2 Timotyo 2 - Mɨkan wu Fi

Gwe Kristo Yeso wa a Faʼnə nɨ Táʼ Ntəm ə

¹ A mbó gho Timotyo mɔn ɨghan, tɛm ntɨŋə ngə́ twə́ŋ ntsa a ndzum abɔŋəntəm za a nɨ azɨgɨnə a mbúm bɨgɨnə bɨ Kristo Yeso lá.

² Lɔgɨ ɨnu tsa o zúʼnɨ́ ma diʼnə mbáʼ bətɛmə-ndzě bə ghaʼnɨ tsínɨ́ ɨwu lá, ɨ nɨŋ a tsɛrə a mu mbó ɨbɛn ba bɨ sóŋnə́ a mɔ́ʼɔ́ a nu mɔ́ʼɔ́, ɨbɛn ba bo chinɨ kɨ diʼ ɨbɛn bə mɔʼɔ nɨ tsɛrə lá.

³ Lɔgɨ azo adiʼ a ndzé ngɨ́ʼ tso gwe Kristo Yeso wa a faʼnə nɨ táʼ ntəm ə.

⁴ Gwe wa a bvurɨnɨ ntsi afaʼ a lǒ ngɨə á ɨnye tantso mbɔ́ŋə́, ma lan, a se mbvúrə́ atú azhi a nye ɨnu ntsi mbyi ɨbɛn ba bo se bɨgwe be ə.

⁵ Ŋwɔn wa a kɨənə amaŋnɨ a nɨkɨə a chi keʼ dzɨ ndɔ́ŋ tɨgha a zúʼnɨ́ ntɨgə nɨkɨə məna ə.

⁶ Ndyiʼ mɨshwom wa a faʼnə nɨ adaʼ azhi atsum a tsi nɨ nchyɛ nɨ nɨtú nɨ mɨdzɨ ma bɨ fuʼnə.

⁷ Kwaʼtɨ ɨnu tsa ma sóŋnə́ a mbó gho lá mbɨ́ʼ ngə́ Maʼmbyí a mɨ ghɨ o zuʼ nkɨ nji a tsɛrə ɨtsum ə.

⁸ Waʼtɨ a Yeso Kristo, zɨ wa Ŋwi a zhwémnɨ́nɨ́ a mbó nɨvwo, wa a bénɨ́ ŋwɔn ɨlə̌ Devidɨ, adzaŋ za bɨ diʼnə a mu Nkən wu Shiʼnɨ wa ma sóŋnə́ lá.

⁹ Mbɨ́ʼ ngə́ ma sǒŋ Nkən wu Shiʼnɨ məwa, ma zě ngɨ́ʼ, bɨ kɨ nɨŋ bɨkɨbuʼ a mɨku me tso ŋwɔn wa a fasɨnɨ a nyɔngɔŋ ə. Lá ka bɨkɨbuʼ korɨ ayi nɨgham nɨ Ŋwi ə.

¹⁰ Ma lan, ma chigɨ ntəm a nye ɨnu ɨtsum mbɨ́ʼ atú a ɨbɛn bɨ Ŋwi ba wɛrə a tsɔʼnɨ, taŋ á bo chi kɨ tsi nɨ ɨloŋ wa ɨ yenə ntsǎ a ndzum Kristo Yeso, wa ɨ kɨ́nə́ nkə́ ngyíŋə́ nɨ nɨfáŋ nə nɨnkoŋ lá.

¹¹ Nɨgham nɛnə nɨ nkənu ngə́: “Be a be ngə́ bɨgɨnə kfokɨnə bɨgɨnə bɨ wɛrə, muŋ bɨgɨnə ghɨ kɨ tsi ntən bɨgɨnə bɨ wɛrə ghe.

¹² Be bɨgɨnə ngěn nɨ mbyi nchigɨ ntəm, muŋ bɨgɨnə ghɨ kɨ saʼnə bɨgɨnə bɨ wɛrə ghe. Be bɨgɨnə ton ayi, muŋ wɛrə a ghɨ kɨ ton awɨgɨnə ghe.

¹³ Be bɨgɨnə tú faʼnə tsɛʼ nɨ táʼ ntəm, wɛrə a ghɔŋ a faʼə tsɛʼ nɨ táʼ ntəm mbɨ́ʼ ngə́ wɛrə a chi keʼ chwe ɨnu a mbó atuəmbəm azhi ɛ.”

Ngaŋ Afaʼ za bɨ Bemtɨnɨ Ayi ɛ

¹⁴ Kwemtɨ ɨnu tsen a mbó ɨbɛn ɨbo nkɨ nkwantɨ awa tsɛʼ ɨ shiʼnɨ a ɨshi ɨmɨgɨ Ŋwi ngə́ á bo keʼ ntókə́ mbɨ́ʼ ɨnu tsa ɨtú mɨgham sóŋnə́ ghe. Ka anu zə tsɛrə zə shiʼnɨ a tsi ayi ɨwu ntsatɨ ngə́ a bɛ́ʼtɨ́ ɨbɛn ba bɨ zhwíʼtɨ́nɨ́ mɨgham məmiŋ ə.

¹⁵ Ghɨ atsum a ndzé ngə́ o tɛm a ɨshi ɨmɨgɨ Ŋwi tso ŋwɔn wa bɨ bemtɨnɨ ayi, tso ngaŋ afaʼ za ka ɨ ndɨrə ayi atú mbɨ́ʼ afaʼ azhi, ŋwɔn wa a diʼnɨ nkən mbɨ́ʼ nkənu Ŋwi ɨ shiʼnɨ ə.

