Ɨfaʼ 19 - Mɨkan wu Fi

Baolo a Soŋ Anu a Ŋwi a Ɛfɛso ghe

¹ Mbáʼ Abolo a tsínɨ́ a Korɨnto lá, Baolo a yíŋ nɨyen a mu ɨdiʼ tsa tsɨ tsínɨ́ a ɨmu alaʼ, ngyen fu a Ɛfɛso ghe. Ɨwu wɛrə a zɛ́n bɨyɛʼ bə tsɛrə ghe.

² Wɛrə a bítɨ́ awa ngə́, “Nɨ kwárɨ́ Azhwi zə Fɛmnɨ a nkfu za nɨ nɨ́ŋnɨ́ mɨntəm ɨmən a nye Kristo lá le?” Bo chwɨ́gɨ́ ngə́, “Bɨgɨ bvurɨ tɨ kwɛ ndzuʼ ngə́ Azhwi zə Fɛmnɨ zə tse a tsi ɨwu ə.”

³ Baolo a tíʼ mbítɨ́ awa ngə́, “Nɨ kwárɨ́ lá abə́ŋ a nkyi zə ɨ nə́ le?” Bo chwɨ́gɨ́ ngə́, “Nkwarɨ Nkyi zɨ Yoane ghe.”

⁴ Baolo a sóŋ ngə́, “Nkwarɨ Nkyi zɨ Yoane ɨ tsí lá a mbó ɨbɛn ba bɨ bə́ŋnɨ́ mɨntəm ɨma a nye mɨbvu ɨma ghe. Yoane a kɨ́ sóŋ a mbó ɨbɛn bə Izrai ngə́ á bo nɨŋ mɨntəm ɨma a ɨnye zɨ wa a tsínɨ́ nɨ ngyiŋə a ndzum zɨ — lá be ngə́, a nye Yeso ghe.”

⁵ Mbáʼ bo zúʼnɨ́ a məzen lá, bɨ ghá nkyi a mbó bo nɨ ɨkum Maʼmbyí Yeso ghe.

⁶ Baolo a nyɔ́ŋ mbó ɨmyi atú bo, Azhwi zə Fɛmnɨ a shiʼ atú bo; bo tiʼ ngam mɨgham mɨ ɨtóm ɨtóm nkɨ nchwitɨ nkən Ŋwi ə.

⁷ Bo bɨtsum bé mbáŋnɨ́ ntiʼə ngěn tso nɨghúm ntsɔb bá ghe.

⁸ Atú bɨsaŋ bi bɨtárə́ Baolo a kə́ ngěn a mu ndáŋwi bə Yuda ngámə́ tɨ nɨbɔgɨ bo bɨ ɨbɛn ba, ntǎŋ anu a Ŋwi bo bo nkə́ njwə́ŋtɨ́ ngɨə á bo ze nkənu mbɨ́ʼ Nɨfɔ nɨ Ŋwi ə.

⁹ Lá bo bə tse tɨ́ŋ atú nkeʼ mɨntəm ɨma ɨwu nɨŋə, bo tɛ́m a ɨshi ngǒtə za tsum ɨ soŋ ɨnu tsɨ tɔmnɨnɨ mbɨ́ʼ Ndómnji Maʼmbyí ɛ. Ma lan, Baolo a nyɛ́ʼtɨ́ awa, ndɔgɨ ɨbɛn ba bɨ nɨ́ŋnɨ́ mɨntəm ɨma a nye Kristo bo bo ghɛn, njwi tsum, bo tíʼə ntǎŋ anu a Ŋwi a mu tsa Tairanusɨ ə.

¹⁰ Məzen a ghɛ́n nɨ mbyi atú ɨlom tsi bá, a nye ndóm wa ɨbɛn bɨtsum ba bɨ kɨ́nə́ nchyɛ̌ a mu mbuʼ Esha za, bə Yuda nkwiʼtɨ a ba a se bə Yuda be, zúʼnɨ́ nɨgham nɨ Maʼmbyí ɛ.

Ɨbɔ bɨ Skiva bə Mbáŋnɨ́ ə

¹¹ Ŋwi a kə́ ngɨ̌ ɨnu tsɨ yerɨnɨ-yerɨnɨ tsɨ líʼ ntsa a ndzum Baolo ghe.

