Alukasɨ 10 - Mɨkan wu Fi

Yeso a Tyigɨ Ɨbɛn Mɨghúm mi Samba nɨ ntsɔb bá ba bɨ kɨ́nə́ Ndzɔŋə ayi ɛ

¹ Məzen a tsanə, Maʼmbyí a bə nkwiʼ ntsɔʼ ɨbɛn bə mɔʼɔ mɨghúm mi samba nɨ ntsɔb bá, ntyigɨ awa bɨbá bɨbá ngə́ á bɨ ghɛn a mbyi zɨ a mu ntáʼmbagə ɨtsum abɔʼnɨ ɨdiʼ ɨtsum tsa mbáʼ zɨmboŋ a tsínɨ́ nɨ ngěn ɨwu ə.

² A sóŋ a mbó bo ngə́, “Mɨdzɨ mə fuʼnɨ ghaʼ a mu ɨshwom, lá bɨfuʼ kətɨ a fuʼ ɨ kwɛn nɨ mɛrə ghe. Tsaʼtɨnə a Ŋwi, zɨ wa nɨ mboŋ ɨshwom ngə́ á tyigɨ bɨfuʼ á bɨ fuʼ nkwɛn nɨ mɛrə ghe.

³ Ghɛnə! Ma tyígə́ awən tso ɨbɔ bɨ mbyindzɨ a tɨtərɨ bəngwabaʼ ə.

⁴ Nɨ keʼ a mɔn aban nkáb, kə aban, kə ngobɨ lɔgə; nkeʼ kɨ ntɛm a ntsaʼtɨ ŋwɔn tse a ndómnji ɛ.

⁵ Nkfu tsum za nɨ konɨ a mu ndá, fom soŋnə ngə́, ‹A mbɔnɨ ɨ tsi a ndá wiŋ ə.›

⁶ Be ŋwɔn wa a kɔŋnɨ mbɔnɨ a tsi a ndá wa, á atsaʼtɨ a mbɔnɨ azən a ghɔŋ wə ɨnye; a tú lá bé, nɨ bə nkwarɨ atsaʼtɨ a mbɔnɨ azən wədiʼ ə.

⁷ A nɨ ghɔŋ a mu ndəŋndəŋ ndá məza, ndzɨ́ə nkə́ nǒ azúm atsum za bɨ ghanɨ a mbó bɨŋ ə mbɨ́ʼ ngə́ a nɨ adiʼ a ngaŋ afaʼ a nkwárɨ́ nkáb afaʼ ɨzhi ɛ. Nɨ keʼ ngyíŋə́ nkárə́ nɨ ndá nɨ ndá ə.

⁸ Nkfu tsum za nɨ ghɛnɨ a mu ntáʼmbagə zɨ tse, bɨ kwarɨ awən ɨ shiʼnɨ, dzɨnə azúm atsum za bɨ ghanɨ a mbó bən,

⁹ ntsuʼ ngaŋ mɨghɔ a mu ntáʼmbagə məwa, ɨ soŋ a mbó ɨbɛn bɨ adiʼ məwa ngə́, ‹Nɨfɔ nɨ Ŋwi yenə ɨ fatɨ awɨŋ ə.›

¹⁰ Lá, nkfu tsum za nɨ konɨ a mu ntáʼmbagə tse bɨ keʼ awən kwarɨ ɨ shiʼnɨ, fu ngɛnə nɨ ɨtú ɨfaŋnɨ ɨ soŋnə ngə́,

¹¹ ‹Tsɛʼ abvuŋnɨ a ntáʼmbagə azən za a ŋanɨ a shwúrɨ́ mɨku bɨgɨ, bɨgɨ chiʼ a zɛrə a fu ngɛn a nye bɨŋ ə. Lá waʼtɨnə ngə́ Nɨfɔ nɨ Ŋwi yenə ɨ fatɨ awɨŋ ə!›

¹² Ma sóŋə́ a mbó bən tsɛʼ a nkənu ngə́ a Njwi Nɨsáʼ nɨ Ŋwi, Ŋwi a ghɨ diʼ a mɨlɨŋnɨ wa a ghɛnɨ nɨ mbyi a mbó Sodom ɨ tsa ɨbɛn bɨ ntáʼmbagə məwa!”

