Alukasɨ 11 - Mɨkan wu Fi

Yeso a Diʼ Adzaŋ za bɨ Tsaʼtɨnə a Ŋwi ə

¹ A bé a njwi tsɛrə Yeso a tsaʼtɨnə a Ŋwi adiʼ zə tsɛrə ghe. A ghɨnə mɛ́tɨ́, táʼ ngyɛʼ ɨyi a soŋ wəmbo ngə́, “Maʼmbyí, diʼ awɨgɨ nɨ adzaŋ za bɨ tsaʼtɨnə a Ŋwi, tso mbáʼ Yoane a díʼnɨ́ bɨyɛʼ ɨbyi lá.”

² Yeso a sóŋ a mbó bo ngə́, “Be nɨ ndǒ ntsaʼtɨ Ŋwi, nɨ soŋ ngə́: ‹Tarɨ, á bɨ ngúʼsɨ́ ɨkum ɨgho wa a nɨ wu fɛmnɨ ə. A anu a nɨfɔ azo a yiŋə.

³ Gha awɨgɨ njwi tsum nɨ azúm zə dzɨnə;

⁴ lɨgɨnɨ mɨbvu ɨmɨgɨ, mbɨ́ʼ ngə́ bɨgɨ lɨgɨnɨ mɨbvu mɨ ɨbɛn bɨtsum ba bɨ fanə a nye bɨgɨ ə; koʼ nyɛʼtɨ á bɨgɨ vwo a mu akwaʼnɨ ə.›”

⁵ Yeso bə́ ntíʼ sóŋ a mbó bɨyɛʼ ɨbyi ngə́, “Lɔgɨ ngə́ táʼ ŋwɔn nɨbən a ghɛn a ndá ɨson ɨyi a ntɨŋ ɨtfúʼ ɨ soŋ wəmbo ngə́, ‹Ɨson ɨghan, tsɔʼtɨ aghan nɨ mbɛʼ abán tsi tárə́ ghe.

⁶ Ɨson ɨghan wu tse mbáʼ a ghɛnə a nɨghan a dum ngyen a ndá me, ma kaʼ tsi nɨ azúm a mɨdzɨ wəmbo ə!›

⁷ Lɔgɨ ngə́ ɨson ɨgho wa a chwɨgɨ ntsi ayi a mu ndá zɨ ngə́, ‹Koʼ aghə a ngágə́ ghe! Ma fənɨ ntsundá, bɨgɨ bɨ ɨbɔ ɨbə nɔŋnə awɨgɨ bo ghe. Ma chi kaʼ bə ndo atɨ́ nga azúm zə tse a mbó gho ghe.›

⁸ Tsɛʼ ɨ shiʼnɨ, ake a mɨ tiʼ ghɨ le? Ma soŋ a mbó gho ngə́ be a kwɛ ntsi tú lo atɨ́ ɨ gha abán za a mbó gho, mbɨ́ʼ ngə́ o nɨ ɨson ɨyi, lá a mɨ lo atɨ́ ɨ gha azúm atsum za o lɔnə a mbó gho mbɨ́ʼ ngə́ ka o ndɨ́rə́ agho atú a ngěn nɨ mbyi ɨ bítɨ́nə ghe.

⁹ Ma tiʼ ngɛn ɨwu ɨ soŋ a mbó gho ngə́: bitə, o mɨ kwarə; shwaʼə; o mɨ ze; kwɛntə, bɨ mɨ ŋaʼ ntsundá a mbó gho ghe.

¹⁰ Mbɨ́ʼ ngə́ ŋwɔn tsum wa a bítɨ́nə́, a kwárə́ ghe, wa a shwaʼnə, a zě ghe, bɨ ŋǎʼ ntsundá a mbó ŋwɔn tsum wa a kwɛntɨnə ghe.

¹¹ Ŋwɔn nɨbən wu tse wa a nɨ tarɨ a chi gha ɨnyo a mbó mɔn ɨyi mbáʼ be a bitɨ ɨshwú le?

¹² Kə o chi gha ayi nɨ angámshe mbáʼ a bitɨnɨ nɨbom le?

