Ɛbal 9 - Mɨkan wu Fi

Nguʼsɨ Ŋwi a mu Mbəmnye abɔʼnɨ Azhwi ə

¹ Akan zə ntsambyi za a tsí nɨ mbɔm za ɨbɛn kɨ́nə́ ndzɔŋə a ngúʼsɨ́ Ŋwi abɔʼnɨ adiʼ za bɨ kɨ́nə́ ngúʼsə́ a Ŋwi ɨwu atuəshe.

² Bɨ vwú ntaŋ wa ɨ tsínɨ́ nɨ bɨkwasɨ bi bɨbá ghe. Kwasɨ wu abyɛn bɨ kə́ ntɔ́ŋə́ ngə́ Adiʼ zə Fɛmnɨ ə. Wə mu a tsí atɛkɨ a nkaʼ, atɛkɨ za bɨ kɨ́nə́ ntɛ́gə́ abán za bɨ ghánɨ́ a mbó Ŋwi wu atú ə.

³ A ndzum abagɨ atsɛʼ zə nkwasə za a zɔ́ŋtɨ́nɨ́ a nye ɨdiʼ tsi bá lá, a tíʼ mbe adiʼ za bɨ kɨ́nə́ ntɔŋə ngə́ Adiʼ za a Fɛmnɨ Ntsa Atsum ə.

⁴ Ɨwu, atú a mɨkuʼ za bɨ bɔ́mnɨ́ nɨ ŋwaʼŋwaʼ a tsí ɨwu za bɨ kɨ́nə́ ntǒ alyɛn wu atú ə. Nkom Akan wa tɛ́m ɨwu bɨ kubɨnɨ a wɛrə bɨbagɨ bɨtsum nɨ ŋwaʼŋwaʼ ə. A mu Nkom Akan wa, sotɨ wa bɨ nyɛ́tɨ́nɨ́ nɨ ŋwaʼŋwaʼ ntsi nɨ abə́ŋ abán za bɨ kɨ́nə́ ntɔ́ŋə́ ngə́ mana lá wə mu, mbaŋ Alon za ɨ byɛ́rɨ́nɨ́ abɔʼnɨ bɨtáfɛrə bɨ ngɔʼ bi bɨbá ba bɨ ŋwáʼnɨ́nɨ́ ntɨgə tsa atú tsɛrə tsí ɨwu ə.

⁵ Atú Nkom wa a tsí ɨdzúm tsɨ káʼnɨ́ tsa tsɨ tsínɨ́ nɨ mɨbabɨnɨ, ndiʼə ngə́ Ŋwi a tsí ɨwu ə. Mɨbabɨnɨ ɨma kúbɨ́nɨ́ adiʼ za bɨ kɨ́nə́ ndɨgɨnɨ mɨbvu ɨwu ə. Lá ka tɨtsɔŋnɨ a be ayi nkfu za bɨ mɨ fɨʼtɨ atyetɨ azúm atsum ə.

⁶ Nə nɨ akyaŋtɨ za a tsínɨ́ adiʼ wa. Bɨntumshe kə́ nkúŋə́ ngěn a mu kwasɨ wu abyɛn wa njwi tsum a faʼ ɨfaʼ ɨwa a sugɨ mɨbvu ə.

⁷ Lá a kə́ nkúŋə́ tsɛʼ Ntumshe wu Ngwi a mu kwasɨ wu ɨmu wa, nkə́ ngɨə ma lan lá táʼ nkfu atú alom ə. A kɨ chi keʼ kon wə mu tɨ tiʼtɨ alɛm za wɛrə a mɨ gha taŋ ɨ fom sugɨ mɨbvu ɨmyi ɨwu bɔŋ ɨ tiʼ kɨ sugɨ mɨbvu mɨ ɨbɛn ɨbyi ma bo kɨ́nə́ ngɨə tɨ zhyɛ.

⁸ A nye akyaŋtɨ zen atsum, Azhwi zə Fɛmnɨ a diʼə ngə́ ndómnji wa ɨ kónə́ ngěn a mu Adiʼ za a Fɛmnɨ Ntsa Atsum lá ɨ bvurɨ tɨ ŋaʼnɨ mbáʼ be kwasɨ wu abyɛn wa a bvurɨ ntɛm atɨ́ ə.

