Filibi 3 - Mɨkan wu Fi

Nchinə Ntsa a Ndzum Abeməntəm a Nye Kristo ghe

¹ A ndwɨgɨnə nə ɨbɔmbɨma ɨban, á nɨ ndórɨ́kə́ a nye adzaŋ za nɨ tsinɨ a mbúm bɨŋ bɨ Maʼmbyí ɛ. Ka a be ayi anu zə tsɛrə a mbó me ɨ bə kwiʼ ŋwaʼnɨ anu za ma kwɛnə ŋwaʼnɨ a mbó bɨŋ ə. A kɨ mbe zə shiʼnɨ a mbó bən mbáʼ be ma ghɨ adzaŋ məwiŋ ə.

² A nɨ lə̌ ɨtú ɨtsən mbɨ́ʼ ɨbɛn ba bɨ ghɨnɨ ɨnu tsɨ tɔmnɨnɨ, ngvo tsa, ɨbɛn ba bɨ nyəmnə a ngvúŋ ɨdiʼ ɨnye lá.

³ A nɨ bɨgɨnə, nkeʼ bo be ba bɨ kwarɨnə ngótɨ́ ntsəŋ alagɨ, mbɨ́ʼ ngə́ bɨgɨnə ghúʼsə́ a Ŋwi ntsǎ lá a ndzum Azhwi azhi nkə́ ndórɨ́kə́ a mu ntsi mbyi ɨzɨgɨnə a mbúm bɨgɨnə bɨ Kristo Yeso ghe. Ka bɨgɨnə nɨŋ awɨgɨnə mɨntəm ɨmɨgɨnə a nye ɨnu tsa bɨgɨnə ghɨnə a nye mbəmnye ɨtsɨgɨnə ghe.

⁴ Le buŋ, me mboŋ, ma tsi nɨ yentəzɔʼ a nɨ́ŋ ntəm ɨghan a nye ɨnu mətsiŋ ə. Be ŋwɔn tse a kwaʼtɨ ngə́ zɨə tsi nɨ yentəzɔʼ a nɨ́ŋ ntəm ɨyi a nye ɨnu tsa bɨ ghɨnə a nye ɨnyam ɨnye, ma tsi nɨ wɛrə ntsa ayi ɛ.

⁵ Bɨ tsə́ŋ alagɨ azan mbáʼ ma bénɨ́ táʼ ngabɨ atuəshe. Bɨ jwí aghan tso ŋwɔn bə Izrai, a mu atsé zə wi zə Bɛnjamɛn, mbe ngótɨ́ búʼshe ŋwɔn bə Ɛbal ə. Be bɨ ghangə bɨ ghamə lá anu mbɨ́ʼ ndě Nyɔngɔŋ bə Yuda, ma bé ŋwɔn bə Farisao,

⁶ nkɨ ntən wə mu tɨ́sə́n adzaŋ za ma kɨ́nə́ ndɨ́gɨ́ ndáŋwi ə. Be bɨ ghangə bɨ ghamə lá anu ngə́ ŋwɔn a chi chinɨ a ntsǎ a ndzum ndzuʼnɨ Nyɔngɔŋ, muŋ ma sá nɨ ɨfərɨ chyɛ.

⁷ Lá ɨdzúm ɨtsum tsa ma chinɨ kwaʼ tso nɨsə́ŋ, ma tiʼ ndɔgɨ a tsɛrə tso byé, mbɨ́ʼ atú a Kristo ghe.

⁸ Ka a be ayi tsɛʼ ɨdzúm mətsa; ma tiʼə nkwǎʼ azúm atsum tso byé wa a ghɛnɨ ndwitɨ mbɨ́ʼ atú anu za a tsinɨ nɨ ɨlɨŋ ngɛn nɨ mbyi, mbe lá azhyɛ a Kristo Yeso Maʼmbyí ɨghə. Mbɨ́ʼ atú azhi ma nyɛʼnə azúm atsum; ma tiʼə ndə́ŋtə́ a tsɛrə ɨtsum tso ntsaʼ, taŋ á abi azə a be ngə́ ma tiʼ ŋwɔn Kristo

⁹ ɨ tsi a mbúm tsum tsum bɨgɨ zɨ ə. Ka ma bə nkwiʼ ntsi aghan nɨ nchinə zɨ tse za a nɨ ɨzə, za o tsínə́ zɨ zɛrə ntsa a ndzum ndzuʼnɨ Nyɔngɔŋ lá. Tɨtsɔŋnɨ, ma tsi nɨ nchinə za bɨ ghanɨ ntsa a ndzum abeməntəm a nye Kristo, nchinə za ɨ lonə a mbó Ŋwi ndzɛʼtɨ ayi a nye abeməntəm lá.

