Ɨfaʼ 11 - Mɨkan wu Fi

Bita a Fɨʼtɨ a za a Fúnɨ́ a Ndá Kamalósɨ a mbó Ndáŋwi a Yerosalɛm ə

¹ Ntóm Yeso abɔʼnɨ ɨbɛn bə mɔʼɔ ba bɨ nɨ́ŋnɨ́ mɨntəm ɨma a nye Kristo a mu mbuʼ Yudiya tsum zúʼ ngə́ ba a se bə Yuda be kɨ́ nkwárɨ́ nɨgham nɨ Ŋwi ə.

² Bita a ghɨnə ngɛ́n a Yerosalɛm, ɨbɛn ba bɨ kɨ́nə́ ndǒ ngə́ muŋ bɨ tsəŋ ɨlagɨ ba a se bə Yuda be kəbtɨ ayi, ɨ sóŋə́ ngə́,

³ “O ghɛ́n a ndá ba a se bə Yuda be ba bɨ se ɨlagɨ ɨtsa tsəŋ nkɨ ndzɨ ɨwu lá mbɨ́ʼ ake le?”

⁴ Ma lan, Bita a nyɔ́ŋ ɨnye ɨzhi a ɨshe ɨ fɨʼtɨ anu atsum za a fúnɨ́ a mbó bo tsɛʼ a nɨyerɨ nɨyerɨ ndɔgɨnɨ a mbiʼnə ngə́:

⁵ “Mbáʼ ma kɨ́nə́ ntsaʼtə a Ŋwi a ntáʼmbagə wu wi wa ɨ nɨ Joba lá, ma lyé ndzɛm nəzhwɨgɨnɨ ə. Ma zɛ́n bɨ chwa a nye mɨbú ɨmyi mi nɨkwa azúm zə tse za a fínɨ́ abagɨ atsɛʼ zə faŋnɨ ndo a fɔməbvurə bɨ shiʼsɨnə, a yen ntɛm a mbyɛn me ghe.

⁶ Ma lén wə mu ɨ shiʼnɨ ndzɛn ɨnyam njwuʼ abɔʼnɨ ɨnyam mɨbaʼ, bɨkóŋə́shé abɔʼnɨ bɨsɨ́ŋ bə mɨbaʼ ə.

⁷ Ma tíʼ ndzúʼ nji zɨ tse soŋ a mbó me ngə́, ‹Bita, lo atɨ́, njwitɨ nkfurə!›

⁸ Lá ma chwɨ́gɨ́ ngə́, ‹Ngáŋ a Maʼmbyí! Ma láʼnə mbvurɨ tɨ dzɨ azúm zə tse za a se fɛm a mu mbɔm kə za bɨ shwiʼnə.›

⁹ Nji za kwíʼ ndo a fɔməbvurə ɨ soŋ ngə́, ‹Azúm za Ŋwi a soŋnɨ ngə́ a fɛm, koʼ soŋ ngə́ ka a fɛm ayi ɛ.›

¹⁰ Anu məzen a fú nkfu tsi tárə́, bɨ tiʼ mbə ndɔgɨ azúm məza nkɔʼ ngɛn nɨ zɛrə a fɔməbvurə ghe.

¹¹ Tsɛʼ a nyom məwa, ɨbɛn bi bɨtárə́ ba bɨ lónɨ́ a Seseria, bɨ tyigɨ awa a mbó me, yén nkón a mu ndá za ma kɨ́nə́ nchyɛ̌ ɨwu ə.

¹² Azhwi a sóŋ a mbó me ngə́ á ma zɔŋ awa tɨ jwɛrɨkə. Ɨbɔmbɨma a ndzum Kristo benə bi ntugə ba bɨ lonɨ a Joba zɔ́ŋ aghan bɨgɨ bo ghɛn a Seseria, ngɛn nkon a ndá Kamalósɨ ə.

¹³ Wɛrə a sóŋ a mbó bɨgɨ adzaŋ za zɨə zɛ́nɨ́ ntsendá Ŋwi ɨ tɛm a mu ndá zɨə. Wɛrə a kwíʼtɨ́ ngə́ ntsendá Ŋwi za ɨ sóŋ a mbó zɨ ngə́, ‹Tyigɨ a ŋwɔn tse a Joba á ghɛn ntɔŋ a ŋwɔn tse wa mɨkum ɨmyi mɨtsum nɨ Samɔn Bita ghe.

¹⁴ Wɛrə a mɨ gham mɨgham mə tsɛrə a mbó gho ma a ntsǎ a ndzum mɛrə, bɨ mɨ loŋ awɨŋ bɨ ngwəgɨ ɨzo tsum ə.›

¹⁵ Ma ghɨnə mbíʼnɨ́ ngamə, Azhwi zə Fɛmnɨ a shiʼ atú bo tsɛʼ tso mbáʼ a shíʼnɨ́ atú bɨgɨnə a mbiʼnə lá.

¹⁶ Ma tíʼ ngwáʼtɨ́ anu za Maʼmbyí a kwɛ́nə soŋ ngə́, ‹Yoane a ghá nkyi nɨ nkyi ngəŋ ə, lá bɨ ghɨ ghá nkyi a mbó bən be nɨ Azhwi zə Fɛmnɨ ə.›

¹⁷ A lán ngə́ Ŋwi a ghá ndəŋndəŋ azúm zə ghanɨ za wɛrə a ghánɨ́ a mbó bɨgɨnə a nkfu za bɨgɨnə fómnɨ́ nɨŋ mɨntəm ɨmɨgɨnə a nye Maʼmbyí Yeso Kristo lá a mbó ba a se bə Yuda be məba; ma lánɨ́ ntíʼ mbé lá ɨwa a njwə́ŋtə́ a ntsúʼnɨ́ Ŋwi le?”

