Ɨfaʼ 16 - Mɨkan wu Fi

Timotyo a zɔŋ a Baolo bo Sailasɨ ə

¹ Baolo a yén ɨ fu a Dərɨbe bo Listra, adiʼ wa ŋwɔn tse wa a kɨ́nə́ ndzɔŋə a Kristo, wa ɨkum ɨyi bénɨ́ Timotyo a kɨ́nə́ nchyɛ̌ ɨwu ə. Nɨmi ɨyi wa a kɨ́nɨ́ nkɨ́ mbé ŋwɔn wa a kɨ́nə́ ndzɔŋə a Kristo, a bé mangye bə Yuda, lá ta ɨyi a be ŋwɔn bə Grikɨ ə.

² Ɨbɛn bɨtsum ba bɨ nɨ́ŋnɨ́ mɨntəm ɨma nye Kristo a Listra abɔʼnɨ Aikonium kə́ ngǎm ɨnu tsɨ shiʼnɨ mbɨ́ʼ a Timotyo ghe.

³ Baolo a kə́ ndǒ ndɔgɨ Timotyo á bo bo ghɛ́n, ma lan, wɛrə a tsə́ŋ alagɨ a Timotyo ghe. Wɛrə a ghɨ́ ma lan lá mbɨ́ʼ ngə́ bə Yuda ba bɨ tsínɨ́ nɨ ɨdiʼ tsa zhí ngə́ ta bɨ Timotyo a bé ŋwɔn bə Grikɨ ə.

⁴ Mbáʼ bo kɨ́nə́ ngěn ntsǎ a mu ntáʼmbagə tsa lá, bo kə́ ngǎ ɨtɨgɨtɨ tsa ntóm Yeso abɔʼnɨ ɨtú ndáŋwi tsa tsɨ tsínɨ́ a Yerosalɛm a bɨ ghánɨ́ a mbó bo lá a mbó ɨbɛn ba bɨ nɨ́ŋnɨ́ mɨntəm ɨma a nye Kristo ghe. Bo sóŋ ngə́ á bo ndzúʼnə́ tsɛrə ghe.

⁵ Ma lan, ndáŋwi tsa kə́ ntən ɨ tənɨ a nye abeməntəm aza nkə́ nkwiə a nye ndvuŋ ɨwa njwi tsum ə.

Baolo a lye Ndzɛm Nəzhwɨgɨnɨ a Truasɨ ə.

⁶ Bo núm nkárɨ́ ntsa a mu mbuʼ Frigya nɨ Galesha mbɨ́ʼ ngə́ Azhwi zə Fɛmnɨ a sé nyɛʼtɨ á bo soŋ nkən wa a mu Mbuʼ Esha ghe.

⁷ Bo ghɨnə ngɛ́n nkuʼ a nɨbarə Maisia, nzhwəŋtɨ a nkúŋə́ a mu Mbuʼ Bitinia, lá Azhwi a Yeso a sé nyɛʼtɨ awa ghe.

⁸ Ma lan, bo tsá tsɛʼ tsanɨ a mu Maisia ntósɨ́ ngɛn fu a Truasɨ ə.

⁹ Nɨ ɨtfúʼ məwa, Baolo a lyé ndzɛm nəzhwɨgɨnɨ za ŋwɔn bə Masedonia wu tse a tɛ́mnɨ́ wə mu mbúʼtɨ́ mbó wəmbo ngə́, “Yen a Masedonia, nkwatɨ awɨgɨ ə!”

¹⁰ Tsɛʼ mbáʼ Baolo a lyénɨ́ ndzɛm nəzhwɨgɨnɨ za lá, bɨgɨ kyáŋtɨ́ ɨnye ɨtsɨgɨ a ngén a Masedonia, mbɨ́ʼ ngə́ a lán a mbó bɨgɨ ngə́ Ŋwi a tsɔ́ʼ awɨgɨ ngə́ á bɨgɨ ghɛn soŋ Nkən wu Shiʼnɨ a mbó ɨbɛn ba bɨ tsínɨ́ ɨwu ə.

A Filibi Litia a Bə́ŋ Ntəm ɨyi ɨ Nɨŋ a nye Kristo ghe

¹¹ Bɨgɨ kón abáŋ a nkyi ndo a Truasɨ mbyi ngɛn tsɛʼ tɨ fakɨ a Samɔtrasɨ, njwi bənə ndán, bɨgɨ ghɛn a Niabolisɨ ə.

