Galesha 4 - Mɨkan wu Fi

¹ Anu za ma sóŋnə́ tɨtsɔŋnɨ lá nɨ ngə́, mɔn mbáŋnɨ́, zɨ wa a ghɨ tsí nɨ ɨdzúm ta ɨyi, bɨ báʼtə́ ntíʼtə́ ayi ɨ tiʼtɨnɨ tso abuʼ mbáʼ a bvurɨnɨ wu mbɔrɨ lá, a lanɨ ntsi zɨ ntsi nɨ ɨdzúm ɨtsum ə.

² A nkfu za a bvurɨnɨ wu mbɔrɨ, ɨbɛn tsi ɨwu ba bɨ lánɨ́ atú wə ɨnye nkə́ ndə́ŋtɨ́ ɨnu ɨchi ɨ kɔʼ kuʼ nkfu za ta ɨyi a lɛnə.

³ Ndəŋndəŋ, bɨgɨnə bɨtsum yén mbé ɨbuʼ ɨzhwi tsa tsɨ sáʼnɨ́ mbyi-mbyi tsum bɔŋ ɨ ghɨ kuʼ nkfu wa bɨgɨnə kwínə́.

⁴ Lá ngótɨ́ nkfu ghɨnə ngyén, Ŋwi a tsagɨ a Mɔn ɨyi ɛ. A jwí mangye njwi ayi, wɛrə nkɨ nkwi a shwúrɨ́ Nyɔngɔŋ bə Yuda,

⁵ a ndzúŋ atú ɨbɛn ba bɨ tsínɨ́ a shwúrɨ́ Nyɔngɔŋ Mǒse, taŋ á bɨgɨnə chi be ɨbɔ bɨ Ŋwi ə.

⁶ A ndiʼə ngə́ nɨ nɨ ɨbɔ bɨ Ŋwi, Ŋwi a tságɨ́ azhwi a Mɔn ɨyi a mu mɨntəm ɨmɨgɨnə, Azhwi za a búgɨ́nə́ nɨ nji zɨ ntən ngə́, “Tarɨ, Ta ɨghan” lá.

⁷ Ma lan, ka nɨ bə́ mbvurɨ awən ɨbuʼ, nɨ tiʼ be ɨbɔ ə. Mbáʼ nɨ tiʼnɨ ɨbɔ ɨbyi lá, Ŋwi a ghɨ ghá ɨdzúm tsa tsɨ nɨ tsɨ ɨbɔ ɨbyi a mbó bɨŋ ə.

Anu za a Kɨ́nə́ Ngágɨ́ Ntəm Baolo mbɨ́ʼ bə Galesha ghe

⁸ A bé a mbyi lá nɨ keʼ a Ŋwi zhyɛ, ma lan, nɨ tíʼ mbé ɨbuʼ a mbó ɨdzúm tsɨ kaʼnɨ tsa tsɨ se bɨŋwi be.

⁹ Lá tɨtsɔŋnɨ wa nɨ zhinɨ a Ŋwi lá — kə á ma soŋ ngə́, tɨtsɔŋnɨ wa Ŋwi a zhinɨ awən lá — a tiʼ ntsa lá ɨ nə́ ngə́ nɨ lǒ ɨ bə bən nɨ ndzum a mbó ɨbɔrɨkɨ ɨzhwi tsa tsɨ se nɨ ɨlɨŋ tse tsi á tsɨ sáʼə awən le? Nɨ lánə́ ndǒ ɨ bə kwiʼ kwatɨ be ɨbuʼ ɨtsa lá mbɨ́ʼ ake le?

¹⁰ Nɨ kɔ́ʼsɨ́ njwi tsɨ tse, bɨsaŋ bə tsɛrə, nkfu tsɨ tsɛrə a mu alom abɔʼnɨ ɨlom tsɨ tsɛrə atɨ́ ə.

¹¹ Anu zə tsɛrə a ghágɨ́ ntəm ɨghan mbɨ́ʼ awɨŋ ə! A chi lanɨ be ngə́ afaʼ azan a mbó bən a tsa atú adaŋədaŋə le?

¹² Ma buʼ mbó a mbó bɨŋ ə, ɨbɔmbɨma ɨban, á nɨ be tso me ghe. Mbɨ́ʼ ngə́ ma kɨnə nkɨ ntiʼ mbe tso bɨŋ ə. Ka nɨ fə awɨŋ anu zə tsɛrə a nye me ghe.

¹³ Nɨ waʼtɨ anu za a ghɨ́nɨ́ ma soŋ nkən wu shiʼnɨ a mbó bən a nye ntsambyi nkfu lá; a bé mbɨ́ʼ ngə́ ma kə́ ngǒ ghe.

¹⁴ Nɨgho ɨnə báʼtɨ́ chi gha ngɨ́ʼ a mbó bɨŋ ɨ ghanɨ lá, nɨ sé aghan wagɨnɨ kə ntuŋə. Nɨ báŋnɨ́ nkwárɨ́ aghan tso nɨ chi kwarɨ ntsendá Ŋwi za ɨ lonɨ a fɔməbvurə; nɨ kwárɨ́ aghan tso nɨ chi kwarɨ a Kristo Yeso ghe.

¹⁵ Nɨ lánɨ́ ndórɨ́ be a nkə. Awən lá a tiʼ mbə ngɨ ake le? Me mboŋ ma chi soŋ ngə́ nɨ chí be twɛʼtɨ ɨmɨgɨ ɨmən, mbáʼ be nɨ chi twɛʼtɨ, ɨ gha a mɛrə a mbó me ghe.

