Galesha 6 - Mɨkan wu Fi

A Bɨgɨnə Nkwátɨ́ Ngɨ́ʼ Ŋwɔn nɨ Ŋwɔn ə

¹ Ɨbɔmbɨma ɨban, be bən bə tse chwa a ŋwɔn tse wa a fanɨ anu zə tse, bən ba Azhwi a Ŋwi a tsɨŋnɨnɨ ntsi mbyi ɨzən tsi nɨ nchisɨ zɨə; lá nɨ tsi nɨ ɨ zagɨ ghɨ mə lan a nye ndómnji wu bɔnɨnə. A nɨ kɨ ntɛgɨ nɨdɨgɨ a nye ɨtumbəm ɨtsən, taŋ á bɨ keʼ awən kɨ nkwaʼnə.

² A nɨ nkwátɨ́ ngɨ́ʼ a nye ŋwɔn nɨ ŋwɔn ə. Adzaŋ məwen, nɨ mɨ zúʼnɨ́nə́ a nyɔngɔŋ Kristo ghe.

³ Be ŋwɔn tse a kwaʼtɨ ngə́ zɨə nɨ ŋwɔn tse wu ndɨtɨnɨ, mbáʼ tsɛʼ nkan ka a be ayi ŋwɔn tse wu ndɨtɨnɨ, muŋ a támtə́ lá atuəmbəm azhi ɛ.

⁴ A ŋwɔn tsum a lentɨ mbɔm ngɨnɨ mɨnu ɨzhi zɨmboŋ ə. Be ɨ bɔŋ, muŋ o chi tiʼ ŋuʼ ɨnye mbɨ́ʼ anu za o ghɨnɨ gho mboŋ, tɨgha o fɨʼnɨ a zɛrə bo anu za ŋwɔn daŋ a ghɨnə.

⁵ Mbɨ́ʼ ngə́ ŋwɔn tsum a tɨtərɨ bɨgɨnə a tsi nɨ ɨzhi ngɨ́ʼ za a zɛ́nə́ ghe.

⁶ Ɨbɛn ba bɨ diʼnə awa nɨ nkən mbɨ́ʼ a Kristo tsi nɨ ngyɛbtɨ ɨdzúm tsɨ shiʼnɨ ɨtsum tsa bo tsinɨ nɨ tsɛrə bo bɨ ndiʼ aŋwaʼnɨ ɨwa ghe.

⁷ A nɨ keʼ ɨtumbəm ɨtsən tamtə; ŋwɔn tse a chi keʼ a Ŋwi werə. Ɨbɛn ghɨ fuʼ tsɛʼ ndəŋndəŋ azúm za bo bínə́.

⁸ Be bo bi a mu ɨshwom ɨdzúm tsa mbəmnye ɨ lɔnə, ɨwu bo mɨ fuʼ nɨvwo; be bo bi a mu ɨshwom Azhwi a Ŋwi, za bo mɨ fuʼ ndo a mbó Azhwi a Ŋwi a mɨ be ntsi ntən nɨnkoŋ ə.

⁹ Ma lan, á bɨgɨnə keʼ kán a ngɨ ɨnu tsɨ shiʼnɨ; mbɨ́ʼ ngə́ be bɨgɨnə tú kyɛntɨ a ngɨ ɨnu tsɨ shiʼnɨ, muŋ nkfu ghɨ yen za bɨgɨnə ghɨ fuʼ a za bɨgɨnə bínə́.

¹⁰ Ma lan, nkfu tsum za bɨgɨnə tsinɨ nɨ abárɨ́, á bɨgɨnə ghɨ ɨbɔŋ a mbó ŋwɔn tsum, tɨ́sə́n tɨ́sə́n a mbó bə ngwəgɨ ɨzɨgɨnə a mu abeməntəm ə.

Akwantɨ a Ndwɨgɨnə abɔʼnɨ Atɔ́ŋtɨ ə

¹¹ A nɨ ze adzaŋ za ɨkugɨ tsiŋ fankɨnɨ mbáʼ ma ŋwaʼnɨnə tɨtsɔŋnɨ a mbó bən nɨ abó azan me mboŋ ə!

¹² Ɨbɛn ba bɨ zhwə́ŋtɨ́nə́ a nyəm bən ngə́ á bɨ tsəŋ ɨlagɨ ɨtsɨŋ lá ɨbɛn ba bɨ lɔnɨ ŋuʼ ɨnye ɨ kɨ tɛrɨ mbɨ́ʼ ɨnu abyɛn abyɛn ə. Lá bo ghɨə mə lan lá tsɛʼ taŋ á bɨ chi keʼ awa dɨgɨ mbɨ́ʼ ngə́ bo sǒŋ nkən wu shiʼnɨ mbɨ́ʼ nɨvwo nɨ Kristo atɨ abaŋnɨ-baŋnɨ ə.

¹³ Tsɛʼ ɨbɛn ba bɨ tsəŋnɨ ɨlagɨ se a Nyɔngɔŋ Mǒse a ndzúʼnə́ ghe. Bo lǒ ngə́ á bɨ tsəŋ ɨlagɨ ɨtsən lá taŋ á bo chi tiʼ tɛrɨ ngə́ nɨ bem ngɨ anu a mbəmnye məziŋ ə.

¹⁴ Lá a mbó me, ma mɨ tɛrɨ tsɛʼ mbɨ́ʼ ngə́ Maʼmbyí Yeso Kristo ɨwɨgɨnə a kfó atɨ abaŋnɨ-baŋnɨ lá a ndoŋ me ghe. Mbɨ́ʼ ngə́ a ntsǎ a ndzum abaŋnɨ-baŋnɨ azhi, ɨnu atuəshe wiŋ tsi tso tsɨ kfo mbáʼ be bɨ sóŋə́ lá anu mbɨ́ʼ ɨnu atuəshe a mbó me, ma kɨ ntsi tso ma kfo mbáʼ be bɨ sóŋə́ lá anu mbɨ́ʼ ɨnu atuəshe.

¹⁵ Ka líʼ a tsi ayi ɨwu ngə́ ŋwɔn a tsəŋ alagɨ azhi kə nkeʼ tsəŋə; líʼ wa a tsinɨ ɨwu a nɨ ngə́ á ŋwɔn a be azúm zə kaʼnɨ zə fi ə.

¹⁶ A mbó ɨbɛn ba bɨ zɔŋnɨ mbɔm məzen a mu ntsi mbyi ɨza, á mbɔnɨ abɔʼnɨ mɨlɨŋnɨ tsi a mbó bo ghe — a mbó bo abɔʼnɨ ɨbɛn bɨ Ŋwi bɨtsum ə!

¹⁷ A ndwɨgɨnə: á ŋwɔn tse a keʼ kwiʼ nga ngɨ́ʼ zɨ tsɛrə a mbó me, mbɨ́ʼ ngə́ ɨlɨgɨ tsa ma tsinɨ nɨ tsɛrə a mbəmnye me diʼ ngə́ ma nɨ abuʼ a Yeso ghe.

¹⁸ Ɨbɔmbɨma ɨban, á abɔŋəntəm a Maʼmbyí Yeso Kristo ɨwɨgɨnə a tsi a mbó bən bɨtsum ə. A be lá.