Ɨfaʼ 10 - Mɨkan wu Fi

Bita a Bomnkɨ bo Ŋwɔn wa a se Ŋwɔn bə Yuda be ə

¹ Ŋwɔn tse a tsí ɨwu a Seseria wa ɨkum ɨyi bénɨ́ Kamalósɨ, wa a bénɨ́ tantso bɨgwe nkɨ wu fɨgɨnɨ a mu akarɨ a bɨgwe bɨ bə Roma zə tse za bɨ kɨ́nə́ ntɔ́ŋə́ ngə́, “Akarɨ a bɨgwe bɨ Itali ə.”

² Wɛrə a bé ŋwɔn wa a tɛ́gɨ́nɨ́ atú azhi a nye Ŋwi tsɛʼ nkə; wɛrə nɨ ngwəgɨ ɨzhi kə́ ngúʼsə́ a Ŋwi ə. Wɛrə a ghɨ́ ɨnu tsɨ ghaʼnɨ a nkwátɨ́ ngaŋ afúm tsə bə Yuda nkə́ ntsáʼtə́ Ŋwi nkfu tsum ə.

³ A ghɨnə mbé tso bɨnyom bi bɨtárə́ a ndzəŋ nyom, wɛrə a lye ndzɛm nəzhwɨgɨnɨ ngə́ ntsendá za a nɨ zɨ Ŋwi ɨ kón ngyen soŋ a mbó zɨ ngə́, “Kamalósɨ!”

⁴ Wɛrə a kyérɨ́ ntsendá Ŋwi za a mu nɨbɔgɨ ntiʼ mbitɨ wəmbo ngə́, “Tə̧, a nɨ ake le?” Ntsendá Ŋwi za chwɨ́gɨ́ ngə́, “Ɨnye Ŋwi bɔŋə mbɨ́ʼ atsaʼtɨ a Ŋwi azo abɔʼnɨ ɨfaʼ nkwatɨ ɨbɛn wa o faʼnə ghe. Ŋwi a mɨ chwɨgɨ a mbó gho ghe.

⁵ Tɨtsɔŋnɨ, o mɨ tsagɨ ɨbɛn a Joba á bɨ ghɛn ntsɔʼnɨ aku a ŋwɔn tse wa ɨkum ɨyi nɨ Samɔn Bita ghe.

⁶ Wɛrə a chyɛ̌ bo ŋwɔn tse wa a nɨ́ŋnɨ́ ɨkan a nye ngobɨ ɨnyam ɨkum ɨyi be Samɔn ə. Ŋwɔn məwen a chyɛ̌ a ngə́rɨ́ sagɨrə wu ngwi ə.”

⁷ Ntsendá Ŋwi za tíʼ ngɛn ayi, Kamalósɨ a kɨ ntiʼ ntɔŋ ngaŋ afaʼ tsa tsi bá tsa tsɨ kɨ́nə́ faʼə a ndá zɨ abɔʼnɨ táʼ gwe ghe. Gwe wen a bé ŋwɔn wa a tɛ́gɨ́nɨ́ atú azhi a nye Ŋwi tsɛʼ nkan nkɨ ndzɔŋ mbe ŋwɔn wa a kɨ́nə́ ngáʼə nchyɛ̌ a mbyɛn Kamalósɨ ɨ fáʼə wəmbo ə.

⁸ Wɛrə a fɨ́ʼtɨ́ anu za a fúnɨ́ a mbó bo ntiʼ ntsagɨ awa a Joba ghe.

⁹ Njwi zɨ mɔʼɔ bənə ndan, mbáʼ bo tsínɨ́ a ndóm ntíʼə ndɔ́btɨ́ nkuŋə a Joba, Bita a kɔʼ ngɛn atú azabɨ a ndá a ntsaʼtɨ Ŋwi mbáʼ a bénɨ́ tso ntənɨ nyom ə.

¹⁰ Nji záŋ ayi, wɛrə a bitɨ azúm a mɨdzɨ ə; mbáʼ bɨ kɨ́nə́ ndǎm mɨdzɨ ma lá, wɛrə a lyé ndzɛm nəzhwɨgɨnɨ ə.

¹¹ Wɛrə a zɛ́n fɔməbvurə ŋaʼnɨ, bɨ chwa azúm zə tse za a fínɨ́ abagɨ atsɛʼ zə faŋnɨ a nye mɨbú ɨmyi mi nɨkwa ntiʼə shíʼsə́ atuəshe.