¹³ Be bən wa nɨ bɨ́gɨ́nɨ́, nɨ zhi adzaŋ a ngá ɨdzúm tsɨ shiʼnɨ a mbó ɨbɔ ɨbən, a ghɨ tiʼ bə be ɨ nə́ a mbó Tarɨ a fɔməbvurə a ngá Azhwi zə Fɛmnɨ a mbó ɨbɛn ba bɨ bitɨnɨ wəmbo le!”

Yeso bo Bɛlzɛbu ə

¹⁴ Yeso a kə́ nkɨŋə a dzɨŋ wu tse wa a kúgɨ́nɨ́nə́; dzɨŋ wa a funə lá, ŋwɔn wa a tsínɨ́ wə mu ɨnye lá a biʼnɨ ntiʼə ngamə ghe. Anu zə wu a kɨ́ʼnɨ́ ɨnɔ ɨbɛn wa ɨ tsínɨ́ ɨwu,

¹⁵ lá ɨbɛn ba bə tse sóŋ ngə́, “A nɨ Bɛlzɛbu, ɨfɔ bɨdzɨŋ, mbáʼ a ghánə́ mɨtən wəmbo a kɨŋənɨ bɨdzɨŋ ba ɨwu ə.”

¹⁶ Bə mɔʼɔ kə́ ndǒ mbentɨ Yeso, ntiʼ soŋ wəmbo ngə́ á ghɨ anu zə yerɨnɨ-yerɨnɨ za a lonɨ a fɔməbvurə ghe.

¹⁷ Lá Yeso a zhí ɨkwaʼtɨ ɨtsa, ntiʼ soŋ a mbó bo ngə́, “Alaʼ atsum za a yɛbtɨnɨ awa, ntsi a achwirɨ achwirɨ, ntǒkə́ awa bo nɨbo, bɨ mɨ keʼ tsi á abaŋ a satə; ngwəgɨ tsum za ɨ tsinɨ achwirɨ achwirɨ ɨ dzagɨnə ghe.

¹⁸ Ma lan, be nɨfɔ nɨ Satan tsi achwirɨ achwirɨ, nɨ ghɨ tiʼ ghɔŋ lá ɨ nə́ le? Ma sóŋə́ adzaŋ məwen lá mbɨ́ʼ ngə́ nɨ sóŋə́ ngə́ ma kɨ̌ŋ bɨdzɨŋ nɨ mɨtən mɨ Bɛlzɛbu ə.

¹⁹ Be lə be adzaŋ za ma fɨ́gɨ́nɨ́ bɨdzɨŋ, ɨbɛn ba bɨ zɔŋnə awən tiʼə fɨ́gə́ a bɛrə lá ɨ nə́ le? Ɨbɛn ba bɨ zɔŋnə awən diʼ ngə́ nɨ fə!

²⁰ Ngáŋ, a baŋnɨ mbe be nɨ mɨtən mɨ Ŋwi mbáʼ ma fígɨ́nɨ́ bɨdzɨŋ, ma lan, a tiʼ ndiʼ ngə́ nɨfɔ nɨ Ŋwi yenə a mbó bɨŋ ə.

²¹ Be ntɨŋ ŋwɔn a ntsǐŋ njwuʼ ɨzhi nɨ ɨdzúm nkyɛm ɨnye ɨchi ɨtsum, ŋwɔn tse a chi keʼ bən ndze ɨdzúm ɨchi ɛ.

²² Lá be ŋwɔn wa a tənɨ ntsa ayi a zumtɨ ayi nɨ fɨto, ngaʼ ayi, a kwarɨ ɨdzúm nkyɛm ɨnye ɨchi tsa a kɨ zhinɨ ngə́ tsɨ nɨ atsum atsum a mbó zɨ lá, ntiʼ ndze ɨdzúm ŋwɔn wa ngɛn ngyɛbtə.

²³ Ŋwɔn tsum wa a se a bagɨ me tsi, a kwənkə bɨgɨ zɨə; ŋwɔn tsum wa a sě aghə a nkwátə́ a ngótə́, a dzagə ghe.”

