Galesha 1 - Mɨkan wu Fi

¹ Aŋwaʼnɨ zen a lo a mbó me, Baolo ghe. A tsɔ́ʼ Yeso Kristo abɔʼnɨ Ŋwi, zɨ wa a nɨ Tarɨ, zɨ wa a zhwémnɨ́nɨ́ a Yeso a mbó nɨvwo ntsɔʼ aghan a nye ntom Yeso ghe. A sé tsɔ́ʼ ŋwɔn mɨsɔŋ a ntsu ntsɔʼ aghan kə ngə́ bɨ tsá lá a ndzum ŋwɔn mɨsɔŋ a ntsu ntsɔʼ aghan a nye ntom Yeso ghe.

² Ɨbɔmbɨma bɨtsum ba bɨ tsinɨ ɨghan bɨgɨ bo nkwiʼtɨ aghan, tsagə atsaʼtɨ a mbó ndáŋwi tsa tsɨ tsinɨ a Galesha ghe.

³ A abɔŋəntəm abɔʼnɨ mbɔnɨ, ndo a mbó Ŋwingɔŋ Ta ɨwɨgɨnə bo Maʼmbyí Yeso Kristo tsi a mbó bɨŋ ə.

⁴ A fɨ́gɨ́ bɨgɨnə a mu nguʼ mbyi zɨ ntɔmnɨnɨ zɨ tɨtsɔŋnɨ zen, Kristo a ghá atuəmbəm azhi tso mɨtsuʼnɨ mɨ atú mbɨ́ʼ mɨbvu ɨmɨgɨnə, a ndzúʼnɨ́ anu za Ŋwi, zɨ wa a nɨ Ŋwingɔŋ Ta ɨwɨgɨnə a lɔnə ghe.

⁵ A nɨfáŋ tsi a mbó Ŋwi nɨnkoŋ nɨnkoŋ ə! A be lá.

Nkən wu Shiʼnɨ Nu Zɨzɨ ə

⁶ Anu za nɨ ghɨnɨ a kɨʼnɨ aghə! Tsɛʼ a nye məkum a nkfu lan nɨ kɨə ɨ nyɛ́ʼtə́ a Ŋwi, zɨ wa a tsɔ́ʼnɨ́ awən a nye ɨbɛn ɨbyi ntsa a ndzum abɔŋəntəm a Kristo, ntíʼə mbémə́ be nkən wu shiʼnɨ wədaŋ ə.

⁷ Tsɛʼ a nkənu, ka anu zə tse a tsi ayi ɨwu tso “Nkən wu shiʼnɨ wədaŋ ə”, lá ma soŋ a zen lá mbɨ́ʼ ngə́ ɨbɛn bə tse tsi ɨwu ba bɨ bvǔrɨnɨ ɨtú ɨtsən, ndɔ́btɨ́ nkwebɨ nkən wu shiʼnɨ mbɨ́ʼ a Kristo ghe.

⁸ Lá, be bɨgɨ kə ntsendá Ŋwi zɨ tse za ɨ lonɨ a fɔməbvurə soŋ nkən wu shiʼnɨ wa ɨ tsinɨ chwa a nye wa bɨgɨ sóŋnɨ́ a mbó bən, á Ŋwi a lɔʼ ayi ɛ!

⁹ Bɨgɨ kwɛnə soŋə, tɨtsɔŋnɨ ma kwiʼə nkwátə́ ngə́: be ŋwɔn tsɛrə a soŋ nkən wu shiʼnɨ wa ɨ tsinɨ chwa a nye wa nɨ bémnɨ́, á Ŋwi a lɔʼ ayi ɛ!

¹⁰ Məzen a diʼ lá tsɛʼ tso ngə́ ma lɔ́btə́ ngə́ á ŋwɔn mɨsɔŋ a ntsu a bemtɨ aghan le? Kə́ kə́! Anu za ma lɔnə a nɨ ngə́ á Ŋwi a bemtɨ aghə. Ma lɔ́btə́ lá ngə́ á ɨbɛn zhinɨ aghan le? A be be ngə́ ma bvurə ndɔ́btə́ lá ngɨə mə lan, muŋ ma sa be ngaŋ afaʼ Kristo ghe.

