Alukasɨ 19 - Mɨkan wu Fi

Yeso bo Sakyo ghe

¹ Yeso a kón a Yeriko ntsǎ ayi ɨ tsanə.

² Atú a bɨnkwárɨ́ ashɛbɨ zə tse a tsí ɨwu, ɨkum ɨyi be Sakyo mbáʼ a tsínɨ́ nɨ afuʼ tsɛʼ nkə.

³ A kə́ ndǒ ndze ŋwɔn wa Yeso a bénɨ́ wɛrə, lá a vwúgɨ́ tɨ́sə́n nchi keʼ a Yeso zɛn mbɨ́ʼ ɨnɔ ɨbɛn wa ɨ nɔ́ŋnɨ́ adiʼ wa.

⁴ A tíʼ nkɨə ngɛn a mbyi ɨnɔ ɨbɛn wa, nkɔʼ atú atɨ a saikamɔ taŋ ɨ zɛn a Yeso, mbɨ́ʼ ngə́ a tsí nɨ ɨ yen tsa a ndóm məwa.

⁵ Mbáʼ Yeso a yénɨ́ nkuʼ adiʼ məwa lá, ndyiŋ atɨ́, ɨ soŋ a mbó Sakyo ngə́, “Waŋnɨ shiʼ a ɨshe, a Sakyo, mbɨ́ʼ ngə́ ma mɨ tsi bɔgə a ndá ɨgho ɨ sɨŋə ghe.”

⁶ Sakyo a wáŋnɨ́ shíʼ, nkwarɨ a wɛrə nɨ nɨdorɨ nə wi ə.

⁷ Ɨbɛn bɨtsum ba bɨ zɛ́nɨ́ anu məzen, chwúʼ ntíʼə nzhwúʼnə́ ngə́, “Ŋwɔn wen a bem ngə́ zɨə mɨ be ngən a njwuʼ ngaŋ ngɨ mɨbvu ə!”

⁸ Sakyo a ló atɨ́ ɨ soŋ a mbó Maʼmbyí ngə́, “Zuʼə, a Tə̧! Ma mɨ buʼnɨ afuʼ azan ɨ gha a mbó ɨfúm, be a be ngə́ ma dzɨ nkobɨ a nye ŋwɔn tse, ma mɨ byigɨnɨ ayi nkfu tsi nɨkwa ghe.”

⁹ Yeso a chwɨ́gɨ́ wəmbo ngə́, “Ɨloŋ ɨ yen a ndá wen ɨ sɨŋə mbɨ́ʼ ngə́ ŋwɔn wen a kɨ mbe ŋwɔn ɨlə̌ Abraʼm ə.

¹⁰ Mɔn Ŋwɔn a yén atuəshe lá a ndǒ ɨ kɨ loŋ ɨbɛn ba bɨ fanɨ ndóm ə.”

Nɨgham nə Nanɨ mbɨ́ʼ Nkáb Ŋwaʼŋwaʼ ə

¹¹ Mbáʼ ɨbɛn ba kɨ́nə́ njwíʼtɨ́ ɨnu tsen lá, Yeso a ghɛ́n nɨ mbyi ɨ ná nɨgham a mbó bo ghe. A kɨ chinə fátɨ́ a nkúŋə́ a Yerosalɛm, bo tiʼ nkwaʼtɨ ngə́ Nɨfɔ nɨ Ŋwi na mɨ byi fu a ɨshe.

¹² Wɛrə a tíʼ sóŋ ngə́, “A bé a nkfu tsɛrə ŋwɔn wu ngwi tse a tsi ɨwu, ngěn a nɨghan alaʼ a sagə aghagɨ á bɨ ghɨ ayi ɨwu a nye ɨfɔ, a mɛtɨ ɨwu a bən nkwɛn a njwuʼ zɨə.