Adzaŋ za Azhwi zə Tɔmnɨnɨ a Fúnə́ Mbɨ́ŋə́ Mbɨŋə ghe

²⁴ “Azhwi zə tɔmnɨnɨ a ghɨ fu a nye ŋwɔn lá, a numə nkárə́ a mu ɨdiʼ tsɨ zobɨnɨ ndǒ adiʼ zə zhwitɨnə. Be a tú adiʼ zɛn, a soŋ a mbó atuəmbəm azhi ngə́, ‹Ma mɨ bə ghɛn aghə a ndá me ghe.›

²⁵ A bə́ mbən, a zɛn ngə́ ndá ɨzhi za ɨ fɛ́mə́, bɨ kɨ nkyaŋtɨ a zɛrə ɨ shiʼnɨ ə.

²⁶ Wɛrə a tiʼ fu ngɛn nghuŋ ɨzhwi tsə daŋ tsi samba tsa tsɨ bɨ́gɨ́nɨ́ ntsa ayi, bo bo tiʼ ngyen ntsi ɨwu ə. A ndwitə, ŋwɔn məwa a bə mbɨ́gɨ́ ntsa adzaŋ za a kwɛ́nɨ́ mbé a mbiʼnə ghe.”

Nkasɨ Nɨdorɨ ə

²⁷ Mbáʼ Yeso a sóŋnɨ́ adzaŋ wen lá, mangye wu tse a nyɛ́nɨ́ ndo a mu ɨnɔ ɨbɛn wa, ɨ soŋ wəmbo ngə́, “Nɨdorɨ tsi a mbó mangye wa a jwínɨ́ agho nkɨ nkúgə́!”

²⁸ Lá Yeso a chwɨ́gɨ́ ngə́, “Nɨdorɨ, baŋnɨ ntsi be a mbó ŋwɔn tsum wa a zúʼnə́ anu a Ŋwi nkə́ ndě a zɛrə ghe!”

Ɨbɛn Lǒ Ndzě Anu zə Yerɨnɨ-yerɨnɨ ə

²⁹ Adzaŋ za ɨnɔ ɨbɛn kɨ́nə́ níʼnə́ nkárɨ́sə́ ayi lá, wɛrə a ghɛ́n nɨ mbyi ɨ soŋ ngə́, “Ntɔm ɨ lanɨ ntsi a nye ɨbɛn bɨ sɨŋə be tɨsɨŋə! Bo bítə́ anu zə yerɨnɨ-yerɨnɨ, lá bo mɨ keʼ a zə tse zɛn ntsa anu zə yerɨnɨ-yerɨnɨ za fúnɨ́ a nye Yǒna ghe.

³⁰ Ndəŋndəŋ, mbáʼ Yǒna a bénɨ́ alɨgɨ a mbó ɨbɛn bɨ Ninive lá, nə nɨ adzaŋ za Mɔn Ŋwɔn a ghɨnɨ bé alɨgɨ a mbó ɨbɛn bɨ sɨŋə ghe.

³¹ A lo bé a Njwi Nɨsáʼ, á Mangye wa a kɨ́nə́ sáʼə a Shɛba lá a lo ntɛm nkaŋ ɨbɛn bɨ sɨŋə, mbɨ́ʼ ngə́ wɛrə yíŋ nɨyen nə sa ndo alaʼ zɨ ngyen njwiʼtɨ a zóŋ Ɨfɔ Sanɨmɔ ghe; ma tiʼə soŋə awɨŋ ə, ŋwɔn tse a tsi ɨghan ntsa a Ɨfɔ Sanɨmɔ ghe.

³² A lo bé a Njwi Nɨsáʼ, á ɨbɛn bɨ Ninive lo ntɛm nkɨ nkaŋ awən, mbɨ́ʼ ngə́ bɛrə bə́ŋ mɨntəm ɨma a nye mɨbvu ɨma ntiʼ ntsi a bagɨ Ŋwi a nkfu wa bɛrə zúʼnɨ́ anu a Ŋwi a mbó Yǒna ghe; ma tiʼə soŋə a mbó bən tsɛʼ a nkənu ngə́ ŋwɔn tse a tsi ɨghan ntsa a Yǒna ghe!”

Nkaʼ Mbəmnye

³³ “Ka ŋwɔn tse a nchwúʼə ayi nkaʼ ndwɛʼə a wɛrə kə ntságə́ a wɛrə a shwúrɨ́ ɨkon ə; a baŋnə ntɛ́gə́ atú atɛkɨ a nkaʼ taŋ ɨbɛn kon a ndá bɨ ze ɨdiʼ ə.