¹⁶ Koʼ nɨ anu zə tsɛrə byi nyam ntsi a ngɨə nɨ mɨgham ma mɨ sóŋnɨ́ ɨnu tɨbɔŋ mbɨ́ʼ a Ŋwi abɔʼnɨ ɨdzɨŋtɨ mɨgham ə. Ɨbə́ŋ mɨgham tso mətsiŋ kwátə́ tsɛʼ a ndɔgɨ ɨbɛn ɨ ghɛn nɨ bo á aghagɨ aza a sagɨ a nye Ŋwi ə.

¹⁷ Ɨbə́ŋ ɨnu mətsen tsa bɨ diʼnə tsi lá tsɛʼ tso ntsɔʼ mádɨ́ŋ za ɨ dzɔʼɔtɨnə tsɛʼ dzɔʼɔtɨnə. Ɨbɛn bi bɨbá ba bɨ diʼnə ɨbə́ŋ ɨnu tso mətsiŋ nɨ Ayimɛnosɨ bo Failɛtusɨ ə.

¹⁸ Bo nyɛʼtɨnə ndómnji nkənu nkə́ ntíʼə ntɔ́bə́ abeməntəm a ɨbɛn bə tse ba bɨ nɨŋnɨ mɨntəm ɨma a nye Kristo, adzaŋ za bo sóŋnə́ ngə́ nzhwemnə ɨzɨgɨnə a mbó nɨvwo kwɛnə ndɔgɨ adiʼ ə.

¹⁹ Lá atsé ndá za Ŋwi a tumnɨ bɨ chi keʼ a zɛrə chiʼtɨ; bɨ kɨ ŋwaʼnɨ mɨgham men wu atú ngə́: “Maʼmbyí a zhi ɨbɛn ba bɨ nɨ ɨbyi” abɔʼnɨ “Ɨbɛn bɨtsum ba bɨ soŋnɨ ngə́ bo tsi a mbó Maʼmbyí mɨ zagɨ bəŋ mɨntəm ɨma a nye ɨbvu ə.”

²⁰ A mu ndá zɨ ngwi ka a tsi ayi tsɛʼ ɨkáŋ ŋwaʼŋwaʼ bo tsə tsə́ŋtsə́ŋ, tsə atɨ abɔʼnɨ abɔm kɨ ntsi ɨwu; tsə mɔʼɔ tsi a faʼə nɨ tsɛrə a nye nyom anu, tsə mɔʼɔ tsi a faʼə nɨ tsɛrə njwi tsum ə.

²¹ Be ŋwɔn tse a ghɨ atuəmbəm azhi a lán a mbó ɨnu tsɨ tɔmnɨnɨ tsa ɨtsum, muŋ bɨ mɨ faʼnə nɨ bo a ngɨ ɨnu tsɨ dɨtɨnɨ, mbɨ́ʼ ngə́ a tɛgɨ atú azhi tsɛʼ a mbó tafaʼ ɨyi, tafaʼ a kə ndǒ tsɛʼ ɨdzaŋ ɨbɛn tso mətsen a faʼə nɨ bo mbɨ́ʼ ngə́ bo kyaŋtɨ ɨtuəmbəm ɨtsa tsɨ tsi a ngɨ ɨbə́ŋ ɨnu tsɨ shiʼnɨ ɨtsum ə.

²² Ma lan, tsɔʼ ntəm ɨgho a nye ɨnu tsa nkaŋ ŋwɔn lɔnə be tɨ́sə́n, ntiʼə ntǒkə́ a nchyɛ́ nɨ nchinə, abeməntəm, akɔŋnɨ abɔʼnɨ mbɔnɨ ə. Ghɨ mə lan bɨŋ bɨ ɨbɛn ba bɨ lɔ́ntɨ́nə́ akwatɨ a mbó Maʼmbyí nɨ ntəm wa ɨ lánə́.

²³ Tsɔʼ ntəm ɨgho a nye ɨlɨʼkɨ ɨdzɨŋtɨ abɔʼnɨ tsə bɨtɨzhi ɛ; o zhi ngə́ tsɨ láʼ ndwɨ́gɨ́nə́ lá nɨ azɔŋ ə.

²⁴ Tso ngaŋ afaʼ Maʼmbyí, o mɨ zagɨ keʼ nchyɛ̌ nɨ azɔŋ bɨŋ bɨ bə mɔʼɔ ghe. O tsi nɨ nchyɛ nɨ ntəm ngɨ ɨbɔŋ a nye ŋwɔn tsum, ɨ be ndiʼ aŋwaʼnɨ wu shiʼnɨ wa a kɨnɨ nkɨ ntsi nɨ nchigə,

²⁵ ndiʼ aŋwaʼnɨ wa a lɔgɨnə mbɔnɨ nchísɨ́ ɨbɛn ba bɨ tónə́ mɨgham ɨmyi ɨwu ə. Mbɨ́ʼ ngə́ a chi be ngə́ Ŋwi a ghɨ gha abárɨ́ a mbó bo ngə́ á bo bəŋ mɨntəm ɨma a nye mɨbvu ɨma ntiʼ nji nkənu ə.

²⁶ Bo mɨ tiʼ vwukɨ a fɨlye, ɨ lɛʼ ndab za Dəbɨrɨ a nyɔŋnɨ nko awa ɨwu, ngɨ bo ghɨnɨ ɨnu tsa wɛrə a lɔnə lá.