¹² Bɨgɨ tíʼ ndo ɨwu nkon ngɛn a mu alaʼ ngɛn fu a Filibi, wa a bénɨ́ ntáʼmbagə wu wi a mu ntsambyi ntɛʼə a mu mbuʼ Masedonia ghe. A bé adiʼ za bə Roma vwúnə́. Bɨgɨ tsí ɨwu atú njwi tsə ghaʼtɨnə.

¹³ A ghɨnə mbé a Njwi Alaʼ Ŋwi, bɨgɨ fu awɨgɨ a mu ntáʼmbagə wu wi wa ngɛn a ngə́rɨ́ mɨzam, adiʼ wa bɨgɨ kwáʼtɨ́nɨ́ ngə́ adiʼ a mɨ tsi ɨwu za bə Yuda ghótɨ́nə́ ɨwu ntsáʼtə́ a Ŋwi ə. Bɨgɨ shíʼtɨ́ ntsí a tɨshe ngam a mbó bəngye ba bɨ ghótɨ́nɨ́ ɨwu ə.

¹⁴ Táʼ ŋwɔn wa a zúʼnɨ́ anu azɨgɨ a bé Litia wa a lónɨ́ a Tatira, wa a kɨ́nə́ fǐŋ atsɛʼ atɨŋndvuŋ za a kɨ́nə́ mbaŋə ghe. Wɛrə a bé mangye wa a kɨ́nə́ ngúʼsə́ a Ŋwi, Maʼmbyí a ŋáʼ ntəm ɨyi ngə́ á tɛgɨ atú azhi a nye anu za Baolo a kɨ́nə́ sóŋə́ ghe.

¹⁵ Wɛrə abɔʼnɨ ŋwɔn tsum a mu ndá zɨ ghɨnə nkwárɨ́ nkyi, wɛrə a tiʼ ngon awɨgɨ ɨ sóŋə́ ngə́, “Yenə ngyen ntsi a mu ndá me mbáʼ be a be ngə́ nɨ zɛnə ngə́ ma nɨ nkasɨ ŋwɔn wa a nɨŋnɨ ntəm ɨyi a nye Maʼmbyí ɛ.” Wɛrə a lɛ́tɨ́ mɨntəm ɨmɨgɨ, bɨgɨ ghen.

Bɨ Nɨŋ a Baolo bo Sailasɨ Atsáŋ a Filibi ə

¹⁶ A ɨtfúʼ njwi tse mbáʼ bɨgɨ kɨ́nə́ ngěn adiʼ wa bɨ kɨ́nə́ ntsaʼtə a Ŋwi ɨwu, mɔn mangye tse wa bɨ fénɨ́ ayi tso abuʼ wa a tsínɨ́ nɨ azhwi zə tɔmnɨnɨ za a kɨ́nə́ ngɨə wɛrə a kwabɨnɨ ɨnu ɨ fɨ́ʼtə́ a za a ghɨnɨ yen, a bóm awɨgɨ ə. Wɛrə a kə́ fuʼ nkáb zɨ ngaʼnɨ a mbó bɨta bɨ abuʼ ɨbyi adzaŋ za wɛrə a kɨ́nə́ nkwǎb nɨkwábɨ ə.

¹⁷ Wɛrə a kə́ ndzɔŋə a Baolo abɔʼnɨ bɨgɨ ntɔ́nkə́ ngə́, “Mbáŋnɨ́ tsiŋ nɨ ngaŋ afaʼ Ŋwi Akɔ́ʼɔ́ntsɨrə ghe! Bo chwítə́ a mbó bən adzaŋ za be Ŋwi a loŋ awɨŋ ə!”

¹⁸ Wɛrə a ghɨ́ a məzen atú njwi tsə ghaʼnɨ a nye ndóm wa ɨnye Baolo ɨ tsɛ́gɨ́nɨ́nɨ́, a bəŋ ayi ɨ soŋ a mbó azhwi za a tsínɨ́ a mu ɨnye mɔn mangye wa ngə́, “Nɨ ɨkum Yeso Kristo, ma soŋ a mbó gho ngə́ o fu a mu ɨnye zɨə!” Tsɛʼ a nyom məwa azhwi zə tɔmnɨnɨ za a nyɛ́ʼtɨ́ a mɔn mangye wa.