Ntáʼmbagə Tsa Tsɨ sé Nɨ́ŋ Mɨntəm ɨma a nye Anu a Ŋwi ə

¹³ “Wei ngɨ́ʼ zɨ ngwi a nye bɨŋ ɨbɛn bɨ Chorəzɨn! Wei ngɨ́ʼ zɨ ngwi a nye bɨŋ ɨbɛn bɨ Bɛtɨsaida! Ɨnu tsɨ yerɨnɨ-yerɨnɨ tsa bɨ ghɨ́nɨ́ a nye bən, bɨ bé ghɨ́ a tsɛrə lá a Taya bo Saidɔn, muŋ ɨbɛn ba ɨwu, ɨ lɔgɨnɨ a lɔ́ʼkwam, bɨ kwɛ́nə nkəmnɨ, ngwəgɨ ɨtsɛʼ ndzə́ŋnə́ nkɨ fuʼ ɨtumbəm ɨtsa nɨ abvu, a ndiʼə ngə́ bo bəŋnə mɨntəm ɨma a nye mɨbvu ɨma ntiʼ ntsi a bagɨ Ŋwi ə!

¹⁴ Ŋwi a ghɨ diʼ a mɨlɨŋnɨ wu ngwi a Njwi Nɨsáʼ zɨ a mbó ɨbɛn bɨ Taya bo Saidɔn ɨ tsa awɨŋ ə.

¹⁵ A mbó gho nə Kabɛrɨnaum! O kə́ ndǒ nkɔʼsɨ atuəmbəm azo á kɔʼ ngɛn mɔmtɨ fɔməbvurə le? Bɨ ghɨ zhwíbɨ́nɨ́ agho a mu ɨmugɨ nɨnkoŋ ə!”

¹⁶ Yeso a sóŋ a mbó bɨyɛʼ ɨbyi ngə́, “Ŋwɔn tsum wa a zúʼnə́ a mbó bən, a zúʼə a mbó me, ŋwɔn tsum wa a tonɨ awən a ton aghə; ɨ bə ghɛn ɨwu, ŋwɔn tsum wa a tonɨ aghan a ton lá a ŋwɔn wa a tságɨ́nɨ́ aghə.”

Adzaŋ za ba Mɨghúm mi samba nɨ ntsɔb bá ba bɨ kɨ́nə́ Ndzɔŋə a Yeso a bɨ Bə́nɨ́ Nkwé

¹⁷ Bo ba mɨghúm mi samba nɨ ntsɔb bá bə́ kwɛ́n nɨ nɨdorɨ nə wi ə. Bo sóŋ ngə́, “Maʼmbyí, ɨ ghɛn kuʼ a nye bɨdzɨŋ, bɨ zúʼnɨ́ awɨgɨ mbáʼ be bɨgɨ soŋ ngə́ á bo ghɨ anu nɨ ɨkum ɨgho!”

¹⁸ Yeso a chwɨ́gɨ́ a mbó bo ngə́, “Ma zɛ́n a Satan a vwo tso azhwibtɨ a mbəŋ a lo a fɔməbvurə ghe.

¹⁹ Zhwiʼtɨnə! Ma ghanə mɨtən a mbó bən, taŋ á nɨ chi tɛmtɨ atú mɨnyo bo bəngámshe ɨ kɨ gháʼ adaʼ a Ŋwɔn Kɨban, á azúm zə tse keʼ awən mɔmtə.

²⁰ Lá á nɨ keʼ ndórə́ be mbɨ́ʼ ngə́ ɨzhwi tsɨ tɔmnɨnɨ zúʼnə́ awɨŋ ə, nɨ ndórə́ be mbɨ́ʼ ngə́ bɨ ŋwaʼnɨnə mɨkum ɨmən a fɔməbvurə ghe.”