¹³ Mbɔŋə a tɨ fuə, a tɔ́ŋ ngaŋ afaʼ ɨchi tsi nɨghúm nga awa bɨtsum nɨ nchwuʼ nɨghúm nɨghúm, ɨ soŋ a mbó bo ngə́, ‹A nɨ ntáŋə́ a mɨtan nɨ nkáb zen a nye nkfu zen za ma tsinɨ a nɨghan lá.›

¹⁴ Lá ɨbɛn bɨ alaʼ ɨbyi bə̂ ayi, ntiʼ ntsagɨ bɨlo bɨ ntom wə ndzum ngə́ á bɨ ghɛn ntǒtɨ a ŋwɔn wu ngwi wa a mɨ chwem ayi alaŋ tso ɨfɔ lá ngə́, ‹Ka bɨgɨ kɔŋ awɨgɨ a ŋwɔn wen ngə́ á be ɨfɔ ɨwɨgɨ ə.›

¹⁵ Bɨ yén ndzɔ́ʼ a ŋwɔn wa a nye ɨfɔ a bə nkwe. A byí ngɨ bɨ tɔŋ ngaŋ afaʼ ɨchi tsa bɨ yen a ɨshi zɨ, taŋ á tsɔʼ aku ndvuŋ nkáb wa bo fúʼnə ghe.

¹⁶ Wu ntsambyi a yén ɨ soŋ ngə́, ‹Tə̧, ma fuʼ aban a nkáb a ndzum nchwuʼ nɨghúm tsa o kɨ ghanɨ lá.›

¹⁷ A sóŋ ngə́, ‹O ghɨ ɨ shiʼnɨ ə, o nɨ ŋwɔn afaʼ wu shiʼnɨ ə! Mbáʼ o kɨ wɛmnɨ a mɨnya mɨ azúm ɨ shiʼnɨ lá, ma mɨ lɛn agho o ndə́ŋtɨ́ ntáʼmbagə tsə wi tsi nɨghúm ə.›

¹⁸ Ndzɔŋtɨ ŋwɔn afaʼ a yén ɨ soŋ ngə́, ‹Tə̧, ma fuʼ nchwuʼ mɨghúm mɨntə̧̂ a ndzum tsa nɨghúm tsa o kɨ ghanɨ ɨwən lá.›

¹⁹ A mbó məwen a sóŋ ngə́, ‹O mɨ ləŋtɨnə ntáʼmbagə tsə wi tsi tə̧̂ ghe.›

²⁰ Wu mɔʼɔ ŋwɔn afaʼ a yén ɨ soŋ ngə́, ‹Tə̧, nchwuʼ nɨghúm ɨtso tsɨ tsenə; ma kɨ nyam ndwɛʼ a tsɛrə a mu abagɨ atsɛʼ ə.

²¹ Ma kɨ chyɛ mbɔ́gə́ agho, mbɨ́ʼ ngə́ mɨkyiʼ ɨgho a bɨ́gɨ́ tɨsɨŋə. O lɔgə azúm za ka a be ayi azo, ɨ fuʼə adiʼ wa ka o bi agho ə.›

²² Mboŋnjwuʼ wa a sóŋ wəmbo ngə́, ‹Ŋwɔn afaʼ tɨbɔŋ! Ma mɨ lɔgɨ mɨgham ɨmo ɨ ghɨ o vwo ɨsáʼ nɨ mɛrə ghe! O zhi ngə́ ma nɨ ŋwɔn a bɨ́gɨ́ a mɨkyiʼ, ndɔgə azúm za ka a be ayi azan, ɨ fuʼə adiʼ wa ka ma bi aghə.

