Ɛbal 12 - Mɨkan wu Fi

Ŋwi, zɨ wa a nɨ Ta Ɨwɨgɨnə ghe

¹ Ma lan, mbáʼ bətɛmə-ndzě a ɨnɔ karɨsɨnɨ awɨgɨnə lá, á bɨgɨnə tiʼ nkɨ nyɛʼ ntasɨ tsum abɔʼnɨ ɨbvu ɨtsum wa ɨ korɨnɨ awɨgɨnə tso ŋwɔn a laʼnɨ a mu mɨndyiʼ, ntintɨ a tsɛrə ndɛn táʼ bagɨ ə. A bɨgɨnə nkɨə nɨkɨə nɨ amaŋnɨ na nɨ tsinɨ a ɨshi bɨgɨnə nɨ achigəntəm,

² ntɛgɨ ɨmɨgɨ ɨmɨgɨnə a nye Yeso, zɨ wa a biʼnɨnə abeməntəm azɨgɨnə, nkə́ nchísə́ a zɛrə a kɔʼə ntɛ́mə́ ngə́ tsáŋ lá. Zɨ wa a chígɨ́nɨ́ ntəm bɨ kwemtɨ ayi atɨ abaŋnɨ-baŋnɨ nkɨ ngwagɨnɨ adɨrətú atsum mbɨ́ʼ nɨdorɨ na nɨ kɨ́nə́ ntsiŋə ayi, a tiʼ shiʼtɨ ntsi a bagɨ abó maʼə alaŋ a nɨfɔ a Ŋwi ə.

³ A nɨ waʼtɨ a zɨ wa a chígɨ́nɨ́ ntəm a nye kɨban tsum wa ngaŋ ngɨ mɨbvu díʼnɨ́ wəmbo, taŋ á nɨ keʼ nyɛʼtɨ nkotɨ mbáŋnɨ́ ɨtsən ntiʼ nkɨ nkyɛntɨ a nɨ́ŋ mɨntəm ɨmən a nye Ŋwi ə.

⁴ A mu anyuʼnɨ azən bɨŋ bɨ ɨbvu, nɨ bvurɨ tɨ to nton awɨŋ ɨbvu nkɔʼ nkuʼ a nye ɨfɨʼ za bɨ mɨ chwirɨ alɛm azɨŋ ə.

⁵ Nɨ kɨnə nkɨ ndɨgɨnɨ ngwɔŋtə za Ŋwi a wɔŋtɨnə awən nɨ zɛrə tso ɨbɔ ɨbyi le? Wɛrə a soŋ ngə́, “Mɔn ɨghan, o koʼ lɔgɨ nchisə za Maʼmbyí a chísɨ́nə́ agho ɨwu tso ɨnu adaŋədaŋə, kə nkoʼ kɨ ntsi tɨ nkotɨ mbáŋnɨ́ ɨtso a nkfu za wɛrə a shwómnə́ agho ə.

⁶ Mbɨ́ʼ ngə́ Maʼmbyí a chísə́ lá a ŋwɔn wa wɛrə a kɔŋnɨ nkə́ nɨ̌ŋ ngɨ́ʼ lá a nye mɔn tsum wa wɛrə a lɔgɨnɨ tso mɔn ɨyi ɛ.”

⁷ A nɨ chigɨ ntəm a nye ngɨ́ʼ za nɨ zɛ́nə́ tso ngə́ a nɨ nchisə za ta ɨwən a chísɨ́nə́ awɨŋ ə. Ŋwi a tíʼtə́ awən lá tso ɨbɔ ɨbyi ɛ; mbɨ́ʼ ngə́ ka mɔn tse a tsi ayi ɨwu wa ta ɨyi a se ayi a nchísə́ ghe.

⁸ Be a be ngə́ bɨ chísə́ a ŋwɔn tsum, mbaŋnɨ nyɛʼtɨ awən, lá be ngə́ nɨ nɨ be ɨbɔ bə lɔntɨnɨ, nkeʼ ngótɨ́ ɨbɔ be.

⁹ A nkwiʼtə, bɨta ɨbɨgɨnə bɨ atuəshe wiŋ chísɨ́ awɨgɨnə lá bɨgɨnə kɨ́ ndzúʼnɨ́ awa tsɛʼ zuʼnɨnə. Bɨgɨnə mɨ keʼ baŋnɨ ndzuʼnɨ a Ta ɨwɨgɨnə a fɔməbvurə ɨ ghɛn nɨ mbyi taŋ ɨ tsi ntən nɨnkoŋ le?

