Alukasɨ 22 - Mɨkan wu Fi

Ɨbɛn Korɨ a Mɨnaŋ a Njwítɨ́ Yeso ghe

¹ Nkfu za bɨ kɨ́nə́ ndzɨ̌ Nɨdorɨ nɨ Abán tɨ Mbɛgə za bɨ tɔ́ŋnə́ nɨ Tsa-yɛʼnɨ lá ɨ ghɨ́nə ntiʼə ngyíŋə́ ghe.

² Bɨntumshe bə wi abɔʼnɨ bɨdiʼ bɨ Nyɔngɔŋ ghɨ́ ntíʼə nkórə́ a mɨnaŋ adzaŋ za bɛrə mɨ zhwitɨ a Yeso tsɛʼ atəchi mbɨ́ʼ ngə́ bo kə́ mbɔ́gɨ́ ɨmɨgɨ mɨ ɨbɛn ə.

Yudasɨ a Bem Ɨ fiŋ Yeso ghe

³ Satan a kón a ntəm Yudasɨ wa bɨ kɨ́nə́ ntɔ́ŋə́ ngə́ Iskario mbáʼ a ghɨ́nɨ́ mbé táʼ ngyɛʼ a tɨtərɨ bo ba bɨ bénɨ́ nɨghúm ntsɔb bá lá.

⁴ Wɛrə a tíʼ ngɛn nkwatɨ bɨntumshe bə wi ba bo ɨtú bɨntsiŋ ɨdiʼ ba bɨ kɨ́nə́ ndyɛm Ndáŋwi zɨ Ngwi lá ntiʼə ntáŋə́ adzaŋ za wɛrə a mɨ fen a Yeso ghe.

⁵ Bɛrə tíʼ ndórɨ́ tsɛʼ nkan, ntiʼ nkaʼ a tfú wɛrə nɨ ndvuŋ nkáb tse ghe.

⁶ Yudasɨ a tíʼ nkɨ́ mbémtɨ́ a nkwárɨ́ nkáb za a mbó bo ghe. A ghɨnə lá, ntiʼə nkə́ ndǒ mɨndómɨnji ma wɛrə a mɨ gha a Yeso a mbó bo ndzum ndzum á ɨbɛn keʼ zhyɛ.

Yeso a Kyaŋtɨ Ɨnye ɨzhi a Ndzɨ́ Mɨdzɨ mɨ Tsa-yɛʼnɨ ə

⁷ Njwi Nɨdorɨ nɨ Abán tɨ Mbɛgə za ghɨnə ngyén mbáʼ bɛrə ghɨ́nɨ́ ntsí nɨ njwitɨ ɨbɔ bɨ mbyindzɨ a nye mɨtsuʼnɨ mɨ atú ma bɨ kɨ́nə́ ngǎ a nkfu nɨdorɨ nɨ Tsa-yɛʼnɨ lá.

⁸ Yeso a tíʼ ntsagɨ a Bita bo Yoane ngə́ á bo ghɛn a mbyi nkɨ soŋ a mbó bo ngə́ “Ghɛnə, nkyaŋtɨnə adiʼ za bɨgɨnə bɨtsum mɨ dzɨ mɨdzɨ mɨ Tsa-yɛʼnɨ ma ɨwu ə.”

⁹ Bo bítɨ́ a Yeso ngə́, “O lǒ ngə́ á bɨgɨ ghɛn nkyaŋtɨ a mɛrə lá ɨ ghé le?”

¹⁰ Yeso a tíʼ nchwɨ́gɨ́ ngə́, “Adzaŋ za nɨ mɨ byi kon a ntáʼmbagə wu wi wa lá, nɨ mɨ zɛn a ŋwɔn tse á byɛʼ atɛn a nkyi atú zɨə; zɔŋnə ayi ngɛn nkon a ndá za a mɨ ghɛn ɨ kon ɨwu,

¹¹ ntiʼ fɨʼtɨ a mbó mboŋndá wa ngə́, ‹Ndiʼ aŋwaʼnɨ ɨwɨgɨ a bítə́ ngə́, kwasɨ ndá bɨghən a tsi lá ɨ ghé, adzaŋ za zɨ bo bɨ bɨyɛʼ ɨbyi chinɨ dzɨ mɨdzɨ mɨ Tsa-yɛʼnɨ ɨwu le?›

¹² A mɨ tiʼ diʼ a təkɔʼ bɨ kwasɨ ndá atɨ́ a mu ndá-nɨkaŋ ɨzhi wa azúm atsum a tsinɨ wə mu ə. Ɨwu, nɨ tiʼ kyaŋtɨ azúm atsum ə.”