²³ A bɔŋ tsɛʼ nkə, o kɨ chi ntiʼ nkoʼ ghɛn nde nkáb ɨzan za a ndá nɨlɛnɨ nɨ nkáb ngə́ ke le? Muŋ ma kwɛn lá nkwarɨ a zɛrə nɨ abi wə ndzum ə.›

²⁴ Mboŋnjwuʼ wa a tíʼ sóŋ a mbó ɨbɛn ba bɨ tsínɨ́ a kárɨ́kɨ́ zɨ lá ngə́, ‹Nɨ kwarɨ nkáb za wəmbo nga a mbó ŋwɔn wa a tsinɨ nɨ táʼ aban a nkáb lá.›

²⁵ Lá bɨ sóŋ wəmbo ngə́, ‹Tə̧, a kwɛnə ntsi nɨ aban a nkáb ə!›

²⁶ A chwɨ́gɨ́ ngə́, ‹Ma sóŋə́ awən ngə́ a mbó ŋwɔn wa a tsinɨ nɨ zɛrə, bɨ ghɨ kwiʼtɨ a zə ghaʼtɨnə; lá ŋwɔn wa a se nɨ azúm tsi, tsɛʼ mɨnya wa a tsinɨ nɨ wɛrə lá bɨ ghɨ kwárɨ́ wəmbo ə.

²⁷ Lá, tɨtsɔŋnɨ, a mbó ngaŋ kɨban ɨtsan tsa, mbáʼ bɨ kɨ chinə nkeʼ ndǒ ngə́ á ma be ɨfɔ lá, nɨ yen nɨ bɛrə ɨghə, njwitɨ awa a ɨshi ɨmɨgɨ me ghe!›”

Adzaŋ za Yeso a kónɨ́ a Yerosalɛm tso Ɨfɔ ghe

²⁸ Yeso a nanə nɨgham nen lá, ɨ nyɛʼtɨ awa ngɛn a mbyi bo a Yerosalɛm ə.

²⁹ Mbáʼ a yénɨ́ ɨ fátɨ́ a Bɛtɨfage bo Bɛtani atú Mbám Olif za lá, ntsagɨ bɨyɛʼ ɨbyi bi bɨbá a mbyi ɨ soŋ ngə́:

³⁰ “Ghɛnə a mu atom za a tsinɨ a mbyi bən lá; adzaŋ za nɨ kónə́ lá, nɨ mɨ zɛn a mɨmu jakashi wa bɨ tɨŋnɨnɨ, mbáʼ bɨ bvúrɨ́nə́ wu atú tɨ kɔʼə. Kyəgɨnə ngyen nɨ wɛrə ghe.

³¹ Be ŋwɔn tse a bitɨ awən ngə́ nɨ kyəgə a zɛrə ngə́ ke, sóŋnə wəmbo ngə́ Maʼmbyí a lǒ a zɛrə ghe.”

³² Bɛrə lɔ́gɨ́ ndóm, ngɛn ndzɛn azúm atsum tsɛʼ adzaŋ za Yeso a sóŋnɨ́ a mbó bo lá.

³³ Adzaŋ za bo kɨ́nə́ nkyəgə a mɨmu jakashi wa lá, bɨboŋ ɨbyi bítɨ́ awa ngə́, “Nɨ kyəgə a zɛrə lá ngə́ ke le?”

³⁴ Bo chwɨ́gɨ́ ngə́, “Maʼmbyí a lǒ a zɛrə ghe,”

³⁵ ntiʼ ndɔgɨ ngɛn nɨ zɛrə a mbó Yeso ghe. Bɨ zɔ́ŋtɨ́ ntsɔ́ʼtɨ́ ɨtsɛʼ ɨtsa njitɨ ndzum mɨmu jakashi za ɨwu, ntwɛmtɨ a Yeso a kɔʼ wu atú ə.

³⁶ Mbáʼ a kɨ́nə́ ngěn lá, ɨbɛn tsɔ́ʼtɨ́ ɨtsɛʼ ɨtsa ndɨʼ a ndómnji ɛ.

