Filibi 4 - Mɨkan wu Fi

Ɨtɨgɨtɨ Baolo a mbó Ɨbɛn bɨ Ŋwi a Filibi ə

¹ Ɨbɔmbɨma ɨban, ma kɔŋ awən be tɨ́sə́n nkə́ ndǒ nɨ ntəm ɨghə ɨtsum a ndzé bɨŋ ə! Nɨ ghɨə ma dorɨnə be tɨsɨŋə! Ma kə́ ŋǔʼ ɨnye ɨzan be tɨ́sə́n mbɨ́ʼ awɨŋ ə! O ɨbɔmbɨma, nə tiʼ mbe adzaŋ za nɨ tsinɨ nɨ ɨ tɛm ɨ tɨŋənə ngə́ twə́ŋ a mu ntsi mbyi ɨzən a mbúm bɨŋ bɨ Maʼmbyí ɛ.

² Yudia bo Sintichɨ, ma buʼ mbó a mbó bɨŋ ə, á nɨ zhwəŋtɨ a mbémnə́ tso ɨbɔmbɨma bə bəngye ba bɨ shíʼtɨ́nə́ nɨ ɨtumbəm ɨtsa a ɨshe a ɨshi Maʼmbyí ɛ.

³ Gho, ŋwɔn aku ɨghan wa a faʼnə tsɛʼ nɨ táʼ ntəm, ma lǒ ngə́ o kwatɨ bəngye ben; mbɨ́ʼ ngə́ bo faʼnə bɨgɨ bo tsɛʼ nɨ adaʼ aza atsum a ndaʼ nkən wu shiʼnɨ ə. Bo faʼə bo bɨ Klɛmɛn abɔʼnɨ ngaŋ afaʼ tsə mɔʼɔ ɨtsum tsa bɨgɨ bo faʼnə abó mɔ́ʼɔ́, tsa mɨkum ɨma tsinɨ a mu aŋwaʼnɨ a ɨbɛn ba bɨ tsinɨ ntən lá.

⁴ Nkfu tsum, á nɨ nchyɛ̌ nɨ nɨdorɨ a nye adzaŋ za nɨ tsinɨ a mbúm bɨŋ bɨ Maʼmbyí ɛ. Ma kwiʼə sóŋə́ ngə́: dórɨ́kɨ́nə!

⁵ A nɨ ngɨ̌ ɨnu a nye ndómnji wu bɔnɨnɨ bɨŋ bɨ ŋwɔn tsum ə. A bvurɨ tsɛʼ mɨnyiə lanə á Maʼmbyí a yiŋə.

⁶ A nɨ keʼ ɨnye ɨtsən a ngágə́ mbɨ́ʼ anu zə tsɛrə, lá a mu atsaʼtɨ a Ŋwi azən atsum, á nɨ bitɨ a Ŋwi nɨ azúm atsum za nɨ lɔnə ghe. Nkfu tsum za nɨ bítɨ́nə́ a wɛrə nɨ anu, á nɨ mbítə́ tsɛʼ nɨ ntəm wa ɨ lonɨ nɨ mɨya ghe.

⁷ Mbɔnɨ Ŋwi, zɛrə za ɨ tsanɨ anu atsum za be ŋwɔn mɨsɔŋ a ntsu a zuʼ nkɨ nji, mɨ len mɨntəm ɨmən abɔʼnɨ ɨtú ɨtsən á tsɨ tsi a mbúm bo bɨ Kristo Yeso ghe.

⁸ A ndwɨgɨnə nə ɨbɔmbɨma ɨban, á nɨ lwɨgɨ ɨtú ɨtsən nɨ ɨnu tsə shiʼnɨ, ɨnu tsa tsɨ tsinɨ ngə́ á bɨ bontɨ a tsɛrə ghe. Ɨnu tsen lá ɨnu tsa a nɨ tsə nkənu, tsa tsɨ yenə nɨ nkɔʼsə atɨ́, tsə kuʼnɨnɨ, tsə fɛmnɨ, tsa bɨ kɔŋnɨ abɔʼnɨ tsa tsɨ bɔŋnɨ ɨbɛn ə.

⁹ A nɨ ngɨ̌ ɨnu tsa nɨ yɛ́ʼnɨ́ nkɨ nkwárɨ́ a mbó me; ɨnu tsa nɨ kwárɨ́nɨ́ a nye mɨgham ɨman abɔʼnɨ ngɨnɨ mɨnu ɨman lá. Ŋwi, zɨ wa a ghánɨ́ mbɔnɨ a mbó bɨgɨnə a mɨ tiʼ tsi bɨŋ bo ghe.

Baolo a Gha a Mɨya Mbɨ́ʼ Ɨdzúm tsə Ghanɨ tsa bɨ Ghánɨ́ a mbó Zɨə

¹⁰ A mu ntsi mbyi ɨzan a mbúm bɨgɨ Maʼmbyí, a nɨ nɨdorɨ nə wi a mbó me ngə́ nɨ bə́ nkwiʼ ntsi nɨ abárɨ́ a ndiʼə ngə́ nɨ lə̌tú nɨ me mbáʼ abaŋ zə sa a tsanə ghe. Ka ma sóŋə́ aghan lá ngə́ nɨ kyɛ́ntɨ́nə a ndə́tú nɨ me ghe. Nɨ sé byi nyam ntsi nɨ abárɨ́ a ndiʼ zɛrə ghe.