¹³ Bɛrə tíʼ ngɛn ndzɛn anu atsum tsɛʼ adzaŋ za wɛrə a fɨ́ʼtɨ́nɨ́ lá, nkyaŋtɨ mɨdzɨ mɨ Tsa-yɛʼnɨ ma ɨwu ə.

Mɨdzɨ mɨ Maʼmbyí mə Nkwɛfɔ

¹⁴ Nkfu ghɨnə nkúʼ Yeso bo Ntóm Yeso tiʼ shiʼtɨ ntsi atú atɛkɨ tsɛʼ bo bɨtsum ə.

¹⁵ A sóŋ a mbó bo ngə́, “Ma kwɛ njwɨ́gə́ ntsíŋə́ nɨ ntəm ɨghə ɨtsum ɨ ghɨ dzɨ́ mɨdzɨ mɨ Tsa-yɛʼnɨ mɛnə bɨgɨnə bɨtsum bɔŋ ɨ chwuʼ ndzě ngɨ́ʼ ə.

¹⁶ Mbɨ́ʼ ngə́ ma sóŋə́ a mbó bən ngə́, ma mɨ kaʼ kwiʼ ndzɨ a mɛrə ɨ kɔʼ kuʼ nkfu za bɨ ghanɨ ɨlɨŋ ɨyi a mu Nɨfɔ nɨ Ŋwi ə.”

¹⁷ Yeso a tíʼ ndɔgɨ ndɔ́ŋ, nga a mɨya a mbó Ŋwi ndzɔŋtɨ soŋ ngə́, “Konə, ngyɛbtɨ a tɨtərɨ bɨŋ ə;

¹⁸ mbɨ́ʼ ngə́ ma sóŋə́ a mbó bən ngə́ ɨ lɔgɨnɨ tɨtsɔŋnɨ ɨ ghěnə nɨ mbyi ma mɨ kaʼ kwiʼ no mɨluʼ məmen ɨ kuʼ nkfu za Nɨfɔ nɨ Ŋwi ghɨ yiŋə.”

¹⁹ A tíʼ ndɔgɨ abagɨ abán nkwiʼ nkɨ ngá a mɨya a mbó Ŋwi, mbatɨ nga a mbó bo, ɨ soŋ ngə́, “Nə nɨ ɨnyam ɨnye ɨzə zɛnə mbáʼ bɨ ghanɨ a mbó bɨŋ ə. Nɨ tɨ ghɨə a məzen nɨ waʼtɨnə aghə.”

²⁰ Ndəŋndəŋ, bo dzɨnə ɨ mɛtɨ, wɛrə kwiʼ ndɔgɨ ndɔ́ŋ mɨluʼ za, ɨ soŋ ngə́, “Mɨluʼ miŋ nɨ akan a Ŋwi zə fi mbáʼ bɨ nyɛtɨnɨ nɨ alɛm azan ntiʼ nɨŋ a mbó bɨŋ ə.

²¹ Lá, zɛnə azɨŋ ə! Ŋwɔn wa a dzɨnɨ a mɨnaŋ atú ɨghan a dzɨ́ə bɨgɨnə bo atú atɛkɨ ziŋ ə!

²² Mbɨ́ʼ ngə́ Mɔn Ŋwɔn a mɨ kfo be mbɨ́ʼ adzaŋ za Ŋwi a kwɛ́nə ndɛn a mu ntəm zɨə; lá, ndɔn ɨ tsi atú ŋwɔn wa a dzɨnɨ a mɨnaŋ atú ɨyi ɛ!”