¹² Tsɛʼ ɨbagɨ ɨtsɛʼ abɔʼnɨ mɨmam mɨ afaʼ ma wɛrə a fáʼnɨ́ nɨ tsɛrə, bɨ kə́ ndɔgə ngěn nɨ tsɛrə a mbó ɨbɛn ba bɨ kɨ́nə́ ngǒ, mɨghɔ ɨma shwétɨ́nə, ɨzhwi tsə tɔmnɨnɨ kə́ fúkə́ a mu ɨnye ɨtsa ghe.

¹³ Bə Yuda bə tse ba bɨ kɨ́nə́ nkárə́ ngyíŋə́ ɨ fɨ́gɨ́ ɨzhwi tsə tɔmnɨnɨ, kə́ njwə́ŋtɨ́ faʼə nɨ ɨkum Maʼmbyí a ngɨ məziŋ ə. Bo kə́ sóŋə́ a mbó ɨzhwi tsə tɔmnɨnɨ ngə́, “Ma soŋ a mbó gho nɨ ɨkum Yeso wa Baolo a sóŋnə́, ngə́ o fuə.”

¹⁴ Ɨbɔ mbáŋnɨ́ bi samba, mbe ɨbɔmbɨma nkɨ mbe ɨbɔ bɨ Ntumshe wu Ngwi bə Yuda wa ɨkum ɨyi bénɨ́ Skiva kə́ ngɨə a məziŋ ə.

¹⁵ Lá azhwi zə tɔmnɨnɨ za a sóŋ a mbó bo ngə́, “Ma zhi a Yeso, nkɨ nji a Baolo ghe; lá bən — nɨ lá bɨwa le?”

¹⁶ Ŋwɔn wa a tsínɨ́ nɨ azhwi zə tɔmnɨnɨ za a mu ɨnye zɨ a jíntɨ́ awa nɨ fɨto nɨ adaʼ zə wi ngháʼ awa bɨtsum ə. Bo kɨə fúkɨ́ a mu ndá zɨ nɨ ɨlɛmnɨ a nye bo, ɨtsɛʼ tsa kɨ sarɨkə.

¹⁷ Bə Yuda bɨtsum abɔʼnɨ ba a se bə Yuda be bɨtsum ba bɨ kɨ́nə́ nchyɛ̌ a Ɛfɛso zúʼ anu məzen; ntiʼ ndon nɨ nɨbɔgɨ, nkɨ nkɔʼsɨ ɨkum Maʼmbyí Yeso atɨ́ ngɛn nɨ mbyi ɛ.

¹⁸ Ɨbɛn ba bɨ nɨ́ŋnɨ́ mɨntəm ɨma a nye Kristo bə ghaʼnɨ yén, mbémə́ nkə́ nkyɛ́ʼə asaŋəsaŋ ɨnu tsa bo ghɨ́nə ghe.

¹⁹ Ɨbɛn bə ghaʼnɨ ba bɨ kwɛ́nə ngɨ mɨfu ghótɨ́ ɨŋwaʼnɨ ɨtsa táʼ adiʼ ntɔn a tsɛrə asaŋəsaŋ ə. Bɨ bósɨ́ ndvuŋ ɨŋwaʼnɨ tsa, ndvuŋ ɨyi kɔʼ nkuʼ nkám mɨghúm mi mɨntə̧̂ ghe (50,000,000).

²⁰ Ma lan, nɨgham nɨ Maʼmbyí kə́ nkwi ɨ kwinɨ a nye ndómnji wu tɨŋə.

Ndum a Ɛfɛso ghe

²¹ Mbáʼ ɨnu tsiŋ ɨtsum fúnɨ́ lá, Baolo a tsɔ́ʼ a mu ntəm zɨ a ngén a Yerosalɛm ɨ tsa a mu Masedonia abɔʼnɨ Akaiya ghe. Wɛrə a sóŋ ngə́, “Mbáʼ ma ghɛnə ɨwu, ma mɨ zagɨ ghɛn a Roma ghe.”

²² Ma lan, wɛrə a tságɨ́ a Timotyo bo Eratosɨ, ɨbɛn bi bɨbá ba bɨ kɨ́nə́ nkwátə́ ayi a Masedonia, lá mbə ntsi a mu mbuʼ Esha atú nkfu zɨ tse ghe.

²³ A bé lá a nkfu məwen wa ngɨ́ʼ zɨ ngwi tsínɨ́ a Ɛfɛso mbɨ́ʼ Ndómnji Maʼmbyí ɛ.