Yeso a Dorə

²¹ A bé a nkfu məwa lá, Azhwi zə Fɛmnɨ a lwɨ́gɨ́ ntəm Yeso nɨ nɨdorɨ, a soŋ ngə́, “Tarɨ, Maʼmbyí wu fɔməbvurə bo wu atuəshe! Ma gha a mɨya a mbó gho mbɨ́ʼ ngə́ o diʼ a mbó bɨtɨzhi ɨnu tsa o lwɛʼnə a mbó bɨzhyɛ. Eŋə, a Tarɨ, nə nɨ adzaŋ za o kɨ́nə́ ndǒ ngə́ á ghɨ́ fuə.

²² Ta ɨghan a ghanə ɨdzúm ɨtsum a mbó me ghe. Ka ŋwɔn tse a zhi ayi a ŋwɔn wa a nɨ Mɔn ntsa a Tarɨ, ŋwɔn tse a keʼ kɨ nji a ŋwɔn wa a nɨ Tarɨ ntsa a Mɔn, nkwiʼtɨ ɨbɛn ba Mɔn a zarɨnɨ ngə́ á bɨ zhi a Tarɨ ə.”

²³ Yeso a bə́ŋ ayi bo bɨ bɨyɛʼ ɨbyi tsumnɨ, a soŋ a mbó bo ngə́, “Ɨfɔgə wu wi ɨ tsi a mbó bən wa nɨ zɛ́nɨ́ ɨnu tsen tsa nɨ zɛ́nə́ lá!

²⁴ Ma soŋ a mbó bən ngə́ Ntóm Ŋwi bo bɨ Bɨfɔ bə ghaʼnɨ kə́ ndǒ ndzě ɨnu tsen tsa nɨ zɛ́nə́ lá, lá nchi keʼ ze, ɨ kɨ zuʼ a tsa nɨ zúʼnə́ lá, lá nchi keʼ zuʼə.”

Nɨgham nə Nanɨ Mbɨ́ʼ a Ŋwɔn Samaria wu Shiʼnɨ ə

²⁵ Ndiʼ Nyɔngɔŋ wu tse a yén a njwiʼtɨ ntsu Yeso ghe. Wɛrə a bítɨ́ ngə́, “Ndiʼ aŋwaʼnɨ ma mɨ zagɨ ghɨ lá ɨ nə́ taŋ ɨ kwarɨ ntsi ntən nɨnkoŋ za le?”

²⁶ Yeso a chwɨ́gɨ́ wəmbo ngə́, “Aŋwaʼnɨ a Ŋwi a soŋ ngə́ ke le? O bəgɨrɨ ndzuʼ ngə́ ke le?”

²⁷ Ŋwɔn wa a chwɨ́gɨ́ ngə́, “‹Kɔŋ a Maʼmbyí Ŋwi ɨgho nɨ ntəm ɨgho ɨtsum, nɨ gharɨ ɨgho tsum, nɨ adaʼ azo atsum abɔʼnɨ akwaʼtɨ azo atsum ə›; nkɨ ‹Nkɔŋ a ŋwɔn nɨbarə ɨgho tso atuəmbəm azo ə.›”

²⁸ Yeso a bémtɨ́ ngə́, “O soŋ tsɛʼ nkə, á ngɨə a məzen, o mɨ tsi ntɨŋ ə.”

²⁹ Lá ndiʼ Nyɔngɔŋ wa kə́ ndǒ ndiʼə ngə́ abítɨ azhi a kuʼnɨ ntiʼ mbitɨ a Yeso ngə́, “Ŋwɔn nɨbarə ɨghan a lá ɨwa le?”

³⁰ Yeso a chwɨ́gɨ́ ngə́, “Ŋwɔn tse a tsí ɨwu, ndo a Yerosalɛm ngěn a Yeriko, mɨzɛrə kanɨ nchwa ayi, ɨ sɔtɨ ɨtsɛʼ wə ɨnye, nghɔʼ ayi nɨ mbɨ́ŋ a tiʼ a ntsu nɨvwo ə.

³¹ Tsɛʼ a nyom məwa, ntumshe wu tse a tsanə a ndómnji məwa; mbáʼ a zɛ́nɨ́ a ŋwɔn wa a tɨshe lá, a ghɔ́btɨ́ awəŋ a ndómnji zə mɔʼɔ ntsa ayi ɛ.