²³ Bo tíʼə mbítə́ awa bo nɨbo ngə́ təsɔʼ anu tso wɛnə a ghɨ ɨwa a tɨtərɨ bɨgɨnə le?

Alɨʼkɨ ngə́ Ŋwɔn wu Ngwi a lá wɨŋ ə

²⁴ Alɨʼkɨ a lánɨ́ a tɨtərɨ bɨyɛʼ ba ngə́ bo mɨ lɔgɨ lá awa a tɨtərɨ bo tso ŋwɔn wu ngwi ə.

²⁵ Yeso a chwɨ́gɨ́ ngə́, “Bɨfɔ bɨ ba a se bə Yuda be tsi nɨ mɨtən atú ɨbɛn ɨba, bɨsáʼ bɨ alaʼ tɔ̌ŋ ɨtumbəm ɨtsa ngə́, ‹Bɨson bɨ Ɨbɛn.›

²⁶ Lá ka a be ayi adzaŋ məwen a tɨtərɨ bɨŋ ə; a baŋnɨ mbe be ngə́ wu ngwi a tɨtərɨ bən a tsi nɨ ɨ zagɨ tsi tso wa a nɨ mánkɨ́ə ntsa a ŋwɔn tsum, ntsagɨnɨ ɨwən a tsi nɨ mbe be ngaŋ afaʼ ə.

²⁷ A nɨ ɨwa wa a tsanɨ a wu mɔʼɔ, a lá wa a shíʼtɨ́nə́ nchyɛ̌ ndzɨ̌ mɨdzɨ kə wa a yenə ntɛ́kɨ́ mɨdzɨ le? A se wa a shíʼtɨ́nə́ nchyɛ̌ bɨ yiŋə ntɛ́kɨ́ mɨdzɨ ɨmyi lá be le? Lá ma baŋnɨ ntsi a tɨtərɨ bən be tso wa a yenə ntɛ́kɨ́ mɨdzɨ ə.

²⁸ Nɨ ghɔ́ŋ bɨgɨnə a nye nkfu tsa ɨtsum tsa bɨ kɨ́nə́ nkwaʼnə aghə;

²⁹ ndəŋndəŋ mbáʼ Ŋwi a ghanə mɨtən a mbó me a sáʼə lá, ma mɨ kɨ gha ndəŋndəŋ mɨtən a mbó bɨŋ ə.

³⁰ Nɨ ghɨ dzɨ́ ɨ kɨ no bɨgɨnə a mu Nɨfɔ ɨnə. Nɨ ghɨ tsí atú ɨbərɨ, ɨ saʼnɨ ɨtsé tsɨ wi tsɨ bə Yuda tsa nɨghúm ntsɔb bá ghe.”

Yeso a Fóm Fɨʼtɨ adzaŋ za Bita a Ghɨnɨ Tón ayi ɛ

³¹ “Samɔn, Samɔn! Zuʼ le! Satan a kwarɨ mɨtən a njwə́ŋtɨ́ bən taŋ ɨ zarɨ a bə shiʼnɨ a tɨtərɨ bə tɨbɔŋ tso mbáʼ ndyiʼ mɨshwom a kyɛ́rɨ́nɨ́ mɨkon abɔʼnɨ ntsaʼ ɨchi lá.

³² Lá, ma tsaʼtɨnə a Ŋwi atú gho nə Samɔn, ngə́ á abeməntəm azo a keʼ ghɔgə. Be o ghɨ́ mbə ngyen a bagɨ me, lɨʼtɨ ɨbɔmbɨma ɨbo ə.”

³³ Bita a sóŋ ngə́, “Maʼmbyí, ma mɨ kon atsáŋ bɔgə mbáʼ be o nkúŋə́ ghe, ɨ kɨ kfo bɔgə mbáʼ be o nkfǒ ghe.”

³⁴ Lá Yeso a chwɨ́gɨ́ ngə́, “Bita, á ma soŋ agho ə. Ankɨʼə mɨ keʼ tɔŋ nɨ ɨtfúʼ sɨŋə tɨgha o ton nkfu tsi tárə́ ngə́ o zhi aghə.”

