3 Yoane 1 - Mɨkan wu Fi

¹ Aŋwaʼnɨ zen a lo a mbó Yoane, me wa ma nɨ Nkum ə. A ghěn a mbó gho Gayosɨ mbɔŋ ɨson ɨghan wa ma kɔŋnɨ nɨ táʼ ntəm ə.

² Mbɔŋ ɨson ɨghan, ma tsaʼtə a Ŋwi ngə́ á ɨnu ɨtsum chi ghěnɨ ɨ shiʼnɨ a mbó gho, o kɨ ntsi ntə́ntə́ ndəŋndəŋ adzaŋ za o tsinɨ ɨ shiʼnɨ a mu azhwi lá.

³ Ma kɨ ndanɨ ndórɨ́tɨ́ mbáʼ ɨbɔmbɨma bə tse ba bɨgɨnə bo zɔŋnə a Kristo, bɨ kɨ yenɨ soŋ a mbó me adzaŋ za o zɔŋnɨ nkənu tsɛʼ nɨ táʼ ntəm, nkə́ sóŋə́ adzaŋ za o ghɛnə nɨ mbyi nchyɛ̌ a mu nkənu ə.

⁴ Ma dórə́ be tɨ́sə́n a ndzúʼə ngə́ ɨbɔ ɨbə chyɛ̌ a mu nkənu ə.

Yoane a Bontɨ a Gayosɨ

⁵ Mbɔŋ ɨson ɨghan, o lánə́ fáʼə tsɛʼ nɨ táʼ ntəm ɨfaʼ wa o faʼnə a mbó ɨbɛn ba bɨ zɔŋnə a Kristo, mbáʼ be bo kwɛ mbe be bɨngyen-yenɨ ə.

⁶ Bo mɨnə a mbó ngǒtə ɨbɛn za ɨ zɔŋnə a Kristo ɨghan mbɨ́ʼ akɔŋnɨ azo a nye ɨbɛn ə. Ma buʼ mbó, kwatɨ awa ngə́ á bo ghɛn nɨ mbyi nɨ nɨyen ɨna a nye ndómnji wa ɨ mɨ ghɨ á ɨnye Ŋwi mbɔ́ŋə́ ghe.

⁷ Mbɨ́ʼ ngə́ bo fúə abyɛn a mu nɨyen ɨna a faʼə a mbó Kristo tə́ mbémə́ akwatɨ zə tsɛrə za a lonɨ a mbó bɨtɨnɨŋ ntəm a nye Kristo ghe.

⁸ Bɨgɨnə ba bɨ zɔŋnə a Kristo tsi nɨ ɨ tiʼ zagɨ kwatɨ ɨbɛn ben, taŋ á bɨgɨnə bo tiʼə faʼə a mbúm a mbó nkənu ə.

Anu mbɨ́ʼ a Diotrɛfɛsi bo Dimitiriyo ghe

⁹ Ma ŋwáʼnɨ́ aŋwaʼnɨ a mbó ngǒtə ɨbɛn za ɨ zɔŋnə a Kristo ghe; lá Diotrɛfɛsi, wa a kɔŋnɨ a mbé ntsagɨnɨ ɨwa, a keʼ kɔŋ ntɛgɨ atú a nye anu za ma sóŋnə́ ghe.

¹⁰ Ma ghɨ ngyén, ma mɨ ghɨ á wɛrə a zhi ɨnu ɨtsum tsa wɛrə a ghɨnə ghe: ɨnu tsɨ tɔmnɨnɨ tsa a ghamnə mbɨ́ʼ awɨgɨ abɔʼnɨ ɨchwenu tsa a chwɛ́nə́ lá! Ka a be ayi atsum a za za a ghɨnə ghe; ka a nkwárə́ ayi ɨbɔmbɨma ba bɨ zɔŋnə a Kristo a nkfu za bo yenɨ, nkə́ ntsúʼnə́ ɨbɛn ba bɨ lɔnɨ nkwarɨ bo, nkə́ njwə́ŋtɨ́ nkəntɨ ɨbɛn məben ba bɨ kwárɨ́nə́ awa a ngǒtə ɨbɛn za ɨ zɔŋnə a Kristo ghe!

¹¹ Mbɔŋ ɨson ɨghan, koʼ nyiʼsɨ a zə tɨbɔŋ, lá nyiʼsɨ a za a bɔŋnɨ ə. Ŋwɔn tsum wa a ghɨnɨ ɨbɔŋ a nɨ ŋwɔn Ŋwi; ŋwɔn tsum wa a ghɨnə a za a bɨ́gɨ́nɨ́, ka a zɛnə ayi a Ŋwi ə.

¹² Ŋwɔn tsum a ghǎm ɨ shiʼnɨ mbɨ́ʼ a Dimitiriyo; ntsi mbyi ɨzhi ɨ zɔŋə adzaŋ za aŋwaʼnɨ a Ŋwi a lɔnə ghe. Bɨgɨ kə́ nkwíʼtə́ azɨgɨ atɛmə-ndzě, nɨ kɨ nji ngə́ za bɨgɨ sóŋnə́ a nɨ nkənu ə.

Atɔ́ŋtɨ a Ndwɨgɨnə ghe

¹³ Ma tsi nɨ zə ghaʼnɨ be tɨ́sə́n a sóŋə́ a mbó gho, lá ma sa kɔŋ ngɨ zɛrə nɨ nkɔŋ aŋwaʼnɨ bo nkyi aŋwaʼnɨ ə.

¹⁴ Ma tsiŋə nɨ ntəm ɨghə ɨtsum a ndzé gho a ndzum məbaŋtɨ, taŋ á tɨ chi ghamnɨ bɔgə bɔgə ghe.

¹⁵ A mbɔnɨ tsi a mbó gho ghe. Bɨson ɨbo bɨtsum tsagə atsaʼtɨ ə. Tɔŋtɨ bɨson ɨbɨgɨnə bɨtsum ɨ mɔ́ʼɔ́ mɔ́ʼɔ́ ghe.