³⁷ Mbáʼ a yénɨ́ ɨ fátɨ́ a Yerosalɛm, adiʼ wa ndómnji kɨ́nə́ shiʼə ngěn atú Mbám Olif lá, ɨnɔ bɨyɛʼ ɨbyi bɨ bíʼnɨ́ ngǎ mɨya a mbó Ŋwi mbóntə́ a wɛrə nɨ nji tsɨ tən mbɨ́ʼ ɨnu tsɨ wiəwi tsa bo zɛ́nɨ́ ɨ sóŋə́ ngə́;

³⁸ “A Ŋwi a fɔgɨ a ɨfɔ wa a yenə nɨ ɨkum Maʼmbyí ɛ! Mbɔnɨ a fɔməbvurə bo nɨfáŋ a mbó Ŋwi atú atəntsánɨ́ ə!”

³⁹ Bə Farisao bə tse ba bɨ tsínɨ́ a mu ɨnɔ ɨbɛn wa tíʼ sóŋ a mbó Yeso ngə́, “Ndiʼ aŋwaʼnɨ soŋ a mbó bɨyɛʼ ɨbo ngə́ á bɨ kyɛntə!”

⁴⁰ Yeso a chwɨ́gɨ́ awa ngə́, “Ma sóŋə́ awɨŋ ə, be bo kyɛntɨ, muŋ mɨngɔʼ mɨ chwuʼ ɨ tɔ́nkɨ́nə ghe.”

Yeso a Bugɨ mbɨ́ʼ a Yerosalɛm ə

⁴¹ Yeso a yén ɨ fátɨ́ ntáʼmbagə zɨ ngwi za, ntɛm, ndzɛn a zɛrə, nkyi shiʼ wu atú;

⁴² a tiʼ soŋ ngə́, “A lanɨ ngɨ ake á nɨ zhi ɨ sɨŋə anu za a mɨ fu mbɔŋə mbɔnɨ ɨ yen ɨghan a Yerosalɛm ə! Lá tɨtsɔŋnɨ nɨ chi keʼ ze!

⁴³ Nkfu ghɨ yen mbáʼ ngaŋ kɨban ɨtsən ghɨ tɛ́m karɨsɨ awən tso bɨ jigɨ nká, ɨ tiʼ jintɨ awən bɨbagɨ bɨbagɨ ə.

⁴⁴ Bɨ ghɨ zɛtɨ awən bɨtsum ɨ kwiʼtɨ a ba bɨ tsinɨ a mu ndá ɨtsən; á tsɛʼ táʼ ngɔʼ a keʼ atú zɨ mɔʼɔ bən nɔŋ, mbɨ́ʼ ngə́ nɨ sé zhi a nyom wa Ŋwi a yénɨ́ a ndoŋ bɨŋ ə!”

Yeso a Ghɛn a mu Ndáŋwi zɨ Ngwi ə

⁴⁵ Yeso a tíʼ nkón ngɛ́n a mu Ndáŋwi zɨ Ngwi ntiʼ mbiʼnɨ nkɨ̌ŋ ngaŋ ntáŋ mɨtan wə mu,

⁴⁶ ɨ soŋ a mbó bo ngə́, “A tsi a mu aŋwaʼnɨ a Ŋwi ngə́ Ŋwi a sóŋ ngə́, ‹Ndá ɨzan ghɨ bé ndá atsaʼtɨ a Ŋwi ə.› Lá nɨ lɔgɨ a zɛrə mbənkɨ a nye adiʼ za mɨzɛrə lyɛmtɨnə ɨwu ə!”

⁴⁷ Njwi ɨtsum, Yeso a kə́ ndiʼə anu a Ŋwi a mu Ndáŋwi zɨ Ngwi ə. Bɨntumshe bə wi, bɨdiʼ bɨ Nyɔngɔŋ abɔʼnɨ bɨsáʼ bɨ alaʼ kə́ ndǒ njwitɨ wɛrə,

⁴⁸ lá nchi keʼ ndóm zɛn, mbɨ́ʼ ngə́ ŋwɔn tsum a kə́ njwíʼtə́ anu za a kɨ́nə́ sóŋə́, nkeʼ ndǒ samə tsɛʼ táʼ atú a nɨgham ə.