⁹ Nə nɨ alisɨ za a fɨʼtɨnɨ anu mbɨ́ʼ nkfu tɨtsɔŋnɨ ə. A tiʼ ndiʼ ngə́ ɨkáŋ Ŋwi abɔʼnɨ mɨtsuʼnɨ mɨ atú, mbe ɨdzúm tsa bɨ ghánə́ a mbó Ŋwi chi keʼ ghɨ á ntəm ŋwɔn wu wu wa a ghúʼsɨ́nə́ a Ŋwi kɔʼ ntɛm ngə́ tsáŋ,

¹⁰ mbɨ́ʼ ngə́ tsɨ tsi nɨ anu tsɛʼ mbɨ́ʼ mɨdzɨ, mɨluʼ abɔʼnɨ ɨ sugɨ ɨnye ɨ fɛm a mu mbɔm ə. Mətsiŋ lá mbɔm abyɛn abyɛn tsa tsɨ tsinɨ ɨ kuʼ nkfu za Ŋwi a ghɨnɨ kyaŋtɨ mbɔm zɨ fi za.

¹¹ Lá Kristo a yenə tso Ntumshe wu Ngwi wu ɨnu tsɨ shiʼnɨ tsa tsɨ binə ntsi ɨghə. Ntaŋ wa wɛrə a faʼnə wə mu nɨ wu wi ngɛn nɨ mbyi nkɨ nkɔʼ ntɛm ngə́ tsáŋ ngɛn nɨ mbyi; ka a be ayi ntaŋ wa bɨ korɨnɨ nɨ mbó mɨ ŋwɔn mɨsɔŋ, lá be ngə́, ka a be ayi abagɨ atuəshe zen za bɨ káʼnɨ́ lá.

¹² A nkfu za Kristo a tsánɨ́ a mu ntaŋ wa nkon a mu Adiʼ zə Fɛmnɨ Ntsa Atsum məzen táʼ nkfu wa a ghɔŋnɨ nɨnkoŋ lá, a sé alɛm a mbyi abɔʼnɨ zə bɨnkɔ́ʼɔ́ndzum lɔgɨ nkon nɨ zɛrə a ngá tso mɨtsuʼnɨ mɨ atú; wɛrə a báŋnɨ́ ndɔgɨ azhi alɛm ndzuŋ ɨtú ɨtsɨgɨnə ɨwu táʼ nkfu wa a nunɨ nɨnkoŋ ə.

¹³ Bɨ lɔgə alɛm a mbyi abɔʼnɨ zə bɨnkɔ́ʼɔ́ndzum nɨ abvu a mɔn nkɔ́ʼɔ́ndzum wa bɨ tɔnɨ ɨ faʼrə atú ɨbɛn ba bɨ se fɛm a mu mbɔm, məzen a tiʼə sugə awa bo fɛmnə nkə́ ndɔgɨ ɨnu tsa bo fanɨ a mu mbɔm ngěn nɨ tsɛrə ghe.

¹⁴ Mbáʼ məzen a nɨ nkənu lá, a ghɨ tíʼ be ɨ lə́ a mbó alɛm a Kristo le? A ntsǎ a ndzum Azhwi a nɨnkoŋ, wɛrə a ghá atuəmbəm azhi tso mɨtsuʼnɨ mɨ atú ma mɨ tsinɨ tɨ alɔʼ a mbó Ŋwi ə. Alɛm a wɛrə a mɨ sugɨ mɨntəm ɨmɨgɨnə a nye mbɔm alaʼ tsa tsɨ se nɨ ɨlɨŋ tse tsi, taŋ á bɨgɨnə faʼə a mbó Ŋwi, zɨ wa a tsinɨ atú ntən lá.

¹⁵ Nə nɨ anu za a ghɨnɨ wɛrə a be nkyaŋtɨ akan zə fi, taŋ á ɨbɛn ba Ŋwi a tsɔʼnɨ awa tiʼ ntsi nɨ ɨfɔgə wu nɨnkoŋ wa Ŋwi a káʼnɨ́ awa nɨ wɛrə lá. A chi fu adzaŋ məwen lá mbɨ́ʼ ngə́ nɨvwo nə tse funə mbáʼ nɨ lá ndzuŋ atú a ɨbɛn a mbó mɨbvu ɨma ma mɨ tsinɨ a mu akan zə lvuŋ za lá.

¹⁶ Tɨtsɔŋnɨ, be anu mbɨ́ʼ ntɨgə nɨvwo a tsi ɨwu muŋ ŋwɔn wa a tɨ́gɨ́nɨ́ a kfonə ghe.

¹⁷ Mbɨ́ʼ ngə́ ntɨgə nɨvwo nɨ ɨnu adaŋədaŋə mbáʼ be ŋwɔn wa a ghɨ́nɨ́ a tsi ntɨŋə; ɨ tsi nɨ anu tsɛʼ mbáʼ ŋwɔn wa a ghɨ́nɨ́ a kfonə ghe.

¹⁸ Nə nɨ anu za, akan zə lvuŋ za a sé nɨ adaʼ tsi tɨgha bɨ chwirɨ alɛm lá.