¹⁹ Ɨbɛn ba bɨ tsínɨ́ nɨ zɨ ghɨnə njí ngə́ ndóm wa bo kɨ́nə́ nchyɛ̌ nɨ nkáb ɨ bɨ́gɨ́ ayi, bo chwá a Baolo bo Sailasɨ ɨ shwuŋ awa ngɛn nɨ bo a samnɨ mɨtan a ɨshi bɨsáʼ bɨ ɨlaʼ ə.

²⁰ Bɨ yén nɨ bo a ɨshi bɨsáʼ bɨ ɨlaʼ bə Roma ɨ soŋ ngə́, “Ɨbɛn benə nɨ bə Yuda ghe. Bo bvugɨ ndum a mu ntáʼmbagə wu wi ɨwɨgɨnə ghe.

²¹ Bo dǐʼ mbɔ́m tsa tsɨ kwənkɨnə a nyɔngɔŋ ɨwɨgɨnə; bɨgɨnə nɨ ɨbɛn bɨ bə Roma, bɨgɨnə chi keʼ mbɔ́m mətsen bem kə ɨ ghɨnə a tsɛrə ghe.”

²² Ɨnɔ wa ɨ tsínɨ́ ɨwu nɨ́ŋ mɨntsu ɨma a nye nkobtə za bɨ kɨ́nə́ nkobtə a Baolo bo Sailasɨ lá. Bɨsáʼ bɨ ɨlaʼ ba sátɨ́ ɨtsɛʼ Baolo bo Sailasɨ ntiʼ soŋ ngə́ á bɨ shwom awa nɨ ngwan ə.

²³ Bɨ ghɨnə shwóm awa tsɛʼ ɨ shiʼnɨ, ntyiŋ awa ntsagɨ atsáŋ ntiʼ soŋ a mbó ntsiŋ atsáŋ wa ngə́ á fɨŋ awa tsɛʼ ɨ shiʼnɨ ə.

²⁴ Mbáʼ ntsiŋ atsáŋ wa a kwárɨ́nɨ́ ntɨgə tsen lá, a tyíŋ awa ntsagɨ a mu kwasɨ ndá wa a bénɨ́ wu ɨmu ntiʼ nkɨ nɨŋ bɨkɨbuʼ a mɨku bo ghe.

²⁵ A ghɨnə mbé tso ntɨŋ ɨtfúʼ Baolo bo Sailasɨ tsaʼtɨnə a Ŋwi nkə́ ndzɔ́bɨ́ mɨkom ngúʼsə́ a Ŋwi ɨwu, ngaŋ atsáŋ tsə mɔʼɔ tsa zhwiʼtɨnə ghe.

²⁶ Ɨshe vwúkɨ́ nɛ́m tsɛʼ nɨ azhwuʼ a nye ndóm wa atsáŋ za a chíʼnɨ́nɨ́ ɨ shiʼ nkuʼ a nye atsé azhi ɛ. Mɨntsu mɨndá byí ŋáʼnɨ́, mɨnkɨ mɨ atɨŋə ma bɨ kórɨ́nɨ́ ngaŋ atsáŋ tsa ɨwu tɨnkɨ a ɨnye bo bɨtsum ngvokɨ a tɨshe.

²⁷ Ntsiŋ atsáŋ wa a ló atɨ́ ə. A ghɨnə ndzɛ́n ngə́ mɨntsu mɨ atsáŋ ma tɛ́m ɨ dzɨgɨ, ntɔŋ ngə́ ngaŋ atsáŋ tsa kɨ́əkɨ́ ntiʼ sɔŋ a lumban ɨyi ndǒ njwitɨ atuəmbəm azhi ɛ.

²⁸ Lá Baolo a tɔ́nkɨ́ nɨ adaʼ azhi atsum ngə́, “Koʼ atuəmbəm azo lɛmə! Bɨgɨ tsi ɨghan tsɛʼ bɨtsum ə!”

²⁹ Ntsiŋ atsáŋ wa a tɔ́ŋ bɨ yen nɨ nkaʼ, wɛrə a kɨə nkon ngɛn ngvo a mɨku Baolo bo Sailasɨ mbɨ́ŋnə́ ghe.

