Ɛbal 2 - Mɨkan wu Fi

Ŋwi a Ghá Ɨloŋ wu Wi a mbó Bɨgɨnə ghe

¹ Nə nɨ anu za mbáʼ bɨgɨnə tsinɨ nɨ ntɛgɨ ɨtú ɨtsɨgɨnə a nye nkənu za bɨgɨnə zuʼnə lá, taŋ á bɨgɨnə ghɨ nkeʼ ghənkɨ ɨ fu wə mu ə.

² Nkən wa bɨtsen bɨ ndá bɨ Ŋwi ghánɨ́ a mbó bɨta ɨbɨgɨnə bə kɔ́ʼɔ́nguʼ ɨ bé nkənu, ɨbɛn bɨtsum ba bɨ sé zɔŋ nkɨ ndzuʼnɨ anu za nkən wa ɨ sóŋnɨ́ kwárɨ́ ɨnɨŋ ngɨ́ʼ za ɨ bénɨ́ ɨza ghe.

³ Nɨ kwaʼtɨ ngə́ bɨgɨnə ghɨ lɛʼ ɨnɨŋ ngɨ́ʼ məzen lá ɨ nə́ mbáʼ be bɨgɨnə tú tɛgɨ ɨtú ɨtsɨgɨnə a nye ɨloŋ wu wi məwen le? Nkən mbɨ́ʼ ɨloŋ məwen a fóm nchwítɨ́ Maʼmbyí Yeso zɨmboŋ, ɨbɛn ba bɨ zúʼnɨ́ ɨnu tsa wɛrə a sóŋnɨ́ tíʼ ndiʼ a mbó bɨgɨ ngə́ ɨ nɨ nkənu ə.

⁴ Ŋwi a kɨ́ ndiʼ ngə́ nkən məwen ɨ bé nkənu a nye adzaŋ za wɛrə a díʼnɨ́ ɨlɨgɨ abɔʼnɨ ɨnu tsɨ tsanɨnɨ nɨ ɨnu tsɨ yerɨnɨ-yerɨnɨ tsə ghaʼnɨ ə. Wɛrə a kɨ́ mbe atɛmə-ndzě a ntsǎ a ndzum ɨdzúm tsə ghanɨ tsə Azhwi zə Fɛmnɨ tsa wɛrə a ghánɨ́ a mbó bo a nkɔŋ zɨə.

Zɨ wa a Tsagɨnɨnə Awɨgɨnə a mu Ɨloŋ ə

⁵ Ka Ŋwi a lɛn ayi bɨtsen bɨ ndá bɨ Ŋwi ngə́ á bɨ sáʼə mbyi zɨ fi za ɨ ghɨnɨ yen lá — mbyi za bɨgɨnə ghamnə mbɨ́ʼ a zɛrə lá.

⁶ Bɨ baŋnɨ ŋwaʼnɨ a mu Aŋwaʼnɨ a Ŋwi adiʼ zə tsɛrə ngə́: “O Ŋwi, ŋwɔn mɨsɔŋ a ntsu a lanɨ mbe lá ake a mbó gho wa be o kwaʼtɨnə mbɨ́ʼ ayi le? Mɔn ŋwɔn a lá ake o ngěn nchyɛ̌ ndə̌tú wə ɨnye le?

⁷ O ghɨ́ ayi a tsi a shwúrɨ́ bɨtsen bɨ ndá bɨ Ŋwi tsɛʼ a nye məkum a nkfu; o chwém ayi atú alaŋ za a tsinɨ nɨ nɨfáŋ abɔʼnɨ nkɔʼsə atɨ́ ə,

⁸ nkɨ ngɨ ayi a saʼnɨ ɨdzúm ɨtsum ə.” Aŋwaʼnɨ a Ŋwi a soŋ ngə́ Ŋwi a ghɨ́ ayi a nye “Ɨsáʼə ɨdzúm ɨtsum ə”; məzen ka a tɔʼ ayi azúm zə tsɛrə ghe. Lá tɨtsɔŋnɨ ka bɨgɨnə ndzě awɨgɨnə ayi á sáʼə ɨdzúm ɨtsum ə.

