Ɛbal 6 - Mɨkan wu Fi

¹ A bɨgɨnə fu a mu ɨnu tsɨ biʼnɨnɨ tsɨ ɨnu tsa bɨ diʼnə mbɨ́ʼ a Kristo ngɛn nɨ mbyi nɨ ndiʼ ɨnu tsa bɨ diʼnɨ bɨləmə nɨ tsɛrə ghe. Bɨgɨnə keʼ bə ngɛn mbvurɨ ntsi tsɛʼ a ndiʼ ɨbɛn ngə́ á bɨ furɨ ndzum ɨtsa a ngɨ ɨkfurɨ ɨfaʼ abɔʼnɨ ɨ nɨŋ mɨntəm ɨma a nye Ŋwi;

² a ndiʼ ɨbɛn mbɨ́ʼ sugɨ ɨnye ndzɔ̌ŋ mbɔm tse abɔʼnɨ ngɨə ngə́ á Azhwi zə Fɛmnɨ a lo a mbó táʼ ŋwɔn ngɛn a mbó wu mɔʼɔ ntsa a ndzum ɨnyɔŋ mbó wu atú; mbɨ́ʼ nzhwemnɨ ɨbɛn a mbó nɨvwo abɔʼnɨ nkyɛgɨnɨ abyɛn a Ŋwi za a ghɨ ghɔŋ nɨnkoŋ lá.

³ A bɨgɨnə yɛʼnɨ ngɛn nɨ mbyi ɛ! Nə nɨ anu za bɨgɨnə mɨ ghɨ, mbáʼ be Ŋwi a bemtə.

⁴ Ka ndóm tse be ayi ɨwu a ngɨə á ɨbɛn bə mbəŋ mɨntəm ɨma a nye mɨbvu ɨma, ɨbɛn ba bɨ kwɛ́nə ntsi a mu nkaʼ Ŋwi, njwiʼtɨ azúm zə ghanɨ za a lonə a fɔməbvurə nkɨ nchintɨ bo bɨ ɨbɛn bə mɔʼɔ nkwarɨ Azhwi zə Fɛmnɨ ə.

⁵ Bo tsá a mu ɨnu tsa bo zɛ́nɨ́ nkɨ ngɨ, ntiʼ nji ngə́ nɨgham nɨ Ŋwi nɨ bɔŋ, nkɨ ndzɛn mɨtən ma mɨ tsinɨ a mu mbyi za Ŋwi a ghɨnɨ sáʼ lá.

⁶ Be a be ngə́ bo nyɛ́ʼ abeməntəm aza, muŋ ka ndóm tse be ayi ɨwu a ngɨə á ɨbɛn bə mbəŋ mɨntəm ɨma a nye mɨbvu ɨma, mbɨ́ʼ ngə́ bo bɨŋə nkwemtə lá a Mɔn Ŋwi atɨ abaŋnɨ-baŋnɨ, ɨ nɨŋə adɨrətú wə ɨnye asaŋəsaŋ ə.

⁷ Ŋwi a fɔ́gə́ ɨshe za mbəŋ ɨ lónə́ ɨŋwě nkúŋə́ ngěn wə mu ə. Ɨbɛn bǐ mɨdzɨ ma mɨ kwátɨ́nə́ awa atú ɨshe məziŋ ə.

⁸ Lá be a tom ngyɛn abɔʼnɨ zagəzagə atú ɨshe məzen, ɨ keʼ nɨ ɨlɨŋ tse chyɛ. Be a tú atú bɔŋ muŋ Ŋwi a mɨ lɔʼ a zɛrə, á ɨmugɨ lwɨgɨnɨ ntɔn a zɛrə ghe.

⁹ Bɨson ɨban ba ma kɔŋnɨ tsɛʼ nkan, be bɨgɨ kwɛ ŋwaʼnɨ ɨbə́ŋ mɨgham tso mətsen, ntsɛgɨ a nye bən, muŋ ka bɨgɨ tsi awɨgɨ nɨ nɨbɔgɨ nə tsɛrə ghe. Bɨgɨ zhi ngə́ nɨ tsi nɨ ɨfɔgə wu wi wa nɨ ghɨnɨ tsí nɨ wɛrə a nkfu za bɨ ghɨ loŋ awən lá.

¹⁰ Ka Ŋwi a ndiʼə ayi nkyerɨ ə. Wɛrə a mɨ keʼ lɨgɨnɨ ɨfaʼ wa nɨ fáʼnɨ́ kə akɔŋnɨ za nɨ díʼnɨ́ wəmbo a nye adzaŋ za nɨ ghánɨ́ akwatɨ nkə́ mbvúrə́ ngǎ akwatɨ a mbó ɨbɛn ba bɨŋ bo nɨŋnɨ mɨntəm ɨmən a nye Kristo lá.