¹² A mu abagɨ atsɛʼ zen, ɨbə́ŋ ɨnyam ɨtsum, bɨkóŋə́shé abɔʼnɨ bɨsɨ́ŋ bɨ mɨbaʼ tsí wə mu ə.

¹³ Nji zɨ tse sóŋ wəmbo ngə́, “Bita, lo atɨ́, njwitɨ nkfurə!”

¹⁴ Lá Bita a chwɨ́gɨ́ ngə́, “Ngáŋ a Maʼmbyí! Ma láʼnə mbvurɨ tɨ dzɨ azúm zə tse za a se fɛm a mu mbɔm kə za bɨ shwiʼnə.”

¹⁵ Nji za kwíʼ soŋ a mbó zɨ ngə́, “Azúm za Ŋwi a soŋnɨ ngə́ a fɛm, koʼ soŋ ngə́ ka a fɛm ayi ɛ.”

¹⁶ Anu məzen a fú nkfu tsi tárə́, bɨ tiʼ mbə ndɔgɨ azúm məzen nkɔʼ ngɛn nɨ zɛrə a fɔməbvurə ghe.

¹⁷ Mbáʼ Bita a kɨ́nə́ mbvúrə́ ngwíʼə ayi anu za ndzɛm nəzhwɨgɨnɨ ziŋ ɨ díʼnɨ́, ɨbɛn ba Kamalósɨ a tságɨ́nɨ́ lá bɨ tsɔ́ʼnɨ́nə aku nji ndá Samɔn, ntiʼ ntɛmnkɨ a ntsu abuʼ zɨə.

¹⁸ Bo tɔ́nkɨ́ mbítɨ́ ngə́, “Ngən wu tse a tsi ɨghan wa ɨkum ɨyi nɨ Samɔn Bita le?”

¹⁹ Bita a kə́ mbvúrə́ njwə́ŋtɨ́ ndzuʼ kɨ zhi anu za ndzɛm nəzhwɨgɨnɨ za ɨ díʼnɨ́ mbáʼ Azhwi a sóŋnɨ́ wəmbo ngə́, “Zuʼ le! Ɨbɛn bi bɨtárə́ tsi ɨghan ndǒ agho ə.

²⁰ Ma lan, lo atɨ́ ɨ shiʼ ngen, koʼ kɨ njwɛrɨkɨ a ndzɔŋ bo ɨ ghɛn bɨŋ bo mbɨ́ʼ ngə́ a tyigɨ me ntyigɨ awa ghe.”

²¹ Ma lan, Bita a shíʼ ngɛn ɨ soŋ a mbó bo ngə́, “A nɨ me wa nɨ lɔnə ghe. A nɨ anu ake le?”

²² Bo chwɨ́gɨ́ ngə́, “A tyigɨ Tantso Kamalósɨ ntyigɨ awɨgɨ ə. Wɛrə a nɨ ŋwɔn wu shiʼnɨ wa a ghúʼsɨ́nə́ a Ŋwi, bə Yuda bɨtsum kə ndǐʼ mbɔm zɨ shiʼnɨ a mbó zɨ tsɛʼ nkə. Ntsendá za a nɨ zɨ Ŋwi kɨ soŋ wəmbo ngə́ á wɛrə ghon agho a ndá zɨ, taŋ ɨ chi zuʼ anu za o mɨ soŋə.”

²³ Bita a sóŋ ngə́ á ɨbɛn ba kon a ndá, ntiʼ nkɨ soŋ ngə́ á bo lye ɨwu ə. Njwi zɨ mɔʼɔ bənə ndan, Bita a kyaŋtɨ ɨnye ɨzhi ndzɔŋ ɨbɛn ba bo bo ghen. Ɨbɛn bə tse a tɨtərɨ ɨbɛn ba bɨ nɨ́ŋnɨ́ mɨntəm ɨma a nye Ŋwi a Joba zɔ́ŋ a wɛrə ghe.

²⁴ Njwi zɨ mɔʼɔ bənə ndan, wɛrə a yen ɨ fu a Seseria, adiʼ wa Kamalósɨ a kɨ́nə́ njwíʼtə́ ayi ɛ. Kamalósɨ a tsí bo bɨ ngaŋ ngwəgɨ abɔʼnɨ bɨson ɨbyi ba bɨ fátɨ́nɨ́ ayi tsɛʼ a nkan ba wɛrə a ghónə́.

²⁵ Mbáʼ Bita a yénɨ́, ntiʼə nkúŋə́ ngěn lá, Kamalósɨ a yén mbom ayi, mbyi ngvo wə mɨku, nguʼsɨ ayi ɛ.