¹⁹ Mbɨ́ʼ ngə́ a nkfu za Mǒse a tɔ́ŋnɨ́ ntɨgə ɨtsum a mu nyɔngɔŋ wa a mbó ɨbɛn bɨtsum, wɛrə a lɔ́gɨ́ alɛm a mɔn nkɔ́ʼɔ́ndzum abɔʼnɨ zə mbyi ɨ nyamtɨ nɨ nkyi, ntiʼ myigɨtɨ atú aŋwaʼnɨ za abɔʼnɨ ɨbɛn bɨtsum ə. Wɛrə a ghɨ́ a məzen nɨ abagɨ atsɛʼ zə baŋnɨ za a fɨgɨnɨ nkorɨ a nye abó abə́ŋ atɨ zə tse za bɨ tɔ́ŋnə́ ngə́ aisɔbɨ ə.

²⁰ A kə́ ngɨə mə lan lá ɨ sóŋə́ ngə́, “Nə nɨ alɛm za a nɨŋnɨ alɨgɨ a nye akan za Ŋwi a sóŋnɨ́ ngə́ á nɨ lɛn lá.”

²¹ Ndəŋndəŋ wɛrə a kə́ myigɨtɨ alɛm məza atú Ntaŋ wu Fɛmnɨ wa abɔʼnɨ ɨdzúm ɨtsum tsa bɨ kɨ́nə́ faʼə nɨ tsɛrə a ngúʼsɨ́ Ŋwi ə.

²² Tsɛʼ a nkənu, a mu ntɨgə Mǒse, a nɨ tsɛʼ ɨnu a nɨ́sháŋnɨ́ tsa bɨ sě ngɨə á tsɨ fɛm a mu mbɔm nɨ alɛm ə: lá be bɨ tú alɛm chwirɨ, bɨ mɨ keʼ mɨbvu lɨgɨnə.

Mɨtsuʼnɨ mɨ atú mɨ Kristo Sugə Mɨbvu ə.

²³ Ma lan, a kúʼnɨ́ ngə́ á bɨ sugɨ ɨfi ɨdzúm fɔməbvurə tsen á tsɨ fɛm a nye mbɔm məziŋ ə, lá ɨdzúm fɔməbvurə mətsen tsɨ lǒ mɨtsuʼnɨ mɨ atú ma mɨ tsanɨ ɨdzúm tsiŋ ə.

²⁴ Adiʼ zə Fɛmnɨ za Yeso a konɨ ɨwu lá, ka bɨ korɨ ayi a zɛrə lá nɨ mbó, nkɨ be afi a ngótɨ́ zə wu ə. Wɛrə a kón be a mu ngótɨ́ fɔməbvurə, ntiʼə fuə a ɨshe a ɨshi Ŋwi a nkfu bɨgɨnə ghe.

²⁵ Ntumshe wu Ngwi wu bə Yuda a kúŋə́ ngěn a mu Adiʼ zə Fɛmnɨ Ntsa Atsum nɨ ɨlom nɨ ɨlom ntíʼtə́ alɛm a mɨnyam ə. Lá Kristo a sé kon ngɛn lá a ngá atuəmbəm azhi nkfu tsə ghaʼnɨ,

²⁶ mbe be lá mə lan muŋ wɛrə a tsí nɨ ndzě ngɨ́ʼ nkfu tsə ghaʼnɨ nchwuʼnɨ nkfu za Ŋwi a káʼnɨ́ mbyi ɛ. Lá, adzaŋ za a benɨ, wɛrə a fu a ɨshe táʼ nkfu wa a ghɔŋnɨ nɨnkoŋ a nye nkfu zɨ ndwɨgɨnɨnɨ zen a sugɨ ɨbvu ntsa a ndzum nga atuəmbəm azhi tso mɨtsuʼnɨ mɨ atú ə.

²⁷ Tso mbáʼ ŋwɔn mɨsɔŋ a ntsu a tsinɨ nɨ nkfo tsɛʼ táʼ nkfu, ɨ zɔŋtɨ, á Ŋwi a kyɛgɨnɨ abyɛn azhi lá,

²⁸ ndəŋndəŋ Kristo, zɨ wa Ŋwi a nyɛ́ʼtɨ́nɨ́ táʼ nkfu tso mɨtsuʼnɨ mɨ atú a sugɨ mɨbvu mɨ ɨbɛn bə ghaʼnɨ, a ghɨ yen a nye nkfu tsa tsɨ kuʼnɨ ɨdiʼ tsi bá be a ndoŋ ɨbɛn ba bɨ tsenə ayi nɨ mɨntəm ɨma mɨtsum, nkeʼ bə mbvurɨ mbe be a sugɨ ɨbɛn a mbó mɨbvu ɨma ghe.