²⁴ Ntwɛ́lam tse wa a kɨ́nə́ faʼə nɨ tsə́ŋtsə́ŋ ɨkum ɨyi be Demetɨrɨyo, a kə́ ndɔgə a tsə́ŋtsə́ŋ ngɨ̌ ɨbɔ bɨ abe bɨ nɨshwim nɨ ŋwi mangye Atɛmisɨ ɨwu ə. Ɨfaʼ ɨyi wiŋ kə́ fǔʼ nkáb zɨ ngwi a mbó ngaŋ afaʼ ɨchi ɛ.

²⁵ Ma lan, wɛrə a tɔ́ŋ awa ngǒtɨ táʼ adiʼ bo bɨ bə mɔʼɔ ba bɨ kɨ́nə́ faʼə abə́ŋ afaʼ məza, ntiʼ soŋ a mbó bo ngə́, “Ɨbɔmbɨma, nɨ zhi ngə́ afuʼ azɨgɨnə atsum a fúə lá a mu ɨfaʼ wiŋ ə.

²⁶ Tɨtsɔŋnɨ, nɨ zě nkə́ ndzúʼə bɨŋ mboŋ anu za mba wen wa bɨ tɔ́ŋnə́ ngə́ Baolo lá a ghɨnə ghe. Wɛrə a sóŋə́ ngə́ bɨŋwi ba bɨ nyɛtɨnɨ nɨ mbó, ka bɨ byi nyam mbe awa bɨŋwi tsɛʼ benɨ, wɛrə a kɨnə nkɨ ndɛtɨ mɨntəm mɨ ɨbɛn bɨ tsa ntɛm a bagɨ zɨ ɨghan a Ɛfɛso ndzɔŋ nkwiʼtɨ mbuʼ Esha ntíʼə ndɔ́btɨ́ ɨ ghɛn mɛtɨ ə.

²⁷ Nɨbɔgɨ tsi ɨwu ngə́ ɨfaʼ ɨwɨgɨnə mɨ tsi nɨ ɨkum tɨbɔŋ ə. Ka a be ayi tsɛʼ məza, nɨbɔgɨ kɨ ntsi ɨwu ngə́ nɨshwim nɨ ŋwi mangye wu ngwi Atɛmisɨ mɨ keʼ anu zə tse bə mbe, á bɨ kɨ ntsənkɨ nɨghaʼ ɨni; nə nɨ ŋwi mangye wa ŋwɔn tsum a Esha a ghúʼsɨ́nə́ abɔʼnɨ atuəshe atsum ə!”

²⁸ Adzaŋ za ɨnɔ ɨbɛn wa zúʼnɨ́ mɨgham mɛnə lá, mɨntɔŋ ɨma lwínɨ́ tsɛʼ nkan, bo tiʼ mbiʼnɨ ntɔ́nkə́ ngə́, “A ntsi mbyi Atɛmisɨ wu bə Ɛfɛso ngɛn ɨ ghɛnɨ nɨ mbyi ɛ!”

²⁹ Ndum za dzágɨ́nɨ́ a mu ntáʼmbagə wu wi wa ɨtsum ə. Nángyérə́ wa a fé a Gayosɨ abɔʼnɨ Aristakusɨ, ɨbɛn bɨ Masedonia bi bɨbá ba bo kɨ́nə́ númə́ ngyíŋə́ bo bɨ Baolo, ngɛn nɨ bo a mu ɨsamnɨ ɨwa ghe.

³⁰ Baolo zɨmboŋ a kə́ ndǒ ɨ kon ghɛn a mu ɨnɔ ɨbɛn wa, ɨ gham a mbó bo, lá ɨbɛn ba bɨ nɨ́ŋnɨ́ mɨntəm ɨma a nye Kristo tón awa ghe.

³¹ Bɨsáʼ bɨ ɨlaʼ mbuʼ za bə tse ba bɨ bénɨ́ bɨson ɨbyi kɨ́ ntsagɨ nkən wəmbo mbuʼtɨ mbó a mbó wɛrə ngə́ á wɛrə a keʼ byi nyam ndiʼ ɨshi ɨyi a mu ɨsamnɨ wa tsɛʼ diʼnə.