Adzaŋ za Baolo a Tsánɨ́ Ntiʼ Ntom Yeso ghe

¹¹ A ma soŋ a mbó bən, nə ɨbɔmbɨma ɨban ngə́, nkən wu shiʼnɨ wa ma sóŋnə́ se lo lá a mbó ŋwɔn mɨsɔŋ a ntsu ə.

¹² Ma sá kwarɨ a wɛrə a mbó ŋwɔn mɨsɔŋ a ntsu tse, ka ŋwɔn tse a kɨ ndiʼ ayi aghan nɨ wɛrə ghe. A bé Yeso Kristo zɨmboŋ wa a kyɛ́ʼnɨ́ a wɛrə a mbó me ghe.

¹³ Bɨ soŋnə a mbó bən adzaŋ za ma kɨ́nə́ nchyɛ̌ a nkfu za ma kɨ́nə́ faʼə nɨ mɨku bo bɨ mbó a mu mbɔm nguʼsɨ Ŋwi bə Yuda, adzaŋ za ma kɨ́nə́ ndɨ́gɨ́ ndáŋwi za a nɨ zɨ Ŋwi tɨ mɨlɨŋnɨ nkɨ ngɨ anu atsum a ntsənkɨ zɛrə ghe.

¹⁴ Ma tsí a mbyi bə ghaʼnɨ ba bɨgɨ bo nɨ bə Yuda atú a nkaŋ me a nye adzaŋ za ma kɨ́nə́ ndě mbɔm nguʼsɨ Ŋwi bə Yuda, ɨ faʼə nɨ mɨku bo bɨ mbó a ndé mbɔm bɨta ɨbɨgɨ bə kɔ́ʼɔ́nguʼ ə.

¹⁵ Lá Ŋwi a mu abɔŋəntəm azhi a zárɨ́ aghan ngə́ á ma be ɨyi ŋwɔn bɔŋ á bɨ láʼ njwi aghan, ntiʼ ntɔŋ aghan ngə́ á ma yen faʼ a mbó zɨə. A nkfu za wɛrə a tsɔ́ʼnɨ́ a mu ntəm zɨ

¹⁶ a nkyɛʼ Mɔn ɨyi a mbó me taŋ á ma chi soŋ Nkən wu Shiʼnɨ wa mbɨ́ʼ ayi a mbó ba a se bə Yuda be, ma sá ghɛn a mbó ŋwɔn tse ngə́ á tɨgɨtɨ aghə.

¹⁷ Ma sá kɨ ngɛn a Yerosalɛm a ndzé bo ba bɨ bénɨ́ bɨtsabɨmbyi ɨban a mbé ntóm Yeso ghe. Lá, ma báŋnɨ́ ngɛn aghan Arebya, ntiʼ mbə́ mbən a Damaskusɨ ə.

¹⁸ Ɨlom tsi tárə́ tsá zaʼnɨ bɔŋ á ma ghɛn a Yerosalɛm a ngamnə bɨgɨ Bita ghe. Ma tsí bɨgɨ zɨ atú njwi nɨghúm ntsɔb tə̧̂ ghe.

¹⁹ Ma sá zɛn ntom Yeso za zɨ tsɛrə ntsatɨ a Jemsɨ mɨma Maʼmbyí ɛ.

²⁰ Anu za ma ŋwaʼnɨnə lá a nɨ nkənu ə. Ŋwi a zhi ngə́ ka ma nchwě aghan ɨnu ə!

²¹ Ma tíʼ ngɛn a mu mbuʼ Sirɨya bo Silisha ghe.

²² A kə́ mbé nkfu məwa lá, ɨbɛn bɨ ndáŋwi a Yudiya bvúrɨ́ tɨ tum nɨdɨgɨ a nye me ghe.

²³ Bo zhí tsɛʼ ɨnu tsa bədaŋ kɨ́nə́ sóŋə́ ngə́: “Ŋwɔn wa a kɨ́nə́ ndɨ́gə́ awɨgɨ, tɨtsɔŋnɨ a tiʼə sǒŋ anu abeməntəm za a bénɨ́ nkfu tsɛrə a lɔbtɨnɨ ntsənkə lá!”

²⁴ Ma lan, bo bóntɨ́ a Ŋwi mbɨ́ʼ anu za Ŋwi a ghɨ́nɨ́ a nye me ghe.