Ɛbal 11 - Mɨkan wu Fi

Abeməntəm ə

¹ A nchyɛ́ nɨ abeməntəm, a nɨ nji ɨ shiʼnɨ ngə́ ɨnu tsa bɨgɨnə tsenə nɨ ntəm tsum tsɨ tsi ɨwu, ɨ keʼ nkə́ mə́ŋnə́ ngə́ tsa o so ndzě tsɨ tsi ɨwu ə.

² A bé mbɨ́ʼ abeməntəm mbáʼ Ŋwi a bémtɨ́nɨ́ bə kɔ́ʼɔ́nguʼ ə.

³ A ntsǎ a ndzum abeməntəm bɨgɨnə zuʼ nkɨ nji ngə́ bɨ káʼ mbyi-mbyi tsum lá a ndzum nɨgham nɨ Ŋwi ə. Adzaŋ məwen, ɨdzúm tsa bɨgɨnə zɛ́nə́ bɨ káʼ a tsɛrə lá a nye ɨdzúm tsa bɨ sě ndzě ghe.

⁴ A ndzum abeməntəm, Abɛrɨ a ghá mɨtsuʼnɨ mɨ atú ma mɨ bɔ́ŋnɨ́ ngɛn nɨ mbyi ntsa a mə Kain ə. A ndzum abeməntəm azhi, Ŋwi a bémtɨ́ ngə́ wɛrə a bé ŋwɔn wa a chínɨ́nɨ́, mbɨ́ʼ ngə́ Ŋwi zɨmboŋ a bémtɨ́ azúm zə ghanɨ zə Abɛrɨ ə. Abɛrɨ a baʼtɨ nkfo ɨ kfonɨ lá, a ndzum abeməntəm azhi, wɛrə a bvurə ngamə ghe.

⁵ A ndzum abeməntəm, bɨ lɔ́gɨ́ a Ɛnɔkɨ nkɔ́ʼ nɨ wɛrə a fɔməbvurə taŋ á keʼ nɨvwo ze. Bɨ sé ayi zɛn mbɨ́ʼ ngə́ Ŋwi a lɔ́gɨ́ ayi ɛ. Aŋwaʼnɨ a Ŋwi a soŋ ngə́ bɔŋ á bɨ ndɔgə a Ɛnɔkɨ, wɛrə a ghɨ́nə ɨnye Ŋwi bɔŋə.

⁶ Tɨ abeməntəm o chi koʼ ghɨ á ɨnye Ŋwi bɔŋə. Mbɨ́ʼ ngə́ ŋwɔn tsum wa a ghɛnə a mbó Ŋwi, a tsi nɨ ɨ nɨŋə a mu ntəm zɨ ngə́ Ŋwi a tsi ɨwu nkə́ nkyǎŋ ɨbɛn ba bɨ lɔnə ayi ɛ.

⁷ A ndzum abeməntəm, Nua a tɛ́gɨ́ atú azhi a nye akwantɨ a Ŋwi mbɨ́ʼ ɨnu tsa tsɨ ghɨnɨ fu, ɨnu tsa a kɨ chínɨ́ keʼ ze. Wɛrə a zúʼnɨ́ a Ŋwi nkɔm abáŋ a nkyi a ndoŋ ngwəgɨ ɨzhi ɨwu ə. Adzaŋ məwen, Ŋwi a tsə́nkɨ́ atuəshe ntiʼ ngɨ Nua a kwarɨ nchinə za ɨ lǒnə be a mbó Ŋwi ntsa a ndzum abeməntəm ə.

⁸ A ndzum abeməntəm, Abraʼm a zúʼnɨ́ a Ŋwi a nkfu za Ŋwi a tɔ́ŋnɨ́ ayi ngə́ á fu ngɛn a nye adiʼ za zɨə mɨ gha wəmbo á tiʼ azhi ɛ. A fú ngɛn nkeʼ zhi adiʼ za zɨə kɨ́nə́ ngěn ɨwu ə.

⁹ A ndzum abeməntəm, wɛrə a tsí a mu adiʼ za Ŋwi a káʼnɨ́ ayi ɨwu tso ngyen-yenɨ ə. Wɛrə a kə́ nchyɛ̌ a mu bɨkfúʼə tso Isak bo Yakɔb, ɨbɛn ba Ŋwi a ghɨ́nɨ́ nkɨ́ nkaʼ awa nɨ adiʼ məza.