⁹ Lá bɨgɨnə zě a Yeso, zɨ wa bɨ ghɨ́nɨ́ a tsi a shwúrɨ́ bɨtsen bɨ ndá bɨ Ŋwi a nye məkum a nkfu; taŋ a ntsǎ a ndzum abɔŋəntəm a Ŋwi a nye ɨbɛn, á wɛrə a ze ngɨ́ʼ nkfo atú ŋwɔn tsum ə. Tɨtsɔŋnɨ, bɨgɨnə zě ayi a mu nɨfáŋ, ŋwɔn tsum a tiʼə nkɔʼsə ayi atɨ́ mbɨ́ʼ abə́ŋ a nɨvwo za wɛrə a kfónə́.

¹⁰ A kwɛ́ nkuʼnɨ adzaŋ za a tsinɨ nɨ mbe ngə́ á Ŋwi, zɨ wa a káʼnɨ́ nkɨ ndɛ́n azúm atsum, á lɔgɨ ngɨ́ʼ ngɨ a Yeso á kɔʼ ntɛm ngə́ tsáŋ, taŋ á wɛrə a be ntsambyi nɨfɔ a ndɔgɨ ɨbɛn ɨ kon nɨ bɛrə a mu nɨfɔ nɨ Ŋwi, taŋ á bə ghaʼnɨ tiʼ ndzɨ nɨfɔ nɨ Ŋwi ə.

¹¹ Wɛrə a sugɨ ɨbɛn a nye mɨbvu ɨma ghe. Wɛrə abɔʼnɨ ɨbɛn ba bɨ sugɨnə awa tsi nɨ táʼ Tarɨ ə. Nə nɨ anu za a ghɨnɨ Yeso a keʼ ndɨ́rə́ atú a ntɔ́ŋ bo nɨ ɨbɔmbɨma ɨbyi,

¹² ɨ sóŋə́ ngə́, “Ma mɨ soŋ anu za o ghɨnɨ a mbó ɨbɔmbɨma ɨbə; ma mɨ bontɨ agho adiʼ atsum za ɨbɛn bomnkɨnɨ ɨwu ə.”

¹³ Wɛrə a kɨ nkwiʼtɨ ɨ soŋ ngə́, “Ma mɨ nɨŋ ntəm ɨghan a nye Ŋwi ə.” Mbə nkɨ nkwiʼtɨ ngə́, “Ma wɛnə, abɔʼnɨ ɨbɔ ba Ŋwi a ghanɨ a mbó me ghe.”

¹⁴ Mbáʼ ɨbɛn ba a tɔ́ŋnə́ nɨ ɨbɔ ɨbyi, a nɨ tsɛʼ ɨbɛn bɨ mɨsɔŋ a ntsu lá, nə nɨ anu za wɛrə kɨ́nɨ́ nkɨ́ mbe ŋwɔn mɨsɔŋ taŋ ɨ tsa a ndzum nɨvwo ɨ zhwi adaʼ a ŋwɔn wa a ghɨnə ɨbɛn kfonə, mbe lá Dəbɨrɨ ə.

¹⁵ Ma lan, a chi təntɨ mɨnkɨ mɨ abuʼ mɨ ɨbɛn ba bɨ tsinɨ a mu ɨfaʼ abuʼ a mu ntsi mbyi ɨza tsum mbɨ́ʼ mbɔgɨ nɨvwo ə.

¹⁶ Mbɨ́ʼ ngə́ a lán ngə́ ka wɛrə a nkwátə́ ayi lá bɨtsen bɨ ndá bɨ Ŋwi ə. Wɛrə a kwátə́ be ɨlə̌ ndá Abraʼm ə.

¹⁷ Ma lan, nə nɨ anu za mbáʼ a tsínɨ́ nɨ mbe tso ɨbɔmbɨma ɨbyi a nye mɨndóm mɨtsum, taŋ ɨ be ntumshe wu ngwi ɨwa, wa a faʼnə tsɛʼ nɨ táʼ ntəm abɔʼnɨ akômɨlɨŋnɨ a mu afaʼ azhi a mbó Ŋwi, taŋ á Ŋwi a lɨgɨnɨ mɨbvu mɨ ɨbɛn ə.

¹⁸ Tsɛʼ tso mbáʼ wɛrə a kwɛ́nə ndzɛn ngɨ́ʼ, bɨ kɨ nkwaʼnɨ ayi lá, tɨtsɔŋnɨ a chi kwatɨ ɨbɛn ba bɨ kwaʼnɨnə awa ghe.