Ɛbal 5 - Mɨkan wu Fi

¹ A tsɔ́ʼə Ŋwi ntsɔʼə a ntumshe wu ngwi tsum a tɨtərɨ ɨbɛn ɨbyi ngə́ á faʼə a mbó Ŋwi nɨ ɨkum ɨwa a ngá mɨtsuʼnɨ mɨ atú abɔʼnɨ akáŋ a Ŋwi mbɨ́ʼ mɨbvu ɨma ghe.

² Mbáʼ ntumshe məwa a bɔrɨkɨnɨ a nye mbě ɨzhi tso ŋwɔn mɨsɔŋ a ntsu a nye mɨndóm mə ghaʼnɨ lá, məzen a ghɨə ngə́ á bɔnɨ a nye ɨbɛn ba bɨ ghɨnɨ ɨkɔkɨ ɨnu mbɨ́ʼ ngə́ bo se zhyɛ.

³ Mbɨ́ʼ ngə́ wɛrə zɨmboŋ a bɔrɨ a nye mbě ɨzhi tso ŋwɔn mɨsɔŋ a ntsu, ka wɛrə a ngǎ ayi mɨtsuʼnɨ mɨ atú ma lá tsɛʼ a sugɨ mɨbvu mɨ ɨbɛn ɨbyi, a kɨ mbe mbɨ́ʼ ɨmyi mɨbvu ə.

⁴ Ŋwɔn tse a chi keʼ tsi atuəmbəm zɨ ɨ soŋ ngə́, “Ma kɔʼsɨ atuəmbəm azan atɨ́ a mbé ntumshe wu ngwi ə.” A tsɔʼə Ŋwi ntsɔʼə a ŋwɔn a nye ntumshe wu ngwi — tsɛʼ tso mbáʼ a tsɔ́ʼnɨ́ Alon lá.

⁵ Ndəŋndəŋ, Kristo a sé kɔʼsɨ atuəmbəm azhi atɨ́ a mbé ntumshe wu ngwi ə. A báŋnɨ́ mbé Ŋwi, zɨ wa a tsɔ́ʼnɨ́ ayi ɨ soŋ wəmbo ngə́: “O nɨ Mɔn ɨghan; ɨ sɨŋə ma tiʼ Ta ɨgho ghe.”

⁶ A kɨ́ nkwiʼ soŋ adiʼ zə mɔʼɔ ngə́, “O ghɨ be ntumshe nɨnkoŋ, tso Mɛkisɛdɛkɨ ə.”

⁷ A nkfu za Yeso a tsínɨ́ atuəshe, a tsáʼtɨ́ a Ŋwi, ndɔntɨ wəmbo nɨ nji nɨzɛʼ zɨ ntən bo nkyi a ɨmɨgɨ a mbó Ŋwi, zɨ wa a chínɨ́ kwarɨ ayi a mbó nɨvwo ə. Ŋwi a zúʼ nji ɨzhi mbɨ́ʼ ngə́ wɛrə a tsí nɨ abɔgɨtɨ a nye Ŋwi nkə́ faʼə nɨ mɨku bo bɨ mbó ə.

⁸ A báʼtɨ́ mbé be Mɔn Ŋwi lá, a yɛ́ʼ ndzuʼnə ntsa a mu ndzě ngɨ́ʼ ə.

⁹ A nkfu za Ŋwi a ghɨ́nɨ́ ayi a kɔʼ ntɛm ngə́ tsáŋ lá, a tíʼ mbé adiʼ za ɨloŋ nɨnkoŋ fúnə́ ɨwu a mbó ɨbɛn ba bɨ zúʼnɨ́nə́ ayi,

¹⁰ Ŋwi a tíʼ ntsɔ́ʼ ayi a nye ntumshe wu ngwi, tso Mɛkisɛdɛkɨ ə.

Akwantɨ a mbó Ɨbɛn ba bɨ Nyɛʼnɨ Abeməntəm aza ghe

¹¹ Ɨnu tsɨ ghaʼnɨ tsi ɨwu tsa ma tsinɨ nɨ ɨ soŋə a mu anu ziŋə, lá a tsanɨ a fɨʼtə a mbó bən, mbɨ́ʼ ngə́ nɨ ghɔgɨ a ndzuʼə ɨ kɨ zhyɛ.

¹² Nɨ kwɛnə ntsi nɨ nkfu zɨ sa ɨ tiʼ be bɨdiʼ ə — lá nɨ bvurə ndǒ a ŋwɔn á kwiʼ nkwatɨ ndiʼ awən nɨ ɨnu tsɨ biʼnɨnɨ a ndzúʼ nɨgham nɨ Ŋwi ə. Nɨ bvurə nǒ nɨbə́n, mbáʼ nɨ benɨ chwáʼtɨnɨ mɨdzɨ ə;

¹³ mbɨ́ʼ ngə́ ŋwɔn tsum wa a tsinɨ nɨ ɨ no tsɛʼ nɨbə́n, a bvurɨ tɨ zhi a líʼ wa a tsinɨ ɨwu a tɨtərɨ za a kuʼnɨnɨ bo za a se kuʼnɨ, mbɨ́ʼ ngə́ a bvurɨ mɔn ə.

¹⁴ Lá mɨdzɨ mə chwaʼtɨnɨ tsi lá a mbó bɨləmə nkɨ ntsi lá a mbó ɨbɛn ba bɨ mərɨsɨnə ɨtumbəm ɨtsa a nkwátɨ́ ɨ kyɛrɨ ɨbɔŋ a nye ɨnu tsɨ tɔmnɨnɨ ə.