Mɨmu Aban Nkáb, Aban abɔʼnɨ Lumban ə

³⁵ Yeso a tíʼ bítɨ́ bɨyɛʼ ɨbyi ngə́, “Ma tyígɨ́ awən tɨ mɨmu aban nkáb, tɨ aban abɔʼnɨ ngobɨ lá, nɨ bóŋ azúm zə tse le?” Bo chwɨ́gɨ́ ngə́, “Ngáŋ, bɨgɨ sé azúm zə tse boŋə.”

³⁶ Yeso a sóŋ ngə́, “Lá, tɨtsɔŋnɨ, ŋwɔn tsum wa a tsinɨ nɨ mɨmu aban nkáb kə aban a tsi nɨ ɨ zagɨ lɔgɨ a zɛrə; á ŋwɔn tsum wa a se tsi nɨ lumban, a tsi nɨ ɨ zagɨ fen atsɛʼ azhi ɨ zon a táʼ ɨwu ə.

³⁷ Mbɨ́ʼ ngə́ ma soŋ a mbó bən ngə́ nɨgham nɨ Ŋwi na nɨ soŋnɨ ngə́, ‹Bɨ fáʼ a nye zɨ adzaŋ za bɨ faʼnə a nye ngaŋ mbuʼ mɨnu,› nɨ mɨ zagɨ be nkənu mbɨ́ʼ aghan, mbɨ́ʼ ngə́ anu za bɨ ŋwáʼnɨ́nɨ́ mbɨ́ʼ aghan a tsi a ndóm ɨ yen fu a nye nkənu ə.”

³⁸ Bɨyɛʼ ɨbyi sóŋ ngə́, “Ze azo! Bɨlumban bi bɨbá bɨ benə ghe, a Maʼmbyí.” Yeso a tíʼ mbyigɨ a mbó bo ngə́, “Nɨ kyɛntə!”

Yeso a Tsaʼtɨ a Ŋwi Atú Mbám Olif ə

³⁹ Yeso a nyɛ́ʼtɨ́ ntáʼmbagə wu wi wa, ngɛn Atú Mbám Olif, adzaŋ za a bénɨ́ mbɔm ɨzhi lá; bɨyɛʼ ɨbyi zɔ́ŋ ayi ɛ.

⁴⁰ Mbáʼ bo ghɛ́nɨ́ nkon adiʼ wa lá, wɛrə a sóŋ a mbó bo ngə́, “A nɨ ntsáʼtə́ a Ŋwi mbɨ́ʼ nɨ vwo a mu akwaʼnɨ ə.”

⁴¹ A nyɛ́ʼtɨ́ awa, ngɛn aghagɨ azhi a chi be tso aghagɨ za bɨ maʼnɨ ngɔʼ, nkwem mɨkwiʼtɨ ɨmyi a tɨshe ntsaʼtɨ a Ŋwi ngə́,

⁴² “Tarɨ, be o ndǒ, lwɛʼtɨ adzaŋ a ndɔ́ŋ ngɨ́ʼ zen a mbyi me ghe. Lá, á be be adzaŋ za o lɔnə keʼ be be adzaŋ za a lɔnə me ghe.”

⁴³ Tsɛʼ a nyom məwa ntsendá Ŋwi zɨ tse ɨ ló a fɔməbvurə ngyen nkwiʼtɨ adaʼ azhi ɛ.

⁴⁴ Nɨ mɨlɨŋnɨ wu ngwi a kwíʼ mbə ntsáʼtɨ́ a Ŋwi tsɛʼ nɨ ntəm ɨyi ɨtsum, ndyiʼnɨ, ɨtam ɨchi tsəmkɨ a ɨshe ɨ fi ɨtam alɛm ə.

⁴⁵ A ghɨnə mɛ́tɨ́ a ntsaʼtɨ Ŋwi, ntiʼ mbə ngɛn nkwatɨ bɨyɛʼ ɨbyi ba, bɨ nɔŋ ndyě, nkɨ nkan mbɨ́ʼ asɔbɨnɨ ə.

