Ɛbal 13 - Mɨkan wu Fi

Adzaŋ za Be Bɨgɨnə Ghɨ Ɨnye Ŋwi Bɔŋənə ghe

¹ A ɨbɔmbɨma a ndzum Kristo ngěn nɨ mbyi nkɔŋnə awa bo nɨ bo ghe.

² A nɨ nkwárə́ bɨghən nɨ njwuʼ ɨtsən, mbɨ́ʼ ngə́ bə tse ghɨ́nə mə lá, ntaŋtɨ nɨghan nɨ bɨtsen bɨ ndá bɨ Ŋwi, tɨ zhyɛ.

³ Nɨ ngwáʼtɨ́ ngaŋ atsáŋ tso nɨ tsi atsáŋ bɨŋ bo ghe. A nɨ ngwáʼtɨ́ ɨbɛn ba bɨ diʼnɨ ngɨ́ʼ a mbó bo tsɛʼ tso bɨ dǐʼ ngɨ́ʼ lá a mbó bən bɨtsum ə.

⁴ A mangye bo ndóm nkɔ́ʼsə́ mɨzɔ́ʼ mɨtsum atɨ́, á achwurɨ a keʼ ɨwu be, mbɨ́ʼ ngə́ Ŋwi a ghɨ sáʼ ɨbɛn ba bɨ ghɨnɨ ɨnu ntɔrɨ ɨlɛbɨ abɔʼnɨ ba bɨ chwurɨnə ghe.

⁵ A nɨ keʼ nɨ ntɔŋ nkáb tsi, á nkáb za nɨ tsinɨ nɨ zɛrə ɨ kuʼ a mbó bən, mbɨ́ʼ ngə́ Ŋwi a soŋ ngə́, “Ma ghɨ láʼ kaʼ awən nyɛʼtɨ, ma ghɨ láʼ kaʼ awən nyɛʼnə.”

⁶ Adzaŋ məwen, bɨgɨnə chi soŋ tɨ nɨbɔgɨ ngə́, “Maʼmbyí a nɨ nkwatɨ ɨghə, ma mɨ kaʼ nɨ nɨbɔgɨ chyɛ; ŋwɔn mɨsɔŋ a chi ghɨ ɨ nə́ nɨ me le?”

⁷ Nɨ ngwáʼtə́ bɨntsagɨnɨ ɨbən, bo ba bɨ sóŋnɨ́ nɨgham nɨ Ŋwi a mbó bən; ngwáʼtə́ adzaŋ za bo tsínɨ́ ntsi mbyi ɨza abɔʼnɨ adzaŋ za bo kfónɨ́, ntiʼə nyíʼsə́ abeməntəm aza ghe.

⁸ Yeso Kristo a nɨ ndəŋndəŋ, ɨzo, ɨ sɨŋə nɨ nɨnkoŋ ə.

⁹ A nɨ keʼ nyɛʼtɨ á bɨ diʼ awən nɨ ɨbə́ŋ ɨnu tsədaŋ tsa tsɨ mɨ ghɨ á nɨ fə ndóm ɨwən; mbɨ́ʼ ngə́ a bɔŋ ngə́ á abɔŋəntəm a Ŋwi a nɨ̌ŋ mɨntəm ɨmən ntsa ndzúʼnɨ́ ntɨgə mbɨ́ʼ mɨdzɨ ə. Mbɨ́ʼ ngə́ ntɨgə mətsiŋ sé kwatɨ ɨbɛn ba bɨ zúʼnɨ́nɨ́ a tsɛrə ghe.

¹⁰ Bɨntumshe ba bɨ faʼnə a nye adiʼ za bə Yuda ghúʼsɨ́nə́ a Ŋwi ɨwu se tsi nɨ mɨtən mə tse a ndzɨ́ mɨtsuʼnɨ mɨ atú ma mə tse ma mɨ tsinɨ atú atú a mɨkuʼ azɨgɨnə ghe.

¹¹ Ntumshe wu Ngwi wu bə Yuda a lɔgə alɛm a mɨnyam nkúŋə́ ngěn nɨ zɛrə a mu Adiʼ zə Fɛmnɨ Ntsa Atsum a ngá zɛrə tso mɨtsuʼnɨ mɨ atú mɨ sugɨ mɨbvu; lá ɨkfú ɨnyam tsa bɨ lɔgɨnɨ alɛm ɨwu lá bɨ ghɛn ntɔn abyɛn balɨgɨ ə.

¹² Ma lan, Yeso a kɨ́ ndzé ngɨ́ʼ abyɛn a ntsu abuʼ ntáʼmbagə wu wi wa taŋ ɨ sugɨ ɨbɛn á bɨ fɛm a mbó mɨbvu ɨma ntsa a ndzum alɛm azhi ɛ.

¹³ Ma lan, á bɨgɨnə ghɛn nɨ mbyi nkwatɨ ayi abyɛn balɨgɨ ntiʼ nkɨ nkwarɨ adɨrətú za wɛrə a kwárɨ́nə́ ghe.