³⁴ Ɨmɨgɨ ɨmo tsi lá tso nkaʼ wa bɨ chwuʼnɨ a mbó mbəmnye ɨzo ghe. Be ɨmɨgɨ ɨmo tsi ɨ shiʼnɨ, mbəmnye ɨzo tsum tsi nɨ nkaʼ ə; lá be ɨmɨgɨ ɨmo tú ɨ shiʼnɨ tsi, mbəmnye ɨzo tsum ɨ tsi a mu ndzumnɨ ə.

³⁵ Tíʼ lá ndə atú azo ngə́ nkaʼ wa ɨ tsinɨ a ɨnye gho se ndzumnɨ be.

³⁶ Be nkaʼ luŋ ɨnye ɨzo tsum, tɨ adiʼ zə tse a ndzumnɨ, ɨ mɨ fugɨ ɨdiʼ ɨtsum, tsɛʼ tso mbáʼ nkaʼ wa bɨ chwúʼnə́ ɨ baŋnə a nye gho nɨ ɨfugɨ ɨzhi lá.”

Yeso a kaŋ bə Farisao abɔʼnɨ Bɨdiʼ bɨ Nyɔngɔŋ ə

³⁷ Mbáʼ Yeso a mɛ́tɨ́nɨ́ a ngamə lá, ŋwɔn bə Farisao a ghón a wɛrə ngə́ á yen ndzɨ bo zɨə; a tíʼ ngɛn ɨwu ɨ shiʼtɨ ntsi a ndzɨ́ə ghe.

³⁸ A kɨ́ʼnɨ́ a Ŋwɔn bə Farisao wa mbáʼ a zɛ́nɨ́ ngə́ Yeso a dzɨ́ tɨ sugɨ mbó ɨmyi adzaŋ za Nyɔngɔŋ Mǒse a díʼnə́.

³⁹ Ma lan, Maʼmbyí a tíʼ soŋ wəmbo ngə́, “Bɨŋ bə Farisao sugɨ ndzum ndɔ́ŋ bo bɨ ɨkáŋ ɨtsən, lá a mu bən a luŋ adzɨə a mɨtən ɨwu abɔʼnɨ abɨgəntəm ə.

⁴⁰ Ɨdzɨŋtɨ tsenə, Ŋwi wa a káʼnɨ́ abyɛn, a sé tsɛʼ zɨ kɨ mbé wa a káʼnɨ́ ɨmu le?

⁴¹ Lá, ghanə atsum za a tsinɨ a mu, a mbó ɨfúm ə, taŋ á diʼ ngə́ ɨnu ɨtsɨŋ ɨtsum tsɨ fɛm a mu mbɔm ɨshi ɨmɨgɨ ə.

⁴² Wei ngɨ́ʼ zɨ ngwi a nye bɨŋ ə a bə Farisao! Mbɨ́ʼ ngə́ nɨ ghǎ ndza tsa nɨ kánə́ tso ɨyen, ɨshwe abɔʼnɨ tsə mɔʼɔ mbáʼ nɨ yɛbtɨnɨ ɨdiʼ tsi nɨghúm nga a táʼ a mbó Ŋwi, lá ngwágɨ́nɨ́ ngɨ ɨnu tsɨ tɛmnɨnɨ abɔʼnɨ nkɔŋ Ŋwi; ɨnu tsiŋ ɨtsum nɨ tsi nɨ ngɨ tsɛrə tə́ ngwágɨ́nə́ a tsa nɨ ghɨnə lá.

⁴³ Wei ngɨ́ʼ zɨ ngwi a nye bɨŋ bə Farisao! Mbɨ́ʼ ngə́ nɨ kɔŋ ɨlaŋ ɨbɛn bə wi a mu ndáŋwi bə Yuda nkɨ nkɔŋ á bɨ ntsáʼtə́ awən a ɨsamnɨ mɨtan ə.

⁴⁴ Wei ngɨ́ʼ zɨ ngwi a nye bɨŋ ə! Mbɨ́ʼ ngə́ nɨ fi mɨshe ma ka bɨ lisɨ ayi, ɨbɛn tɛmtɨnə atú mɛrə tɨ zhyɛ.”