²⁶ Lá Bita a chwá ayi ntsɔʼ ɨ soŋ wəmbo ngə́, “Tɛm atɨ́ ə; me mboŋ ma kɨ mbe lá tsɛʼ ŋwɔn mɨsɔŋ a ntsu ə.”

²⁷ Bita bo Kamalósɨ kə́ ngamnə adzaŋ za bo kɨ́nə́ nkúŋə́ ngěn a mu ndá ə. Wɛrə a kón ngɛn nkwatɨ ɨbɛn bə ghaʼnɨ ba bɨ ghótɨ́nɨ́ ɨwu ə.

²⁸ Wɛrə a sóŋ a mbó bo ngə́, “Bɨŋ mboŋ nɨ zhi ɨ shiʼnɨ ngə́ ka mbɔm nguʼsɨ Ŋwi bə Yuda bem ayi ngə́ á ŋwɔn bə Yuda a ghantɨ kə ngyenə bo bɨ ba a se bə Yuda be ə. Lá Ŋwi a diʼnə a mbó me ngə́ á ma zagɨ nkaʼ a ŋwɔn tse lɔgɨ tso wa a se fɛm a mu mbɔm kə wa bɨ shwiʼnə.

²⁹ Ma lan, mbáʼ nɨ kɨ tɔŋnɨ aghan lá, ma yen tɨ jwɛrɨkə. Ma tiʼə mbítə́ agho ngə́ o tɔŋ aghan lá ngə́ ke le?”

³⁰ Kamalósɨ a chwɨ́gɨ́ ngə́, “A nɨ njwi tsi tárə́ tɨtsɔŋnɨ mbáʼ a kɨ benɨ a nyom tso wɛnə ma tsaʼtɨnə a Ŋwi a mu ndá me a nye bɨnyom bɨtárə́ a ndzəŋ nyom ə. Mɨmboŋnɨ ŋwɔn tse wa a kɨ wəgɨnɨ ɨtsɛʼ tsɨ ŋwankɨnə a tɛm a ɨshi me

³¹ ɨ soŋ ngə́: ‹Kamalósɨ! Ŋwi a zuʼnə atsaʼtɨ a Ŋwi azo nkɨ ndze ɨfaʼ nkwatɨ ɨbɛn wa o faʼnə ghe.

³² Tsagɨ ɨbɛn a Joba á bɨ ghɛn ntsɔʼnɨ aku a ŋwɔn tse wa mɨkum ɨmyi mɨtsum nɨ Samɔn Bita ghe. Wɛrə a nɨ ngən a ndá ŋwɔn tse wa a nɨ́ŋnɨ́ ɨkan a nye ngobɨ ɨnyam ɨkum ɨyi be Samɔn wa a tsínə́ a ngə́rɨ́ sagɨrə wu ngwi ə.›

³³ Ma lan, ma kɨ chi mbyi ntsagɨ ɨbɛn ngə́ á bɨ yen ntɔŋ agho, o kɨ ngɨ ɨ shiʼnɨ mbáʼ o yenɨ lá. Tɨtsɔŋnɨ bɨgɨnə bɨtsum tsi adiʼ wa Ŋwi a tsinɨ ɨwu, njwíʼtə́ a ndzúʼ anu atsum za Maʼmbyí a tɨgɨtɨnɨ agho ngə́ o soŋə.”

Nɨgham nɨ Bita ghe

³⁴ Bita a bíʼnɨ́ ngamə ɨ soŋ ngə́, “Ma zɛnə tɨtsɔŋnɨ ngə́ ka Ŋwi a ndiʼə ayi nkyerɨ ə.

³⁵ Wɛrə a kwárə́ ɨbɛn bɨtsum ba bɨ bɔ́gɨ́tɨ́nə́ ayi nkə́ ngɨ̌ ɨnu tsɨ tɛmnɨnɨ, kə o lo be a nye zɨŋə ngwəgɨ ŋwɔn mɨsɔŋ ə.

³⁶ Nɨ zhi nkən wa wɛrə a tságɨ́nɨ́ a mbó ɨbɛn bə Izrai lá, wɛrə a kə́ nchwítɨ́ Nkən wu Shiʼnɨ wu mbɔnɨ ntsa a ndzum Yeso Kristo, zɨ wa a nɨ Maʼmbyí ŋwɔn tsum lá.

³⁷ Nɨ zhi anu mbɨ́ʼ anu zə wi za a fúnɨ́ a mu Yudiya tsum, mbiʼnɨ a Galili lá. Anu məzen za a zɔ́ŋtɨ́nɨ́ fú mbáʼ Yoane a sóŋnɨ́ nkən ɨyi mbɨ́ʼ nkwarɨ nkyi lá.