³⁰ Wɛrə a tíʼ ndɔgɨ awa ɨ fu nɨ bo a mu atsáŋ za ntiʼ mbitɨ awa ngə́, “Bɨtə̧, ma mɨ zagɨ ghɨ lá ɨ nə́ á bɨ loŋ aghan le?”

³¹ Bo chwɨ́gɨ́ ngə́, “Nɨŋ ntəm ɨgho a nye Maʼmbyí Yeso, bɨ mɨ tiʼ loŋ agho — gho abɔʼnɨ ŋwɔn tsum a ndá gho ghe.”

³² Bo tíʼ sóŋ nɨgham nɨ Maʼmbyí a mbó zɨ abɔʼnɨ ɨbɛn bə mɔʼɔ bɨtsum ba bɨ tsínɨ́ a ndá zɨə.

³³ Tsɛʼ a nyom məwa nɨ ɨtfúʼ wa, ntsiŋ atsáŋ wa a ghɛ́n sugɨ ɨlagɨ ɨtsa ɨtsum; zɨ abɔʼnɨ ngwəgɨ ɨzhi tsum byi nkwarɨ nkyi ɛ.

³⁴ A tíʼ ndɔgɨ a Baolo bo Sailasɨ nkɔʼ ngɛn nɨbo a ndá zɨ, ntiʼ nga mɨdzɨ bo dzɨə. Nɨdorɨ lón a ntəm zɨ abɔʼnɨ ŋwɔn tsum wa a tsínɨ́ a ndá zɨ, mbɨ́ʼ ngə́ tɨtsɔŋnɨ bo nɨ́ŋnə mɨntəm ɨma a nye Ŋwi ə.

³⁵ A ghɨnə mbé a tənjwi, bɨsáʼ bɨ ɨlaʼ bɨ bə Roma tsagɨ bɨgwe nɨ ntɨgə ngə́, “A nɨ nyɛʼtɨ ɨbɛn ba á bɨ ghen.”

³⁶ Ma lan, ntsiŋ atsáŋ wa a fɨ́ʼtɨ́ a mbó Baolo ngə́, “Bɨsáʼ bɨ ɨlaʼ tsagɨ ntɨgə ngə́ á bɨ nyɛʼtɨ agho abɔʼnɨ Sailasɨ ə. Nɨ chi tiʼ ghɛn nɨ mbɔnɨ ə.”

³⁷ Lá Baolo a sóŋ a mbó bɨgwe ba ngə́, “Bo kɨ se anu zə tse za bɨgɨ fanɨ zɛn lá ɨ shwom awɨgɨ nɨ ngwan asaŋəsaŋ ə — le buŋ bɨgɨ nɨ ɨbɛn bə Roma ghe. Bo kɨ farɨ awɨgɨ atsáŋ, ntiʼə ndǒ fɨgɨ bɨgɨ ndzum ndzum le? A chi keʼ ma lan be! Bɨsáʼ bɨ ɨlaʼ bɨ bə Roma bo mboŋ tsi nɨ ɨ zagɨ yen fɨgɨ awɨgɨ ə.”

³⁸ Bɨgwe ba fɨ́ʼtɨ́ mɨgham mɛnə a mbó bɨsáʼ bɨ ɨlaʼ bɨ bə Roma; bo ghɨnə ndzúʼ ngə́ Baolo bo Sailasɨ bé ɨbɛn bə Roma, ntsi nɨ nɨbɔgɨ ə.

³⁹ Ma lan, bo ghɛ́n mbuʼtɨ mbó ngə́ á bo lɨgɨnɨ anu za; ntiʼ fɨgɨ awa atsáŋ wa, ntiʼ nkɨ soŋ ngə́ á bo nyɛʼtɨ ntáʼmbagə wu wi ɨwa ghe.

⁴⁰ Baolo bo Sailasɨ nyɛ́ʼtɨ́ atsáŋ za ntiʼ ngɛn a ndá Litia ghe. Ɨwu, bo kwátɨ́ ɨbɛn ba bɨ nɨ́ŋnɨ́ mɨntəm ɨma a nye Kristo, ngam mɨgham a ngwɔŋtɨ bo ntiʼ ngɛn awa ghe.