³² Tsɛʼ a nye mbon məwa ŋwɔn ɨlə̌ ndá Levi a kə́ ngyiŋə, ngɛn ndəŋtɨ a ŋwɔn wa mbə ndaŋ ndómnji nghɔbtɨ ngɛn ayi ɛ.

³³ Lá ŋwɔn bə Samaria wa a kɨ́nə́ ntsǎ a ndóm məwa, a yén ɨ fu a nye ŋwɔn wa, mɨlɨŋnɨ a lwɨgɨ ntəm ɨyi ɛ.

³⁴ A ghɛ́n wə mbyɛn, ndzɔʼ ɨlagɨ tsa nɨ mɨvwurɨ, ɨ nɨŋ afu ɨwu nkorɨ a tsɛrə; ntsɔʼ ayi nzhwəgɨrɨ atú ɨnyam abyɛʼ ɨzhi ngɛn nɨ wɛrə a mu ndá ngaŋ nɨghan zɨ tse ntiʼ ndə̌tú wə ɨnye ə.

³⁵ Njwi zɨ mɔʼɔ bənə ngyen, a fɨgɨ nchwuʼ tsi tə̧̂ nga a mbó ŋwɔn afaʼ ndá ngaŋ nɨghan za. A sóŋ wəmbo ngə́, ‹Lətu wə ɨnye, ma mɨ bə tɨ kwě ɨ byigɨnɨ agho nɨ azúm atsum za o tsəŋnɨ wə ɨnye ə.›”

³⁶ Yeso a tíʼ ndwɨgɨnɨ mbitɨ ayi ngə́, “A nye azo akwaʼtɨ o kwaʼtɨ ngə́ a tɨtərɨ ɨbɛn ben bi bɨtárə́, a fáʼ ɨwa tso ŋwɔn nɨbarə ŋwɔn wen wa mɨzɛrə shwómnɨ́ lá le?”

³⁷ Ndiʼ Nyɔngɔŋ wa a chwɨ́gɨ́ ngə́, “Wa a ghɨ́nɨ́ ɨbɔŋ wə ɨnye lá.” Yeso a byígɨ́ ngə́, “Ghɛn, lá, a ntiʼə ngɨə tsɛʼ adzaŋ məwa.”

Yeso a Ghantɨ a Marɨta bo Mɛrɨ ə

³⁸ Mbáʼ Yeso bo bɨ bɨyɛʼ ɨbyi kɨ́nə́ ngěn awa lá, a yén nkón a mu atom zə tse za mangye tse a tsínɨ́ ɨwu bɨ tɔŋə nɨ Marɨta ghe. Marɨta a kwárɨ́ a wɛrə ɨ shiʼnɨ a ndá zɨə.

³⁹ A tsí nɨ mɨma ɨyi wu mangye, ɨkum ɨyi be Mɛrɨ ə. A shíʼtɨ́ ntsi a ɨshi mɨku Maʼmbyí ndzúʼə anu a Ŋwi za a kɨ́nə́ sóŋə́ ghe.

⁴⁰ Ntɔŋ Marɨta lwí mbɨ́ʼ ngə́ a kɨ chyɛ faʼə anu atsum zɨzɨ ə. A tíʼ ngyen mbitɨ a Yeso ngə́, “Maʼmbyí, a se anu zə tse a mbó gho be ngə́ mɨma ɨghan a nyɛʼtɨ aghan me me ma faʼnə anu atsum le? Soŋ wəmbo ngə́ á yen nkwatɨ aghə!”

⁴¹ Maʼmbyí a chwɨ́gɨ́ wəmbo ngə́, “Marɨta, Marɨta! O zhwíə nkə́ mbǔʼ ɨnye ɨzo atú ɨnu tsɨ ghaʼnə,

⁴² lá o lǒ tsɛʼ a táʼ anu ə. Mɛrɨ a tsɔʼ anu za a kuʼnɨnɨ, bɨ chi keʼ wəmbo kwarə.”