¹⁴ Mbɨ́ʼ ngə́ ɨghan atuəshe, ka bɨgɨnə tsi awɨgɨnə nɨ adiʼ zə tsinɨ ɨwu za a ghɔŋnɨ nɨnkoŋ, lá bɨgɨnə baŋnə ndǒ be ntáʼmbagə wu wi wa ɨ tsinɨ ɨ ghɨ yiŋə.

¹⁵ A bɨgɨnə tiʼ lá ntsa wə ndzum mbóntə́ a Ŋwi nkfu tsum tso ɨwɨgɨnə ndóm nga mɨtsuʼnɨ mɨ atú, lá be ngə́, məzen a tsi lá tso mɨtsuʼnɨ mɨ atú ma ɨwəŋ ntsu ghánə́ a nkfu za bɨgɨnə sóŋnə́ nɨ mɨtsu ɨmɨgɨnə ngə́ wɛrə nɨ Maʼmbyí ɛ.

¹⁶ A nɨ ngɨ̌ ɨbɔŋ nkfu tsum nkə́ ngyɛbtə ɨ bə́dzúm ba nɨ tsinɨ nɨ tsɛrə: ɨbə́ŋ mɨtsuʼnɨ mɨ atú tso məmiŋ ghɨə ɨnye Ŋwi bɔŋənə ghe.

¹⁷ A nɨ ndzúʼnɨ́ ɨbɛn ba bɨ tsagɨnɨnə a ngɨ ɨnu tsa bo sóŋnə́ ngə́ á nɨ ngɨə; mbɨ́ʼ ngə́ bo lə̌tu nɨ bɨgharɨ ɨbən tso ɨbɛn ba bo ghɨnɨ fɨʼtɨ a mbó Ŋwi adzaŋ za bo fáʼnɨ́ ɨfaʼ ɨwa ghe. Be nɨ ndzúʼnə́ awa muŋ bo mɨ faʼnɨ ɨfaʼ ɨwa nɨ nɨdorɨ; ntú lá be muŋ bo mɨ faʼnə nɨ adzə́ŋnɨ, á məzen a keʼ nɨ akwatɨ zə tsɛrə a mbó bən chyɛ.

¹⁸ A nɨ ntsaʼtə a Ŋwi atú bɨgɨ, mbɨ́ʼ ngə́ bɨgɨ zhi ɨ shiʼnɨ ngə́ ka mɨntəm ɨmɨgɨ sáʼə ayi awɨgɨ, mbɨ́ʼ ngə́ nkfu tsum bɨgɨ lǒ ngɨ ɨnu tsa tsɨ kuʼnɨnɨ ə.

¹⁹ Ma tiʼə mbuʼtɨ mbó a mbó bən nɨ ntəm ɨghə ɨtsum ngə́ á nɨ tsaʼtɨ a Ŋwi atú me taŋ á ma bə ngyaŋnɨ ngyen nkwatɨ awɨŋ ə.

Atsaʼtɨ a Ŋwi a Ndwɨgɨnə ghe

²⁰ A Ŋwi, zɨ wa a ghánɨ́ mbɔnɨ, zɨ wa a zhwémnɨ́nɨ́ a Maʼmbyí Yeso ɨwɨgɨnə a mbó nɨvwo, ntsiŋ mbyindzɨ wu ngwi, ntsa a ndzum alɛm akan zə nɨnkoŋ,

²¹ á Ŋwi a gha awən nɨ azúm atsum zə shiʼnɨ za a kuʼnɨnɨ a ngɨ za wɛrə a lɔnə ghe. A wɛrə, a ntsǎ a ndzum Yeso Kristo a ghɨ a nye bɨgɨnə a za a bɔŋnə ayi; á nɨfáŋ tsi a mbó Kristo nɨnkoŋ ə. A be lá.

Nɨgham nə Lwɨgɨnɨnə

²² Ma buʼ mbó a mbó bɨŋ ə a ɨbɔmbɨma ɨban, á nɨ zhwiʼtɨ mɨgham men ma mɨ wɔŋtɨnə awən lá nɨ nchigə, mbɨ́ʼ ngə́ aŋwaʼnɨ zen za ma ŋwaʼnɨnɨ a mbó bən lá ka a sagɨ ayi ɛ.

²³ A nɨ zhi ngə́ Timotyo mɨma ɨwɨgɨnə a funə atsáŋ ə. Be a waŋnɨ ngyen, bɨgɨ zɨ yen ndzɛn awɨŋ ə.

²⁴ A nɨ tɔŋtɨ ɨbɛn ba bɨ tsagɨnɨnə awən abɔʼnɨ ɨbɛn bɨ Ŋwi bɨtsum ə. Ɨbɔmbɨma a ndzum Kristo ba bə Itali bɨ tsaʼtə awɨŋ ə.

²⁵ A abɔŋəntəm a Ŋwi a tsi a mbó bən bɨtsum ə. A be lá.