¹⁰ Mbɨ́ʼ ngə́ bɨta ɨbɨgɨnə bɨ atuəshe chísɨ́ awɨgɨnə tsɛʼ a nye məkum a nkfu adzaŋ za bo zɛ́nɨ́ ngə́ a kuʼnə, lá Ta ɨwɨgɨnə a fɔməbvurə a chísə́ awɨgɨnə taŋ á bɨgɨnə tsi nɨ ɨbɔŋ, ɨ kɨ tsi nɨ nɨfɛm ɨni ɛ.

¹¹ Tɨtsɔŋnɨ, nchisə tsum za bɨ chísɨ́nə́ awɨgɨnə nɨ zɛrə ɨ fi tso ɨ zǎŋ ɨ zaŋnɨ nkeʼ awɨgɨnə a ndɛ́tə́ ghe. A nkfu ndzum, ɨbɛn ba bɨ mərɨsɨnɨ awa nɨ nchisə məziŋ ghɨ tsí nɨ mɨkyaŋnɨ mɨ mbɔnɨ ma a nɨ nchinə a ɨshi ɨmɨgɨ Ŋwi ə.

Ɨtɨgɨtɨ bo Ɨkwantɨ ə

¹² Ma lan, a nɨ shintɨ mbó ɨmən ma mɨ bɔrɨnɨ ntiʼə ndzə́nkə́ nkɨ ngɨ á ɨbɔrɨkɨ mɨkwiʼtɨ ɨmɨŋ təntə.

¹³ A nɨ ngyiŋə tsɛʼ a nye ɨbɔʼ tsa tsɨ chinɨnɨ taŋ á bɨ keʼ bɛʼ aku za a nɨ tə́ngórə́kuʼ lá mbaŋnɨ shiŋ a zɛrə á shwetə.

¹⁴ A nɨ zagɨ ndzɛn ngə́ mbɔnɨ tsi a tɨtərɨ ɨbɛn bɨtsum, á ŋwɔn tsum a kɨ ntsi nɨ ntsi mbyi zɨ fɛmnɨ ə. Be ntsi mbyi zɨ fɛmnɨ zen ɨ tú be muŋ kə́ tsɛʼ táʼ ŋwɔn nɨ bən a ghɨ keʼ ɨshi Maʼmbyí ze.

¹⁵ A nɨ zagɨ ndzɛn ngə́ ŋwɔn tsum a tɨtərɨ bən a kwarɨ abɔŋəntəm a Ŋwi; á ŋwɔn tse a tɨtərɨ bən a keʼ tsi tso atɨ a ndyíʼ za a tomnɨ taŋ ɨ bvugɨ ndum, ɨ shwiʼ a bə ghaʼnɨ ə.

¹⁶ A ŋwɔn tse a tɨtərɨ bən keʼ tsi tso Esao wa a bénɨ́ ŋwɔn ntɔrɨ ɨlɛbɨ, nkɨ mbe wa a sé nɨ́ŋ ntəm ɨyi a nye Ŋwi, wa a kɨ́nɨ́ nkɨ́ fén a za a tsínɨ́ nɨ mbé azhi tso ntsambyi mɔn a mbó azɔŋəndzum azhi atú táʼ akáŋ a mɨdzɨ lá.

¹⁷ Mbɨ́ʼ ngə́ nɨ zhi ngə́ a nkfu ndzum, a nkfu za wɛrə a kɨ́nə́ ndǒ ɨ bə kwarɨ ɨfɔgə məza, bɨ tón a zɛrə wəmbo mbɨ́ʼ ngə́ wɛrə a sé nɨ nkfu tsi a mbəŋ ntəm ɨyi a nye mɨbvu ɨmyi, le buŋ wɛrə a shwáʼ a zɛrə nɨ nkyi a ɨmɨgɨ zɨə.

¹⁸ A nɨ waʼtɨ ngə́ adiʼ za nɨ tsinɨ ɨwu tɨtsɔŋnɨ lá, nɨ bvurɨ tɨ yen ɨ fatɨ a za nɨ chinɨ mɔmtɨ, mbe lá Mbám Sainai za ɨ kɨ́nə́ nɨ ndwa ɨmugɨ, nɨ bvurɨ tɨ yen ɨ fatɨ ndzumnɨ abɔʼnɨ ndzumnɨ za ɨ fɨ́ŋnə́ ngə́ tsɨ́ŋ abɔʼnɨ kɨfɛrɨ wu ntɨŋ ə.