³² Le buŋ, ndum za ɨ bvúgɨ́nɨ́nɨ́ lá ɨ ghɛ́nə nkwatɨ ngǒtə za: ɨbɛn tɔ́nkɨnə aza anu, bə mɔʼɔ tɔ́nkɨnə aza, mbɨ́ʼ ngə́ bo bə ghaʼnɨ sé zhi anu za a yénɨ́ nɨ bo táʼ adiʼ ə.

³³ Ɨbɛn ba bə tse tíʼ ntɛ́gɨ́nɨ́ ngə́ ɨnu tsen a ghɨ́ Alɛgɨsanda mbɨ́ʼ ngə́ bə Yuda sóŋ ngə́ á wɛrə a ghɛn ntɛm a ɨshi ɛ. Alɛgɨsanda a chítɨ́ ɨbɛn ba ngə́ á bo kyɛntɨ ngamə, ntiʼ njwəŋtɨ a fɨʼtə á ɨtú tsa lán ngə́ nkən wa mbɨ́ʼ Ndómnji wa sé nɨ ngɨ́ʼ za yiŋə.

³⁴ Lá bo ghɨnə njí ngə́ wɛrə a bé ŋwɔn bə Yuda, bo bɨtsum tɔ́nkɨ́ a táʼ anu atú bɨnyom bɨbá ngə́: “A ntsi mbyi Atɛmisɨ wu bə Ɛfɛso ngɛn ɨ ghɛnɨ nɨ mbyi ɛ!”

³⁵ A ndwɨgɨnə, ngvǔŋ aŋwaʼnɨ ntáʼmbagə wa a ghɨ́ ɨnɔ wa kyɛntɨ ngamə ghe. Wɛrə a tíʼ sóŋ ngə́, “Ɨbɔmbɨma ɨban bə Ɛfɛso! Ŋwɔn tsum a zhi ngə́ ntáʼmbagə wu wi wu bə Ɛfɛso nɨ adiʼ a nchyɛ nɨshwim nɨ Atɛmisɨ wu ngwi wa a nɨ azúm alɔ́ʼ nkɨ mbe adiʼ a nchyɛ ngɔʼ zɨ fɛmnɨ za ɨ lónɨ́ a fɔməbvurə ngvo lá.

³⁶ Ŋwɔn tse a chi keʼ ɨnu tsen tuŋə. Ma lan, nɨ tsi nɨ ɨ zagɨ bɔrɨsɨ mɨntəm ɨmən ɨ keʼ anu zə ghagɨrɨnɨ zə tse ghɨə.

³⁷ Nɨ baʼtɨ ngyen nɨ ɨbɛn benə ɨghan ɨ yenɨ lá, ka bo ze awa azúm zə tse a mu mɨshwim ɨmɨgɨnə kə ngam mɨgham mɨ ndzɔm ŋwi mangye ɨwɨgɨnə ghe.

³⁸ Be a be ngə́ Demetɨrɨyo bo ngaŋ afaʼ ɨchi tsi nɨ anu zə tse a nkaŋ ŋwɔn tse nɨ zɛrə, njwi tsa bɨ tɔ́ŋtɨ́nə́ abyɛn abɔʼnɨ bɨsáʼ bɨ ɨlaʼ ba bɨ chinɨ sáʼ mɨsáʼ tsi ɨwu, bɨ chi tɔŋtɨ abyɛn ɨwu ə.

³⁹ Lá be anu zə daŋ a bvurɨ ntsi ɨwu za nɨ lɔnə, bɨ mɨ lentɨ a zɛrə a mu ngǒtɨ ɨbɛn bɨ alaʼ za ɨ ghótɨ́nə́ ndzɔ̌ŋ a nyɔngɔŋ ə.

⁴⁰ Nɨbɔgɨ tsi ɨwu ngə́ bɨ mɨ kaŋ awɨgɨnə ngə́ bɨgɨnə bvugɨ ndum, mbɨ́ʼ aziŋ anu za a funɨ ɨ sɨŋə lá. Ka anu zə tse a tsi ayi ɨwu za be bɨgɨnə soŋ a ntwɛ́mtə́ ngə́ á ndum ziŋ fuə, bɨgɨnə keʼ kɨ ntsi nɨ anu za be bɨgɨnə soŋ ngə́ a ghɨ zɛrə ɨ fuə.”

⁴¹ Mbáʼ wɛrə a sóŋnɨ́ a məzen lá, wɛrə a sóŋ ngə́ á bo kwenkɨ ngɛn nɨ mɨntsu mɨ ndá ɨma ghe.