¹⁰ Atsum atsum za ma lɔnə, a nɨ nji Kristo ɨ kɨ zhwiʼtɨ ɨ zɛn mɨtən ma mɨ tsínɨ́ wə ɨnye a nkfu za wɛrə zhwémnɨ́nɨ́ a mbó nɨvwo, ɨ kɨ ze ngɨ́ʼ tso wɛrə, ɨ tiʼ kɨ kfo tso zɨ,

¹¹ a mu ntsiŋə nɨ ntəm tsum ngə́ me mboŋ bɨ ghɨ kɨ zhwémnɨ́ aghan a mbó nɨvwo, á ma tsi nɨ ntsi ntɨŋ ə.

Anyuʼnɨ ɨ Ghɨ Tsi nɨ Mɨkyaŋnɨ ma

¹² Ka ma nkaŋə aghan lá ngə́ ma byinə ngɨ atsum za ma tsínɨ́ nɨ ngɨə kə ngə́ ma byinə nkɔʼ ntɛm ngə́ tsáŋ ə. Ma nyuʼnə tsɛʼ nkfu tsum a nchyɛ́ nɨ mɨkyaŋnɨ ma ə. Kristo Yeso a dzɨ́ aghan mbyigɨ a bagɨ zɨ lá taŋ á ma tsi nɨ mɨkyaŋnɨ məmiŋ ə.

¹³ Tsɛʼ a nkənu, nə ɨbɔmbɨma ɨban, ka ma kwaʼtɨ aghan ngə́ ma kwɛnə ntsi nɨ mɛrə ghe; lá táʼ anu wa ma ghɨnə, a nɨ ndɨgɨnɨ za a tsinɨ a ndzum me, ɨ kɨ́rɨ́ mɨtən ɨman ɨ ghɛn kwatɨ a za a tsinɨ a mbyi ɛ.

¹⁴ Ma lan, ma kɨə ngěn tsɛʼ adiʼ za ma mɨ yɛʼ nkaŋ taŋ ɨ tsi nɨ akyaŋə za, mbe lá adzaŋ za Ŋwi a tɔŋnɨ aghan a fɔməbvurə a mu ntsi ntən ntsa a ndzum Kristo Yeso ghe.

¹⁵ Bɨgɨnə bɨtsum ba bɨ kwinɨ a mu abeməntəm tsi nɨ nchyɛ nɨ ndəŋndəŋ mbɔm məziŋ ə. Lá be bən bə tse tsi nɨ mbɔm zə daŋ, muŋ Ŋwi a mɨ ghɨ á lán a mbó bɨŋ ə.

¹⁶ Lá kə a be be ɨ nə́ muŋ, á bɨgɨnə ghɛn nɨ mbyi ndzɔ̌ŋ mbɔm za bɨgɨnə kwɛ́nə́ ndzɔŋə ɨ kɔʼ kuʼ tɨtsɔŋnɨ ə.

¹⁷ Ɨbɔmbɨma ɨban, á nɨ ngěn nɨ mbyi ɨ nyíʼsə́ aghə. A nɨ tɛgɨ ɨmɨgɨ ɨmən a nye ɨbɛn ba bɨ zɔŋnə alisɨ zə shiʼnɨ za mbáʼ bɨgɨ diʼnə a mbó bɨŋ ə.

¹⁸ Ma kwɛnə soŋ a məzen a mbó bən nkfu tsə ghaʼnɨ, tɨtsɔŋnɨ ma kwiʼə nkwátə́ a zɛrə nɨ nkyi a ɨmɨgɨ ngə́: bə ghaʼnɨ tsi ɨwu ba ntsi mbyi ɨtsa ghɨnə awa bo keʼ kɔŋ ndzuʼ yentəzɔʼ nɨvwo nɨ Kristo atɨ abaŋnɨ-baŋnɨ ə.

¹⁹ Bo ghɨ lwɨgɨnɨ a mu ndzě ngɨ́ʼ zɨ tɨbɔŋ, mbɨ́ʼ ngə́ ŋwi ɨwa nɨ ɨdzúm tsa mbəmnye ɨtsa lɔnə ghe. Bo ŋǔʼ ɨnye nɨ ɨdzúm tsa bo benɨ dɨrɨnə be atú nɨ tsɛrə, nkə́ nkwáʼtə́ tsɛʼ mbɨ́ʼ ɨdzúm atuəshe.

²⁰ Lá bɨgɨnə nɨ ngaŋ alaʼ a fɔməbvurə, bɨgɨnə bɛ́bə́ adzaŋ za bɨgɨnə tsenə a Ndoŋ ɨwɨgɨnə, Maʼmbyí Yeso Kristo ngə́ á lo a fɔməbvurə ngyiŋə.

²¹ Wɛrə a mɨ kwebtɨ ɨbɔrɨkɨ ɨnyam ɨnye ɨtsɨgɨnə tsa tsɨ nɨ ɨdzúm nɨvwo, ɨ tiʼ ghɨ a tsɛrə tso ɨnye ɨzhi za ɨ tsinɨ nɨ nɨfáŋ, ɨ faʼnə nɨ mɨtən ma a ntsǎ a ndzum mɛrə, wɛrə a ghɨə ɨdzúm ɨtsum yenə a shwúrɨ́ nɨsáʼ ɨni ɛ.