¹⁰ Mbɨ́ʼ ngə́ Abraʼm a kə́ ntsiŋə a nchyɛ́ a mu ntáʼmbagə wu wi wa ɨ tsínɨ́ nɨ ndá tsa tsɨ tsínɨ́ nɨ ɨtsé ndá tsə nɨnkoŋ tsa Ŋwi a kwɛ́nə nkyaŋtɨ nkorɨ ndɛn ɨwu ə.

¹¹ A ndzum abeməntəm, Sara zɨmboŋ a kwárɨ́ mɨtən a ntɛ́mə́ nɨ mɔn, le buŋ ɨfɨʼ tsánə a mbó zɨ a ntɛ́mə́ nɨ mɔn mbɨ́ʼ ngə́ wɛrə a zhí ɨ shiʼnɨ ngə́ Ŋwi a lě akaʼ azhi ɛ.

¹² Ma lan, ɨ lo a mbó táʼ ŋwɔn wa a tíʼnɨ́ a ntsu nɨvwo mbáʼ be a yen mbe anu mbɨ́ʼ njwi mɔn, Ŋwi a ghɨ́ ngwəgɨ mɔn ŋwɔn ɨ fu a mbó zɨ ngaʼ tso mɨndzɔŋ a nɨkaŋ nkɨ ngaʼ tso awaŋə za a nɔŋnɨ a ngə́rɨ́ nkyi o chi koʼ a zɛrə kwaʼə.

¹³ A ndzum abeməntəm, bə kɔ́ʼɔ́nguʼ ben bɨtsum kfókɨ́ tɨgha bo kwárɨ́ akaʼ za Ŋwi a káʼnɨ́ awa nɨ zɛrə ghe. Lá bo zɛ́n a tsɛrə nəghagɨ nkɨ ndorɨtə. Bo tíʼ mbém ngə́ bo nɨ bɨghən bɨ atuəshe nkɨ mbe bɨngyen-yenɨ bɨ atuəshe ə.

¹⁴ Mbɨ́ʼ ngə́ ɨbɛn ba bɨ ghamnə adzaŋ məwen, bo ghɨ a lán ngə́ bo lǒ aza alaʼ ə.

¹⁵ Bo sě ngwíʼtə́ mbɨ́ʼ alaʼ za bo nyɛ́ʼtɨ́nɨ́ lá, mbɨ́ʼ ngə́ a be be ngə́ bo kə́ ngwíʼtə́ adiʼ za bo nyɛ́ʼtɨ́nɨ́ lá muŋ bo tsí nɨ abárɨ́ ɨ bə bən ɨ ghɛn ɨwu ə.

¹⁶ Lá, adzaŋ za a tsinɨ, bo lǒ be alaʼ za a bɔŋnɨ ntsa a məza, mbe lá za a tsinɨ a fɔməbvurə ghe. Ma lan, ka Ŋwi a ndɨrə ayi atú ngə́ be bo tɔŋ ayi ngə́ Ŋwi ɨwa, mbɨ́ʼ ngə́ wɛrə a kyaŋtɨnə ntáʼmbagə wu wi a mbó bo ghe.

¹⁷ A ndzum abeməntəm, Abraʼm a ghá a mɔn ɨyi Isak tso mɨtsuʼnɨ mɨ atú a nkfu za bɨ zhwə́ŋtɨ́nɨ́ a zɨ Abraʼm ə. Abraʼm, zɨ wa Ŋwi a káʼnɨ́ ayi a sé baŋnɨ nton a ngá mɔn ɨyi məwen wa a núnɨ́ zɨzɨ tso mɨtsuʼnɨ mɨ atú ə.

¹⁸ Ŋwi a ghám a mbó zɨ ɨ soŋ ngə́, “A ntsǎ a ndzum Isak, o ghɨ tsi nɨ ɨbɔ bɨ ɨlə̌ ɨbo ba ma káʼnɨ́ agho nɨ bɛrə lá.”