¹⁹ Nɨ bvurɨ tɨ zuʼ nji ntaŋ abɔʼnɨ nji zɨ tse za ɨnu tsa ɨ sóŋnɨ́, tsɨ ghɨ́ ɨbɛn ba bɨ zúʼnɨ́ a zɛrə tiʼə mbuʼtɨ mbó ngə́ á bɨ keʼ ɨdzaŋ mɨnkən tso mətsen a mbó bo bə nkwiʼ nchwitə.

²⁰ Mbɨ́ʼ ngə́ bo kɨ chi keʼ bem ntɨgə za bɨ ghánɨ́ ngə́, “Be a kwɛ mbe tsɛʼ ɨnyam mɨbaʼ za ɨ mɔmtɨnɨ mbám za, bɨ tsi nɨ ntumtɨ zɛrə nɨ mɨngɔʼ á ɨ kfoə.”

²¹ Tsɛʼ a nkənu, azúm za Mǒse a zɛ́nɨ́ a ghɨ́ wɛrə a tsi nɨ nɨbɔgɨ be tɨ́sə́n ntiʼ soŋ ngə́, “Nɨbɔgɨ ghɨ ma bɨŋnɨnə ghe.”

²² Lá nɨ yenə nkuʼ a Mbám Zayɔn, ntáʼmbagə wu wi wu Ŋwi, zɨ wa a tsinɨ ntən, a Yerosalɛm wa a tsinɨ a fɔməbvurə ntsi nɨ ɨtsendá Ŋwi tsa bɨ chinɨ keʼ kwaʼ tsa tsɨ tsinɨ a ngǒtə nɨdorɨ ə.

²³ Nɨ yenə nkuʼ a nye ngǒtə za ɨ fi be ngǒtə bɨtsabɨmbyi bɨ ɨbɔ ba bɨ ŋwaʼnɨnɨ mɨkum ɨma a fɔməbvurə, a nye tabyɛn wa a nɨ Ŋwi ŋwɔn tsum, a nye ɨzhwi ɨbɛn ba bɨ chinɨnɨ, bɨ ghɨ bo kɔʼ ntɛm ngə́ tsáŋ ə.

²⁴ Nɨ yenə nkuʼ a nye Yeso, ŋwɔn wa a tsinɨ a tɨtərɨ ɨbɛn bɨ Ŋwi nɨ akan zə fi za, a nye alɛm za bɨ myígɨ́tɨ́nɨ́, za a ghamnə nɨ abɔŋəntəm za a tsanɨ abɔŋəntəm za alɛm Abɛrɨ a ghamnə nɨ zɛrə lá.

²⁵ A nɨ zɛn ngə́ nɨ se a zɨ wa a ghamnə lá tuŋə. Mbɨ́ʼ ngə́, be a be ngə́ bo sé lɛʼ a zɨ wa a kwántɨ́nɨ́ awa atuəshe, bɨgɨnə ghɨ keʼ byi njwəŋtɨ a ndɛ́ʼ zɨ wa a kwantɨnə awɨgɨnə a fɔməbvurə ghe.

²⁶ A nkfu məwa, nji ɨzhi ɨ chíʼtɨ́ atuəshe; lá tɨtsɔŋnɨ wɛrə a kaʼnə awɨgɨnə ngə́, “Ma mɨ keʼ bə nkwiʼ nchiʼtɨ tsɛʼ atuəshe, ma mɨ kɨ chiʼtɨ fɔməbvurə ghe.”

²⁷ Atu a nɨgham zɛnə ngə́, “kwiʼ,” diʼ asaŋəsaŋ ngə́ ɨdzúm tsa bɨ kaʼnɨ, bɨ mɨ chiʼtɨ a tsɛrə ɨ chwɛʼ, taŋ á tsa bɨ chinɨ keʼ chiʼtɨ á tsɨ ghɔŋə.

²⁸ Ma lan, á bɨgɨnə gha a mɨya ngə́ bɨgɨnə kwarɨnə nɨfɔ na bɨ chinɨ keʼ chiʼtə. Adzaŋ məwen, á bɨgɨnə ntiʼə ngúʼsə́ a Ŋwi a nye ndóm wa Ŋwi a kɔŋnɨ, a nye ndóm wa ɨ kɔ́ʼsɨ́nə́ a Ŋwi atɨ́ abɔʼnɨ abɔgɨtɨ,

²⁹ mbɨ́ʼ ngə́, tsɛʼ a nkənu Ŋwi ɨwɨgɨnə a tsi lá tso ɨmugɨ wa ɨ tsənkɨnə ghe.