨ chwe ɨnu a ndarɨsɨ ɨbɛn ba bɨ nɨŋnɨ mɨntəm ɨma a nye Kristo á bɨ zɔŋ awa ghe.

³¹ A nɨ lə ɨtú ɨtsən nkə́ ngwáʼtə́ ngə́ nɨ nkyi a ɨmɨgɨ, ma kə́ ndiʼə a ŋwɔn tsum a tɨtərɨ bən ɨ mɔ́ʼɔ́ mɔ́ʼɔ́ atú ɨlom tsi tárə́ nɨ ɨtfúʼ nɨ njwi ɛ.

³² Tɨtsɔŋnɨ ma nɨŋ awən a mu mbó Ŋwi, nkə́ sóŋə́ a mbó bən ngə́ á nɨ waʼtɨ nkən mbɨ́ʼ abɔŋəntəm a Ŋwi za bɨgɨnə tsinɨ wə shwúrɨ́, nkən wa ɨ chinɨ ghɨ á nɨ kwi ɨ kɨ gha awən nɨ ɨfɔgə wa Ŋwi a tsinɨ nɨ wɛrə a mbó ɨbɛn ɨbyi bɨtsum lá.

³³ Ma sa tɛgɨ ntəm ɨghan a nye tsə́ŋtsə́ŋ ŋwɔn tse kə a nye ŋwaʼŋwaʼ ɨyi kə atsɛʼ azhi ɛ.

³⁴ Bɨŋ mboŋ nɨ zhi ngə́ nɨ mbó ɨman mɛnə, ma ghɨ́ azúm atsum za ngaŋ aku ɨtsan nɨ me kɨ́nə́ ndǒ ghe.

³⁵ Ma diʼnə a mbó bən a nye mɨndóm mɨtsum ngə́ a faʼə nɨ ntəm ɨtsum a nye ndóm wen, bɨgɨnə tsi nɨ ɨ zagɨ kwatɨ a ba bɨ ghɔnə, ɨ kə́ waʼtɨnə mɨgham ma Maʼmbyí Yeso zɨmboŋ a sóŋnɨ́ ngə́, ‹Ɨfɔgə wu wi tsi ɨwu a ngá ntsa a nkwárə́ ghe.› ”

³⁶ Baolo a ghɨnə mɛ́tɨ́, nkwem mɨkwiʼtɨ ɨmyi bo bo a tɨshe ntsaʼtɨ a Ŋwi ə.

³⁷ Bo bɨtsum kə́ mbúgə́ adzaŋ za bo kɨ́nə́ njíʼtə́ ayi a nɨgo ɨbo nkə́ nchwɨ́gə́ ayi ntiʼ nkɨ nga fɨlye ɨfi ɛ.

³⁸ Bo dzə́ŋnɨ́ be tɨ́sə́n mbɨ́ʼ ngə́ wɛrə a kwɛ́nə soŋ ngə́ bo láʼ keʼ ayi bə nkwiʼ ndze. Ma lan, bo zɔ́ŋ ayi ngɛn nkuʼ a nye abáŋ a nkyi za.