Ɛbal 4 - Mɨkan wu Fi

Azhwitɨ za Ɨbɛn bɨ Ŋwi Ghɨnɨ tsi nɨ zɛrə ghe

¹ Tɨtsɔŋnɨ, tso mbáʼ akaʼ a nkúŋə́ a mu adiʼ azhwitɨ za Ŋwi a ghánə́ a bvurɨnɨ ntsi ɨwu lá, á bɨgɨnə tiʼ ndə̌ ɨtú mbɨ́ʼ táʼ ŋwɔn nɨ bən a ghɨ ntsí tɨ kon ɨwu ə.

² Mbɨ́ʼ ngə́ bɨgɨnə zuʼnə Nkən wu Shiʼnɨ ndəŋndəŋ adzaŋ za bo kɨ́nɨ́ nkɨ́ ndzúʼə. Bo zúʼ nkən wa, lá ɨ sé ɨbɔŋ wu tse a mbó bo ghɨ mbɨ́ʼ ngə́ a nkfu za bo zúʼnɨ́ nkən məwa lá, bo sé a wɛrə kwarɨ nɨ abeməntəm ə.

³ A mbó bɨgɨnə ba bɨ nɨŋnɨ mɨntəm ɨmɨgɨnə a nye Ŋwi lá, bɨgɨnə kwárə́ azhwitɨ məza, za Ŋwi a káʼnɨ́ lá. A mbó ba bɨ se nɨŋ mɨntəm ɨma a nye Ŋwi, a kɨ nyáʼ mbe lá adzaŋ za Ŋwi a sóŋnɨ́ ngə́, “Ma lwí ntɔŋ, nkan ngə́: ‹Bo láʼ keʼ kon a mu abɨŋ a ɨshe za ma tsinɨ ɨ ghɨ gha azhwitɨ ɨwu a mbó bo lá!›” A báʼtɨ́ mɛtɨ ɨfaʼ ɨyi ɨ mɛtɨnɨ nchwuʼnɨ nkfu za wɛrə a káʼnɨ́ mbyi lá, wɛrə bvúrɨ́ sóŋ a məziŋ ə.

⁴ A mu Aŋwaʼnɨ a Ŋwi adiʼ zə tsɛrə, bɨ gham a zen mbɨ́ʼ njwi za ɨ kɔʼnɨ nkuʼ ɨdiʼ tsi samba ngə́: “A nye njwi za ɨ kɔ́ʼnɨ́ nkúʼ ɨdiʼ tsi samba, Ŋwi a zhwítɨ́ a mbó ɨfaʼ ɨyi ɨtsum ə.”

⁵ Bɨ bə nkɨ ngam mbɨ́ʼ ndəŋndəŋ anu məzen adiʼ zə mɔʼɔ ngə́, “Bo láʼ keʼ kon a mu abɨŋ a ɨshe za ma kyaŋtɨnɨ ngə́ á bo zhwitɨ ɨwu lá.”

⁶ Ɨbɛn ba bɨ tsánɨ́ mbyi ndzuʼ Nkən wu Shiʼnɨ mbɨ́ʼ azhwitɨ za sé kwárɨ́ azhwitɨ za, mbɨ́ʼ ngə́ bo sé nɨŋ mɨntəm ɨma a nye Nkən wu Shiʼnɨ wa. Bə mɔʼɔ bvurɨ ba bɨ ghɨnɨ kwárɨ́ a zɛrə ghe.

⁷ O zě a məzen a nye adzaŋ za mbáʼ Ŋwi a tsɔʼnɨ njwi zɨ mɔʼɔ bɨ tɔŋə nɨ, “Sɨŋə” ghe. A ndzum ɨlom tsɨ ghaʼnɨ Ŋwi a sóŋ a mu aŋwaʼnɨ azhi mbɨ́ʼ anu məzen, ntsa a ndzum Devidɨ, mbáʼ ma kwɛnə ngam mbɨ́ʼ a zɛrə ngə́: “Sɨŋə, be nɨ zuʼ nji Ŋwi, á nɨ keʼ mɨntəm ɨmən fɨŋə.”