¹⁸ Bo ghɨnə ndzúʼ a məzen lá, nkeʼ nɨ anu zə soŋnɨ bə ntsi, ntiʼ mbontɨ a Ŋwi ɨ sóŋə́ ngə́, “Lá be ngə́ Ŋwi a kɨnə nkɨ nga abárɨ́ a mbó ba a se bə Yuda be á bo bəŋ mɨntəm ɨma a nye mɨbvu ɨma ntiʼ ntsi nɨ ntsi ntɨŋ ə!”

Ndáŋwi za ɨ Tsínɨ́ Antyokɨ ə

¹⁹ Ɨbɛn bə mɔʼɔ mbe ɨbɛn ba bɨ nɨ́ŋnɨ́ mɨntəm ɨma a nye Kristo dzágɨ́nɨ́ mbɨ́ʼ ndɨgə za bɨ kɨ́nə́ ndɨ́gə́ awa mbáʼ bɨ zhwítɨ́nɨ́ a Sɨtifa lá. Bo ghɛ́n ngɛn nkuʼ a Fonisha, bə mɔʼɔ ghɛn a Saibrusɨ, bə tse ghɛn Antyokɨ ə. Bo kə́ sǒŋ nkən wa tsɛʼ a mbó bə Yuda ghe.

²⁰ Lá ɨbɛn bə mɔʼɔ ba bɨ nɨ́ŋnɨ́ mɨntəm ɨma a nye Kristo ba bɨ lónɨ́ a Saibrusɨ abɔʼnɨ Sirin, ghɛ́n Antyokɨ, nkɨ nchwitɨ nkən wa a mbó ba a se bə Yuda be, ɨ sóŋə́ a mbó bo Nkən wu Shiʼnɨ mbɨ́ʼ a Maʼmbyí Yeso ghe.

²¹ Mɨtən mɨ Maʼmbyí tsí bo bo, ɨnɔ ɨbɛn nɨ́ŋ mɨntəm ɨma a nye Kristo ntiʼ nkɨ nkwebtɨ ntiʼə ndzɔŋə a Maʼmbyí ɛ.

²² Nkərɨ mbɨ́ʼ anu məzen ɨ ghɛ́n nkón a mbó ndáŋwi a Yerosalɛm ə. Ma lan, bo tíʼ ntsagɨ a Banabasɨ Antyokɨ ə.

²³ Wɛrə a ghɨnə ngyén nkón, ndzɛ́n adzaŋ za Ŋwi a fɔ́gɨ́nɨ́ ɨbɛn ba, ndorɨ tsɛʼ nkə. Wɛrə a tíʼ ngwɔŋtɨ awa ngə́ á bo fáʼə nɨ táʼ ntəm a mbó Maʼmbyi nkə́ sóŋə́ tsɛʼ nkənu nkfu tsum ə.

²⁴ Mbɨ́ʼ ngə́ Banabasɨ a bé ŋwɔn wu shiʼnɨ, ndon nɨ Azhwi zə Fɛmnɨ abɔʼnɨ abeməntəm, ɨbɛn bə ghaʼnɨ tíʼə ndzɔŋə a Maʼmbyí ɛ.

²⁵ Banabasɨ a tíʼ ngɛn a Tasusɨ a ndǒ Sɔlɨ ə.

²⁶ A ghɨnə ndzɛ́n ayi, ndɔgɨ ayi bo zɨ ghɛn Antyokɨ ə. Atú táʼ alom wu fɨgɨnɨ bo wa bi bɨbá kə́ mbomnkə bo bɨ ɨbɛn bɨ ndáŋwi, ndǐʼ ɨbɛn ba bɨ gháʼnɨ́ be tɨsɨŋə. Bɨ fóm ntɔ́ŋ ɨbɛn ba bɨ nɨ́ŋnɨ́ mɨntəm ɨma a nye Kristo ngə́ Ɨbɛn ba bɨ zɔŋnə a Kristo lá Antyokɨ ə.

²⁷ A nkfu məwa, ntóm Ŋwi tsɨ tse ló a Yerosalɛm ngɛn Antyokɨ ə.

²⁸ Táʼ a tɨtərɨ bo wa ɨkum ɨyi bénɨ́ Agabusɨ a ló ntɛm atɨ́, a ntsǎ a ndzum Azhwi, wɛrə a sóŋ a za a ghɨnɨ fú ngə́ mɨchwinɨ wu ntən a mɨ tsi a mu mbyi tsum ə. (Mɨchwinɨ məwen a yén mbáʼ Klodiosɨ a bénɨ́ ɨfɔ ghe.)

²⁹ Bɨyɛʼ ba tsɔ́ʼ a mu mɨntəm ɨma ngə́ táʼ ŋwɔn nɨ bo a mɨ tsagɨ akwatɨ a nye ndvuŋ wa zɨə chinɨ tsagɨ a mbó ɨbɛn ba bo bo nɨ́ŋnɨ́ mɨntəm ɨma a nye Kristo ba bɨ kɨ́nə́ nchyɛ̌ a Yudiya ghe.

³⁰ Bo ghɨ́ a məziŋ ə, ntiʼ ntsagɨ nkáb zɨ wu a mbó Banabasɨ bo Sɔlɨ ngə́ á bo ghɛn nga a mbó ɨtú ndáŋwi ə.