¹¹ Za bɨgɨ lɔnə nɨ mɨntəm ɨmɨgɨ mɨtsum a nɨ ngə́ á ŋwɔn tsum a tɨtərɨ bən a ngěn nɨ mbyi nɨ ntəm ɨyi ɨtsum a ngɨ ɨnu tsa a ghɨnə ɨ kɔʼ kuʼ a ndwitə, taŋ á anu za nɨ tsenə nɨ mɨntəm ɨmən mɨtsum a ghɨ́ fú mbe nkənu ə.

¹² Ka bɨgɨ ndǒ awɨgɨ ngə́ á nɨ bəŋ ɨnarɨ ə. Lá bɨgɨ lǒ ngə́ á nɨ be tso ɨbɛn ba bɨ nɨŋnɨ mɨntəm ɨma a nye Kristo nkɨ ntsi nɨ nchigə, ma lan, məzen a ghɨ á nɨ kwarɨ a za Ŋwi a káʼnɨ́ lá.

Akaʼ a Ŋwi zə Tən a Ghɨ Zagɨ Fuə

¹³ A nkfu za Ŋwi a ghɨ́nɨ́ akaʼ azhi a mbó Abraʼm lá, wɛrə a kán ngə́ anu za zɨə káʼnɨ́ lá a ghɨ fuə. Tso mbáʼ wu tse ŋwɔn a sé tsi ɨwu wa a dɨ́tɨ́nɨ́ ntsa a Ŋwi lá, wɛrə a kán nɨ ɨkum ɨyi zɨmboŋ a nkfu za wɛrə a ghɨ́nɨ́ akaʼ zə tən azhi ɛ.

¹⁴ Wɛrə a sóŋ ngə́, “Ma kaʼ agho ngə́ ma mɨ fɔgɨ agho ɨ gha ɨbɛn bɨ ɨlə̌ bə ghaʼnɨ a mbó gho ghe.”

¹⁵ Abraʼm a tsí nɨ nchigə, ma lan, wɛrə a kwárɨ́ a za Ŋwi a káʼnɨ́ ayi nɨ zɛrə ghe.

¹⁶ Ɨbɛn tɨ ghɨ̌ ɨkaʼ tsɨ tən lá, bo ghɨnə a tsɛrə nɨ ɨkum ŋwɔn wa a dɨtɨnɨ ntsa awa ghe. Akan zə tən məza a kə́ mbyɛ́tə́ a kɨlɨʼ tsum a tɨtərɨ bo ghe.

¹⁷ A mbó ɨbɛn ba bɨ tsínɨ́ nɨ nkwarɨ za Ŋwi a káʼnɨ́ lá, Ŋwi a kə́ ndǒ ngə́ á tsi asaŋəsaŋ ngə́ zɨə láʼ keʼ kwebtɨ anu za zɨə a káʼnɨ́; ma lan, wɛrə a sé kaʼ tsɛʼ kaʼnɨ, wɛrə a ghɨ́ akaʼ zə tɨŋə.

¹⁸ Ɨnu tsenə tsi bá tiʼ ntsi ɨwu tsa tsɨ chinɨ keʼ kwebtɨ, Ŋwi a chi keʼ kɨ chwe ɨnu mbɨ́ʼ a tsɛrə ghe. Ma lan, bɨgɨnə ba bɨ kɨənɨ ngɛn a shwúrɨ́ Ŋwi taŋ á wɛrə a kɨnkɨ awɨgɨnə lá, bɨ wɔŋtə awɨgɨnə be tɨ́sə́n ngə́ á bɨgɨnə chwa ntsiŋə nɨ ntəm tsum ngə́ za wɛrə a káʼnɨ́ lá a ghɨ fuə.

¹⁹ Ntsiŋə nɨ ntəm tsum məziŋ ghɨə bɨgɨnə tɛm ntən tɨ nɨbɔgɨ nə tsɛrə tso abáŋ a nkyi za təkɨŋ atɨŋə a chwanɨ taŋ á kɨfɛrɨ a keʼ tyiŋ a zɛrə ngɛn nɨ zɛrə ghe. Ɨ tsi ɨ shiʼnɨ nkɨ ntsi nɨ ɨ ghɨ zagɨ yiŋə. Ntsiŋə nɨ ntəm tsum məzen ghɨ ghɨ á bɨgɨnə tsa nkon ngɛn nkuʼ a mu adiʼ zə fɛmnɨ a mu yirɨ a mu yirɨ, za bɨ kubɨnɨnɨ ntsu ɨyi nɨ abagɨ atsɛʼ zə nkwasə, adiʼ za Ŋwi a tsinɨ ɨwu a fɔməbvurə lá.

²⁰ A nkfu bɨgɨnə, Yeso a konə ngɛn a mu adiʼ məzen a mbyi bɨgɨnə, ntiʼ mbe ntumshe wu ngwi nɨnkoŋ tso Mɛkisɛdɛkɨ ə.