⁴⁶ A bítɨ́ awa ngə́, “Nɨ lyě lá ake le?’ Lonə atɨ́ ntsaʼtɨnə a Ŋwi mbɨ́ʼ akwaʼnɨ a ghɨ ngaʼ awɨŋ ə.”

Adzaŋ za bɨ Konɨ a Yeso ghe

⁴⁷ Yeso a kə́ mbvúrə́ ngámə́ mbáʼ ɨnɔ ɨbɛn wa ɨ yénə́, Yudasɨ mbáʼ a bénɨ́ táʼ ngyɛʼ a tɨtərɨ ba nɨghúm ntsɔb bá lá a tsá mbyi ɛ. Wɛrə a kɔ́ʼ ngɛn a nchwɨgɨ Yeso ghe.

⁴⁸ Yeso a bítɨ́ ayi ngə́, “Yudasɨ, njingə o mɨ fen a Mɔn Ŋwɔn lá nɨ nchwɨgə le?”

⁴⁹ Adzaŋ za bɨyɛʼ ba bɨ tsínɨ́ bo bɨ Yeso zɛ́nɨ́ anu za a kɨ́nə́ ndǒ fuə lá, mbitɨ ngə́, “Maʼmbyí, bɨgɨ bvugɨ fɨto nɨ bɨlumban ɨbɨgɨ le?”

⁵⁰ Táʼ ngyɛʼ wa wu mɔʼɔ a sɔ́ŋ a lumban ɨyi mbáŋ atoŋnɨ abó maʼə zə táʼ ŋwɔn ɨwu ə. Ŋwɔn wɛnə a bé ngaŋ afaʼ a mbó Ntumshe wu Ngwi ə.

⁵¹ Lá, Yeso a sóŋ ngə́, “Kyɛntə!” Wɛrə a tságɨ́ abó azhi ɨ mɔmtɨ atoŋnɨ a ŋwɔn wa ntsuʼ a zɛrə ghe.

⁵² Yeso a tíʼ mbítɨ́ a mbó bɨntumshe bə wi ba bo ɨtú ngaŋ ndyɛm Ndáŋwi zɨ Ngwi tsa nkwiʼtɨ bɨkum bɨ alaʼ ba bɨ ghɨ́nɨ́ ngyen a nkó zɨ lá ngə́, “Njingə nɨ lo ntsi nɨ ɨ yen ko aghan nɨ bɨlumban abɔʼnɨ mɨbúʼ tso nɨ ghěn a nkó ntɨŋ ndzɛrə tse le?

⁵³ Ma kɨ chyɛ nchyɛ̌ bɨgɨnə njwi tsum a Ndáŋwi zɨ Ngwi lá nɨ sé zhwəŋtɨ a nkó me ghe. Lá, nyom ɨwən a kuʼnə a ngɨ mɨnu, nkfu za mbáʼ mɨtən mɨ ndzumnɨ tíʼnə́ sáʼə ghe.”

Bita a Ton a Yeso ghe

⁵⁴ Bɛrə tíʼ nkó ayi ngɛn nɨ zɨ a ndá Ntumshe wu Ngwi; Bita a zɔŋənə nəghagɨ ə.

⁵⁵ Bɨ tɔ́n ɨmugɨ a tɨtərɨ ɨsaŋəbyɛn ntsi ntiʼə ndzɔ́gə́, Bita a zɔŋ ntsi a tɨtərɨ bo nkə́ ndzɔ́gɨ́ ɨmugɨ məwa.

⁵⁶ Mɔn mangye, mbe ngaŋ afaʼ zɨ mangye a zé a Bita, nkyerɨ ayi ɨ soŋ ngə́, “Ŋwɔn wɛnə a kɨ chi nkɨ́ ntsí bo Yeso ghe.”

⁵⁷ Lá Bita a kwétɨ́ ayi ɨ soŋ ngə́, “Ngwe, ka ma zhi aghə ayi ɛ.”

⁵⁸ Məkum a nkfu a bənə ntsa, ŋwɔn wu mɔʼɔ a zɛn a Bita ɨ soŋ ngə́, “O kɨ mbe ŋwɔn aku ɨwa ghe!” Lá Bita a chwɨ́gɨ́ ngə́, “Ngáŋ aghə a mba wen.”