⁸ A be be ngə́ Yoshua a lɔ́gɨ́ bə Yuda ngɛn nɨ bo adiʼ za Ŋwi a káʼnɨ́ azhwitɨ za lá muŋ, ka Ŋwi a bə nkwiʼ soŋ ayi a ndzum mbɨ́ʼ njwi zə daŋ ə.

⁹ Lá adzaŋ za a tsinɨ, Njwi Alaʼ Ŋwi, njwi azhwitɨ a mbó ɨbɛn bɨ Ŋwi kɨ mbvurɨ ntsi ɨwu a mbó bo a nkúŋə́ ɨwu ə.

¹⁰ Mbɨ́ʼ ngə́ ŋwɔn tsum wa mbáʼ a kwarɨnɨ azhwitɨ za Ŋwi a káʼnɨ́ lá, a mɨ zhwitɨ a mbó afaʼ azhi zɨmboŋ, ndəŋndəŋ adzaŋ za Ŋwi a zhwítɨ́nɨ́ a mbó azhi lá.

¹¹ Ma lan, á bɨgɨnə ghɨ atsum a nchyɛ́ nɨ azhwitɨ məza, taŋ á táʼ ŋwɔn nɨ bɨgɨnə a ghɨ́ nkeʼ sam azhwitɨ məza tso bo ba bɨ sámnɨ́ a zɛrə mbɨ́ʼ ngə́ bo sé tsi nɨ abeməntəm lá.

¹² Nɨgham nɨ Ŋwi tsi atú ntən nkə́ faʼə ghe. Nɨ tsɛgɨ ntsa a lumban ndzum tsum ə. Nɨ sóbə́ nkúŋə́ ngěn nkuʼə adiʼ wa gharɨ bo azhwi bomnkɨnə, adiʼ wa mɨkyebɨnɨ mɨ ɨnye bo nɨfɔ́m bomnkɨnə ghe. Nɨgham nɨ Ŋwi nen nɨ zhi ɨkwaʼtɨ abɔʼnɨ ɨnu tsa ntəm ŋwɔn lɔnə ghe.

¹³ Ka azúm zə tse a tsi ayi ɨwu za be bɨ lwɛʼ a mbó Ŋwi; azúm atsum za bɨ káʼnɨ́ a nɔŋ asaŋəsaŋ a ɨshi ɨmɨgɨ Ŋwi ə. A nɨ wə ɨshi mbáʼ bɨgɨnə ghɨnɨ zagɨ sóŋ adzaŋ za bɨgɨnə fáʼnə́.

Yeso a nɨ Ntumshe wu Ngwi ə

¹⁴ Tso mbáʼ bɨgɨnə tsinɨ nɨ ntumshe wu ngwi, Yeso, Mɔn Ŋwi, zɨ wa a ghɛnə adiʼ wa Ŋwi a tsinɨ ɨwu lá, á bɨgɨnə chwa anu za bɨgɨnə nɨŋnɨ mɨntəm ɨmɨgɨnə ɨwu lá, ɨ shiʼnɨ ə.

¹⁵ Mbɨ́ʼ ngə́ bɨgɨnə tsi nɨ ntumshe wu ngwi wa a kónə́ a mɨlɨŋnɨ a nye mbě ɨzɨgɨnə tso ɨbɛn bɨ mɨsɔŋ a ntsu za ɨ ghɨnɨ ɨbvu nkfu tsɨ mɔʼɔ ghe. Bɨ kwáʼnɨ́ ayi a nye mɨndóm mɨtsum ma bɨ kwaʼnɨnə awɨgɨnə, lá wɛrə a sé ɨbvu ghɨə.

¹⁶ A bɨgɨnə nkɔ́ʼtə́ a mbyɛn alaŋ a nɨfɔ a Ŋwi tɨ nɨbɔgɨ, adiʼ wa abɔŋəntəm a tsinɨ ɨwu ə. Ɨwu, bɨgɨnə mɨ kwarɨ akômɨlɨŋnɨ abɔʼnɨ abɔŋəntəm a nkwátɨ́ bɨgɨnə tsɛʼ a nyom wa bɨgɨnə lɔnə a zɛrə ghe.