¹⁹ Abraʼm a kwáʼtɨ́ ngə́ Ŋwi a kɨ chi zhwemnɨ a ŋwɔn mɨsɔŋ a ntsu a mbó nɨvwo — adzaŋ məwen, adzaŋ za bo kɨ́nə́ sóŋə́, wɛrə a bə́ nkwárɨ́ a mɔn ɨyi wədiʼ a mbó nɨvwo ə.

²⁰ A ndzum abeməntəm, Isak a káʼ ɨfɔgə wa ɨ ghɨnɨ yen a mbó Yakɔb bo Esao ghe.

²¹ A ndzum abeməntəm, Yakɔb a fɔ́gɨ́ a mɔn Yosɛb tsum a nkfu za wɛrə a tíʼnɨ́ a ntsu nɨvwo ə. Wɛrə a kfúʼnɨ́ atú mbaŋ ɨzhi nguʼsɨ a Ŋwi ə.

²² A ndzum abeməntəm, Yosɛb a sóŋ ngə́ bə Izrai láʼ fú awa Alaʼ Gyibto ghe. Wɛrə a kə́ soŋə a məzen lá mbáʼ wɛrə a tíʼnɨ́ a ntsu nɨvwo ə. Wɛrə a tɨ́gɨ́ adzaŋ za bɨ mɨ ghɨ nɨ akfú azhi ɛ.

²³ A ndzum abeməntəm, bɨta bɨ Mǒse lwɛ́ʼ ayi atú bɨsaŋ bi bɨtárə́ a nkfu za bɨ jwínɨ́ ayi ɛ. Bo zɛ́n ngə́ mɔn wa a bɔ́ŋ tɨsɨŋə; ma lan, bo sé nɨ nɨbɔgɨ tsi mbɨ́ʼ ntɨgə Ɨfɔ ghe.

²⁴ A ndzum abeməntəm, a nkfu za Mǒse a kwínə, wɛrə a tón ayi ngə́ zɨə sé mɔn mɔn Farao wu mangye be.

²⁵ Wɛrə a báŋnɨ́ ntsɔ́ʼ ngə́ zɨə mɨ tsi bo bɨ ɨbɛn bɨ Ŋwi ɨ zěnɨ ngɨ́ʼ bo bo ntsa a ntuʼə a mu ɨdzúm tsə ləmnɨ tsa ɨbvu yenə nɨ tsɛrə a nye məkum a nkfu ə.

²⁶ Wɛrə a kwáʼtɨ́ ngə́ a nkwárɨ́ ndzɔm mbɨ́ʼ atú a zɨ wa bə Izrai kɨ́nə́ ntsiŋə, a bé afuʼ zə wi ntsatɨ afuʼ Alaʼ Gyibto atsum mbɨ́ʼ ngə́ wɛrə a kə́ ntsiŋə akyaŋə za a láʼ yiŋə.

²⁷ A ndzum abeməntəm, Mǒse a nyɛ́ʼtɨ́ Alaʼ Gyibto nkeʼ mbɔ́gə́ a mɨlwintɔŋ ɨfɔ alaʼ məza; mbɨ́ʼ ngə́ wɛrə a chígɨ́ ntəm tsɛʼ tso ngə́ wɛrə a kə́ ndzě a Ŋwi, zɨ wa bɨ se nɨ ɨmɨgɨ a ndzě lá.

²⁸ A ndzum abeməntəm, wɛrə a bíʼnɨ́ nɨdorɨ nɨ Tsa-yɛʼnɨ nkɨ ndzɔʼtɨ alɛm nɨ mɨntsu mɨ ndá taŋ á Ntsendá Ŋwi zɨ Nɨvwo keʼ bɨtsabɨmbyi bɨ ɨbɔ mbáŋnɨ́ bə Izrai mɔmtə.

²⁹ A ndzum abeməntəm, bə Izrai tóm a Rɛd Si tso ngə́ bo kə́ ntɛ́mə́ atú ɨshe zɨ ndzobɨnə. Lá a nkfu za bə Gyibto zhwə́ŋtɨ́nɨ́ a ngɨ ndəŋndəŋ anu, nkyi wa ghɨ́ bo shwimnkɨ nkfokə.

³⁰ A ndzum abeməntəm, mɨnká mɨ Yeriko bɛ́ʼkɨ́ ngvo a tɨshe a nkfu za bə Izrai tɛ́mkɨ́nɨ́ nkárɨ́sɨ́ a mɛrə atú njwi tsi samba ghe.

