Ɛfɛso 1 - Mɨkan wu Fi

¹ Aŋwaʼnɨ zen a lo a mbó me, Baolo wa ma benɨ ntom Yeso zɨ Kristo Yeso adzaŋ za Ŋwi a lɔnə ghe. Ma ŋwaʼnə a zɛrə a mbó bɨŋ ɨbɛn bɨ Ŋwi a Ɛfɛso ba bɨ faʼnɨ ɨfaʼ ɨwa a mbó Kristo Yeso nɨ táʼ ntəm lá.

² A abɔŋəntəm abɔʼnɨ mbɔnɨ, ndo a mbó Ŋwingɔŋ Ta ɨwɨgɨnə bo Maʼmbyí Yeso Kristo tsi a mbó bɨŋ ə.

Ɨfɔgə Azhwi wa ɨ Lonɨ a mbó Kristo ghe

³ A bɨgɨnə gha a mɨya a mbó Ŋwi, zɨ wa a kɨnɨ nkɨ mbe Ta bɨ Maʼmbyí ɨwɨgɨnə Yeso Kristo lá. Ŋwi a fɔ́gə́ awɨgɨnə nɨ abə́ŋ a ɨfɔgə azhwi atsum za a lonɨ a fɔməbvurə ntsǎ a ndzum Yeso Kristo,

⁴ ndɔgɨnɨ mbáʼ a tsɔ́ʼnɨ́ awɨgɨnə ntsa a ndzum wɛrə mbɔŋə mbyi biʼnɨ, ngə́ á bɨgɨnə fɛm nkɨ ntsi tɨ ɨfərɨ a ɨshi zɨə.

⁵ A mu akɔŋnɨ, wɛrə a kwɛ́nə ndɛn a mu ntəm zɨ ngə́ bɨgɨnə ghɨ bé ngótɨ́ ɨbɔ ɨbyi ntsa a ndzum Yeso Kristo, ndzɔŋə adzaŋ za wɛrə kyáŋtɨ́nɨ́ nkə́ ndǒ ngə́ á be ə.

⁶ A bɨgɨnə bontɨ a Ŋwi mbɨ́ʼ abɔŋəntəm a nɨfáŋ azhi za wɛrə a ghánɨ́ tə́ ndə́ŋtə́ mbɨ́ʼ a Mɔn ɨyi wa wɛrə a kɔ́ŋnɨ́ tsɛʼ a nkan lá.

⁷ A ntsǎ a ndzum alɛm a Kristo za bɨ chwírɨ́nɨ́ atɨ abaŋnɨ-baŋnɨ, bɨ zón atú azɨgɨnə, lá be ngə́, bɨ lɨgɨnɨ ɨfənu ɨtsɨgɨnə, ndzɔŋə a ndzum abɔŋəntəm azhi za a kwə́ŋnɨ́nə́,

⁸ za a chwítɨ́nɨ́ atú bɨgɨnə tsɛʼ adaŋədaŋə lá. A ntsǎ a ndzum zóŋ tsum abɔʼnɨ azhyɛ atsum

⁹ Ŋwi a ghɨ́ a za wɛrə a kyáŋtɨ́nɨ́, nkɨ nkyɛʼ a mbó bɨgɨnə akyaŋtɨ azhi zə nkubə za wɛrə a kwɛ́nə ntsɔʼ a mu ntəm zɨ ngə́ zɨə mɨ ghɨ á ghɛn fu a ndwitə ntsa lá a ndzum Kristo ghe.

¹⁰ Akyaŋtɨ zen za Ŋwi a ghɨ ghɨ á ghɛn fu a ndwitə a nye nkfu za ɨ ghɨnɨ kuʼ lá, a be lá mbosɨ ɨdzúm ɨtsum tsa zɨə a káʼnɨ́ táʼ adiʼ; ɨdzúm fɔməbvurə abɔʼnɨ ɨdzúm atuəshe, á Kristo a tsi a mbyi tsɛrə ɨtsum ə.

¹¹ Bɨ ghɨ̌ ɨnu ɨtsum ndzɔŋə lá akyaŋtɨ a Ŋwi abɔʼnɨ ntɛgɨnɨ ɨzhi; Ŋwi a zárɨ́ awɨgɨnə ngə́ á bɨgɨnə be ɨbɛn ɨbyi mbɨ́ʼ ngə́ bɨgɨnə tsi a mbúm bɨgɨnə bɨ Yeso Kristo, nkɨ ndzɔŋ mbe mbɨ́ʼ a za wɛrə a kɨ́nə́ ndǒ, ntsa a ndzum za wɛrə a lɛ́nɨ́ a ɨshe, nchwuʼnɨ a mbiʼnɨ mbyi ɛ.