⁴⁵ Táʼ Ndiʼ Nyɔngɔŋ wa wu tse a sóŋ wəmbo ngə́, “Ndiʼ aŋwaʼnɨ, o tɨ sǒŋ ɨnu tsenə lá, o kə́ ndzɔmə awɨgɨ lá ɨ zɔmnə!”

⁴⁶ Yeso a chwɨ́gɨ́ ngə́, “Wei ngɨ́ʼ zɨ ngwi a nye bɨŋ ngaŋ Ndiʼ Nyɔngɔŋ wəbɔʼ ə! Mbɨ́ʼ ngə́ nɨ zhǐʼ ɨbɛn nɨ abyɛʼ za a dɨrɨnɨ tɨ́sə́n a mbyɛʼə, lá bɨŋ mboŋ, nɨ chi keʼ zhwəŋtɨ a nkwátɨ́ bo nɨ abyɛʼ məza kə́ tsɛʼ mɨnya ghe.

⁴⁷ Wei ngɨ́ʼ zɨ ngwi a nye bɨŋ ə! Nɨ vwǔ ɨtú mɨshe ntóm Ŋwi tsɛʼ ɨ shiʼnɨ ə — lá ntóm Ŋwi mətsen tsɨ bé tsa bɨta ɨbən bə kɔ́ʼɔ́nguʼ zhwítɨ́nə́.

⁴⁸ Bɨŋ mboŋ nɨ běm ɨnu tsa bɨta ɨbən bə kɔ́ʼɔ́nguʼ ghɨ́nə́; bo zhwítɨ́ ntóm Ŋwi, nɨ tiʼ nkɨ ngvwu ɨtú mɨshe ɨtsa ghe.

⁴⁹ Mbɨ́ʼ ɨshwúrɨ́ ɨnu mətsen, Ŋwi a mu zóŋ ɨyi a sóŋ ngə́, ‹Ma mɨ tsagɨ ntóm Ŋwi abɔʼnɨ ntóm Yeso a mbó bə Yuda; á bo dɨgɨ a bə tse nkɨ njwitɨ a bə mɔʼɔ ghe.›

⁵⁰ Ma lan, ɨbɛn bɨ sɨŋə mɨ ze ngɨ́ʼ mbɨ́ʼ adzaŋ za bo chwírɨ́nɨ́ alɛm a ntóm Ŋwi nchwuʼnɨ nkfu za mbáʼ Ŋwi a káʼnɨ́ atuəshe zen,

⁵¹ ndɔgɨnɨ a nchwirɨ alɛm a Abɛrɨ ɨ kuʼ a nchwirɨ alɛm a Zakaria wa bɨ zhwítɨ́nɨ́ a tɨtərɨ atú a mɨkuʼ bo adiʼ zə fɛmnɨ lá. E, ma soŋ a mbó bən ngə́ ɨbɛn bɨ sɨŋə wɛnə mɨ ze ngɨ́ʼ atú bo bɨtsum ə!

⁵² Wei ngɨ́ʼ zɨ ngwi a nye bɨŋ ngaŋ ndiʼ Nyɔngɔŋ ə! Nɨ lwɛʼ akugɨ a ndá azhyɛ; bɨŋ mboŋ nɨ chi keʼ wə mu kuŋə, lá nkɨ̌ŋ ɨbɛn ba bɨ zhwə́ŋtɨ́nɨ́ nkuŋə wə mu ə!”

⁵³ Nkfu za mbáʼ Yeso a lónɨ́ adiʼ məwa lá, ngaŋ ndiʼ Nyɔngɔŋ bo bɨ bə Farisao tíʼ mbiʼnɨ sǒŋ ɨnu tɨbɔŋ mbɨ́ʼ ayi nɨ mɨlwi nkə́ mbítə́ ayi nɨ ɨbítɨ mbɨ́ʼ ɨnu tsə ghaʼnɨ

⁵⁴ ndɔ́btə́, mbéntɨ́ bɨ makyɛn nɨ ɨbítɨ tsa tsɨ mɨ ghɨ á wɛrə a soŋ anu za ka a kuʼnɨ ayi ɛ.