⁵⁹ Abaŋ a bənə mbe ɨwu tso táʼ nyom, ŋwɔn wu mɔʼɔ a kwiʼ ndzɔŋ nyəm ɨ soŋ ngə́, “A nɨ anu ə, ŋwɔn wen a kɨ chi ntsi bo Yeso mbɨ́ʼ ngə́ wɛrə a kɨ mbe ŋwɔn bə Galili ə.”

⁶⁰ Lá Bita a chwɨ́gɨ́ ngə́, “Mbáŋnɨ́, ka ma zhi aghə anu za o sóŋnə́ lá.” A bvúrɨ́ tsɛʼ tɨ mitɨ mɨtwe, mbáʼ a kɨ́nə́ mbvúrə́ ngámə́ ankɨʼə tse a tɔŋə.

⁶¹ Maʼmbyí a bə́ŋ ayi nkyerɨ a Bita, wɛrə a waʼtɨ nɨgham na Maʼmbyí a sóŋnɨ́ a mbó zɨ ngə́, “Mbɔŋə ankɨʼə a tɨ tɔ́ŋə́ ɨ sɨŋə, o mɨ soŋ ngə́ ka o zhi agho aghan nkfu tsi tárə́ ghe.”

⁶² Wɛrə tíʼ ntsa abyɛn mbugɨ nɨ asɔbɨnɨ ə.

Bɨgwe Werɨ a Yeso nkɨ Shwom ayi ɛ

⁶³ Ɨbɛn ba bɨ kɨ́nə́ ntsiŋə a Yeso lá, bɨ wérɨ́ ayi nkɨ shwom ayi ɛ.

⁶⁴ Bɛrə kɨ́ nkórɨ́ ɨmɨgɨ ɨmyi, ntiʼ mbitɨ ayi ngə́, “Agho lá a yibɨ ɨwa? O chi fɨʼtɨ le?”

⁶⁵ Bɛrə kɨ́ nchwé ɨnu tsɨ ghaʼnɨ atú wɛrə nkɨ ndzɔm ayi ɛ.

Bɨ Yen nɨ Yeso a Ɨshi Ngaŋ sáʼ Abyɛn

⁶⁶ Njwi lanə, bɨkum bɨ alaʼ, bɨntumshe bə wi nkwiʼtɨ bɨdiʼ bɨ Nyɔngɔŋ bɨ ghotɨ, bɨ tiʼ ngyen nɨ Yeso a ɨshi Ngaŋ Sáʼ Abyɛn ə. Ntiʼ soŋ ngə́,

⁶⁷ “Be o be Wa bɨ Zɔ́ʼnɨ́ wa, o soŋ a mbó bɨgɨ ə.” Lá wɛrə a chwɨ́gɨ́ a mbó bo ngə́, “Be ma soŋ a mbó bən muŋ nɨ mɨ keʼ mɨntəm ɨmən a nye anu za ma soŋnɨ lá nɨŋə;

⁶⁸ kə nkɨ mbitɨ awən nɨ abítɨ muŋ nɨ mɨ keʼ chwɨgə.

⁶⁹ Lá ɨ lɔgɨnɨ tɨtsɔŋnɨ ɨ tiʼə ghenə nɨ mbyi, Mɔn Ŋwɔn a mɨ shiʼtɨ tsi a bagɨ abó Ŋwi Tamɨtən Mɨtsum zə maʼə ghe.”

⁷⁰ Bo bɨtsum tíʼ mbosɨ mbitɨ ngə́, “Ma lan, o sóŋə́ ngə́ o lá Mɔn Ŋwi le?” Wɛrə a chwɨ́gɨ́ a mbó bo ngə́, “A soŋ bən ngə́ ma nɨ wɛrə ghe.”

⁷¹ Bo tíʼ sóŋ ngə́, “Bɨgɨnə kwiʼə ndǒ lá bətɛmə-ndzě bɨŋə bə daŋ le? Bɨgɨnə zuʼnə bɨgɨnə mboŋ wə ntsu ə!”