¹⁶ Ma bə ntiʼ mbe ŋwɔn kɨban ɨwən mbáʼ ma soŋnɨ nkənu a mbó bən lá le?

¹⁷ Ɨbɛn bə mɔʼɔ ba lánə́ ndiʼə ngə́ bo tɛgɨ ɨtú ɨtsa a nye bən, lá ɨkwaʼtɨ ɨtsa ka tsɨ bɔŋ ayi ɛ. Atsum za bo lɔnə a nɨ ɨfɨgɨnɨ bən a nye me, taŋ á nɨ kɨ ntiʼ ntɛgɨ ɨtú ɨtsən ndəŋndəŋ a nye bo adzaŋ za bo tɛgɨnɨ a nye bɨŋ ə.

¹⁸ A bɔŋ a ntɛ́gɨ́ atú a nye anu adzaŋ məwen tsɛʼ mbáʼ be anu za nɨ lɔnə ngə́ á fu a nɨ zə shiʼnɨ ə. Məzen a nɨ nkənu nkfu tsum nkeʼ be tsɛʼ a nyom wa ma tsinɨ bɨgɨnə ghe.

¹⁹ O ɨbɔ ɨban! Tso mabvu wa a chiʼnɨ, ma bɨŋə nkwátə́ ndzuʼ abə́ŋ a ndzáŋə́ məza mbɨ́ʼ awən ɨ kuʼ nkfu za nɨ tiʼnɨ mbe tso Kristo ghe.

²⁰ A ghɨ́ ake á ma tsi bɨgɨnə tɨtsɔŋnɨ, taŋ ɨ kwebtɨ ndóm wa ma mɨ gham nɨ wɛrə a mbó bɨŋ ə. Anu mbɨ́ʼ awən a lánə́ ngágə́ aghə!

Alisɨ a Aga bo Sara ghe

²¹ A ma bitɨ awən wa nɨ lɔnɨ ndzuʼnɨ Nyɔngɔŋ Mǒse lá ngə́: nɨ se zuʼ anu za Nyɔngɔŋ Mǒse a soŋnɨ le?

²² A soŋ ngə́ Abraʼm a tsí nɨ ɨbɔ mbáŋnɨ́ bi bɨbá, táʼ a jwi abuʼ a mangye, wu mɔʼɔ a be mɔn mangye wa a sé abuʼ be.

²³ Mɔn mbáŋnɨ́ ɨyi wa mangye abuʼ a jwínɨ́, bɨ jwí ayi lá a nye ndóm wa bɨ jwínə́ a mɔn tsum, lá mɔn mbáŋnɨ́ ɨyi bo mangye wa a sé abuʼ be lá, bɨ jwí ayi ntsa a ndzum akaʼ a Ŋwi ə.

²⁴ Məzen a diʼə lá anu zə tsɛrə zədaŋ ə: a diʼə lá ngə́ bəngye ba bi bɨbá be lá tso mɨkan mi mɨmbá ghe. Wa a jwinɨ ɨbɔ ɨbyi a mu ɨfaʼ abuʼ a nɨ Aga, wɛrə a tɛm adiʼ akan za bɨ ghɨ́nɨ́ atú Mbám Sainai ghe.

²⁵ Aga wa a tɛmnɨ adiʼ Mbám Sainai Alaʼ Arebya, a kɨ ntɛm adiʼ ntáʼmbagə wu wi Yerosalɛm wu tɨtsɔŋnɨ ə. Wɛrə bo bɨ ɨbɔ ɨbyi bɨtsum nɨ ɨbuʼ ə.

²⁶ Lá Yerosalɛm wu fɔməbvurə wa a tsi nɨ atú azhi, mbe nɨmi ɨwɨgɨnə ghe.

²⁷ Mbɨ́ʼ ngə́ aŋwaʼnɨ a Ŋwi a soŋ ngə́, “Dorə, gho wa o nɨ afərɨ a mangye! Tɔnkɨ nɨ nɨdorɨ, gho wa o só zúʼ ndzáŋə́ njwi mɔn ə! Mbɨ́ʼ ngə́ Mangye wa bɨ nyɛ́ʼnɨ́ ayi a ghɨ tsi nɨ ɨbɔ ɨ tsa a mangye wa ndóm ɨyi a sé ayi nyɛʼə.”

²⁸ Tɨtsɔŋnɨ nə ɨbɔmbɨma ɨban, nɨ nɨ ɨbɔ bɨ Ŋwi ntsa a ndzum akaʼ azhi tso mbáʼ Isak a bénɨ́ lá.

²⁹ A bé a nkfu məwa lá mɔn mbáŋnɨ́ wa bɨ jwínɨ́ a nye ndóm wa bɨ jwínə́ a mɔn tsum a dɨ́gɨ́ a wa Azhwi a Ŋwi a ghɨ́nɨ́ ngə́ á bɨ jwi ayi; a kɨ mbvurɨ mbe ndəŋndəŋ tɨtsɔŋnɨ ə.

³⁰ Lá aŋwaʼnɨ a Ŋwi a soŋ ngə́ ke le? A soŋ ngə́, “Kəntɨ a mangye abuʼ wa bo mɔn ɨyi; mbɨ́ʼ ngə́ mɔn mangye abuʼ wa a mɨ keʼ tsi nɨ abagɨ a ɨdzúm ta ɨyi a nchintɨ bo mɔn mangye wa a se abuʼ be lá.”

³¹ Ma lan, nə ɨbɔmbɨma ɨban, ka bɨgɨnə be awɨgɨnə ɨbɔ bɨ mangye abuʼ, bɨgɨnə nɨ ɨbɔ bɨ mangye wa a se abuʼ be lá.