³¹ A ndzum abeməntəm, Raʼb wa a bénɨ́ mangye akwarɨ a sé bo bɨ ɨbɛn ba bɨ tə́nɨ́ atú a mbó Ŋwi kfokɨ mbɨ́ʼ ngə́ wɛrə a kwárɨ́ bɨchwerɨ bə Izrai ba ɨ shiʼnɨ ə.

³² Ma bə kwiʼ soŋ lá ngə́ ke le? Ka nkfu tsi ayi a mbó me a ngamə mbɨ́ʼ a Gidyɔn, Barakɨ, Samsɨn, Jɛbta, Devidɨ, Samwɛrɨ abɔʼnɨ ntóm Ŋwi,

³³ bo nɨ ɨbɛn ba a ntsǎ a ndzum abeməntəm, a bɨ tónɨ́ ɨtóm ɨtóm nghaʼ awa, ɨsaʼ ɨbɛn tɨ nkyérɨ́, nkwarɨ akaʼ a Ŋwi, nchwubtɨ mɨntsu mɨ ɨfon,

³⁴ mbyɛtɨ ndwa ɨmugɨ, ndɛʼ bɨ keʼ awa nɨ lumban zhwitɨ, mbəŋ a nye bə bɔrɨkɨnɨ ntiʼ mbe ɨdzɔŋ, ntiʼ mbe ɨdzɔŋ a ntso nkɨ nghaʼ bɨgwe bɨ ɨtóm tsədaŋ bɨ kɨəkə.

³⁵ A ndzum abeməntəm, bəngye bə́ nkwárɨ́ ɨbɛn ɨba ba bɨ zhwémnɨ́nɨ́ awa a mbó nɨvwo ə. Bə mɔʼɔ tón awa a fuə atsáŋ, bɨ lə́ŋ awa nɨ ngwan bɨ kfokɨ, taŋ ɨ ghɨ zhwemnɨ tiʼ tsi a mu ntsi ntən za ɨ bɔŋnɨ ngɛn nɨ mbyi lá.

³⁶ Bɨ zɔ́m a bə mɔʼɔ nkɨ shwom awa ghe. Bɨ kórɨ́ a bə mɔʼɔ nɨ mɨnkɨ mɨ atɨŋə nkɨ nɨŋ awa atsáŋ ə.

³⁷ Bɨ túmtɨ́ a bə mɔʼɔ nɨ mɨngɔʼ, nchɛtɨ a bə mɔʼɔ nɨ seke ɨkum tsi bá, njwitɨ a bə mɔʼɔ nɨ lumban; bə mɔʼɔ wə́gɨ́ ngobɨ mbyindzɨ abɔʼnɨ tsə mbyindɔ́ŋ tso ɨtsɛʼ nkárə́ nɨ tsɛrə; mbe ɨfúm be tɨ́sə́n, bɨ ghagɨnə awa nkə́ ndǐʼ ngɨ́ʼ nɨ bo ghe.

³⁸ A mbó məben ɨdzúm atuəshe wiŋ sé azúm zə tsɛrə be. Bo kə́ númə́ ntsɨ́ŋə́ a mu mɨkɨghonɨ abɔʼnɨ ɨtú mɨntáʼ, nchyɛ̌ a mu mɨfúʼ a shwúrɨ́ mɨngɔʼ abɔʼnɨ mɨfúʼ a mbyi ɨshe, tso ɨbɛn ba bɨ kɨənɨ ngɨ́ʼ ə.

³⁹ Bɨ kə́ ngǎm ɨ shiʼnɨ mbɨ́ʼ abeməntəm aza, le buŋ bo sé azúm za Ŋwi a káʼnɨ́ awa nɨ zɛrə kwarɨ,

⁴⁰ mbɨ́ʼ ngə́ Ŋwi a kyáŋtɨ́ a za a bɔŋnɨ ngɛn nɨ mbyi a mbó bɨgɨnə ghe. Nə nɨ mbɨ́ʼ ngə́ Ŋwi a mɨ ghɨ á bo kɔʼ ntɛm ngə́ tsáŋ tsɛʼ a nkfu za bɨgɨnə bo tsinə.