Ɛfɛso 5 - Mɨkan wu Fi

Bɨgɨnə Tsi nɨ ɨ zagɨ ɨ Tsinə tso Ɨbɛn ba bɨ Tsinɨ nɨ Nkaʼ Kristo ghe

¹ Mbáʼ nɨ nɨ ɨbɔ bɨ Ŋwi ba a kɔŋnɨ tsɛʼ a nkan lá, nɨ tsi nɨ ɨ zagɨ zhwəŋtɨ ɨ be tso wɛrə ghe.

² Akɔŋnɨ a tsi nɨ ntsɨŋnɨ ntsi mbyi ɨzən, tso mbáʼ Kristo a kɔ́ŋnɨ́ awɨgɨnə, nga ntsi mbyi ɨzhi tso mɨtsuʼnɨ mɨ atú a nkfu bɨgɨnə tso akáŋ a Ŋwi za nyúʼtɨ́nɨ́ ɨ shiʼnɨ, ngɨə ɨnye Ŋwi bɔŋənə lá.

³ Mbáʼ nɨ nɨ ɨbɛn bɨ Ŋwi lá, ka a byi nkuʼnɨ ayi ngə́ ɨnu ntɔrɨ ɨlɛbɨ, nɨshwe kə a mbé amiɛnɨngám, á bɨ byi nkwemtɨ a tsɛrə a tɨtərɨ bɨŋ ə.

⁴ Kə ngə́ á ɨtɨshwe mɨgham, ɨlentɨ mɨgham abɔʼnɨ mɨgham mɨ atságɨ́ a mɨ fúə a ntsu bɨŋ ə. A nɨ mbáŋnə́ ngǎ a mɨya a mbó Ŋwi ə.

⁵ A nɨ zhi ɨ shiʼnɨ ngə́ ka Ŋwɔn tse wa a nɨ wu ntɔrɨ ɨlɛbɨ, wu ɨtɨshwe ɨnu, wa a nɨ amiɛnɨngám (mbɨ́ʼ ngə́ a mbé amiɛnɨngám a nɨ ndóm wu mɔʼɔ a ngúʼsɨ́ ɨbɔ bɨ abe) a láʼ tsi nɨ anu a mu Nɨfɔ nɨ Kristo abɔʼnɨ nə Ŋwi ə.

⁶ A ŋwɔn tse a keʼ awən nɨ ɨlentɨ mɨgham tamtə; a nɨ mbɨ́ʼ ɨdzaŋ ɨnu tso mətsen tsa tsɨ ghɨnɨ tɔ́ŋ alwɛntɔŋ a Ŋwi a nye ɨbɛn ba bɨ se ayi a ndzúʼnə́ ghe.

⁷ Ma lan, á nɨ keʼ byi nyam ntsi nɨ anu zə tse a ngɨə bɨŋ bɨ ɨdzaŋ ɨbɛn tso mətsiŋ ə.

⁸ Tsɛʼ bɨŋ mboŋ, a bé a nkfu tse lá nɨ tsi a ndzumnɨ ə, lá tɨtsɔŋnɨ mbáʼ nɨ tiʼnɨ mbe ɨbɛn bɨ Maʼmbyí lá, nɨ tiʼ ntsi a mu nkaʼ ə. Ma lan, nɨ tsi nɨ ɨ tiʼə chyɛnə tso ɨbɛn ba bɨ tsinɨ a mu nkaʼ,

⁹ mbɨ́ʼ ngə́ za ŋwɔn wa a tsinɨ a mu nkaʼ a tsínə́ nɨ zɛrə nɨ abə́ŋ a ɨbɔŋ atsum, ɨnu tsɨ chinɨnɨ abɔʼnɨ nkənu ə.

¹⁰ A nɨ zagɨ ndzɛn ngə́ nɨ yɛʼ ɨnu tsa tsɨ ghɨnə Maʼmbyí a dorɨtɨnə ghe.

¹¹ A nɨ keʼ tsi nɨ anu zə tse a ngɨə nɨ ɨnu tɨ ɨnu tsa ɨbɛn ghɨnə, ɨnu tsa a nɨ tsə ndzumnɨ lá. A nɨ baŋnɨ ndɔgɨ a tsɛrə ngyen nɨ tsɛrə a mu nkaʼ ə.

¹² Adɨrətú zə wi a lanɨ ntsi ɨwu tsɛʼ ɨ byi gham mbɨ́ʼ ɨdzaŋ ɨnu tsa bo ghɨnə a nkubə ghe.

¹³ A nkfu za bɨ mɨ lɔgɨ ɨnu ɨtsum ɨ yen nɨ tsɛrə a ɨshi nkaʼ, a nɨ nyom wa mbě ɨza ɨ fúnə́ a ɨshe asaŋəsaŋ ə;

¹⁴ mbɨ́ʼ ngə́ anu atsum za a fúnə́ a ɨshe asaŋəsaŋ, a nɨ nkaʼ ə. Nə nɨ anu za bɨ soŋnɨ ngə́: “O, gho wa o lyénə́, vwukɨ a fɨlye nkɨ nzhwemnɨ a mbó nɨvwo, á nkaʼ Kristo ɨ tá a nye gho ghe.”

¹⁵ Ma lan, á nɨ lə ɨtú ɨtsən adzaŋ za ntsi mbyi ɨzɨŋ ɨ tsinə. A nɨ nchyɛ̌ tso ɨbɛn ba bɨ tsinɨ nɨ zóŋ, nkeʼ be be tso ɨdzɨŋtɨ ə.