¹² Bɨgɨnə ba bɨ tsánɨ́ mbyi ntsi nɨ ntsiŋə nɨ ntəm tsum a nye Kristo, bɨ tiʼ ntsɔʼ awɨgɨnə ngə́ á ntsi mbyi ɨzɨgɨnə ɨ tsi a mbontɨ nɨfáŋ ɨni ɛ.

¹³ Ntsa a ndzum zɨ, bən ba nɨ kɨnə nkɨ ndzuʼ nɨgham nɨ nkənu, Nkən wu Shiʼnɨ wu ndoŋ bɨŋ ə. Nɨ kɨnə nkɨ nɨŋ mɨntəm ɨmən a nye Kristo, Ŋwi a lyigɨ awən nɨ Azhwi zə Fɛmnɨ za wɛrə a káʼnɨ́ lá.

¹⁴ Azhwi zə Fɛmnɨ məzen a tiʼ ntsi lá tso mɨntɨ ma bɨ bɛʼnɨ mɨ diʼnə ngə́ bɨgɨnə ghɨ tsí nɨ za Ŋwi a káʼnɨ́ awɨgɨnə nɨ zɛrə, ɨ kɔʼ kuʼ njwi za bɨgɨnə ghɨnɨ tsí nɨ zɛrə ghe. A bɨgɨnə bontɨ a Ŋwi ə!

Atsaʼtɨ a Ŋwi a Baolo ghe

¹⁵ Mbɨ́ʼ a məzen, mbáʼ ma zuʼnə mbɨ́ʼ abeməntəm azən a nye Maʼmbyí Yeso abɔʼnɨ akɔŋnɨ za nɨ tsinɨ nɨ zɛrə a nye ɨbɛn bɨ Ŋwi bɨtsum lá,

¹⁶ ka ma nkyɛ́ntə́ aghan a ngá mɨya a mbó Ŋwi mbɨ́ʼ awən, nkwémtə́ awən a mu atsaʼtɨ azan,

¹⁷ ngə́ Ŋwi wu Maʼmbyí Yeso Kristo ɨwɨgɨnə, Ta bɨ nɨfáŋ, a chi gha Azhwi a zóŋ a mbó bən ɨ kɨ ghɨ á nɨ zhi a Ŋwi ɨ shiʼnɨ ə.

¹⁸ Ndǒ ngə́ á mɨntəm ɨmɨŋ ŋaʼnɨ, á nɨ ze nkaʼ ɨyi, taŋ á nɨ zhi ɨnu tsa ntsiŋə nɨ ntəm tsum ɨzən ɨ tsinɨ mbɨ́ʼ a tsɛrə mbáʼ wɛrə a tɔŋnɨ awən lá, ɨ kɨ zhi afuʼ zə wi za Ŋwi a kaʼnɨ ɨbɛn ɨbyi nɨ zɛrə ghe.

¹⁹ Nɨ mɨ kɨ zhi adzaŋ za mɨtən ɨmyi ma bɨ chinɨ keʼ fɨʼnɨ, a mɨ faʼnə a mu ɨnye bɨgɨnə ba bɨ nɨŋnɨ mɨntəm ɨmɨgɨnə a nye zɨ lá. Mɨtən məmen ma mɨ faʼnə a mu ɨnye bɨgɨnə tsi ndəŋndəŋ bo mɨtən mə wi ma

²⁰ wɛrə a fáʼnɨ́ nɨ mɛrə a nkfu za wɛrə a zhwémnɨ́nɨ́ a Kristo a mbó nɨvwo, ntiʼ ngɨ a shiʼtɨ ntsi abó zə maʼə, a fɔməbvurə lá.

²¹ Kristo a tsi ɨwu, ɨ sáʼə ɨzhwi tsɨ tən ɨtsum tsa tsɨ sáʼnɨ́ fɔməbvurə ghe. Ɨkum ɨyi tsi atú mɨkum mɨtsum ma bɨ chwinɨ atuəshe wen abɔʼnɨ mbyi za ɨ lo bə yen lá.

²² Ŋwi a kɨ ndzumtɨ ɨdzúm ɨtsum ntsagɨ a shwúrɨ́ mɨku Kristo, ngɨ ayi a nye atú ɨdzúm ɨtsum a mu ndáŋwi ə.

²³ Ndáŋwi lá mbəmnye wɛrə, za bɨ lwɨgɨnɨ nɨ Kristo, zɨ wa a lwɨ́gɨ́nɨ́ ɨnu ɨtsum adiʼ atsum lá.