³⁸ Nɨ zhi anu mbɨ́ʼ a Yeso wu Nazarɛ abɔʼnɨ adzaŋ za Ŋwi a zɔ́ʼnɨ́ ayi nɨ Azhwi zə Fɛmnɨ abɔʼnɨ mɨtən lá. Wɛrə a ghɛ́n a nye ɨdiʼ ɨtsum, ngɨ̌ ɨnu tsɨ shiʼnɨ ɨwu nkə́ ntsǔʼ ɨbɛn bɨtsum ba bɨ tsínɨ́ a shwúrɨ́ adaʼ a Dəbɨrɨ, mbɨ́ʼ ngə́ Ŋwi a tsí bo zɨə.

³⁹ Bɨgɨnə nɨ bətɛmə-ndzě a nye ɨnu ɨtsum tsa wɛrə a ghɨ́nɨ́ a mu alaʼ bə Izrai abɔʼnɨ Yerosalɛm ə. Bɨ tíʼ njwítɨ́ ayi a nkwemtɨ zɨ atɨ abaŋnɨ-baŋnɨ ə.

⁴⁰ Lá Ŋwi a zhwémnɨ́ ayi a ndzum njwi tsi tárə́, ngɨ ngə́ á wɛrə a fu a ɨshe a ɨshi,

⁴¹ nkeʼ ŋwɔn tsum be, lá mbe be tsɛʼ a ɨshi bətɛmə-ndzě ba Ŋwi a kwɛ́nə ntsɔʼ, lá be ngə́, a ɨshi bɨgɨ ba bɨ kɨ́nə́ shíʼtə́ nchyɛ̌ ndzɨ́ə bɨgɨ bo mbáʼ a zhwémnɨ́nɨ́ a mbó nɨvwo ə.

⁴² Wɛrə a kɨ́ ngá ntɨgə a mbó bɨgɨ ngə́ á bɨgɨ sǒŋ nkən wu shiʼnɨ a mbó ɨbɛn ɨ kɨ soŋ nkənu za bɨgɨ zhinɨ ngə́ wɛrə lá ŋwɔn wa Ŋwi a tsɔ́ʼnɨ́ a nye tabyɛn wu ba bɨ tsinɨ atú ntən abɔʼnɨ ba bɨ kfonə ghe.

⁴³ Ntóm Ŋwi ɨtsum ghám mbɨ́ʼ ayi, ɨ soŋ ngə́, a ntsǎ a ndzum mɨtən mɨ ɨkum ɨyi, ɨbɛn bɨtsum ba bɨ nɨŋnɨ mɨntəm ɨma a nye zɨ, bɨ mɨ lɨgɨnɨ mɨbvu ɨma ghe.”

Ba a se bə Yuda be Kwarɨ Azhwi zə Fɛmnɨ ə

⁴⁴ Mbáʼ Bita a kɨ́nə́ mbvúrə́ ngámə́ lá, Azhwi zə Fɛmnɨ a shíʼ atú ŋwɔn tsum wa a kɨ́nə́ njwíʼtə́ anu za wɛrə a kɨ́nə́ sóŋə́ ghe.

⁴⁵ A kɨ́ʼnɨ́ bə Yuda ba bɨ nɨ́ŋnɨ́ mɨntəm ɨma a nye Kristo, ba bɨ lónɨ́ a Joba ngyen bo bɨ Bita lá ngə́ Ŋwi a kɨ́ nchwirɨ azúm zə ghanɨ azhi za a nɨ Azhwi zə Fɛmnɨ atú ba a se bə Yuda be ə.

⁴⁶ Mbɨ́ʼ ngə́ bo zúʼ bo ghamnɨ mɨgham mɨ ɨtóm ɨtóm nkə́ mbóntɨ́ nɨghaʼ nɨ Ŋwi ə. Bita a tíʼ soŋ ntəm ɨyi ngə́:

⁴⁷ “Ɨbɛn biŋ kwarɨnə Azhwi zə Fɛmnɨ tsɛʼ tso mbáʼ bɨgɨ kɨ́nɨ́ nkɨ́ nkwárɨ́ lá. Ŋwɔn tse a chi bə kɨ́ŋ awa a nkwárɨ́ nkyi le?”

⁴⁸ Ma lan, wɛrə a tíʼ nga ntɨgə ngə́ á bo kwarɨ nkyi nɨ ɨkum Yeso Kristo ghe. Bo tíʼ sóŋ ngə́ á wɛrə a tsi bo bo atú njwi tsɨ tsɛrə ghe.