¹⁶ Abárɨ́ atsum za nɨ tsinɨ nɨ zɛrə, á nɨ ghɨ ɨbɔŋ, mbɨ́ʼ ngə́ njwi tsiŋ nɨ njwi tsa ɨnu tsɨ tɔmnɨnɨ ghaʼnə.

¹⁷ Ma lan, á nɨ keʼ ɨbərɨ be, nɨ baŋnɨ njwəŋtɨ a ntsɔ́ʼ aku a njí anu za Maʼmbyí a lɔnə ngə́ á nɨ ngɨə ghe.

¹⁸ A nɨ nkeʼ mbánɨ́ mɨluʼ ə. Məzen a mɨ tsənkɨ awɨŋ ə; á nɨ baŋnɨ ndon nɨ Azhwi a Ŋwi ə.

¹⁹ A nɨ ngámnə́ bən nɨ bən, ndɔ́gə́ mɨgham ma mɨ funɨ a mu bɨsalmsɨ abɔʼnɨ ɨzɔbɨ nkyi nɨ ɨzɔbɨ nkyi tsɨ fɛmnɨ; ndzɔ́bə́ mɛrə nkə́ mbóntə́ a Maʼmbyí nɨ mɨntəm ɨmən mɨtsum ə.

²⁰ Nɨ ɨkum Maʼmbyí Yeso Kristo ɨwɨgɨnə, á nɨ ngǎ a mɨya mbɨ́ʼ anu atsum a mbó Ŋwi, zɨ wa a nɨ Tarɨ lá.

Adzaŋ za Mangye bo Ndóm Tsinɨ nɨ Nchyɛ Tso Ɨbɛn ba bɨ zɔŋnə a Kristo ghe

²¹ A nɨ ndzúʼnə́ a ŋwɔn nɨ ŋwɔn mbɨ́ʼ aghuʼsɨ za nɨ tsinɨ nɨ zɛrə a mbó Kristo ghe.

²² Mangye zuʼnɨ a ndóm ɨgho, tso ngə́ o ghɨə mə lan lá a mbó Maʼmbyí ɛ.

²³ Mbɨ́ʼ ngə́ ndóm a tsi nɨ mɨtən atú ngwe ɨyi tso mbáʼ Kristo a tsinɨ nɨ mɨtən atú ndáŋwi lá; Kristo zɨmboŋ nɨ ndoŋ ndáŋwi za nɨ mbəmnye ɨzhi lá.

²⁴ Ma lan, mangye a tsi nɨ ndzuʼnɨ ndóm ɨyi nɨ ntəm ɨyi ɨtsum tso mbáʼ ndáŋwi zúʼnɨ́nə́ a Kristo lá.

²⁵ Ndóm, kɔŋ a ngwe ɨgho tso mbáʼ Kristo a kɔ́ŋnɨ́ ndáŋwi, ɨ nyɛʼtɨ bɨ zhwitɨ ayi mbɨ́ʼ atú a zɛrə lá.

²⁶ Wɛrə a ghɨ́ a məzen nɨ mɨtən mɨ nɨgham ɨni lá taŋ ɨ gha ndáŋwi tso azúm zə ghanɨ zə wi a mbó Ŋwi, mbáʼ wɛrə a sugɨnə a zɛrə nɨ nkyi ɨ fɛm,

²⁷ taŋ ɨ tsɔʼ ndáŋwi tɛgɨ a mbó atuəmbəm azhi a mu nɨbɔŋ ɨni nɨtsum ə. A ndáŋwi məzen ɨ fɛm nkɨ ntsi tɨ ɨfərɨ tse, tɨ adiʼ zə tse za a nyaʼnɨnɨ kə ɨŋabɨrɨ kə nkeʼ kɨ nkɔʼ ntɛm ngə́ tsáŋ ə.

²⁸ A mbáŋnɨ́ ɨtsum kɔŋ bəngye ɨba tso mbáʼ bo kɔŋnɨ ɨtumbəm ɨtsa lá. Ŋwɔn mbáŋnɨ́ tsum wa a kɔŋnɨ a ngwe ɨyi a kɨ nkɔŋ atuəmbəm azhi ɛ.

²⁹ Ka ŋwɔn tse a ndáʼə mbə̂ ayi atuəmbəm azhi ɛ. Wɛrə a baŋnə ndzɨ́gə́ a zɛrə nkə́ ndə̌tú nɨ zɛrə tso mbáʼ Kristo a lánə́ atú a nye ndáŋwi;

³⁰ mbɨ́ʼ ngə́ bɨgɨnə lá ɨlam ɨnye mbəmnye ɨzhi ɛ.

³¹ Aŋwaʼnɨ a Ŋwi a soŋ ngə́, “Mbɨ́ʼ a məzen, ŋwɔn mbáŋnɨ́ a mɨ nyɛʼtɨ a ta ɨyi bo nɨmi ɨyi ɨ tiʼ bosɨ bo ngwe ɨyi, á bo wa bi bɨbá tiʼ táʼ azúm ə.”

³² Aŋwaʼnɨ a Ŋwi zen a kyɛʼ nkənu zɨ tse za ɨ shwinɨ nkɨ ntsi a nkubə ghe. Ɨ ghamə lá mbɨ́ʼ a Kristo bo ndáŋwi ə.

³³ Lá ɨ soŋ anu a mbó bən ngə́ ndóm tsum a tsi nɨ ɨ zagɨ kɔŋ a ngwe ɨyi tso atuəmbəm azhi, á mangye tsum a kɨ ndzagɨ ndzuʼnɨ a ndóm ɨyi ɛ.