¹¹ Ka ma kə́ sóŋə́ aghə a məzen lá mbɨ́ʼ ngə́ ma kwaʼtɨ ngə́ nɨ nyɛʼ aghə, mbɨ́ʼ ngə́ ma yɛʼnə nji ngə́ za ma tsinɨ nɨ zɛrə a kuʼnɨ a mbó me ghe.

¹² Ma zhi adzaŋ za a benɨ a mbóŋ azúm nkɨ nji adzaŋ za a benɨ a nchyɛ́ nɨ zɛrə á ghaʼ ntsa ɨfɨʼ ə. Ma yɛʼnə a məzen za a tsinɨ a nkubə lá, taŋ adiʼ atsum za ma tsinɨ, nkfu tsum, za ma tsinɨ nɨ zɛrə a kuʼnɨ a mbó me, kə ma dzɨ nzhwurɨ kə ntsi nɨ nji, kə ma tsi nɨ zɛrə a ghaʼ tɨ́sə́n kə ntsi nɨ zɛrə a kɨ́gɨ́ tɨsɨŋə.

¹³ Ma chi ghɨ ɨnu ɨtsum a ntsǎ a ndzum Kristo, zɨ wa a ghánɨ́ adaʼ a mbó me ghe.

¹⁴ Lá a kɨ chi mbɔŋ tsɛʼ a nkan a mbó bən a nkwátɨ́ me a mu ngɨ́ʼ ɨzə.

¹⁵ Bɨŋ bə Filibi zhi tsɛʼ ɨ shiʼnɨ ngə́ a nkfu za ma nyɛ́ʼtɨ́nɨ́ a Masedonia, a nye njwi tsə mbyi tsa ma bvúrɨ́nɨ́ mbíʼnɨ́ nchwítɨ́ Nkən wu Shiʼnɨ lá, a bé tsɛʼ bən ba nɨ bénɨ́ ndáŋwi za ɨ ghánɨ́ ɨdzúm tsə ghanɨ tsa tsɨ bénɨ́ nkáb a mbó me ghe.

¹⁶ Nkfu tsə ghaʼnɨ ma kə́ ndǒ akwatɨ mbáʼ ma tsínɨ́ a Tesalonaika, nɨ tsagɨ a zɛrə a mbó me ghe.

¹⁷ Ka a be ayi tsɛʼ ngə́ ma lǒ nkwarɨ ɨdzúm tsə ghanɨ ə; a baŋnɨ mbe be ngə́ ma lǒ ndze ngə́ bɨ kwiʼtɨ ngɨnɨ mɨnu mə shiʼnɨ a nye ma nɨ kwɛnə ntsi nɨ mɛrə ghe.

¹⁸ Ma sóŋə́ lá ngə́ ma kwarɨ ɨdzúm ɨtsum tsa nɨ ghanɨ a mbó me ghe. Tsɨ ghaʼ ntsa adzaŋ za ma lɔnə ghe! Ma tsi nɨ atsum za ma lɔnə tɨtsɔŋnɨ wa Ebafrɔditusɨ a yenə nɨ ɨdzúm tsə ghanɨ ɨtsɨŋ ɨtsum a mbó me lá. Tsɨ tsi lá tso akáŋ a Ŋwi za a nyúʼtɨ́nɨ́ ɨ shiʼnɨ a mɨlwí Ŋwi, mɨtsuʼnɨ mɨ atú ma wɛrə a bemnɨ, mɨ kə́ ngɨə ɨnye wɛrə bɔŋənə ghe.

¹⁹ Ŋwi ɨghan a mɨ gha atsum za nɨ lɔnə, ɨ lɔgɨ lá a nye afuʼ azhi za a kwə́ŋnɨ́nə́ tsɛʼ adaŋədaŋə a ntsǎ a ndzum Kristo Yeso ghe.

²⁰ A nɨfáŋ tsi a mbó Ŋwi, zɨ wa nɨ Ta ɨwɨgɨnə nɨnkoŋ nɨnkoŋ lá! A be lá.

Atɔ́ŋtɨ a Ndwɨgɨnə ghe

²¹ Atɔ́ŋtɨ a ghěn a mbó ɨbɛn bɨ Ŋwi bɨtsum ba bɨ tsinɨ a mbó Kristo Yeso ghe. Ɨbɔmbɨma ba ma tsinɨ ɨghan bɨgɨ bo tsagə atsaʼtɨ a mbó bɨŋ ə.

²² Ɨbɛn bɨ Ŋwi bɨtsum ba bɨ tsinɨ ɨghan bɨ tsagə atsaʼtɨ a mbó bɨŋ ə, tɨ́sə́n tɨ́sə́n, ba bɨ tsinɨ a ntɔ́ʼ Kaisa ghe.

²³ A abɔŋəntəm a Maʼmbyí Yeso Kristo a tsi a mbó bən bɨtsum ə.